ព័ត៌មានក្នុងខេត្ត

ពោធិ៍សាត់៖ គម្រោង EMPower បាន និងកំពុងបន្តដើរតួនាទីយ៉ាងសំខាន់ក្នុងការលើកកម្ពស់ និងបង្កើនកម្រិតជីវភាពរស់នៅរបស់ប្រជាពលរដ្ឋ តាមរយៈការចូលរួមកាត់បន្ថយអត្រាភាពក្រីក្រ និងឆ្លើយតបទៅនឹងតម្រូវការអាទិភាពជាក់ស្តែងនៅក្នុងមូលដ្ឋាន។ តាមរយៈការអនុវត្តគម្រោងនេះ ប្រជាពលរដ្ឋសរុបចំនួន ៨៣៩ គ្រួសារ ដែលអញ្ជើញមកពីឃុំចំនួន ៣ រួមមាន ឃុំត្រពាំងជង ឃុំស្នាមព្រះ និងឃុំខ្នារទទឹង នៃស្រុកបាកាន ខេត្តពោធិ៍សាត់ ទទួលបានការគាំទ្រដោយផ្ទាល់ ដើម្បីដោះស្រាយបញ្ហាប្រឈមបានទាន់ពេលវេលា និងជំរុញឱ្យជីវភាពគ្រួសារកាន់តែប្រសើរឡើងជាលំដាប់៕

ពោធិ៍សាត់៖ លោកចៅសង្កាត់បន្ទាយដី រួមជាមួយក្រុមប្រឹក្សាសង្កាត់ បានដឹកនាំកម្លាំងអាជ្ញាធរភូមិទាំង ១២ ភូមិ រួមមាន មេភូមិ អនុភូមិ និងសមាជិកភូមិ ចុះធ្វើសកម្មភាពអនាម័យ និងសម្អាតបរិស្ថានដោយផ្ទាល់ នៅតាមដងផ្លូវលេខ ៣០៣ និងក្នុងភូមិបណ្តុះសណ្តែក សង្កាត់បន្ទាយដី ក្រុងពោធិ៍សាត់ នាចុងសប្តាហ៍ ថ្ងៃទី២៩ ខែសីហា ឆ្នាំ២០២៦ ។ ក្នុងយុទ្ធនាការនេះ ក្រុមការងារបានរួមគ្នាកាប់ឆ្ការព្រៃ និងសម្អាតសំរាមនៅតាមដងផ្លូវ ដើម្បីលើកកម្ពស់សោភ័ណភាពមូលដ្ឋានឱ្យមានភាពស្រស់ស្អាត ព្រមទាំងចូលរួមចំណែកការពារសុខភាពជូនប្រជាពលរដ្ឋ។ ជាមួយគ្នានេះ អាជ្ញាធរក៏បានអំពាវនាវដល់បងប្អូនប្រជាពលរដ្ឋទាំងអស់ ឱ្យចូលរួមសហការទុកដាក់សំរាមឱ្យបានត្រឹមត្រូវ និងប្រកបដោយអនាម័យខ្ពស់៕

ពោធិ៍សាត់៖ លោក គិត ផល អនុប្រធានក្តាប់រួមមន្ទីរធនធានទឹក និងឧតុនិយមខេត្តពោធិ៍សាត់ រួមជាមួយមន្ត្រីជនបង្គោល បានចុះផ្សព្វផ្សាយ និងពង្រឹងការងារគណៈកម្មាធិការសហគមន៍កសិករប្រើប្រាស់ទឹក (ស.ក.ប.ទ.) ក្រូចសើច និងបឹងកន្សែង ស្ថិតក្នុងស្រុកបាកាន ខេត្តពោធិ៍សាត់ នាថ្ងៃទី២៨ ខែសីហា ឆ្នាំ២០២៦ ។ ក្នុងបេសកកម្មនេះ ក្រុមការងារបានអនុវត្តសកម្មភាពសំខាន់ៗរួមមាន៖ ជួបប្រជុំជាមួយអាជ្ញាធរមូលដ្ឋានភូមិ-ឃុំ និងគណៈកម្មាធិការ ស.ក.ប.ទ. ពាក់ព័ន្ធនឹងការងារប្រព័ន្ធធារាសាស្ត្រទាំងពីរ, ណែនាំពីផែនការសកម្មភាពក្នុងការគ្រប់គ្រង និងបែងចែកទឹក ព្រមទាំងបង្ហាញពីលក្ខន្តិកៈប្រើប្រាស់ទឹកសម្រាប់សមាជិក, ផ្តល់ការហ្វឹកហ្វឺនលើមេរៀនសំខាន់ៗចំនួន ៥ រួមមាន៖ ការងាររដ្ឋបាល, ហិរញ្ញវត្ថុ, ការគ្រប់គ្រងទឹក, ការបែងចែកទឹក និងការអនុវត្តវិធីសាស្ត្រ PIMD (ការគ្រប់គ្រងប្រព័ន្ធធារាសាស្ត្រដោយមានការចូលរួមពីកសិករ) ដល់ក្រុមការងារមូលដ្ឋាន៕

លោកស្រី សន្យាអ៊ែលមើ ដេតថែលបាលឆ័រ ប្រធានស្ដីទី SDC ប្រចាំកម្ពុជា បានដឹកនាំប្រតិភូអន្តរជាតិ (Swisscontact, ILO, UNESCO, UNICEF, UNIDO) ចុះទស្សនកិច្ចនៅវិទ្យាស្ថានពហុបច្ចេកទេសខេត្តពោធិ៍សាត់ និងក្រុមហ៊ុន មីនេបៀ ដោយមានការទទួលស្វាគមន៍ពីលោក រុន សារី អភិបាលរងខេត្ត និងតំណាងអាជ្ញាធរ វិស័យឯកជនពាក់ព័ន្ធ នៅថ្ងៃទី២៨ ខែសីហា ឆ្នាំ២០២៦ ។

ពោធិ៍សាត់៖ ថ្នាក់ដឹកនាំ និងមន្ត្រីពាក់ព័ន្ធនៃរដ្ឋបាលខេត្តពោធិ៍សាត់ បានអញ្ជើញចូលរួមកិច្ចប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈប្រព័ន្ធវីដេអូ Zoom នាព្រឹកថ្ងៃទី២៨ ខែសីហា ឆ្នាំ២០២៦ នៅសាលប្រជុំសាលាខេត្តពោធិ៍សាត់។ កិច្ចប្រជុំពេញអង្គនេះ ធ្វើឡើងដើម្បីពិភាក្សា ពិនិត្យ និងអនុម័តលើរបៀបវារៈ សេចក្តីព្រាងច្បាប់ និងវិធានការសំខាន់ៗរបស់រាជរដ្ឋាភិបាល ក្នុងការបន្តជំរុញការអភិវឌ្ឍសេដ្ឋកិច្ច សង្គម និងការគ្រប់គ្រងរដ្ឋបាលឱ្យកាន់តែមានប្រសិទ្ធភាពខ្ពស់៕

ពោធិ៍សាត់៖ លោក ឆាយ គឹមម៉ុង អភិបាលស្រុកបាកាន បានដឹកនាំរដ្ឋបាលឃុំចំនួន៥ ដែលស្ថិតនៅតាមបណ្តោយផ្លូវជាតិលេខ៥ រួមមាន ឃុំស្វាយដូនកែវ អូរតាប៉ោង បឹងខ្នារ ត្រពាំងជង និងឃុំស្នាមព្រះ ស្រុកបាកាន ខេត្តពោធិ៍សាត់ បានចុះកាត់កាត់កាប់ និងតុបតែងមែកឈើតាមទ្រូងផ្លូវសាធារណៈ។ សកម្មភាពនេះ ធ្វើឡើងក្នុងគោលបំណងលើកកម្ពស់ និងសោភ័ណភាពតាមដងផ្លូវ ព្រមទាំងសម្រួលដល់ចរាចរណ៍ បង្កើនកម្រិតមើលឃើញ និងទប់ស្កាត់គ្រោះថ្នាក់ផ្សេងៗ ដែលអាចកើតមានជាយថាហេតុចំពោះអ្នកធ្វើដំណើរតាមផ្លូវជាតិលេខ៥ ក្នុងដែនសមត្ថកិច្ចស្រុកបាកាន៕

ពោធិ៍សាត់៖ លោក កេង ចាន់ធឿន អភិបាលរង​ក្រុង បាន​ដឹកនាំ​ក្រុមការងារ​ជំនាញ រួមជាមួយ​អាជ្ញាធរ​មូលដ្ឋាន​ភូមិ-សង្កាត់ កងកម្លាំង​រាជអាវុធហត្ថ​ក្រុង និង​មន្ត្រី​ប៉ុស្តិ៍​នគរបាល​រដ្ឋបាល​រលាប បាន​ចុះ​ពិនិត្យ និង​វាស់វែង​កំណត់​ព្រំដី​ផ្លូវ​សាធារណៈ (ទំហំ​ទទឹង ៦​ម៉ែត្រ) ស្ថិតក្នុង​ភូមិ​ឆ្លងកាត់ ចុះ​ពី​ផ្លូវជាតិ​លេខ​១៥៥ នា​រសៀល​ថ្ងៃ​ទី​២៨ ខែសីហា ឆ្នាំ​២០២៦ ។ សកម្មភាព​ចុះ​វាស់វែង​នេះ ធ្វើឡើង​ក្នុង​គោលបំណង​រៀបចំ​ហេដ្ឋារចនាសម្ព័ន្ធ​ផ្លូវថ្នល់​ឱ្យ​មាន​របៀបរៀបរយ ការពារ​ការ​រំលោភបំពាន​ដី​ផ្លូវ​សាធារណៈ និង​សម្រួល​ដល់​ការធ្វើដំណើរ​របស់​ប្រជាពលរដ្ឋ​ក្នុង​មូលដ្ឋាន​ឱ្យ​កាន់តែ​ងាយស្រួល និង​សុវត្ថិភាព៕

ពោធិ៍សាត់៖ លោក ពៅ ពិសិដ្ឋ ប្រធាន​ក្រុមការងារ​ចុះ​មូលដ្ឋាន​សង្កាត់​ផ្ទះព្រៃ ព្រមទាំង​សមាជិក សមាជិកា​ក្រុមការងារ បាន​អញ្ជើញ​ចុះ​ជួប​សួរសុខទុក្ខ​សមាជិក​បក្ស​ចំនួន ១៥​គ្រួសារ ស្ថិតនៅ​ភូមិ​សំពៅមាស សង្កាត់​ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ។ ក្នុង​ឱកាស​ដ៏​ស្និទ្ធស្នាល​នោះ លោក​ប្រធាន​ក្រុមការងារ និង​ក្រុមការងារ ក៏បាន​នាំយក​នូវ​របស់​កំដរ​ដៃ និង​អំណោយ​មួយចំនួន ចែកជូន​ដល់​គ្រួសារ​សមាជិក​បក្ស​ទាំង ១៥​គ្រួសារ ដើម្បី​ចូលរួម​សម្រាល​ជីវភាព និង​បង្ហាញ​ពី​ការយកចិត្តទុកដាក់​យ៉ាង​ជិតស្និទ្ធ​ចំពោះ​បងប្អូន​នៅ​មូលដ្ឋាន៕

ពោធិ៍សាត់៖ សារមន្ទីរខេត្តពោធិ៍សាត់ បានទទួលស្វាគមន៍ភ្ញៀវទេសចរជាតិ និងអន្តរជាតិ ព្រមទាំងសិស្សានុសិស្សយ៉ាងច្រើនកុះករ ដែលបានអញ្ជើញមកចូលទស្សនា សិក្សាស្រាវជ្រាវ និងឈ្វេងយល់ពីប្រវត្តិសាស្ត្រ វប្បធម៌ ព្រមទាំងបេតិកភណ្ឌដ៏សម្បូរបែបរបស់ខេត្តពោធិ៍សាត់ នាថ្ងៃទី២៨ ខែសីហា ឆ្នាំ២០២៦ ។ សកម្មភាពនេះ បានស្តែងឱ្យឃើញពីការចាប់អារម្មណ៍កាន់តែខ្លាំងពីសំណាក់មហាជន មកលើការអភិរក្ស និងការដាក់បង្ហាញនូវប្រដាប់ប្រដាប្រើប្រាស់បុរាណ វត្ថុបុរាណ និងពិព័រណ៍វប្បធម៌ផ្សេងៗ។ ក្រុមការងារបម្រើការនៅសារមន្ទីរ បានរៀបចំសម្រួលការចូលទស្សនា និងផ្តល់ការណែនាំយ៉ាងយកចិត្តទុកដាក់ ដើម្បីផ្តល់នូវចំណេះដឹង និងបទពិសោធន៍ល្អៗជូនដល់ភ្ញៀវទេសចរគ្រប់រូប៕

ពោធិ៍សាត់៖ លោកស្រី លឹម សុផល្លី អនុប្រធានមន្ទីរអប់រំ យុវជន និងកីឡា បានអញ្ជើញចូលរួមជាគណៈកម្មការចុះពិនិត្យ និងវាយតម្លៃប្រគល់-ទទួលដំណាក់កាលទី៣ លើការងារសាងសង់អគារសិក្សា ទីចាត់ការ បណ្ណាល័យ និងហេដ្ឋារចនាសម្ព័ន្ធគាំទ្រនានាក្នុងសាលារៀន ស្ថិតនៅបរិវេណវិទ្យាល័យប្រម៉ោយ និងអនុវិទ្យាល័យអន្លង់រាប នាថ្ងៃសុក្រ ទី២៨ ខែសីហា ឆ្នាំ២០២៦ ។ សមិទ្ធផលស្ដុកស្ដម្ភទាំងនេះ គឺជាអំណោយដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ក្នុងគោលបំណងលើកកម្ពស់វិស័យអប់រំ និងផ្តល់នូវបរិស្ថានសិក្សាដ៏សមរម្យសម្រាប់សិស្សានុសិស្សក្នុងមូលដ្ឋាន៕

ពោធិ៍សាត់៖ ចំកិច្ចប្រជុំមន្ត្រីសង្ឃប្រចាំខែ ដើមបីពិភាក្សា និងផ្សព្វផ្សាយនូវផែនការរៀបចំពិធីបុណ្យកាន់បិណ្ឌ និងបុណ្យភ្ជុំបិណ្ឌ ដែលជាពិធីបុណ្យប្រពៃណីជាតិដ៏ធំមួយរបស់ខ្មែរ ឱ្យប្រព្រឹត្តទៅដោយរលូន និងមានរបៀបរៀបរយ នាថ្ងៃទី២៨ ខែសីហា ឆ្នាំ២០២៦ នៅវត្តថ្លុកដង្កោ។ កិច្ចប្រជុំនេះ បានផ្តោតសំខាន់លើការរៀបចំសន្តិសុខ សណ្តាប់ធ្នាប់ អនាម័យ និងការសម្របសម្រួលដល់ពុទ្ធសាសនិកជនជិតឆ្ងាយដែលនឹងអញ្ជើញមកធ្វើបុណ្យទាន ដាក់បាត្រ និងរាប់បាត្រប្រគេនព្រះសង្ឃក្នុងរដូវកាលបុណ្យភ្ជុំបិណ្ឌខាងមុខនេះ ឱ្យបានសមរម្យ និងសទ្ធាជ្រះថ្លា៕

ពោធិ៍សាត់៖ លោក ចាន់ វិចិត្រ អភិបាលស្រុកតាលោសែនជ័យ បានចុះពិនិត្យ និងដោះស្រាយសម្របសម្រួលបើកផ្លូវ មួយខ្សែឡើងវិញដែលមានប្រវែង ១,១០០ម៉ែត្រ ជូនប្រជាពលរដ្ឋចំនួន ១៥គ្រួសារ រស់នៅភូមិព្រៃកន្លង់ ឃុំផ្ទះរុង ស្រុកតាលោសែនជ័យ ខេត្តពោធិ៍សាត់ នាថ្ងៃទី២៨ ខែសីហា ឆ្នាំ២០២៦ ។ លោកអភិបាលស្រុកបានបញ្ជាក់ថា កន្លងមកប្រជាពលរដ្ឋបានជួបការលំបាកយ៉ាងខ្លាំងក្នុងការធ្វើដំណើរ ដោយសារផ្លូវចាស់ត្រូវរងការរំលោភបំពានរហូតធ្វើឱ្យបាត់បង់។ ការអន្តរាគមន៍ និងបើកផ្លូវឡើងវិញនាពេលនេះ បានជួយសម្រួលដល់ការធ្វើដំណើរ និងការដឹកជញ្ជូនផ្សេងៗរបស់ប្រជាពលរដ្ឋក្នុងមូលដ្ឋានឱ្យបានងាយស្រួលឡើងវិញ៕