ព័ត៌មានក្នុងខេត្ត

ពោធិ៍សាត់៖ លោក អ៊ន សុផល្លា អភិបាលស្រុកក្រគរ អមដំណើរដោយក្រុមការងារ បានចុះពិនិត្យផ្ទាល់លើកិច្ចការងារសំខាន់ៗចំនួនបី ដើម្បីលើកកម្ពស់សោភ័ណភាព អនាម័យបរិស្ថាន និងសណ្តាប់ធ្នាប់សាធារណៈតាមបណ្តោយផ្លូវជាតិលេខ៥ កាលពី ថ្ងៃ ទី១៣ ខែកញ្ញឆ្នាំ២០២៦។ សកម្មភាពការងារចុះបេសកកម្មជាក់ស្តែងរួមមាន ការចុះរៀបចំ និងណែនាំដល់ប្រជាពលរដ្ឋបញ្ឈប់ការចងគោក្របីបណ្តែតបណ្តោយនៅតាមចិញ្ចើមផ្លូវជាតិ ដែលបង្កហានិភ័យដល់សុវត្ថិភាពចរាចរណ៍ និងប៉ះពាល់ដល់សោភ័ណភាពបរិស្ថានមូលដ្ឋាន .ការសហការជាមួយក្រុមប្រឹក្សាឃុំអន្សាចំបក់ ចុះពិនិត្យមើលទីតាំងដីសាធារណៈរដ្ឋបាល សម្រាប់ត្រៀមរៀបចំផែនការដាំដើមឈើលម្អ និងកែលម្អបរិស្ថានបៃតងនៅតំបន់ពីរ .ការចុះត្រួតពិនិត្យទីតាំងដីដែលមានបញ្ហាទំនាស់ចំនួន ៣ទីតាំងផ្សេងគ្នា ស្ថិតក្នុងឃុំអន្សាចំបក់ ដើម្បីស្វែងយល់ពីស្ថានភាពជាក់ស្តែង និងរកដំណោះស្រាយដោយសន្តិវិធីតាមផ្លូវរដ្ឋបាល៕ សាយយ័ន្ដ វុន្នីយ៉ា

កិច្ចប្រជុំពិគ្រោះយោបល់នេះ ផ្តោតសំខាន់លើការសិក្សាស្វែងយល់អំពីតម្រូវការជាក់ស្តែងរបស់បងប្អូនប្រជាសហគមន៍មូលដ្ឋាន ដើម្បើយកទៅរៀបចំផែនការអភិវឌ្ឍន៍ដែលផ្ដល់ផលប្រយោជន៍ផ្ទាល់ដល់សហគមន៍។ ទន្ទឹមនឹងនេះ ដំណើរការ FPIC ក៏ជាយន្តការដ៏សំខាន់ក្នុងការធានាថា ប្រជាសហគមន៍ទទួលបានព័ត៌មានគ្រប់ជ្រុងជ្រោយ និងមានសិទ្ធិពេញលេញក្នុងការសម្រេចចិត្ត ចូលរួមចំណែកក្នុងសកម្មភាពការពារ និងអភិរក្សធនធានធម្មជាតិ។

ក្រោមកិច្ចចង្អុលការណែនាំផ្ទាល់ពីលោក ធាម សុផាត អភិបាល នៃគណៈអភិបាលស្រុកភ្នំក្រវាញ មន្ត្រីរាជការ អាជ្ញាធរមូលដ្ឋានឃុំលាច និងឃុំរកាត សហការជាមួយក្រុមយុវជន ព្រមទាំងប្រជាការពារភូមិ បានរួមគ្នាចុះយុទ្ធនាការដាំកូនឈើ ដើម្បីលម្អសោភ័ណភាព និងកែលម្អបរិស្ថាននៅតាមបណ្តោយដងផ្លូវជាតិលេខ១៥៥ នាថ្ងៃទី៩ ខែកញ្ញា ឆ្នាំ២០២៦។

លោកអភិបាលស្រុកក្រគរ អមដំណើរដោយមន្ត្រីរដ្ឋបាលស្រុក បានសហការយ៉ាងជិតស្និទ្ធជាមួយអាជ្ញាធរឃុំ និងមេភូមិ ចុះពិនិត្យទីតាំងអាជីវកម្មទិញ លក់អេតចាយមួយកន្លែង ដែលស្ថិតនៅជាប់ប្រឡាយ ទល់មុខវត្តសម្តេចយស ក្នុងឃុំស្នាអន្សា ស្រុកក្រគរ ខេត្តពោធិ៍សាត់ នាថ្ងៃទី០៧ ខែកញ្ញា ឆ្នាំ២០២៦។

ពោធិ៍សាត់៖ ដើម្បីបន្តពង្រឹងអនាម័យ បរិស្ថាន និងលើកកម្ពស់សុខុមាលភាពរបស់ប្រជាពលរដ្ឋក្នុងមូលដ្ឋាន នាថ្ងៃទី៧ ខែកញ្ញា ឆ្នាំ២០២៦ នេះ មន្ទីរបរិស្ថានខេត្តពោធិ៍សាត់ បានប្រគល់រណាយន្តចំនួន ១គ្រឿងបន្ថែម និងធុងសំរាមចំនួន ១៦ធុងបន្ថែម ជូនដល់រដ្ឋបាលស្រុកកណ្តៀង ខេត្តពោធិ៍សាត់។ ពិធីប្រគល់ និងទទួលសម្ភារទាំងនេះ ធ្វើឡើងក្នុងគោលបំណងគាំទ្រដល់អាជ្ញាធរស្រុកកណ្តៀង ក្នុងការបន្តធ្វើឱ្យបរិស្ថានក្នុងមូលដ្ឋានមានភាពស្អាតបាត មានអនាម័យល្អ និងរួមចំណែកយ៉ាងសំខាន់ដល់ការថែរក្សាសុខភាពសាធារណៈរបស់ប្រជាពលរដ្ឋ។ ការផ្តល់ជូននេះក៏ជាផ្នែកមួយយ៉ាងសំខាន់ក្នុងការចូលរួមជំរុញ និងអនុវត្តយុទ្ធនាការ «ភាពស្អាត» ឱ្យកាន់តែមានប្រសិទ្ធភាពខ្ពស់។ បន្ថែមពីលើការផ្តល់សម្ភារ អាជ្ញាធរពាក់ព័ន្ធក៏បានផ្តោតលើការបង្កើនចំណេះដឹង និងការអប់រំផ្សព្វផ្សាយដល់ប្រជាពលរដ្ឋ ឱ្យយល់ដឹងកាន់តែច្បាស់អំពីការបែងចែក និងការទុកដាក់សំរាម សំណល់រឹង ឱ្យបានត្រឹមត្រូវតាមបច្ចេកទេសបរិស្ថាន ដើម្បីកាត់បន្ថយការចោលសំរាមពាសវាលពាសកាល និងបង្កើតបានជាទម្លាប់រស់នៅស្អាតក្នុងសហគមន៍៕

ក្រោមកិច្ចចង្អុលការដឹកនាំផ្ទាល់របស់ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដាក់ផែនការ ឱ្យអាជ្ញាធរខេត្ត និងក្រុមការងារបច្ចេកទេសជំនាញ ក្នុងការអនុវត្តគម្រោងកែលម្អសោភណភាពក្រុង ដោយផ្ដោតលើការជួសជុល និងផ្លាស់ប្តូរការ៉ូឡាថ្មីនៅលើកំណាត់ផ្លូវលេខ១០១ ស្ថិតនៅ មុខកោះសំពៅមាស នៅថ្ងៃទី០៤ ខែកញ្ញា ឆ្នាំ២០២៦។

ការថែរក្សាអនាម័យ និងបរិស្ថានមិនមែនជាភារកិច្ចរបស់បុគ្គលណាម្នាក់នោះទេ ប៉ុន្តែជាកាតព្វកិច្ចរួមរបស់ប្រជាពលរដ្ឋគ្រប់រូបក្នុងសង្គម។ ការផ្តល់ចំណេះដឹងទូទៅនៅក្នុងថ្នាក់រៀន សាលារៀនសុវណ្ណភូមិ សាខាខេត្តពោធិ៍សាត់ បាននិងកំពុងបន្តបណ្តុះស្មារតីទទួលខុសត្រូវសង្គម និងការស្រឡាញ់បរិស្ថានដល់សិស្សានុសិស្សយ៉ាងសកម្ម។

ពោធិ៍សាត់៖ លោក ផាយ ឡេង អភិបាលក្រុងពោធិ៍សាត់ បានចុះត្រួតពិនិត្យផ្ទាល់នៅទីតាំងពូនដាក់ដាំកូនឈើក្ងោកបន្តតាមបណ្តោយផ្លូវជាតិលេខ៥ ក្នុងតំបន់សង្កាត់ព្រៃញី ក្រុងពោធិ៍សាត់។ ការចុះពិនិត្យនេះធ្វើឡើងក្នុងគោលបំណងពន្លឿន និងធានាឱ្យការរៀបចំកែលម្អសោភ័ណភាពបៃតងតាមដងផ្លូវសាធារណៈប្រព្រឹត្តទៅដោយរលូន ស្របតាមផែនការអភិវឌ្ឍន៍បរិស្ថានទីក្រុងស្អាត។ ក្នុងឱកាសនោះ លោកអភិបាលក្រុងបានណែនាំដល់ក្រុមការងារបច្ចេកទេស និងអាជ្ញាធរមូលដ្ឋានឱ្យយកចិត្តទុកដាក់ខ្ពស់លើការថែទាំ ការដាក់ជី និងការការពារកូនឈើទាំងនោះ ដើម្បីធានាឱ្យកូនឈើក្ងោកលូតលាស់បានល្អ បង្កើតបានជាម្លប់ និងសោភ័ណភាពស្រស់បំព្រងសម្រាប់ភ្ញៀវទេសចរ ក៏ដូចជាប្រជាពលរដ្ឋធ្វើដំណើរឆ្លងកាត់៕សាយយ័ន្ត វុន្នីយ៉ា

ពោធិ៍សាត់៖ រដ្ឋបាលស្រុកក្រគរ សហការជាមួយក្រុមការងារឃុំអន្លង់ត្នោត បានរៀបចំយុទ្ធនាការដាំកូនឈើប្រភេទកូនក្ងោកចំនួន ១០០ដើម យ៉ាងផុសផុលតាមបណ្តោយផ្លូវជាតិលេខ ៥៣B នាពីថ្ងៃទី២៩ ខែសីហា ឆ្នាំ២០២៦ ។ កម្មវិធីនេះរៀបចំឡើងក្នុងគោលបំណងលើកកម្ពស់សោភ័ណភាពបរិស្ថាន បង្កើតម្លប់បៃតង និងទប់ស្កាត់ការហូរច្រោះដីក៏ដូចជាការចូលរួមចំណែកយ៉ាងសកម្មក្នុងការកាត់បន្ថយការប្រែប្រួលអាកាសធាតុ។តាមរយៈកិច្ចខិតខំប្រឹងប្រែងនេះអាជ្ញាធរមូលដ្ឋានបានផ្តាំផ្ញើនិងបំផុសស្មារតីដល់ប្រជាពលរដ្ឋគ្រប់រូបថា យើងចូលរួមដាំដើមឈើទាំងអស់គ្នា ដើម្បីបង្កើតភាពបៃតង។ សកម្មភាពនេះមិនត្រឹមតែបង្ហាញពីសាមគ្គីភាពរវាងអាជ្ញាធរ និងប្រជាពលរដ្ឋក្នុងមូលដ្ឋានប៉ុណ្ណោះទេ ប៉ុន្តែវាក៏ជាគំរូដ៏ល្អមួយក្នុងការថែរក្សាធនធានធម្មជាតិ និងបន្សល់ទុកនូវបរិស្ថានស្អាតសម្រាប់កូនចៅជំនាន់ក្រោយផងដែរ៕សាយយ័ន្ត វុន្នីយ៉ា

ក្រុមការងារមន្ទីរព័ត៌មានខេត្តពោធិ៍សាត់ សហការជាមួយអាជ្ញាធរមូលដ្ឋាន បានចុះសម្អាតអនាម័យ កាប់ឆ្ការស្មៅ តែងមែកឈើ និងបោសសម្អាតសំរាម នៅភូមិជុំរុំសៀម។ លោក សេក ញន អនុប្រធានមន្ទីរ និងជាតំណាងលោក លាង ទិដ្ឋាន ប្រធានមន្ទីរព័ត៌មានខេត្តពោធិ៍សាត់ ក្នុងគោលបំណងដើម្បីលើកកម្ពស់សោភណ្ឌភាព បរិស្ថានបៃតង និងសុខុមាលភាពសហគមន៍ ស្របតាមទិសដៅរបស់លោក ខូយ រីដា អភិបាលខេត្តពោធិ៍សាត់ ព្រមទាំងអប់រំប្រជាពលរដ្ឋឱ្យចេះទុកដាក់សំរាម និងថែរក្សាបរិស្ថានស្អាត។

ខេត្តពោធិ៍សាត់៖ លោក ធាម សុផាត អភិបាលស្រុកភ្នំក្រវាញ ចូលរួមក្នុងកម្មវិធីដាំកូនឈើក្រោមប្រធានបទ «យើងចូលរួមយុទ្ធនាការបៃតង» យ៉ាងសកម្ម និងប្រកបដោយបរិយាកាសរីករាយកាលពី ថ្ងៃទី២១ ខែសីហា ឆ្នាំ២០២៦ សាលាបឋមសិក្សាទទឹងថ្ងៃ។ កម្មវិធីនេះរៀបចំឡើងក្នុងគោលបំណងធ្វើឱ្យសិស្សានុសិស្សយល់ដឹងពីសារៈសំខាន់នៃការថែរក្សាធម្មជាតិ ក៏ដូចជាការរួមចំណែកកាត់បន្ថយការប្រែប្រួលអាកាសធាតុតាមរយៈការបង្កើនគម្របព្រៃឈើនៅតាមមូលដ្ឋានសាលារៀន។ ក្នុងឱកាសនោះ គណៈគ្រប់គ្រងសាលា លោកគ្រូ អ្នកគ្រូ និងប្អូនៗសិស្សានុសិស្សបានរួមគ្នាសហការក្នុងការជីករណ្តៅដាំ និងថែទាំកូនឈើចម្រុះជាច្រើនដើម ក្នុងបរិវេណសាលាបឋមសិក្សាទទឹងថ្ងៃ ដើម្បីបង្កើតម្លប់ត្រជាក់ និងបរិស្ថានស្អាតសម្រាប់ជាប្រយោជន៍ដល់ការសិក្សា។ សកម្មភាពបៃតងនេះ មិនត្រឹមតែជួយតុបតែងសោភ័ណភាពសាលារៀនឱ្យកាន់តែស្រស់ស្អាតប៉ុណ្ណោះទេ ប៉ុន្តែថែមទាំងបណ្តុះស្មារតីយុវជនជំនាន់ក្រោយឱ្យចេះស្រលាញ់ និងការពារបរិស្ថានធម្មជាតិរបស់យើងផងដែរ៕

ពោធិ៍សាត់៖ លោក អេង រស្មី ប្រធានមន្ទីរបរិស្ថានខេត្តពោធិ៍សាត់ បានដឹកនាំកិច្ចប្រជុំបូកសរុបលទ្ធផលការងារប្រចាំខែសីហា និងកំណត់ទិសដៅការងារបន្ត ដោយមានការចូលរួមពីតំណាងការិយាល័យជំនាញទាំង៧ ស្នាក់ការតំបន់ការពារធម្មជាតិ និងមន្ត្រីជាប់កិច្ចសន្យាទាំងអស់ នាថ្ងៃទី២០ ខែសីហា ឆ្នាំ២០២៦ ។ ក្នុងឱកាសនោះដែរ លោកស្រី ប៊ុន ដាវីន ប្រធានការិយាល័យរដ្ឋបាល ធនធានមនុស្ស និងហិរញ្ញវត្ថុ បានធ្វើបទបង្ហាញផ្សព្វផ្សាយអំពី «កម្មវិធីអាហារូបករណ៍របស់ប្រទេសនូវែលសេឡង់» ដើម្បីលើកទឹកចិត្ត និងពង្រឹងសមត្ថភាពធនធានមនុស្សនៅថ្នាក់ក្រោមជាតិឱ្យកាន់តែរីកចម្រើនស្របតាមស្តង់ដារអន្តរជាតិ៕