ព័ត៌មានក្នុងខេត្ត

កាលពីថ្ងៃទី១៦-១៧ ខែកញ្ញា ឆ្នាំ២០២៦ ក្រុមការងារអង្គភាពលទ្ធកម្ម (អល) នៃគណៈកម្មាធិការលទ្ធកម្ម (គល) ក្រសួងធនធានទឹក និងឧតុនិយម បានដឹកនាំក្រុមការងារអន្តរក្រសួង រួមជាមួយតំណាងក្រសួងសេដ្ឋកិច្ច និងហិរញ្ញវត្ថុ បានចុះពិនិត្យ វាយតម្លៃ ប្រគល់-ទទួល និងបញ្ចប់សុពលភាព សម្រាប់ការងារជំពូក២១ លើគម្រោងចំនួន ០៤ ស្ថិតក្នុងភូមិសាស្ត្រខេត្តពោធិ៍សាត់ បាត់ដំបង និងខេត្តសៀមរាប។

កិច្ចប្រជុំនេះមានការ​ចូលរួមពីអង្គភាពគ្រប់គ្រងគម្រោង ទីប្រឹក្សាបច្ចេកទេសធនាគារអភិវឌ្ឍន៍អាស៊ី (ADB) និងគម្រោង តំណាងនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍ (GDR) នៃក្រសួងសេដ្ឋកិច្ច និងហិរញ្ញវត្ថុ គណៈអភិបាលស្រុក អាជ្ញាធរដែនដី ប្រជាពលរដ្ឋ និងស្ថាប័នពាក់ព័ន្ធជាច្រើនរូប។

លោកជំទាវ វ៉ាន់ ចាន់ថូ អនុរដ្ឋលេខាធិការ និងជានាយកគម្រោងគ្រប់គ្រងធនធានទឹកចម្រុះ (IWRM) តំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំពិភាក្សា និងធ្វើបច្ចុប្បន្នកម្មស្តីពីការអនុវត្តគម្រោង IWRM ដោយមានការចូលរួមពីលោក លឹម សុខតូ អភិបាលរងខេត្តពោធិ៍សាត់ អាជ្ញាធរដែនដី និងស្ថាប័នពាក់ព័ន្ធ នាថ្ងៃទី១០ ខែកញ្ញា ឆ្នាំ២០២៦។

យោងតាមរបាយការណ៍បានឱ្យដឹងថា បច្ចុប្បន្ន ខេត្តពោធិ៍សាត់បាននិងកំពុងបន្តទទួលរងឥទ្ធិពលពីបាតុភូតអ៊ែលនីញូ (El Niño) ដែលបានអូសបន្លាយពេលយ៉ាងយូរ។ ទោះបីជាកន្លងមក ខេត្តបានទទួលរងនូវឥទ្ធិពលព្យុះជាបន្តបន្ទាប់យ៉ាងណាក៏ដោយ ប៉ុន្តែរបបទឹកភ្លៀងដែលធ្លាក់មកមានកម្រិតតិចតួចនៅឡើយ ដែលជាហេតុបង្កឱ្យមានគ្រោះរាំងស្ងួតកើតឡើងនៅតាមតំបន់មួយចំនួន។

ពោធិ៍សាត់៖ យោងតាមការតាមដានស្ថានភាពអាកាសធាតុនៅក្នុងខេត្តពោធិ៍សាត់ នាថ្ងៃទី៨ ខែកញ្ញា ឆ្នាំ២០២៦ នេះ គេសង្កេតឃើញមានភ្លៀងធ្លាក់នៅតាមបណ្តាក្រុង និងស្រុកមួយចំនួន ដោយមានកម្រិតទឹកភ្លៀង និងបាតុភូតធម្មជាតិខុសៗគ្នា។ ផ្អែកតាមទិន្នន័យអាកាសធាតុប្រចាំថ្ងៃ ស្ថានភាពភ្លៀងធ្លាក់តាមតំបន់នីមួយៗរួមមាន៖ ក្រុងពោធិ៍សាត់៖ មានភ្លៀងធ្លាក់ក្នុងកម្រិតពី ខ្សោយទៅខ្លាំង លាយឡំដោយខ្យល់ និងបាតុភូត ផ្គររន្ទះ។ ស្រុកភ្នំក្រវាញ និងស្រុកកណ្តៀង៖ មានភ្លៀងធ្លាក់ក្នុងកម្រិតពី ខ្សោយទៅមធ្យម លាយឡំជាមួយខ្យល់។ ស្រុកតាលោសែនជ័យ ស្រុកក្រគរ និងស្រុកបាកាន៖ មានភ្លៀងធ្លាក់ក្នុងកម្រិត ខ្សោយ លាយឡំជាមួយខ្យល់ផងដែរ។ អាជ្ញាធរ និងសមត្ថកិច្ចពាក់ព័ន្ធ សូមអំពាវនាវដល់ប្រជាពលរដ្ឋ រស់នៅក្នុងតំបន់ខាងលើ ជាពិសេសនៅភូមិសាស្ត្រក្រុងពោធិ៍សាត់ បង្កើនការប្រុងប្រយ័ត្នខ្ពស់ចំពោះបាតុភូតខ្យល់ និងផ្គររន្ទះ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕

ពោធិ៍សាត់៖ គម្រោងសាងសង់ «ទំនប់ទី២» ដែលជាហេដ្ឋារចនាសម្ព័ន្ធប្រព័ន្ធធារាសាស្ត្រដ៏សំខាន់នៅលើទឹកដីខេត្តពោធិ៍សាត់ កំពុងដំណើរការយ៉ាងសកម្ម និងបង្ហាញរូបរាងកាន់តែច្បាស់ជាបណ្តើរៗហើយ ដើម្បីត្រៀមខ្លួនបម្រើផលប្រយោជន៍ជូនប្រជាពលរដ្ឋនាពេលខាងមុខឆាប់ៗនេះ។ ក្នុងឱកាសអញ្ជើញចុះពិនិត្យ និងវាយតម្លៃផ្ទាល់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានសម្តែងនូវការវាយតម្លៃខ្ពស់ចំពោះវឌ្ឍនភាពការងារដែលក្រុមការងារសាងសង់សម្រេចបាននាពេលកន្លងមក។ ជាមួយគ្នានេះ ឯកឧត្តមរដ្ឋមន្ត្រីបានស្នើ និងផ្ដាំផ្ញើដល់ក្រុមការងារសាងសង់ទាំងអស់ ឱ្យបន្តយកចិត្តទុកដាក់ខ្ពស់លើគុណភាព បទដ្ឋានបច្ចេកទេស និងជំរុញការអនុវត្តការងារឱ្យសម្រេចបានតាមផែនការគ្រោងទុក ប្រកបដោយប្រសិទ្ធភាពខ្ពស់។ ឯកឧត្តមរដ្ឋមន្ត្រីបានគូសបញ្ជាក់បន្ថែមថា ការពង្រឹងគុណភាព និងល្បឿននៃគម្រោងទំនប់ទី២នេះ គឺដើម្បីធានាឱ្យបាននូវការផ្គត់ផ្គង់ទឹកបានគ្រប់គ្រាន់ និងមានស្ថិរភាព សម្រាប់បម្រើដល់ការងារដាំដុះដំណាំកសិកម្មគ្រប់ប្រភេទ ការប្រើប្រាស់ប្រចាំថ្ងៃរបស់ប្រជាពលរដ្ឋ ព្រមទាំងការប្រើប្រាស់លើគ្រប់វិស័យក្នុងខេត្តពោធិ៍សាត់ទាំងមូល៕

ពោធិ៍សាត់៖ លោក ហ៊ន់ សុវណ្ណ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ បានអញ្ជើញចូលរួមកិច្ចប្រជុំពិភាក្សាលើ «ការរៀបចំផែនការសកម្មភាព និងផែនការយុទ្ធសាស្ត្រអភិវឌ្ឍន៍សម្រាប់ឆ្នាំ២០២៧» របស់អង្គការអភិវឌ្ឍន៍សំឡេងសហគមន៍ (BCV) នៅថ្ងៃសុក្រ ទី៤ ខែកញ្ញា ឆ្នាំ២០២៦ ។ កិច្ចប្រជុំនេះបានប្រព្រឹត្តទៅនៅសាលប្រជុំនៃមន្ទីរធនធានទឹក និងឧតុនិយមខេត្តពោធិ៍សាត់ ដោយមានសមាសភាពចូលរួមយ៉ាងច្រើនកុះករពីតំណាងស្ថាប័នពាក់ព័ន្ធ រួមមាន៖ មន្ត្រីជំនាញនៃមន្ទីរធនធានទឹក មន្ទីរកសិកម្ម ខណ្ឌរដ្ឋបាលព្រៃឈើ ព្រមទាំងអាជ្ញាធរមូលដ្ឋានដូចជា ក្រុមប្រឹក្សាឃុំ មេភូមិ និងអនុភូមិ។ បន្ថែមពីនេះ កម្មវិធីក៏មានការចូលរួមយ៉ាងសកម្មពីសំណាក់តំណាងសហគមន៍កសិករប្រើប្រាស់ទឹក សហគមន៍ព្រៃឈើ សហគមន៍កសិកម្ម និងក្រុមយុវជនក្នុងតំបន់ ដើម្បីរួមគ្នាចែករំលែកមតិយោបល់ បញ្ហាប្រឈម និងធាតុចូលសំខាន់ៗ ក្នុងការរៀបចំផែនការយុទ្ធសាស្ត្រឱ្យឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋក្នុងសហគមន៍សម្រាប់ឆ្នាំ២០២៧ ខាងមុខប្រកបដោយប្រសិទ្ធភាព និងចីរភាព៕

មន្ទីរធនធានទឹក និងឧតុនិយមខេត្តពោធិ៍សាត់ បានបង្កើនការយកចិត្តទុកដាក់ខ្ពស់លើការគ្រប់គ្រងប្រព័ន្ធធារាសាស្ត្រ និងការតាមដានស្ថានភាពធាតុអាកាស ដើម្បីឆ្លើយតបទៅនឹងបាតុភូតគ្រោះរាំងស្ងួត ដែលកំពុងគំរាមកំហែងដល់ការបង្កបង្កើនផលរបស់ប្រជាពលរដ្ឋនៅក្នុងតំបន់មួយចំនួន។

លោក គិត ផល អនុប្រធានគ្រប់រួមមន្ទីរធនធានទឹក និងឧតុនិយមខេត្តពោធិ៍សាត់ បានចុះផ្សព្វផ្សាយ និងពង្រឹងការងារសហគមន៍កសិករប្រើប្រាស់ទឹកកំប៉ាង ឃុំស្វាយដូនកែវ ស្រុកបាកាន។ សកម្មភាពសំខាន់ៗរួមមាន ការប្រជុំជាមួយអាជ្ញាធរនិងគណៈកម្មាធិការសហគមន៍ ការផ្សព្វផ្សាយផែនការគ្រប់គ្រងទឹក ការណែនាំលក្ខន្តិកៈសមាជិក និងការបណ្តុះបណ្តាលលើមេរៀនរដ្ឋបាល ហិរញ្ញវត្ថុ ការគ្រប់គ្រង ការបែងចែកទឹក និងប្រព័ន្ធ PIMD នាថ្ងៃទី៣១ ខែសីហា ឆ្នាំ២០២៦ ។

ពោធិ៍សាត់៖ លោក គិត ផល អនុប្រធានក្តាប់រួមមន្ទីរធនធានទឹក និងឧតុនិយមខេត្តពោធិ៍សាត់ រួមជាមួយមន្ត្រីជនបង្គោល បានចុះផ្សព្វផ្សាយ និងពង្រឹងការងារគណៈកម្មាធិការសហគមន៍កសិករប្រើប្រាស់ទឹក (ស.ក.ប.ទ.) ក្រូចសើច និងបឹងកន្សែង ស្ថិតក្នុងស្រុកបាកាន ខេត្តពោធិ៍សាត់ នាថ្ងៃទី២៨ ខែសីហា ឆ្នាំ២០២៦ ។ ក្នុងបេសកកម្មនេះ ក្រុមការងារបានអនុវត្តសកម្មភាពសំខាន់ៗរួមមាន៖ ជួបប្រជុំជាមួយអាជ្ញាធរមូលដ្ឋានភូមិ-ឃុំ និងគណៈកម្មាធិការ ស.ក.ប.ទ. ពាក់ព័ន្ធនឹងការងារប្រព័ន្ធធារាសាស្ត្រទាំងពីរ, ណែនាំពីផែនការសកម្មភាពក្នុងការគ្រប់គ្រង និងបែងចែកទឹក ព្រមទាំងបង្ហាញពីលក្ខន្តិកៈប្រើប្រាស់ទឹកសម្រាប់សមាជិក, ផ្តល់ការហ្វឹកហ្វឺនលើមេរៀនសំខាន់ៗចំនួន ៥ រួមមាន៖ ការងាររដ្ឋបាល, ហិរញ្ញវត្ថុ, ការគ្រប់គ្រងទឹក, ការបែងចែកទឹក និងការអនុវត្តវិធីសាស្ត្រ PIMD (ការគ្រប់គ្រងប្រព័ន្ធធារាសាស្ត្រដោយមានការចូលរួមពីកសិករ) ដល់ក្រុមការងារមូលដ្ឋាន៕

ពោធិ៍សាត់៖ សកម្មភាព និងទិដ្ឋភាពទូទៅនៅស្ថានីយឧតុនិយម និងជលសាស្ត្រ ដែលស្ថិតនៅក្នុងមន្ទីរធនធានទឹក និងឧតុនិយមខេត្តពោធិ៍សាត់ ត្រូវបានដំណើរការយ៉ាងរលូន ក្នុងការតាមដាន ត្រួតពិនិត្យ និងវាស់វែងស្ថានភាពអាកាសធាតុ ព្រមទាំងកម្រិតកម្ពស់ទឹក ដើម្បីប្រមូលទិន្នន័យចាំបាច់សម្រាប់បម្រើឱ្យការងារព្យាករណ៍ និងជូនដំណឹងទាន់ពេលវេលាដល់ប្រជាពលរដ្ឋក្នុងខេត្តពោធិ៍សាត់ នាព្រឹកថ្ងៃទី២០ ខែសីហា ឆ្នាំ២០២៦ នេះ៕

ពោធិ៍សាត់៖ លោក លឹម សុខតូ អភិបាលរងខេត្តពោធិ៍សាត់ រួមដំណើរដោយលោក គិត ផល អនុប្រធានក្តាប់រួមមន្ទីរធនធានទឹក និងឧតុនិយមខេត្ត ព្រមទាំងអាជ្ញាធរមូលដ្ឋាន បានចុះពិនិត្យស្ថានភាពជាក់ស្តែង និងដឹកនាំការអន្តរាគមន៍ជួយសង្គ្រោះស្រូវរដូវវស្សារបស់ប្រជាកសិករ ស្ថិតក្នុងឃុំមេទឹក ស្រុកបាកាន ខេត្តពោធិ៍សាត់ នាថ្ងៃទី១៨ ខែសីហា ឆ្នាំ២០២៦។ ការចុះអន្តរាគមន៍បន្ទាន់នេះ ធ្វើឡើងបន្ទាប់ពីពិនិត្យឃើញថា ផ្ទៃដីស្រែនៅក្នុងតំបន់នោះស្ថិតនៅឆ្ងាយពីប្រភពទឹក និងពុំទទួលបានរបបទឹកភ្លៀងគ្រប់គ្រាន់ ខណៈដែលស្រូវកំពុងស្ថិតក្នុងវគ្គត្រៀមបែកគុម្ភ និងចេញផ្កា ដែលតម្រូវឱ្យមានការជួយសង្គ្រោះជាប្រញាប់។ កន្លងមក ប្រជាកសិករបានខិតខំដោះស្រាយដោយខ្លួនឯង តាមរយៈការបូមទឹកចេញពីអូរ និងប្រឡាយបញ្ចូលស្រែ។ មន្ទីរជំនាញបានសហការយ៉ាងជិតស្និទ្ធជាមួយអាជ្ញាធរដែនដី ដើម្បីចាត់ចែងបូម និងបែងចែកប្រភពទឹកសង្គ្រោះស្រូវឱ្យបានទាន់ពេលវេលា។ ឱកាសនោះដែរ លោកអភិបាលរងខេត្ត បានណែនាំដល់មន្ត្រីជំនាញ និងអាជ្ញាធរពាក់ព័ន្ធទាំងអស់ ត្រូវបន្តសហការគ្នាឱ្យបានស្អិតល្មួតក្នុងការគ្រប់គ្រង និងបែងចែកទឹកដោយសមធម៌ ដើម្បីធានាថាគ្រប់តំបន់ដែលរងផលប៉ះពាល់សុទ្ធតែទទួលបានទឹកស្រោចស្រពគ្រប់គ្រាន់៕