ព័ត៌មានក្នុងខេត្ត

សកម្មភាពក្រុមការងារមន្ទីរវប្បធម៌និងវិចិត្រសិល្បៈ ខេត្តពោធិ៍សាត់ ចុះប្រមូលវត្ថុសិល្បៈពីទីតាំងបេតិកភណ្ឌក្នុងឃុំបឹងបត់កណ្តោល ស្រុកបាកាន។

លោក ចាន់ វិចិត្រ អភិបាលស្រុកតាលោសែនជ័យ និងព្រះអនុគុណស្រុក បានដឹកនាំកិច្ចប្រជុំត្រៀមលក្ខណៈអបអរសាទរពិធីបុណ្យកាន់បិណ្ឌ និងភ្ជំបិណ្ឌ ជាមួយព្រះគ្រូចៅអធិការ និងអាចារ្យវត្តទាំង២២ រួមទាំងអាជ្ញាធរមូលដ្ឋាន។ កិច្ចប្រជុំនេះផ្តោតលើការយកចិត្តទុកដាក់ខ្ពស់ចំពោះ ការងារសន្តិសុខ សណ្តាប់ធ្នាប់ និង អនាម័យបរិស្ថាន តាមទីអារាមនានា ដើម្បីធានាឱ្យដំណើរការបុណ្យប្រពៃណីជាតិប្រព្រឹត្តទៅដោយរលូន និងមានសុវត្ថិភាពល្អប្រសើរ។

ក្រុមការងារមន្ទីរវប្បធម៌ និងវិចិត្រសិល្បៈ ខេត្តពោធិ៍សាត់ បានចុះប្រមូល និងទទួលយកវត្ថុបេតិកភណ្ឌពីឃុំបឹងបត់កណ្តោល ស្រុកបាកាន យកទៅរក្សាទុក ចុះបញ្ជី និងសិក្សាស្រាវជ្រាវតាមបច្ចេកទេស ដើម្បីការពារ និងអភិរក្សសម្បត្តិវប្បធម៌ជាតិឱ្យបានគង់វង្ស។

សេចក្តីជូនដំណឹង បន្តហាត់រៀនសិល្បៈដោយឥតគិតថ្លៃ! មន្ទីរវប្បធម៌ និងវិចិត្រសិល្បៈខេត្តពោធិ៍សាត់ សូមជូនដំណឹងដល់ សិស្សានុសិស្ស និងសិក្ខាកាមសិល្បៈ ដែលបានបញ្ចប់ការហាត់រៀនសិល្បៈក្នុង វគ្គបណ្តុះបណ្តាលសិល្បៈ វគ្គ១ ឆ្នាំ២០២៦ ឱ្យបានជ្រាបថា មន្ទីរនឹងរៀបចំបើក វគ្គបណ្តុះបណ្តាលសិល្បៈ វគ្គ២ ឆ្នាំ២០២៦ ដើម្បីឱ្យសិស្សានុសិស្សអាចបន្តអភិវឌ្ឍសមត្ថភាព និងជំនាញសិល្បៈរបស់ខ្លួន។

ពោធិ៍សាត់៖ លោក សំ ណារិទ្ធិ អភិបាលរងនៃគណៈអភិបាលខេត្ត និងជាអនុប្រធានប្រចាំការសហភាពសហព័ន្ធយុវជនកម្ពុជា (ស.ស.យ.ក) ខេត្តពោធិ៍សាត់ បានដឹកនាំក្រុមគ្រួសារ ស.ស.យ.ក ក្នុងខេត្ត អញ្ជើញចូលទស្សនាពិព័រណ៍រូបភាពមិនអចិន្ត្រៃយ៍ ដែលកំពុងរៀបចំធ្វើឡើងនៅសារមន្ទីរខេត្តពោធិ៍សាត់។ ការរៀបចំដំណើរកម្សាន្ត និងសិក្សាឈ្វេងយល់នាពេលនេះ ធ្វើឡើងក្នុងគោលបំណងបំផុស និងជំរុញស្មារតីយុវជនឱ្យកាន់តែយល់ដឹងស៊ីជម្រៅអំពីសិល្បៈ វប្បធម៌ ប្រវត្តិសាស្ត្រ និងបេតិកភណ្ឌជាតិដ៏មានតម្លៃ។ បន្ថែមពីនេះ សកម្មភាពនេះក៏ជាផ្នែកមួយយ៉ាងសំខាន់ក្នុងការលើកកម្ពស់ការចូលរួមរបស់ស្រទាប់យុវជន ក្នុងការស្រឡាញ់ ការពារ និងអភិរក្សសម្បត្តិវប្បធម៌ជាតិឱ្យបានគង់វង្ស។ តាមរយៈការទស្សនាពិព័រណ៍រូបភាពនេះ សមាជិក-សមាជិកា ស.ស.យ.ក ខេត្តពោធិ៍សាត់ ទទួលបាននូវចំណេះដឹង និងបទពិសោធថ្មីៗបន្ថែមទៀត អំពីប្រវត្តិសាស្ត្រ និងអរិយធម៌ដ៏ល្អផូរផង់ដែលជាគ្រឹះយ៉ាងរឹងមាំសម្រាប់កសាងស្មារតីស្នេហាជាតិ និងមោទនភាពជាតិក្នុងចំណោមយុវជនជំនាន់ក្រោយ៕

ព្រះព្រហ្មាភិរ័ត កែវ កន ព្រះរាជាគណៈថ្នាក់កិត្តិយស ព្រះរាជាណាចក្រកម្ពុជា ព្រះពោធិវង្សាវិមល ព្រះមេគណខេត្តនិងជាព្រះចៅអធិការវត្តកែវវិជ័យ មានសេចក្តីសោមនស្សរីករាយបានដឹកនាំមន្ត្រីសង្ឃក្នុងនិមន្តទស្សកិច្ចពិព័រណ៌មិនអចិន្ត្រៃយ៍ស្តីអំពីការយាងត្រឡប់មកវិញនៃព្រលឹងដូនតា វត្ថុសិល្បៈខ្មែរផ្ទាំងរូបថត ដែលបានបាត់បង់ និងការទាមទារបញ្ជូនត្រឡប់មកកម្ពុជាវិញ នាថ្ងៃទី៣១ ខែសីហា ឆ្នាំ២០២៦ នៅបរិវេណសារមន្ទីរខេត្ត ស្ថិតក្នុងភូមិពាលញែក១ សង្កាត់ផ្ទះព្រៃ ក្រុងពោធិ៍សាត់។

ពោធិ៍សាត់៖ សារមន្ទីរខេត្តពោធិ៍សាត់ បានទទួលស្វាគមន៍ភ្ញៀវទេសចរជាតិ និងអន្តរជាតិ ព្រមទាំងសិស្សានុសិស្សយ៉ាងច្រើនកុះករ ដែលបានអញ្ជើញមកចូលទស្សនា សិក្សាស្រាវជ្រាវ និងឈ្វេងយល់ពីប្រវត្តិសាស្ត្រ វប្បធម៌ ព្រមទាំងបេតិកភណ្ឌដ៏សម្បូរបែបរបស់ខេត្តពោធិ៍សាត់ នាថ្ងៃទី២៨ ខែសីហា ឆ្នាំ២០២៦ ។ សកម្មភាពនេះ បានស្តែងឱ្យឃើញពីការចាប់អារម្មណ៍កាន់តែខ្លាំងពីសំណាក់មហាជន មកលើការអភិរក្ស និងការដាក់បង្ហាញនូវប្រដាប់ប្រដាប្រើប្រាស់បុរាណ វត្ថុបុរាណ និងពិព័រណ៍វប្បធម៌ផ្សេងៗ។ ក្រុមការងារបម្រើការនៅសារមន្ទីរ បានរៀបចំសម្រួលការចូលទស្សនា និងផ្តល់ការណែនាំយ៉ាងយកចិត្តទុកដាក់ ដើម្បីផ្តល់នូវចំណេះដឹង និងបទពិសោធន៍ល្អៗជូនដល់ភ្ញៀវទេសចរគ្រប់រូប៕

ពោធិ៍សាត់៖ ក្រុមការងារនាយកដ្ឋានបុរាណវត្ថុ សហការជាមួយមន្ទីរវប្បធម៌ និងវិចិត្រសិល្បៈខេត្តពោធិ៍សាត់ បានចាប់ផ្តើមរៀបចំឆាក និងដំឡើងផ្ទាំងរូបភាព ដើម្បីត្រៀមបើកពិព័រណ៍មិនអចិន្ត្រៃយ៍ ក្រោមប្រធានបទ «ការយាងត្រឡប់មកវិញនៃព្រលឹងដូនតា៖ វត្ថុសិល្បៈខ្មែរដែលបានបាត់បង់ និងការទាមទារបញ្ជូនត្រឡប់មកកម្ពុជាវិញ» ដែលនឹងប្រព្រឹត្តទៅនាព្រឹកថ្ងៃទី២៤ ខែសីហា ឆ្នាំ២០២៦ ខាងមុខនេះ នៅសារមន្ទីរខេត្តពោធិ៍សាត់។ ព្រឹត្តិការណ៍នេះ រៀបចំឡើងក្នុងគោលបំណងដាស់តឿនស្មារតី លើកកម្ពស់ការយល់ដឹងពីតម្លៃមហាសាលនៃបេតិកភណ្ឌវប្បធម៌ជាតិ ព្រមទាំងបង្ហាញពីកិច្ចខិតខំប្រឹងប្រែងយ៉ាងសកម្មក្នុងការស្វែងរក និងទាមទារសម្បត្តិវប្បធម៌ខ្មែរដែលបានបាត់បង់ ឱ្យត្រឡប់មកកាន់មាតុភូមិវិញ។ មន្ទីរវប្បធម៌ និងវិចិត្រសិល្បៈខេត្ត ក៏បានអំពាវនាវ និងគោរពអញ្ជើញសាធារណជនទាំងអស់ ចូលរួមទស្សនា និងគាំទ្រពិព័រណ៍វប្បធម៌ដ៏មានអត្ថន័យនេះឱ្យបានកុះករ៕

ស្ទឹងត្រែង៖ លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ និងលោក ប្លង់ បញ្ញា អនុប្រធានមន្ទីរ បានអញ្ជើញចូលរួមក្នុងពិធីអបអរសាទរទិវាអន្តរជាតិជនជាតិដើមភាគតិចពិភពលោក លើកទី៣២ និងលើកទី២២ នៅកម្ពុជា ក្រោមប្រធានបទ «ការលើកតម្កើងតួនាទីឆ្មបជាជនជាតិដើមភាគតិច ដើម្បីការពារជីវិត និងលើកកម្ពស់សុខុមាលភាព» ដែលបានរៀបចំឡើងនៅសួនច្បារក្រុងស្ទឹងត្រែង ខេត្តស្ទឹងត្រែង នាថ្ងៃចន្ទ ថ្ងៃទី១០ ខែសីហា ឆ្នាំ២០២៦ ។ អង្គពិធីដ៏អធិកអធមនេះ ស្ថិតក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ព្រមទាំងមានការអញ្ជើញចូលរួមពី ឯកឧត្តម សរ សុត្រា អភិបាលខេត្តស្ទឹងត្រែង ថ្នាក់ដឹកនាំក្រសួង-ស្ថាប័ន តំណាងអង្គការដៃគូអភិវឌ្ឍន៍ អាជ្ញាធរមូលដ្ឋាន លោកគ្រូអ្នកគ្រូ យុវជន និងបងប្អូនជនជាតិដើមភាគតិច សរុបប្រមាណជាង ៩៤០នាក់៕

លោក ហៀម ឃួន អភិបាលរងខេត្តពោធិ៍សាត់ នាំយកទៀនព្រះវស្សា ទេយ្យទាន និងបច្ច័យ វេរប្រគេនព្រះសង្ឃចាំព្រះវស្សាទាំង ៩វត្ត ក្នុងសង្កាត់រលាប ដើម្បីទ្រទ្រង់ជីវភាពព្រះសង្ឃ និងរួមចំណែកលើកស្ទួយវិស័យព្រះពុទ្ធសាសនា ។

លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង បានចាត់តាំងលោក ឃៀង សុជីវ័ន្ត នាំយកទៀនព្រះវស្សា ទេយ្យទាន និងថវិកាសរុបប្រមាណ ៨០លានរៀល ទៅប្រគេនព្រះសង្ឃគង់ចាំព្រះវស្សាចំនួន ១១វត្ត និងថ្វាយបូជនីយដ្ឋានចំនួន ២ ក្នុងខេត្តពោធិ៍សាត់ ដើម្បីចូលរួមទ្រទ្រង់ក្នុងឱកាសបុណ្យចូលព្រះវស្សា និងបានជួយឧបត្ថម្ភដល់គ្រួសារភៀសសឹកចំនួន ៨គ្រួសារផងដែរ។

ខេត្តពោធិ៍សាត់៖ មន្ទីរវប្បធម៌ និងវិចិត្រសិល្បៈខេត្តពោធិ៍សាត់ បានរៀបចំកិច្ចប្រជុំបូកសរុបលទ្ធផលការងារប្រចាំខែកក្កដា ឆ្នាំ២០២៦ ដោយលោក អ៊ុក រក្សា ប្រធានមន្ទីរវប្បធម៌ និងវិចិត្រសិល្បៈខេត្ត។ កិច្ចប្រជុំនេះក៏មានការចូលរួមពី លោក រស់ សំណាង ជំនួយការក្រសួង ព្រមទាំងថ្នាក់ដឹកនាំ និងមន្ត្រីរាជការនៃការិយាល័យជំនាញទូទាំងមន្ទីរ នៅថ្ងៃទី២២ ខែកក្កដា ឆ្នាំ២០២៦។ អង្គប្រជុំបានពិនិត្យ និងវាយតម្លៃលើសមិទ្ធផលការងារសម្រេចបានក្នុងខែកក្កដា ព្រមទាំងលើកយកបញ្ហាប្រឈមនានាមកពិភាក្សា ដើម្បីស្វែងរកដំណោះស្រាយប្រកបដោយប្រសិទ្ធភាព។ ទន្ទឹមនឹងនេះ អង្គប្រជុំបានកំណត់ទិសដៅ និងផែនការសកម្មភាពសម្រាប់ខែសីហា ឆ្នាំ២០២៦ ខាងមុខ សំដៅបង្កើនប្រសិទ្ធភាពការងារ និងជំរុញការលើកកម្ពស់វិស័យវប្បធម៌ និងវិចិត្រសិល្បៈក្នុងខេត្តឱ្យកាន់តែមានចរន្តរីកចម្រើនខ្លាំងក្លាថែមទៀត៕