ព័ត៌មានក្នុងខេត្ត

ពោធិ៍សាត់៖ ឯកឧត្តម លៀង ពេជ្រ ប្រធានក្រុមការងារចុះជួយមូលដ្ឋានសង្កាត់ស្វាយអាត់ បានដឹកនាំក្រុមប្រឹក្សាក្រុង រដ្ឋបាលសង្កាត់ ប៉ុស្តិ៍នគរបាល និងអាជ្ញាធរភូមិត្រាង ចុះជួបសួរសុខទុក្ខ និងប្រមូលព័ត៌មានអត្តសញ្ញាណកម្ម (អត្តសញ្ញាណប័ណ្ណ សៀវភៅគ្រួសារ សំបុត្រកំណើត) ពីប្រជាពលរដ្ឋចំនួន ១៩គ្រួសារ នារសៀលថ្ងៃទី៥ ខែកក្កដា ឆ្នាំ២០២៦។ ក្នុងឱកាសនោះ ឯកឧត្តមបានពង្រឹងការយកចិត្តទុកដាក់លើចាស់ជរា អ្នកជំងឺ និងគ្រួសារក្រីក្រ ដោយបានឧបត្ថម្ភក្នុង ១គ្រួសារ ទទួលបានអង្ករ ១០គីឡូក្រាម និងថវិកា ២ម៉ឺនរៀល (ដោយឡែកចាស់ជរាមានជំងឺ ២នាក់ ទទួលបានថវិកាបន្ថែម ៤ម៉ឺនរៀលម្នាក់)។ ទន្ទឹមនឹងការងារសង្គមកិច្ច ឯកឧត្តមប្រធានក្រុមការងារ ក៏បានចុះពិនិត្យផ្ទាល់លើបញ្ហាប្រឈមរបស់ពលរដ្ឋរួមមាន៖ ពិនិត្យផ្លូវលំបាកចំនួន ២ខ្សែ ដែលជាតម្រូវការចាំបាច់ចំពោះមុខ។ ប្រព័ន្ធរំដោះទឹក៖ ពិនិត្យប្រឡាយទឹកប្រវែងប្រមាណ ៤០០ម៉ែត្រ ដែលកំពុងរងការស្ទះទឹក បង្កឡើងដោយសារការចាក់ដីលុបពីសំណាក់ផ្សារភូពុយ ដើម្បីរកដំណោះស្រាយជូនប្រជាពលរដ្ឋឱ្យបានទាន់ពេលវេលា៕

ពោធិ៍សាត់៖ នាសប្ដាហ៍ទី១ នៃខែកក្កដា ឆ្នាំ២០២៦ ក្រុមការងារគណបក្សប្រជាជនកម្ពុជា ចុះជួយស្រុកក្រគរ និងស្រុកកណ្តៀង ខេត្តពោធិ៍សាត់ បានបន្តចុះបំពេញសកម្មភាពការងារបក្ស និងសួរសុខទុក្ខប្រជាពលរដ្ឋនៅតាមមូលដ្ឋានយ៉ាងសកម្ម។ ក្នុងនោះ ក្រុមការងារគណបក្សប្រជាជនកម្ពុជា ចុះជួយឃុំកញ្ជរ ស្រុកកណ្តៀង បានចុះជួបសម្តែងការគួរសម សួរសុខទុក្ខ និងនាំយកអំណោយ ក៏ដូចជាសារនយោបាយរបស់គណបក្សទៅចែករំលែកផ្ទាល់ជូនដល់សមាជិក សមាជិកាបក្ស និងបងប្អូនប្រជាពលរដ្ឋនៅតាមខ្នងផ្ទះ។ សកម្មភាពចុះជួយមូលដ្ឋានជាប្រចាំនេះ គឺដើម្បីស្វែងយល់ពីសុខទុក្ខ តម្រូវការជាក់ស្តែង និងជួយដោះស្រាយរាល់បញ្ហាប្រឈមនានា សំដៅពង្រឹងជំនឿចិត្ត និងភាពកក់ក្តៅជូនប្រជាពលរដ្ឋនៅថ្នាក់មូលដ្ឋាន៕

នៅក្នុងឱកាសនោះ លោក ហេង សុភាណា បានថ្លែងនូវការកោតសរសើរ និងវាយតម្លៃខ្ពស់ចំពោះស្មារតីទទួលខុសត្រូវរបស់សមាជិកក្រុមការងារទាំងអស់ ដែលបានលះបង់កម្លាំងកាយចិត្តចុះជួយមូលដ្ឋាននាពេលកន្លងមក។ ជាមួយគ្នានេះ លោកប្រធានបានដាក់ចេញនូវទិសដៅគន្លឹះៗមួយចំនួនរួមមាន៖ បន្តចុះជាប់ជាមួយប្រជាពលរដ្ឋនៅតាមខ្នងផ្ទះ ដើម្បីក្តាប់ឱ្យបាននូវរាល់ទុក្ខកង្វល់ និងតម្រូវការជាក់ស្តែង, ពង្រឹងការផ្តល់សេវាសាធារណៈជូនប្រជាពលរដ្ឋឱ្យកាន់តែលឿន រហ័ស និងមានតម្លាភាព ,ជម្រុញការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» ដើម្បីធានាសុខសន្តិភាព និងរបៀបរៀបរយក្នុងមូលដ្ឋាន ។

ឯកឧត្តមបណ្ឌិត ប្រាំង ជលសា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គិសនីកម្ពុជា និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកក្រគរ និងស្រុកកណ្តៀង នាថ្ងៃទី០៤ ខែកក្កដា ឆ្នាំ២០២៦ បានអញ្ជើញជួបសំណេះសំណាលជាមួយប្រជាពលរដ្ឋ និងសម្ពោធដាក់ឱ្យប្រើប្រាស់សមិទ្ធផលហេដ្ឋារចនាសម្ព័ន្ធជាច្រើន ដែលជាអំណោយរបស់ក្រុមការងារអគ្គិសនីកម្ពុជា ក្នុងទឹកប្រាក់សរុប ២១៦,៧៧១.៧៥ដុល្លារអាមេរិក។

នេះបានឆ្លុះបញ្ចាំងពីការយកចិត្តទុកដាក់ខ្ពស់លើការលើកកម្ពស់ជីវភាពរស់នៅ និងសុវត្ថិភាពរបស់ប្រជាពលរដ្ឋ ក្រុមការងាររាជរដ្ឋាភិបាល និងគណបក្សចុះជួយឃុំស្វាយស បានបន្តចុះអនុវត្តការងារយ៉ាងសកម្មនៅតាមមូលដ្ឋាន ដោយសម្រេចបាននូវសមិទ្ធផលសំខាន់ៗជាច្រើន។

ពោធិ៍សាត់៖ នៅព្រឹកថ្ងៃទី៤ ខែកក្កដា ឆ្នាំ២០២៦ នេះ នៅទីស្នាក់ការគណបក្សប្រជាជនកម្ពុជាខេត្តពោធិ៍សាត់ (ជាន់លើ) ស្ថិតក្នុងភូមិមាន់ចែ សង្កាត់ព្រៃញី ក្រុងពោធិ៍សាត់ គណៈកម្មាធិការគណបក្សក្រុងបានបើកកិច្ចប្រជុំពិភាក្សាការងារយ៉ាងសំខាន់មួយ។ កិច្ចប្រជុំនេះប្រព្រឹត្តទៅក្រោមអធិបតីភាព ឯកឧត្តម ម៉ៅ សាន សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានមន្ទីរគណបក្សខេត្ត ដើម្បីពិភាក្សាការងារ និងជំរុញផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ ខាងមុខ។ កិច្ចប្រជុំនេះក៏មានការអញ្ជើញចូលរួមពីសំណាក់៖ ឯកឧត្តម ប្រធានក្រុមការងារទទួលបន្ទុកសង្កាត់, ប្រធាន អនុប្រធាន និងសមាជិកគណបក្សក្រុង, លោកប្រធានគណបក្សសង្កាត់ និងចៅសង្កាត់ទាំង ៧ នៃក្រុងពោធិ៍សាត់។ ក្នុងឱកាសនោះ អង្គប្រជុំបានផ្ដោតការពិភាក្សាយ៉ាងម៉ត់ចត់លើការដាក់ចេញនូវទិសដៅ យុទ្ធសាស្ត្រ និងផែនការសកម្មភាពនានា សំដៅពង្រឹងរចនាសម្ព័ន្ធបក្សនៅមូលដ្ឋានឱ្យកាន់តែរឹងមាំ ដើម្បីត្រៀមលក្ខណៈសម្បត្តិគ្រប់គ្រាន់ក្នុងការដណ្តើមប្រៀបឈ្នះសម្រាប់យុទ្ធនាការបោះឆ្នោតនាពេលខាងមុខ ប្រកបដោយភាពជឿជាក់៕

ពោធិ៍សាត់៖ លោក ចាន់ វិចិត្រ អភិបាលនៃគណៈអភិបាលស្រុក និងជាប្រធានគណៈកម្មាធិការគណបក្សស្រុកតាលោសែនជ័យ បានអញ្ជើញជួបសំណេះសំណាលយ៉ាងស្និទ្ធស្នាល ជាមួយបងប្អូនអាជីវករផ្សារបត់រំដួល មកពីភូមិបត់រំដួល ឃុំផ្ទះរុង ស្រុកតាលោសែនជ័យ នាថ្ងៃទី០៤ ខែកក្កដា ឆ្នាំ២០២៦ ។ ការជួបជុំនេះ ធ្វើឡើងក្នុងឱកាសដែលបងប្អូនអាជីវករ បានស្ម័គ្រចិត្តសុំចូលរួមរស់ក្នុងជីវភាពនយោបាយជាមួយគណបក្សប្រជាជនកម្ពុជា ដើម្បីរួមចំណែកក្នុងការថែរក្សាសុខសន្តិភាព និងការអភិវឌ្ឍន៍នៅក្នុងមូលដ្ឋាន។ ក្នុងឱកាសដ៏មានអត្ថន័យនោះ លោក ចាន់ វិចិត្រ បានសម្តែងនូវការស្វាគមន៍យ៉ាងកក់ក្តៅ និងវាយតម្លៃខ្ពស់ចំពោះការសម្រេចចិត្តដ៏ត្រឹមត្រូវរបស់បងប្អូនអាជីវករទាំងអស់ ដែលបានជឿជាក់លើការដឹកនាំរបស់គណបក្សប្រជាជនកម្ពុជា ព្រមទាំងបានផ្តាំផ្ញើឱ្យបន្តសហការ និងសាមគ្គីគ្នាល្អ ដើម្បីការរីកចម្រើនក្នុងសហគមន៍ទាំងមូល៕

ផ្ទះព្រៃ៖ ទីស្នាក់ការគណបក្សសង្កាត់ផ្ទះព្រៃ បានរៀបចំកិច្ចប្រជុំប្រចាំខែមិថុនា និងលើកទិសដៅអនុវត្តការងារបន្តសម្រាប់ខែកក្កដា ក្រោមវត្តមានថ្នាក់ដឹកនាំ និងសមាជិកបក្សមួយចំនួនទៀត នៅរសៀលថ្ងៃទី០៣ ខែកក្កដា ឆ្នាំ២០២៦។ កិច្ចប្រជុំនេះមានការអញ្ជើញចូលរួមពី លោកប្រធានគណបក្សសង្កាត់ លោក-លោកស្រីអនុប្រធានគណបក្សសង្កាត់ចំនួន ០២រូប ព្រមទាំងសមាជិក សមាជិកាគណបក្សសង្កាត់ និងលោក-លោកស្រីដែលជាប្រធាន/តំណាងសាខាបក្សភូមិទាំង ១៣ ផងដែរ។ ក្នុងឱកាសនោះ អង្គប្រជុំបានពិភាក្សាយ៉ាងផុសផុលលើលទ្ធផលការងារខែចាស់ និងដាក់ចេញនូវទិសដៅយុទ្ធសាស្ត្រថ្មីៗ ដើម្បីបន្តបំរើប្រជាពលរដ្ឋ និងអភិវឌ្ឍន៍មូលដ្ឋានឱ្យកាន់តែរីកចម្រើននៅក្នុងខែកក្កដានេះ៕

ពោធិ៍សាត់៖ គណបក្សស្រុកក្រគរ បានរៀបចំពិធីប្រកាសសេចក្តីសម្រេចតែងតាំងបំពេញបន្ថែមមន្ត្រីគណបក្សស្រុកចំនួន ៨ រូប ក្រោមអធិបតីភាព ឯកឧត្តម ឈុន សុង សមាជិកគណៈអចិន្ត្រៃយ៍ និងជាប្រធានគណៈចាត់តាំងគណបក្សខេត្ត ព្រមទាំង លោក ទឹម សារិន ប្រធានគណៈកម្មាធិការគណបក្សស្រុកក្រគរ នាព្រឹកថ្ងៃទី៣ ខែកក្កដា ឆ្នាំ២០២៦ ។ ពិធីនេះក៏មានការអញ្ជើញអមដំណើរដោយ ឯកឧត្តម ញ៉ឹក សារ៉េត សមាជិកគណបក្សខេត្ត និងជាអនុប្រធានគណៈចាត់តាំងខេត្ត រួមទាំងលោក លោកស្រីជាសមាជិកគណៈអចិន្ត្រៃយ៍គណបក្សស្រុក និងប្រធានគណៈកម្មាធិការគណបក្សឃុំ សរុបអ្នកចូលរួមប្រមាណ ៤០នាក់។ ការប្រកាសតែងតាំងមន្ត្រីបក្សទាំង ៨ រូបនាពេលនេះ ធ្វើឡើងក្នុងគោលបំណងបំពេញបន្ថែមរចនាសម្ព័ន្ធចាត់តាំង និងពង្រឹងកម្លាំងពិតរបស់គណបក្សឱ្យកាន់តែមានសាមគ្គីភាព និងប្រសិទ្ធភាពខ្ពស់ ក្នុងការបម្រើប្រជាពលរដ្ឋ និងអភិវឌ្ឍន៍មូលដ្ឋាន៕

ឯកឧត្តម យឹម វិសិដ្ឋ ប្រធានក្រុមការងារគណបក្សចុះមូលដ្ឋានស្រុកភ្នំក្រវាញ ខេត្តពោធិ៍សាត់ អញ្ជើញចូលរួមកិច្ចប្រជុំពិភាក្សា ដើម្បីស្ដាប់ និងដោះស្រាយរាល់បញ្ហាប្រឈមនានាជូនប្រជាពលរដ្ឋក្នុងមូលដ្ឋាន ព្រមទាំងដាក់ចេញនូវទិសដៅផែនការការងារសំខាន់ៗ ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ ខាងមុខ។ កិច្ចប្រជុំនេះបានប្រព្រឹត្តទៅកាលពីរសៀលថ្ងៃអាទិត្យ ទី២៨ ខែមិថុនា ឆ្នាំ២០២៦ សម្រាប់ភូមិសាស្ត្រឃុំលាច ស្រុកភ្នំក្រវាញ ខេត្តពោធិ៍សាត់៕

ឯកឧត្តម ខូយ រីដា ប្រធានគណៈកម្មាធិការគណបក្សប្រជាជនកម្ពុជាខេត្តពោធិ៍សាត់ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបិទវគ្គអប់រំនយោបាយ កម្រិត១ ជំនាន់ទី១ ជូនដល់មន្ត្រី និងសកម្មជនគណបក្សប្រជាជនកម្ពុជាសរុបប្រមាណជាង ៣០០នាក់ នារសៀលថ្ងៃទី២៨ ខែមិថុនា ឆ្នាំ២០២៦ ស្ថិតនៅទីស្នាក់ការគណបក្សស្រុកតាលោសែនជ័យ ខេត្តពោធិ៍សាត់៕

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាលចុះជួយខេត្តពោធិ៍សាត់ បានអញ្ជើញជួបសំណេះសំណាលជាមួយបងប្អូនអាជីវករប្រមាណ ២,៣៥០នាក់ នៅពហុកីឡដ្ឋានសម្តេចតេជោក្រគរ ដើម្បីផ្សព្វផ្សាយពីចក្ខុវិស័យអភិវឌ្ឍន៍ខេត្ត នារសៀលថ្ងៃទី២៧ ខែមិថុនា ឆ្នាំ២០២៦។