ព័ត៌មានក្នុងខេត្ត

ពោធិ៍សាត់៖ រដ្ឋបាលស្រុកកណ្តៀង បានរៀបចំសិក្ខាសាលាសមាហរណកម្មកម្មវិធីវិនិយោគបីឆ្នាំរំកិល ២០២៧-២០២៩ របស់រដ្ឋបាលស្រុក និងរដ្ឋបាលឃុំ សម្រាប់ឆ្នាំ២០២៦ នៅសាលប្រជុំកែវវិជ័យ សាលាស្រុកកណ្តៀង ក្រោមអធិបតីភាព លោក អ៊ុយ សុធាវី អភិបាលរងខេត្តពោធិ៍សាត់។ អង្គសិក្ខាសាលានេះ មានការចូលរួមពី លោក សុខ លីមុត ប្រធានក្រុមប្រឹក្សាស្រុក, លោក ណារ៉ា ចំរើន អភិបាលស្រុកកណ្តៀង, តំណាងមន្ទីរ-អង្គភាពជំនាញជុំវិញខេត្ត, មន្ត្រីរាជការស្រុក ព្រមទាំងថ្នាក់ដឹកនាំ និងមន្ត្រីរដ្ឋបាលឃុំទាំង៩ ក្នុងស្រុកកណ្តៀង។ គោលបំណងសំខាន់ៗនៃសិក្ខាសាលារួមមាន៖ ពិនិត្យ និងធ្វើសមាហរណកម្មសំណើគម្រោងអភិវឌ្ឍន៍ រៀបចំតាមលំដាប់អាទិភាពដើម្បីឆ្លើយតបនឹងតម្រូវការ និងបញ្ហាប្រឈមជាក់ស្តែងរបស់ប្រជាពលរដ្ឋ, ចៀសវាងការស្ទួនគម្រោង ធានាការប្រើប្រាស់ធនធានមានប្រសិទ្ធភាព និងពិនិត្យលទ្ធភាពអនុវត្តជាក់ស្តែង និងបង្កើនកិច្ចសម្របសម្រួលរវាងរដ្ឋបាលស្រុក ឃុំ និងមន្ទីរ-អង្គភាពជំនាញ ធានាឱ្យផែនការស៊ីសង្វាក់គ្នា ដើមី្បលើកកម្ពស់ការផ្តល់សេវាសាធារណៈឱ្យកាន់តែប្រសើរ៕

ពោធិ៍សាត់៖ លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ បានអញ្ជើញចូលរួមក្នុង «ទិវាស្រែកសិករ» ស្ដីពីបច្ចេកទេសដាំដុះស្រូវឆ្លាតវៃ ធន់នឹងការប្រែប្រួលអាកាសធាតុ និងការកាត់បន្ថយថ្លៃដើមផលិតកម្ម ដែលបានប្រព្រឹត្តទៅនៅភូមិកណ្តាល ឃុំឈើតុំ ស្រុកក្រគរ ខេត្តពោធិ៍សាត់ នាថ្ងៃទី២៦ ខែសីហា ឆ្នាំ២០២៦ ។ កម្មវិធីនេះមានការអញ្ជើញចូលរួមយ៉ាងកុះករពីសំណាក់មន្ត្រីជំនាញ មន្ត្រីកសិកម្មស្រុក អាជ្ញាធរមូលដ្ឋាន និងប្រជាកសិករក្នុងតំបន់ ព្រមទាំងមានការចូលរួមគាំទ្រឧបត្ថម្ភពីក្រុមហ៊ុនជីក្បាលក្របី ដើម្បីចូលរួមចំណែកលើកកម្ពស់ចំណេះដឹងផ្នែកកសិកម្ម និងបង្កើនទិន្នផលស្រូវជូនកសិករដោយចីរភាព៕

ពោធិ៍សាត់៖ លោក អ៊ន សុផល្លា អភិបាលស្រុកក្រគរ បានដឹកនាំក្រុមការងារបច្ចេកទេស ចុះពិនិត្យសកម្មភាពដាំដើមផ្កាលម្អតាមបណ្តោយផ្លូវជាតិលេខ៥ ដោយមានកិច្ចសហការរវាងក្រុមការងារថ្នាក់ខេត្ត និងអាជ្ញាធរឃុំត្នោតជុំ នារសៀលថ្ងៃទី២៦ ខែសីហា ឆ្នាំ២០២៦ ។ សកម្មភាពនេះ ធ្វើឡើង nhằmកែលម្អសភ័ណភាព បង្កើនគម្របបៃតង និងលើកកម្ពស់មុខមាត់ស្រុកក្រគរ ឱ្យកាន់តែមានភាពស្រស់ស្អាត ទាក់ទាញ សម្រាប់បងប្អូនប្រជាពលរដ្ឋ និងអ្នកធ្វើដំណើរឆ្លងកាត់តាមខ្សែផ្លូវជាតិដ៏សំខាន់មួយនេះ៕

ពោធិ៍សាត់៖ មន្ទីរទេសចរណ៍ខេត្តពោធិ៍សាត់ សហការជាមួយកម្មវិធីអភិវឌ្ឍន៍ជំនាញ (SDP) នៃអង្គការ Swisscontact និងទទួលបានការគាំទ្រពីក្រុមហ៊ុន Gourmet Beverage Solutions (GBS) បានរៀបចំពិធីបើកវគ្គបណ្ដុះបណ្ដាលបដិសណ្ឋារកិច្ចកម្ពុជា (HoKa) លើជំនាញ «ឆុងកាហ្វេកម្រិតមូលដ្ឋាន» ក្រោមអធិបតីភាព លោក មីលីយ៉ា សុវត្ថិធី ប្រធានមន្ទីរទេសចរណ៍ខេត្តពោធិ៍សាត់ នាព្រឹកថ្ងៃទី ២៦ ខែសីហា ឆ្នាំ ២០២៦ ។ វគ្គបណ្ដុះបណ្ដាលនេះប្រព្រឹត្តទៅរយៈពេល ៣ ថ្ងៃ (ចាប់ពីថ្ងៃទី ២៦ ដល់ថ្ងៃទី ២៨ ខែសីហា ឆ្នាំ ២០២៦) ដោយមានការចូលរួមពីមន្ត្រីរាជការ និងសិក្ខាកាមជាប្រតិបត្តិករ-សេវាករទេសចរណ៍សរុប ១២ រូប (ស្រី ១០ រូប)។ ខ្លឹមសារសិក្សាផ្តោតលើ ៩ ម៉ូឌុល៖ ចំណេះដឹងទូទៅ ប្រវត្តិកាហ្វេ, តួនាទីជាបារីស្តា, និងប្រភេទនៃគ្រាប់កាហ្វេ, បច្ចេកទេស និងការប្រតិបត្តិ ដំណើរការនៃការធ្វើកាហ្វេ, បញ្ជីរាយឈ្មោះកាហ្វេ, និងការអនុវត្តន៍ការឆុងកាហ្វេផ្ទាល់, ការគ្រប់គ្រង និងឧបករណ៍ នៃការប្រើប្រាស់-ថែទាំម៉ាស៊ីន និងឧបករណ៍ឆុងកាហ្វេ ព្រមទាំងដំណើរការនៃការបើក/បិទហាងកាហ្វេ៕

លោក ផាយ ឡេង អភិបាលក្រុងពោធិ៍សាត់ រួមជាមួយថ្នាក់ដឹកនាំពាក់ព័ន្ធ បានអញ្ជើញជាអធិបតីក្នុងពិធីចែកលិខិតសរសើរជូនសិស្សានុសិស្សឆ្នើម ចំណាត់ថ្នាក់លេខ១ ដល់លេខ៥ ប្រចាំឆ្នាំសិក្សា ២០២៥-២០២៦ នៅសាលាបឋមសិក្សាពោធិ៍សាត់ នាថ្ងៃទី២៦ ខែសីហា ឆ្នាំ២០២៦។

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យដោយផ្ទាល់លើសកម្មភាពត្រាស្សេរ និងស្ថាបនាផ្លូវតភ្ជាប់ទៅកាន់ «រមណីដ្ឋានទឹកធ្លាក់ថ្មចាំង» ដែលស្ថិតនៅក្នុងឃុំក្រពើពីរ ស្រុកវាលវែង ខេត្តពោធិ៍សាត់ កាលពីថ្ងៃទី២៦ ខែសីហា ឆ្នាំ២០២៦។ ការស្ថាបនាខ្សែផ្លូវនេះ គឺជាការបើកច្រកសរសៃឈាមសេដ្ឋកិច្ច និងទេសចរណ៍ដ៏មានសារសំខាន់ក្នុងការតភ្ជាប់ទៅកាន់តំបន់ទេសចរណ៍ធម្មជាតិជាច្រើនទៀតក្នុងស្រុកវាលវែង។ ហេដ្ឋារចនាសម្ព័ន្ធថ្មីនេះ នឹងជួយសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរឱ្យកាន់តែមានភាពងាយស្រួល រហ័ស និងមានសុវត្ថិភាព ស្របតាមទស្សនវិស័យ៖ «វាលវែង ដែនដីធម្មជាតិដ៏ស្រស់បំព្រង ផ្លូវកាន់តែប្រសើរ ការធ្វើដំណើរកាន់តែមានសុវត្ថិភាព ទេសចរណ៍កាន់តែរីកចម្រើន»៕

រដ្ឋបាលស្រុកក្រគរបានរៀបចំសិក្ខាសាលាសមាហរណកម្មកម្មវិធីវិនិយោគបីឆ្នាំរំកិល (២០២៧-២០២៩) ក្រោមអធិបតីភាព លោក ងួន ប៉ោសេង អភិបាលរងខេត្តពោធិ៍សាត់ ដោយមានការចូលរួមពីថ្នាក់ដឹកនាំរដ្ឋបាលស្រុក ក្រុមប្រឹក្សាស្រុក មន្ទីរជំនាញ និងមន្ត្រីរដ្ឋបាលឃុំទាំង១១។

ពោធិ៍សាត់៖ លោក ចាន់ វិចិត្រ អភិបាលស្រុកតាលោសែនជ័យ បានអញ្ជើញជាអធិបតីភាពក្នុងកម្មវិធីប្រកាសបិទផ្សាយជាសាធារណៈនូវឯកសារវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ នាព្រឹកថ្ងៃពុធ ទី២៦ ខែសីហា ឆ្នាំ២០២៦។ កម្មវិធីនេះប្រារព្ធឡើងក្នុងបរិវេណវត្តសិរីគន្ធា ដោយមានការចូលរួមពីប្រជាពលរដ្ឋប្រមាណ ៦០០នាក់ ។ ការបិទផ្សាយជាសាធារណៈនេះ គឺសម្រាប់ភូមិចំនួន ៧ ក្នុងស្រុកតាលោសែនជ័យ រួមមាន៖ ភូមិព្រៃរោង,ភូមិព្រៃតោ,ភូមិទួលជ្រាវ,ភូមិតាលោ,ភូមិត្រយ៉ងស,ភូមិឆ្នាល់មាន់,ភូមិសិរីគន្ធា។ ការរៀបចំកម្មវិធីនេះឡើង គឺដើម្បីផ្តល់ឱកាសជូនប្រជាពលរដ្ឋបានពិនិត្យផ្ទៀងផ្ទាត់ទិន្នន័យក្បាលដី និងព័ត៌មានពាក់ព័ន្ធនានា មុននឹងបន្តជំហានឆ្ពោះទៅ សម្រេចការចេញប័ណ្ណកម្មសិទ្ធិសម្គាល់ម្ចាស់អចលនវត្ថុជូនពួកគាត់ស្របតាមច្បាប់៕

ពិធីបុណ្យចែកទានជូនចាស់ជរាចំនួន ១១៥ នាក់ មកពីសង្កាត់ព្រៃញី ក្រុងពោធិ៍សាត់ ដែលរៀបចំដោយឯកឧត្តម ស៊ុយ សែម និងលោកជំទាវ នៅភូមិគ្រឹះក្នុងភូមិអូរចំបក់ ។

ពោធិ៍សាត់៖ លោក ធាង ឡេង អភិបាល នៃគណៈអភិបាលស្រុកវាលវែង បានអញ្ជើញឧបត្ថម្ភលូមុខកាត់ ១ម៉ែត្រ ចំនួន ២៧កង់ ជូនដល់រដ្ឋបាលឃុំក្រពើពីរ ដើម្បីយកទៅចាត់ចែងដាក់នៅលើកំណាត់ផ្លូវចូលទៅកាន់ «តំបន់ទឹកធ្លាក់ថ្មចាំង» ដែលកំពុងដំណើរកាសាងសង់ ស្ថិតនៅក្នុងភូមិក្រពើពីរលើ ឃុំក្រពើពីរ ស្រុកវាលវែង ខេត្តពោធិ៍សាត់ នាថ្ងៃទី២៥ ខែសីហា ឆ្នាំ២០២៦ ។ ការឧបត្ថម្ភសម្ភារប្រព័ន្ធរំដោះទឹកនាពេលនេះ គឺជាការចូលរួមចំណែកយ៉ាងសំខាន់ក្នុងការសម្រួលដល់ការកសាង និងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ ឱ្យកាន់តែមានភាពរឹងមាំ និងសម្រួលដល់ការធ្វើដំណើររបស់ប្រជាពលរដ្ឋ រួមទាំងភ្ញៀវទេសចរដែលអញ្ជើញទៅកម្សាន្តនៅតំបន់ទឹកធ្លាក់ថ្មចាំងផងដែរ៕

សៀមរាប៖ លោក លាង ទិតដ្ឋាន ប្រធានមន្ទីរព័ត៌មានខេត្តពោធិ៍សាត់ បានអញ្ជើញចូលរួមកិច្ចប្រជុំផ្សព្វផ្សាយ «ច្បាប់ស្តីពីវិសោធនកម្មច្បាប់ស្តីពីផ្លូវថ្នល់ និងលិខិតបទដ្ឋានគតិយុត្តពាក់ព័ន្ធនឹងការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់» ក្រោមអធិបតីភាពដ៏ខ្ពង់ខ្ពស់របស់ ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍។ កិច្ចប្រជុំនេះបានប្រព្រឹត្តទៅនៅសាលប្រជុំរដ្ឋបាលខេត្តសៀមរាប នៅថ្ងៃអង្គារ ទី២៥ ខែសីហា ឆ្នាំ២០១៦ ក្នុងគោលបំណងពង្រឹងការយល់ដឹងអំពីច្បាប់ និងបង្កើនប្រសិទ្ធភាពនៃការអនុវត្តវិធានការទប់ស្កាត់ការដឹកជញ្ជូនលើសទម្ងន់ ដើម្បីថែរក្សាហេដ្ឋារចនាសម្ព័ន្ធផ្លូវថ្នល់ឱ្យបានគង់វង្ស៕

ពោធិ៍សាត់៖ រដ្ឋបាលឃុំព្រងិល ស្រុកភ្នំក្រវាញ ខេត្តពោធិ៍សាត់ បានរៀបចំដាក់ស្លាកស្នាក់ការចុះឈ្មោះអ្នកស្នាក់នៅបណ្ដោះអាសន្នតាមបណ្ដាភូមិ ដើម្បីសម្រួលដល់ការគ្រប់គ្រងទិន្នន័យ និងសន្តិសុខក្នុងមូលដ្ឋាន រដ្ឋបាលឃុំព្រងិល បានឱ្យអាជ្ញាធរភូមិរៀបចំដាក់ស្លាក «ស្នាក់ការចុះឈ្មោះអ្នកមកស្នាក់នៅបណ្ដោះអាសន្ន» នៅតាមទីតាំងផ្ទះរបស់លោក-លោកស្រី មេភូមិគ្រប់ភូមិទាំងអស់ចំណុះឱ្យឃុំព្រងិល។ ការរៀបចំដាក់ស្លាកស្នាក់ការនេះ ធ្វើឡើងក្នុងគោលបំណងបង្កលក្ខណៈងាយស្រួលជូនប្រជាពលរដ្ឋ និងភ្ញៀវដែលមកស្នាក់នៅបណ្ដោះអាសន្ន ក្នុងការចូលរួមរាយការណ៍ និងចុះឈ្មោះស្នាក់នៅឱ្យបានត្រឹមត្រូវតាមនីតិវិធី៕