ព័ត៌មានក្នុងខេត្ត

យោងតាមការបញ្ជាក់ពីខណ្ឌរដ្ឋបាលជលផលខេត្តពោធិ៍សាត់ បានឱ្យដឹងថា គិតត្រឹមដើមឆ្នាំ២០២៦ នេះ អាជ្ញាធរមានសមត្ថកិច្ច និងមន្ត្រីជំនាញ បានប្រមូល និងលែងប្រភេទត្រីកម្រចូលទៅក្នុងដែនអភិរក្សបានចំនួន ៦លើក សរុប ១០ក្បាល រួចមកហើយ ក្នុងនោះរួមមាន៖ ត្រីគល់រាំងចំនួន ៤ក្បាល និងត្រីរាជចំនួន ៦ក្បាល ដើម្បីចូលរួមថែរក្សា និងអភិរក្សពូជមច្ឆជាតិកម្រៗឱ្យនៅគង់វង្សតទៅមុខទៀត។

ពោធិ៍សាត់៖ លោកស្រី ហ៊ោន គន្ធី មន្ត្រីការិយាល័យអភិវឌ្ឍន៍សហគមន៍កសិកម្ម បានចុះពិនិត្យ និងតាមដានលើសកម្មភាពប្រជុំណែនាំពី «នីតិវិធីជ្រើសរើសអ្នកផ្គត់ផ្គង់អាហារតាមសាលារៀន» នៅក្នុងសហគមន៍កសិកម្មវាលវង់មានជ័យ ស្ថិតនៅភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់ កាលពីថ្ងៃទី១៨ ខែកញ្ញា ឆ្នាំ២០២៦ ។ កិច្ចប្រជុំនេះ រៀបចំឡើងក្នុងគោលបំណងណែនាំពីនីតិវិធីច្បាស់លាស់ក្នុងការជ្រើសរើសអ្នកផ្គត់ផ្គង់អាហារតាមសាលារៀន ព្រមទាំងបណ្តុះបណ្តាលពីរបៀបបំពេញពាក្យសុំដេញថ្លៃ ជូនដល់ថ្នាក់ដឹកនាំ និងសមាជិកសហគមន៍កសិកម្ម ដើម្បីធានាបាននូវតម្លាភាព និងប្រសិទ្ធភាពក្នុងការអនុវត្តកម្មវិធី។ កិច្ចប្រជុំនេះមានការអញ្ជើញចូលរួមពី មន្ត្រីមន្ទីរកសិកម្ម រុក្ខាប្រមាញ់ និងនេសាទខេត្ត, មន្ត្រីកសិកម្មឃុំ, ព្រមទាំងថ្នាក់ដឹកនាំ និងសមាជិកសហគមន៍កសិកម្មវាលវង់មានជ័យ ដោយមានអ្នកចូលរួមសរុបចំនួន ៥នាក់ (ស្រី ៤នាក់)។ សកម្មភាពនេះ ត្រូវបានគាំទ្រថវិកា និងបច្ចេកទេសដោយ កម្មវិធីស្បៀងអាហារពិភពលោក (WFP)៕

លោក សំ ស៊ី លោក ថា វ៉ាន់ថេន និងលោក ស៊ឺន យឿម មន្ត្រីនៃការិយាល័យផលិតកម្ម និងបសុព្យាបាល បានអញ្ជើញចូលរួមក្នុង «សិក្ខាសាលាស្តីពីការធ្វើអនាម័យ ជីវសុវត្ថិភាព និងការពង្រឹងបច្ចេកទេសលើវិស័យចិញ្ចឹមសត្វ» នាថ្ងៃទី១៧ ខែកញ្ញា ឆ្នាំ២០២៦ ។

ពោធិ៍សាត់៖ កម្លាំងចម្រុះរួមមាន សង្កាត់រដ្ឋបាលជលផលកណ្ដៀង កម្លាំងយោធាប្រចាំការនៅកន្លែងអភិរក្សជលផលលេខ០៦ (យោធភូមិភាគ៥) និងនគរបាលប្រឆាំងបទល្មើសសេដ្ឋកិច្ចខេត្ត បានចុះប្រតិបត្តិការរួមគ្នា ត្រួតពិនិត្យ និងបង្ក្រាបបទល្មើសនេសាទ នៅចំណុចផ្លូវឆ្លង ស្ថិតក្នុងភូមិតាម៉ៅ ឃុំកញ្ជរ ស្រុកកណ្ដៀង ខេត្តពោធិ៍សាត់ កាលពីថ្ងៃទី១៦ ខែកញ្ញា ឆ្នាំ២០២៦។ ក្នុងប្រតិបត្តិការចុះល្បាតនេះ កម្លាំងសមត្ថកិច្ចសរុបចំនួន ១១នាក់ ដោយប្រើប្រាស់មធ្យោបាយធ្វើដំណើរតាមកាណូតចំនួន ៣គ្រឿង បានបំបែក និងបង្ក្រាបបានបទល្មើសនេសាទខុសច្បាប់ចំនួន ១ករណី។ ជាលទ្ធផល កម្លាំងចម្រុះបានកាប់បំផ្លាញ និងដុតចោលឧបករណ៍ខុសច្បាប់នៅនឹងកន្លែង រួមមាន៖ របាំងស្បៃមុង ចំនួន ១៥ខ្សែ ប្រវែងសរុប ១.៥៧០ម៉ែត្រ, លូកងស្បៃមុង ចំនួន ២០មាត់ និងបង្គោលឈើ ចំនួន ៧៥០ដើម។ ជាមួយគ្នានោះដែរ សមត្ថកិច្ចក៏បានរំដោះ និងចាក់លែងកូនត្រីចម្រុះទម្ងន់ ៣៥គីឡូក្រាម ដែលជាប់នៅក្នុងលូស្បៃមុង ចូលទៅក្នុងបឹងធម្មជាតិវិញផងដែរ។ អាជ្ញាធរបានបញ្ជាក់ថា នឹងបន្តចុះត្រួតពិនិត្យ និងទប់ស្កាត់សកម្មភាពនេសាទខុសច្បាប់ទាំងនេះយ៉ាងម៉ឺងម៉ាត់ ដើម្បីការពារធនធានជលផលឱ្យបានគង់វង្ស៕

មន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ បានរៀបចំវគ្គបណ្តុះបណ្តាលស្តីពី «ការធ្វើកសិកម្មលើកកម្ពស់សន្តិសុខស្បៀង និងអាហាររូបត្ថម្ភ» ជូនដល់កសិករ និងអាជ្ញាធរមូលដ្ឋានសរុបចំនួន ៤២នាក់ (ស្រី ៣០នាក់) កាលពីថ្ងៃទី១៦ ខែកញ្ញា ឆ្នាំ២០២៦ ស្ថិតនៅភូមិស្ពាន ឃុំកោះជុំ ស្រុកកណ្តៀង ខេត្តពោធិ៍សាត់។

លោក ហ៊ន់ សុវណ្ណ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ និងជាប្រធានគម្រោងកែលម្អសន្តិសុខទឹកកម្ពុជាថ្នាក់ខេត្ត បានដឹកនាំក្រុមការងារចូលរួមកិច្ចប្រជុំផ្សព្វផ្សាយតាមប្រព័ន្ធអនឡាញ (Zoom Meeting) ស្តីពីការអនុវត្តកម្មវិធីអន្តរាគមន៍សង្រ្គោះបន្ទាន់ ដោយប្រើបច្ចេកទេសកសិកម្មឆ្លាតវៃធន់នឹងអាកាសធាតុ ដើម្បីលើកកម្ពស់ជីវភាពរស់នៅ ចំណុះអង្គភាពគ្រប់គ្រងគម្រោងកែលម្អសន្តិសុខទឹកកម្ពុជា (CaWSIP-MAFF) នាថ្ងៃទី១៦ ខែកញ្ញា ឆ្នាំ២០២៦។

ពោធិ៍សាត់៖ លោក ម៉ែន វណ្ណៈ ប្រធានការិយាល័យផ្សព្វផ្សាយកសិកម្ម និងជាអ្នកសហការដឹកនាំគ្រប់គ្រងកសិករ បានដឹកនាំកិច្ចប្រជុំពិភាក្សាលើការរៀបចំផែនការសកម្មភាព អនុវត្តគម្រោងកាត់បន្ថយការបំភាយឧស្ម័នមេតានក្នុងស្រែ តាមរយៈបច្ចេកទេស «ពន្លិច និងបង្គោក» កាលពីថ្ងៃទី១០ ខែកញ្ញា ឆ្នាំ២០២៦ ។ គម្រោងនេះជាកិច្ចសហការជាមួយអង្គការពន្លឺកុមារ ដោយត្រូវអនុវត្តសាកល្បងលើផ្ទៃដីស្រែសរុបចំនួន ៥ ០០០ ហិកតា គ្របដណ្តប់លើឃុំចំនួន៣ ក្នុងស្រុកបាកាន រួមមាន ឃុំត្រពាំងជង ឃុំខ្នារទទឹង និងឃុំរំលេច។ សកម្មភាពគម្រោងនឹងចាប់ផ្តើមអនុវត្តផ្លូវការចាប់ពីខែកញ្ញា ឆ្នាំ២០២៦ នេះ រហូតដល់ខែកុម្ភៈ ឆ្នាំ២០២៧។ ការអនុវត្តបច្ចេកទេសពន្លិច និងបង្គោកទឹកក្នុងស្រែនេះ មិនត្រឹមតែជាដំណោះស្រាយដ៏មានប្រសិទ្ធភាពក្នុងការកាត់បន្ថយការបំភាយឧស្ម័នផ្ទះកញ្ចក់ (ឧស្ម័នមេតាន) ចូលទៅក្នុងបរិយាកាសប៉ុណ្ណោះទេ ប៉ុន្តែថែមទាំងជួយកសិករសន្សំសំចៃទឹក ថវិកាក្នុងការបូមទឹក និងបង្កើនទិន្នផលស្រូវប្រកបដោយចីរភាពផងដែរ៕

ត្រីគល់រាំងមួយក្បាលនេះ មានទម្ងន់ ២៨គីឡូក្រាម និងប្រវែង ១,០៥ម៉ែត្រ ត្រូវបាននេសាទបានដោយចៃដន្យតាមរយៈឧបករណ៍លបណរ៉ាវ នៅចំណុចតាអួរឆ័ត្រ ស្ថិតក្នុងភូមិកំពង់ប្រាក់ ឃុំស្នាអន្សា ស្រុកក្រគរ ដោយប្រជានេសាទឈ្មោះ ប៉ែន យុតថា រស់នៅភូមិទី០១ ឃុំកំពង់លួង ស្រុកក្រគរ ខេត្តពោធិ៍សាត់។ ក្រោយនេសាទបាន ប្រជានេសាទរូបនេះបានរាយការណ៍ និងប្រគល់ជូនអាជ្ញាធរជំនាញដើម្បីលែងចូលទៅក្នុងតំបន់អភិរក្សវិញ។

វគ្គបណ្ដុះបណ្ដាលនេះ ទទួលបានការគាំទ្របច្ចេកទេស និងថវិកាពីគម្រោងសុខភាពសត្វឆ្លងកាត់ព្រំដែន និងជម្រុញខ្សែច្រវាក់តម្លៃសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ ដោយមានការសម្របសម្រួលពី លោក ឈឹម វុត្ថា ប្រធានការិយាល័យអេពីដេមីសាស្ត្រ និងវិភាគព័ត៌មាន។ កម្មវិធីនេះមានការចូលរួមពីថ្នាក់ដឹកនាំ មន្ត្រីជំនាញ និងមន្ត្រីកិច្ចសន្យា នៃថ្នាក់ការិយាល័យផលិតកម្ម និងបសុព្យាបាល សរុបចំនួន ១៣ រូប (ក្នុងនោះស្ត្រី ២ រូប)។

ពោធិ៍សាត់៖ ការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ បានសហការជាមួយមន្ត្រីកសិកម្មឃុំស្នាមព្រះ រៀបចំវគ្គបណ្ដុះបណ្ដាលស្ដីពី «បច្ចេកទេសដំណាំបន្លែ» ព្រមទាំងបានផ្តល់គ្រាប់ពូជបន្លែជូនដល់ប្រជាកសិករក្រីក្រ ស្ថិតនៅភូមិព្នៅ ឃុំស្នាមព្រះ ស្រុកបាកាន ខេត្តពោធិ៍សាត់ កាលពីថ្ងៃទី៩ ខែកញ្ញា ឆ្នាំ២០២៦ ។ កម្មវិធីនេះដឹកនាំដោយ លោក មាស សេត ប្រធានការិយាល័យក្សេត្រសាស្ត្រ ដោយមានការចូលរួមពី លោក យឿន យូធីន និងលោកស្រី សុភាម៉ោរីណេ ដែលជាមន្ត្រីកសិកម្មឃុំស្នាមព្រះ ព្រមទាំងលោក ហែម សារ៉ុន មេភូមិព្នៅ។ ក្នុងប្រតិបត្តិការនេះ មានប្រជាកសិករក្រីក្រក្នុងមូលដ្ឋានចូលរួមសរុបចំនួន ៣០ នាក់ (ក្នុងនោះស្ត្រីមានចំនួន ១៩ នាក់)។ តាមរយៈវគ្គបណ្តុះបណ្តាលនេះ មន្ត្រីជំនាញបានផ្ទេរចំណេះដឹង និងបច្ចេកទេសដាំដុះបន្លែសំខាន់ៗ ដើម្បីជួយឱ្យកសិករអាចបង្កើនទិន្នផល ព្រមទាំងបានចែកជូនគ្រាប់ពូជបន្លែបន្ថែម សម្រាប់យកទៅដាំដុះក្នុងគ្រួសារ សំដៅលើកកម្ពស់ជីវភាព និងធានាសន្តិសុខស្បៀងក្នុងមូលដ្ឋានឱ្យកាន់តែប្រសើរឡើង៕ ( សេក ញន )

ពោធិ៍សាត់៖ លោក ប៊ិន ស៊ិន ណារ៉ា ប្រធានការិយាល័យផលិតកម្ម និងបសុព្យាបាលស្តីទី និងជាគ្រូបង្គោលផលិតកម្មមាន់ស្រែ បានសហការជាមួយក្រុមការងារកម្មវិធី ASPIRE រៀបចំវគ្គបណ្ដុះបណ្ដាលស្ដីពី «វិធីសាស្រ្តគ្រប់គ្រងបច្ចេកទេសមុន និងក្រោយប្រមូលផលក្នុងផលិតកម្មមាន់ស្រែ» ជូនដល់សមាជិកសហគមន៍កសិកម្មអន្លង់ត្នោតរុងរឿង ស្ថិតនៅឃុំអន្លង់ត្នោត ស្រុកក្រគរ ខេត្តពោធិ៍សាត់ ដោយមានប្រជាកសិករចូលរួមសរុបចំនួន ២៨ នាក់ (ក្នុងនោះស្ត្រីមានចំនួន ២៣ នាក់) កាលពីថ្ងៃទី៩ ខែកញ្ញា ឆ្នាំ២០២៦។ ក្នុងវគ្គបណ្តុះបណ្តាលនេះ សិក្ខាកាមទាំងអស់ត្រូវបានពង្រឹងចំណេះដឹង និងបច្ចេកទេសសំខាន់ៗជាច្រើន រាប់ចាប់តាំងពីការចិញ្ចឹមមាន់តាមបែបវៃឆ្លាត, ការជ្រើសរើសទីតាំង និងការរៀបចំទ្រុងឱ្យត្រូវតាមបច្ចេកទេសសម្រាប់កូនមាន់ មាន់ជំទង់ និងមាន់ធំ ព្រមទាំងការជ្រើសរើសមេបាពូជឱ្យបានត្រឹមត្រូវ។ បន្ថែមពីនេះ គ្រូបង្គោលក៏បានផ្លាស់ប្តូរបទពិសោធន៍លើវិធីសាស្ត្រផ្សំចំណី ការផ្តល់ទឹក ការអនុវត្តវិធានការការពារ និងព្យាបាលជំងឺសត្វ រហូតដល់បច្ចេកទេសដឹកជញ្ជូន ការកាត់បន្ថយផលប៉ះពាល់បរិស្ថាន និងការស្វែងយល់ពីទីផ្សារ ដើម្បីធានាបាននូវទិន្នផលខ្ពស់ និងប្រាក់ចំណូលរឹងមាំសម្រាប់គ្រួសារ៕ (សេក ញន )

ពោធិ៍សាត់៖ ក្រុមការងារខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ ដឹកនាំដោយលោក ភុន សុវណ្ណា រួមជាមួយនាយរងផ្នែករដ្ឋបាលជលផលក្រគរ និងនាយរងផ្នែករដ្ឋបាលជលផលរាំងទិល បានសហការជាមួយកម្លាំងអធិការដ្ឋានរដ្ឋបាលជលផលខាងត្បូងបឹងទន្លេសាប (ដឹកនាំដោយលោក គិម ទី) និងកម្លាំងរាជអាវុធហត្ថខេត្តពោធិ៍សាត់ បានចុះប្រតិបត្តិការត្រួតពិនិត្យការធ្វើនេសាទដោយឧបករណ៍របាំងលបណរ៉ាវ ក្នុងភូមិសាស្ត្របឹងទន្លេសាប ចាប់ពីឃុំរាំងទិល ស្រុកកណ្ដៀង ដល់ភូមិព្រែកក្រ ឃុំមេទឹក ស្រុកបាកាន ខេត្តពោធិ៍សាត់ កាលពីថ្ងៃទី៩ ខែកញ្ញា ឆ្នាំ២០២៦ ។ តាមការពិនិត្យជាក់ស្ដែងនៅតាមដងទន្លេ អាជ្ញាធរបានសង្កេតឃើញថា បងប្អូនប្រជានេសាទភាគច្រើនបានចូលរួមគោរព និងអនុវត្តច្បាប់ស្តីពីជលផលបានល្អប្រសើរ។ យ៉ាងណាមិញ នៅត្រង់ចំណុចព្រែកទាល់ ស្ថិតក្នុងភូមិចារុះ ឃុំរាំងទិល ស្រុកកណ្ដៀង សមត្ថកិច្ចបានរកឃើញមានការលួចដាក់របាំងសាច់អួនខុសក្រឡាដែលច្បាប់បានកំណត់។ ភ្លាមៗនោះ ក្រុមការងារចម្រុះបានឯកភាពគ្នាចុះរុះរើ និងដកហូតវត្ថុតាងបទល្មើសបានចំនួន ១ករណី រួមមាន៖ របាំងសាច់ក្រឡាល្អិតប្រវែង ១០០ម៉ែត្រ, បង្គោលចំនួន ៥០ដើម និងបរចំនួន ១គ្រឿង ដើម្បីចាត់ការតាមនីតិវិធីច្បាប់៕