ព័ត៌មានក្នុងខេត្ត

នាព្រឹកថ្ងៃសុក្រ ទី២៥ ខែកញ្ញា ឆ្នាំ២០២៦ នៅសាលប្រជុំមន្ទីរអប់រំ យុវជន និងកីឡា លោក លឹម វុទ្ធី ប្រធានមន្ទីរអប់រំ យុវជន និងកីឡាខេត្ត បានអញ្ជើញជាអធិបតីដឹកនាំកិច្ចប្រជុំអាណត្តិប្រចាំខែកញ្ញា ឆ្នាំ២០២៦ ដើម្បីពិនិត្យ និងតាមដានវឌ្ឍនភាពការងារអប់រំក្នុងខេត្ត។

មន្ទីរអប់រំ យុវជន និងកីឡាខេត្តពោធិ៍សាត់ បានរៀបចំប្រារព្ធពិធីប្រឡងប្រជែងតែងនិពន្ធ និងស្មូតកំណាព្យ ដើម្បី​អបអរសាទរទិវាគ្រូបង្រៀន ៥ តុលា ២០២៦ ក្រោមប្រធានបទដ៏មានអត្ថន័យ «គ្រូបង្រៀន ជាសសរស្តម្ភនៃគរុកោសល្យទំនើប ដើម្បីកសាងធនធានមនុស្សសតវត្សរ៍ទី២១» នាថ្ងៃទី២៣ ខែកញ្ញា ឆ្នាំ២០២៦។

មន្ទីរអប់រំ យុវជន និងកីឡាខេត្តពោធិ៍សាត់ បានចុះសម្របសម្រួល និងជួយរៀបចំឯកសាររដ្ឋបាល បច្ចេកទេស និងទិន្នន័យផ្សេងៗ ដាក់តាម «ក្រូណូស្តង់ដាសាលារៀនគំរូ» នៅមត្តេយ្យសិក្សាធនធានខេត្តពោធិ៍សាត់។ សកម្មភាពនេះធ្វើឡើងដើម្បីពង្រឹងប្រព័ន្ធគ្រប់គ្រងទិន្នន័យឱ្យមានរបៀបរៀបរយ និងលើកកម្ពស់គុណភាពអប់រំកុមារតូចឱ្យឆ្លើយតបទៅនឹងបទដ្ឋានសាលារៀនគំរូ។

មន្ទីរអប់រំ យុវជន និងកីឡាខេត្តពោធិ៍សាត់ បានប្រជុំណែនាំបច្ចេកទេសប្រឡងប្រជែង តែងនិពន្ធ និងស្មូត្រកំណាព្យ ដើម្បីអបអរសាទរទិវាគ្រូបង្រៀន ៥ តុលា ឆ្នាំ២០២៦ ខាងមុខ។ កិច្ចប្រជុំនេះដឹកនាំដោយលោក ចាន់ នី និងលោក បេង ឆវីរៈ អនុប្រធានមន្ទីរ ដោយមានការចូលរួមពីគណៈកម្មការប្រឡងប្រជែង ដើម្បីកំណត់ស្តង់ដារវាយតម្លៃឱ្យមានភាពច្បាស់លាស់ និងយុត្តិធម៌។

លោក លឹម វុទ្ធី ប្រធានមន្ទីរអប់រំខេត្តពោធិ៍សាត់ បានដឹកនាំកិច្ចប្រជុំពិនិត្យរបាយការណ៍តេស្ត PISA និងរៀបចំផែនការសកម្មភាពជាមួយតំណាងការិយាល័យអប់រំក្រុង-ស្រុក គណៈគ្រប់គ្រង និងគ្រូបង្រៀនសាលាគោលដៅ ដើម្បីត្រៀមចូលរួមសិក្ខាសាលានាចុងខែកញ្ញាខាងមុខ នាថ្ងៃទី១៧ ខែកញ្ញា ឆ្នាំ២០២៦។

ខេត្តពោធិ៍សាត់បានរៀបចំការប្រកួតកីឡាស្ប៉េស្យាល់អូឡាំពិកថ្នាក់ខេត្ត ឆ្នាំ២០២៦ នៅពហុកីឡដ្ឋានខេត្ត ដោយមានការចូលរួមពីកីឡាករ កីឡាការិនី និងប្រតិភូមកពីខេត្តពោធិ៍សាត់ បាត់ដំបង បន្ទាយមានជ័យ និងកំពង់ឆ្នាំង។ ការប្រកួតនេះរៀបចំឡើងក្នុងគោលបំណងផ្តល់ឱកាសស្មើភាព លើកកម្ពស់ការចូលរួមក្នុងវិស័យកីឡា កាត់បន្ថយការរើសអើង និងបង្កើតឱកាសឱ្យជនមានពិការភាពបញ្ញាបានជួបជុំ ចែករំលែកបទពិសោធន៍ និងបង្កើតភាពសប្បាយរីករាយ ។

វគ្គបណ្តុះបណ្តាលនេះ រៀបចំឡើងក្នុងគោលបំណងពង្រឹង និងបំពាក់បំប៉នសមត្ថភាពបន្ថែមដល់លោកគ្រូ-អ្នកគ្រូដែលជាអ្នកដឹកនាំក្លឹបសិក្សាឌីជីថល ឱ្យមានជំនាញច្បាស់លាស់លើការប្រើប្រាស់បច្ចេកវិទ្យា និងវិធីសាស្ត្របង្រៀនបង្កើតហ្គេមអប់រំ (Coding & Game Creation)។ ជំនាញទាំងនេះ នឹងត្រូវយកទៅអនុវត្តផ្ទាល់ជាមួយសិស្សានុសិស្សក្នុងសកម្មភាពក្លឹបសិក្សាក្រៅម៉ោង ដើម្បីបង្កើតបរិយាកាសសិក្សាថ្មីមួយដែលមានភាពទាក់ទាញ និងបង្កើនការគិតបែបច្នៃប្រឌិត។

ពោធិ៍សាត់៖ សាលាបឋមសិក្សាពោធិ៍សាត់ បានចុះបង្វឹក និងចែករំលែកបទពិសោធន៍ការងារដោយផ្ទាល់ ជូនដល់សាលាបឋមសិក្សាកូលាប ក្នុងគោលបំណងពង្រឹងគុណភាពការងារគ្រប់គ្រង និងការបង្រៀនឱ្យកាន់តែមានប្រសិទ្ធភាព នាថ្ងៃទី១១ ខែកញ្ញា ឆ្នាំ២០២៦ ។ កម្មវិធីចុះបង្វឹកនាឱកាសនោះ បានផ្តោតសំខាន់លើការណែនាំពីវិធីសាស្ត្រនៃការចុះបង្វឹកការងារ និងការតម្រង់ទិសបច្ចេកទេស ដើម្បីអភិវឌ្ឍន៍សាលារៀនឱ្យឆ្លើយតបទៅនឹង «ស្តង់ដាសាលារៀនគំរូ»។ កិច្ចសហការ និងការចូលរួមយ៉ាងសកម្មពីសំណាក់ភាគីទាំងពីរ បានស្តែងឱ្យឃើញពីស្មារតីទទួលខុសត្រូវ និងការប្តេជ្ញាចិត្តខ្ពស់ក្នុងការលើកកម្ពស់វិស័យអប់រំនៅក្នុងមូលដ្ឋាន។ ជំនួប និងសកម្មភាពចែករំលែកបទពិសោធន៍នេះ គឺជាជំហានដ៏មានអត្ថន័យ និងជាគ្រឹះយ៉ាងរឹងមាំក្នុងការរួមចំណែកលើកកម្ពស់គុណភាពនៃការសិក្សារបស់សិស្សានុសិស្ស ព្រមទាំងបង្កើនប្រសិទ្ធភាពនៃការគ្រប់គ្រងសាលារៀនឱ្យកាន់តែរីកចម្រើនជាលំដាប់៕

ពោធិ៍សាត់៖ គណៈគ្រប់គ្រងសាលា ព្រមទាំងតំណាងគណៈកម្មាធិការទ្រទ្រង់សាលារៀន (គ.គ.ស) និងគណៈកម្មាធិការគ្រប់គ្រងថ្នាក់ (គ.គ.ថ) នៃសាលាបឋមសិក្សាពោធិ៍សាត់ បានចុះបង្វឹកការងារដោយផ្ទាល់ដល់សាលាបឋមសិក្សាកោះវត្ត ប្រកបដោយបរិយាកាសស្និទ្ធស្នាល និងសាមគ្គីភាព នាថ្ងៃទី១២ ខែកញ្ញា ឆ្នាំ២០២៦។ សកម្មភាពចុះបង្វឹកនាពេលនេះ បានផ្តោតសំខាន់លើការណែនាំលម្អិតអំពីកម្មវិធីចុះបង្វឹកការងារ ដើម្បីផ្លាស់ប្តូរបទពិសោធន៍ ពង្រឹងសមត្ថភាពការងារគ្រប់គ្រង និងបង្កើនកិច្ចសហប្រតិបត្តិការអប់រំរវាងសាលារៀនទាំងពីរឱ្យកាន់តែមានប្រសិទ្ធភាពខ្ពស់។ ការចូលរួមយ៉ាងសកម្មពីសំណាក់ថ្នាក់ដឹកនាំសាលា និងតំណាងគណៈកម្មាធិការពាក់ព័ន្ធទាំងអស់ បានស្តែងឱ្យឃើញយ៉ាងច្បាស់ពីការយកចិត្តទុកដាក់ និងការប្តេជ្ញាចិត្តខ្ពស់ក្នុងការលើកកម្ពស់គុណភាព នៃការសិក្សារបស់សិស្សានុសិស្សនៅក្នុងមូលដ្ឋាន។ ជំនួបបង្វឹកនេះបានប្រព្រឹត្តទៅដោយរលូន ព្រមទាំងទទួលបានលទ្ធផលយ៉ាងផ្លែផ្កាជាវិជ្ជមាន សម្រាប់យកទៅអនុវត្ត និងអភិវឌ្ឍន៍សាលារៀនឱ្យកាន់តែរីកចម្រើនបន្ថែមទៀត៕

ពោធិ៍សាត់៖ លោក លឹម វុទ្ធី ប្រធានមន្ទីរអប់រំ យុវជន និងកីឡាខេត្ត បានអញ្ជើញជាអធិបតីក្នុងពិធីបើក «វគ្គតម្រង់ទិសគ្រូកម្មវិធីចូលរៀនឡើងវិញ ឆ្នាំ២០២៦» ដែលបានរៀបចំឡើងនៅសាលប្រជុំមន្ទីរអប់រំ យុវជន និងកីឡាខេត្តពោធិ៍សាត់ នាថ្ងៃទី១០ ខែកញ្ញា ឆ្នាំ២០២៦ ។ វគ្គបណ្តុះបណ្តាលនេះមានរយៈពេល ៣ថ្ងៃ ដោយមានការចូលរួមពីលោកគ្រូ អ្នកគ្រូ និងភាគីពាក់ព័ន្ធជាច្រើនរូប ក្នុងគោលបំណងពង្រឹងសមត្ថភាព វិធីសាស្ត្របង្រៀន និងបំប៉នចំណេះដឹងបន្ថែមដល់លោកគ្រូ-អ្នកគ្រូ ឱ្យកាន់តែមានប្រសិទ្ធភាពខ្ពស់ ក្នុងការជួយសម្រួល និងគាំទ្រដល់សិស្សានុសិស្សដែលបានបោះបង់ការសិក្សា ឱ្យមានឱកាសបានត្រឡប់មកចូលរៀន នៅក្នុងប្រព័ន្ធអប់រំឡើងវិញ។ ក្នុងឱកាសនោះ លោក លឹម វុទ្ធី បានផ្តាំផ្ញើ និងលើកទឹកចិត្តដល់សិក្ខាកាមទាំងអស់ ឱ្យយកចិត្តទុកដាក់ត្រង់ត្រាប់ស្តាប់ការណែនាំពីលោកគ្រូឧទ្ទេស និងផ្លាស់ប្តូរបទពិសោធន៍ពីគ្នាទៅវិញទៅមក ដើម្បីចំណេះដឹងដែលទទួលបានពីវគ្គតម្រង់ទិសនេះ ទៅអនុវត្តប្រកបដោយលទ្ធផលវិជ្ជមាន និងឆ្លើយតបបានទាន់ពេលវេលាចំពោះតម្រូវការសិក្សារបស់កុមារនៅក្នុងសហគមន៍៕

ការិយាល័យយុវជននៃមន្ទីរអប់រំ យុវជន និងកីឡា ស្រុកភ្នំក្រវាញ បានបើកវគ្គបណ្តុះបណ្ដាលដល់លោកនាយក នាយិកា និងលោកគ្រូអ្នកគ្រូទទួលបន្ទុកសរុប ៤៥នាក់ មកពីកម្រងសាលាសំរោង អនុវិទ្យាល័យ និងវិទ្យាល័យ។ វគ្គនេះមានគោលបំណង ពង្រឹងសមត្ថភាព និងប្រសិទ្ធភាពការងារក្រុមប្រឹក្សាកុមារ និងយុវជន ដើម្បីបណ្តុះវិន័យ សីលធម៌ និងភាពជាអ្នកដឹកនាំនៅតាមសាលារៀន។

សៀមរាប៖ នៅថ្ងៃទី៩ ខែកញ្ញា ឆ្នាំ២០២៦ ការិយាល័យយុវជន នៃមន្ទីរអប់រំ យុវជន និងកីឡាខេត្តពោធិ៍សាត់ បានដឹកនាំក្រុមក្មួយៗយុវជនជាសិស្សានុសិស្សមកពីវិទ្យាល័យពោធិ៍សាត់ ធ្វើដំណើរទៅចូលរួម «វគ្គបណ្ដុះជំនាញរៀបចំគម្រោងស្ដែម (STEM) ឆ្នាំ២០២៦» ដែលជាផ្នែកមួយនៃកម្មវិធីប្រកួតប្រជែងស្នាដៃយុវជនសតវត្សរ៍ទី២១ ឆ្នាំ២០២៦។ ព្រឹត្តិការណ៍បណ្តុះបណ្តាល និងប្រកួតប្រជែងនេះ ត្រូវបានរៀបចំឡើងនៅមជ្ឈមណ្ឌលជាតិយុវជន ស្ថិតក្នុងខេត្តសៀមរាប ក្រោមប្រធានបទយ៉ាងមានសារសំខាន់គឺ «STEM ក្នុងការកែច្នៃវត្ថុធាតុដើម»។ ការបញ្ជូនតំណាងយុវជនទៅចូលរួមនាឱកាសនេះ ធ្វើឡើងក្នុងគោលបំណងពង្រឹងសមត្ថភាព ចំណេះដឹង និងជំនាញការគិតបែបបច្ចេកវិទ្យា និងវិទ្យាសាស្ត្រ (STEM) ដល់សិស្សានុសិស្ស ដើម្បីឱ្យពួកគាត់អាចច្នៃប្រឌិតវត្ថុធាតុដើមឱ្យក្លាយជាប្រយោជន៍ និងត្រៀមលក្ខណៈសម្បត្តិគ្រប់គ្រាន់ក្នុងការចូលរួមប្រកួតប្រជែងស្នាដៃយុវជនសតវត្សរ៍ទី២១ ប្រកបដោយទំនុកចិត្ត និងប្រសិទ្ធភាព៕