ព័ត៌មានក្នុងខេត្ត

ខេត្តពោធិ៍សាត់៖ លោកព្រឹទ្ធាចារ្យ អួន យ៉ង់ ប្រធានក្រុមប្រឹក្សាស្រុកវាលវែង និងលោក ធាង ឡេង អភិបាលនៃគណៈអភិបាលស្រុកវាលវែង បានអញ្ជើញចូលរួមជាអធិបតីក្នុងកម្មវិធីក្រុងពាលី ដើម្បីបើកដំណើរការចាក់ប្លង់សេព្រះវិហារ វត្តគិរីបុទុម្ពិសី (ហៅវត្តអន្លង់រាប) ស្ថិតក្នុងភូមិចំការជ្រៃខាងជើង ឃុំអន្លង់រាប ស្រុកវាលវែង នាព្រឹកថ្ងៃទី០១ ខែកក្កដា ឆ្នាំ២០២៦នេះ។ ពិធីនេះក៏មានការអញ្ជើញ និងនិមន្តចូលរួមពីសំណាក់ សមាជិកក្រុមប្រឹក្សាស្រុក លោក-លោកស្រីប្រធាន អនុប្រធានការិយាល័យជុំវិញស្រុក អាជ្ញាធរមូលដ្ឋាន ព្រមទាំងព្រះចៅអធិការវត្ត អាចារ្យ គណៈកម្មការវត្ត និងបងប្អូនពុទ្ធបរិស័ទចំណុះជើងវត្តយ៉ាងកុះករ។ ពិធីក្រុងពាលីនេះប្រព្រឹត្តទៅតាមគន្លងប្រពៃណីព្រះពុទ្ធសាសនា ដើម្បីបួងសួងសុំសេចក្តីសុខចម្រើន និងជានិមិត្តរូបនៃការចាប់ផ្តើមការដ្ឋានសំណង់ព្រះវិហារថ្មីនេះ ឱ្យដំណើរការទៅដោយរលូន សុវត្ថិភាព ដើម្បីទុកជាទីសក្ការបូជារបស់ពុទ្ធបរិស័ទ និងជួយលើកកម្ពស់វិស័យព្រះពុទ្ធសាសនា ដែលជាសាសនារបស់រដ្ឋឱ្យកាន់តែរីកចម្រើនថែមទៀតនៅក្នុងមូលដ្ឋាន៕

កងកម្លាំងនគរបាលរដ្ឋបាលគឺជាកម្លាំងនៅជួរមុខ ក្នុងការការពារសន្តិសុខ និងបម្រើប្រជាពលរដ្ឋ។ មន្ត្រីគ្រប់រូបត្រូវប្រកាន់ខ្ជាប់នូវវិន័យ និងក្រមសីលធម៌វិជ្ជាជីវៈ ដើម្បីបន្តពង្រឹងទំនុកចិត្តរបស់ប្រជាពលរដ្ឋចំពោះកងកម្លាំងនគរបាលជាតិ។

ស្រុកតាលោសែនជ័យ៖ លោក អ៊ុក សុខា អភិបាលរងស្រុក តំណាងលោកអភិបាលស្រុក និងជាប្រធានសមាគមអតីតយុទ្ធជន និងនិវត្តជនកម្ពុជាស្រុកតាលោសែនជ័យ បានដឹកនាំក្រុមការងារសមាគម ព្រមទាំងអាជ្ញាធរមូលដ្ឋានឃុំ-ភូមិ ចុះសួរសុខទុក្ខ និងនាំយកថវិកាបេឡាមរណៈសង្គ្រោះ ទៅប្រគល់ជូនគ្រួសារសពអតីតយុទ្ធជនចំនួន ២គ្រួសារ រួមមាន៖ លោកស្រី អ៊ុន គីម រស់នៅភូមិតាសាស់ ឃុំផ្ទះរុង និងលោក ហង្ស ឡាំ រស់នៅភូមិសិរីគន្ធា ឃុំតាលោ។ លោក អ៊ុក សុខា បានពាំនាំនូវការសាកសួរសុខទុក្ខ និងការចូលរួមរំលែកទុក្ខយ៉ាងក្រៀមក្រំពីសំណាក់ថ្នាក់ដឹកនាំ ជូនចំពោះក្រុមគ្រួសារសព។ ទន្ទឹមនឹងនោះ ថវិកាបេឡាមរណៈសង្គ្រោះដែលបានប្រគល់ជូននាពេលនេះ គឺជាការបង្ហាញពីការយកចិត្តទុកដាក់ខ្ពស់ និងការដឹងគុណចំពោះគុណបំណាច់របស់បងប្អូនអតីតយុទ្ធជន ដែលបានលះបង់ដើម្បីបុព្វហេតុជាតិមាតុភូមិកន្លងមក ក៏ដូចជាការជួយសម្រាលបន្ទុកថវិការបស់ក្រុមគ្រួសារក្នុងការរៀបចំពិធីបុណ្យសពទៅតាមគន្លងប្រពៃណីផងដែរ៕

ខេត្តពោធិ៍សាត់៖ ថ្នាក់ដឹកនាំ និងមន្ត្រីរាជការនៃមន្ទីរផែនការខេត្តពោធិ៍សាត់ បានចុះយុទ្ធនាការប្រមូលទិន្នន័យព័ត៌មានរដ្ឋបាលមន្ទីរ អង្គភាព និងរដ្ឋបាលថ្នាក់ក្រោមជាតិ នៅតាមបណ្តាមន្ទីរ-អង្គភាពនានា ជុំវិញខេត្តពោធិ៍សាត់ កាលពីថ្ងៃទី៣០ ខែមិថុនា ឆ្នាំ២០២៦។ សកម្មភាពចុះប្រមូលទិន្នន័យនេះ ធ្វើឡើងក្នុងគោលបំណងចងក្រង និងបច្ចុប្បន្នភាពរាល់ព័ត៌មានរដ្ឋបាល និងស្ថិតិសំខាន់ៗនៅតាមស្ថាប័នថ្នាក់ក្រោមជាតិ។ ទិន្នន័យដែលប្រមូលបានទាំងនេះ នឹងត្រូវយកទៅប្រើប្រាស់ជាមូលដ្ឋានគ្រឹះដ៏មានសារៈសំខាន់ សម្រាប់ការវិភាគ វាយតម្លៃ ក៏ដូចជាបម្រើឱ្យការងាររៀបចំផែនការអភិវឌ្ឍន៍ខេត្តឱ្យចំគោលដៅ និងមានប្រសិទ្ធភាពខ្ពស់ ស្របតាមគោលនយោបាយរបស់រាជរដ្ឋាភិបាល៕

ពោធិ៍សាត់៖ ការិយាល័យស្ថិតិវិទ្យាសាស្ត្រ បច្ចេកវិទ្យា និងនវានុវត្តន៍ សហការជាមួយការិយាល័យស្ថិតិ បានរៀបចំកិច្ចប្រជុំពិភាក្សា និងណែនាំបង្ហាញស្តីពីការប្រមូលទិន្នន័យតាមវិស័យ ក្នុងគោលបំណងយកទៅគណនាផលិតផលសរុបក្នុងស្រុក (GDP) នាថ្ងៃទី០១ ខែកក្កដា ឆ្នាំ២០២៦ នេះ ។ កិច្ចប្រជុំនេះរៀបចំឡើងដើម្បីពង្រឹងសមត្ថភាព និងតម្រង់ទិសដល់មន្ត្រីជំនាញក្នុងការប្រមូលទិន្នន័យឱ្យបានគ្រប់ជ្រុងជ្រោយ ត្រឹមត្រូវ និងទាន់ពេលវេលាទៅតាមវិស័យនីមួយៗ។ ទិន្នន័យទាំងនេះ គឺជាមូលដ្ឋានគ្រឹះដ៏មានសារៈសំខាន់បំផុត ក្នុងការគណនា និងវាយតម្លៃលើកំណើនសេដ្ឋកិច្ចជាតិ (GDP) ឱ្យមានភាពច្បាស់លាស់ និងស្តង់ដារ សម្រាប់បម្រើឱ្យការរៀបចំគោលនយោបាយ និងការអភិវឌ្ឍប្រទេសជាតិ៕

ស្រុកភ្នំក្រវាញ៖ លោក ធាម សុផាត អភិបាលនៃគណៈអភិបាលស្រុកភ្នំក្រវាញ នាព្រឹកថ្ងៃទី០១ ខែកក្កដា ឆ្នាំ២០២៦ នេះ បានចុះពិនិត្យផ្ទាល់នូវការរៀបចំផ្លាស់ប្តូរទីតាំងខ្ចុះ និងទីតាំងចំណតរថយន្ត នៅរមណីយដ្ឋានកោះទឹកឱប ស្ថិតក្នុងឃុំព្រងិល។ ការចុះពិនិត្យ និងរៀបចំសណ្ដាប់ធ្នាប់ឡើងវិញនេះ គឺដើម្បីធានាបាននូវរបៀបរៀបរយ សោភ័ណភាព និងភាពងាយស្រួល ក្នុងការត្រៀមលក្ខណៈទទួលស្វាគមន៍បងប្អូនប្រជាពលរដ្ឋ ក៏ដូចជាកីឡាករ-កីឡការិនី ដែលនឹងមកចូលរួមក្នុងព្រឹត្តិការណ៍រត់កម្សាន្ត នាថ្ងៃទី០៤ ខែកក្កដា ខាងមុខនេះ ឱ្យប្រព្រឹត្តទៅដោយរលូន និងមានសុវត្ថិភាពខ្ពស់៕

យុទ្ធនាការអប់រំផ្សព្វផ្សាយច្បាប់ស្ដីពីចរាចរណ៍ផ្លូវគោក ជូនដល់បងប្អូនប្រជាពលរដ្ឋ និងសិស្សានុសិស្ស ដែលជាអ្នកបេីកបរយានយន្តគ្រប់ប្រភេទនៅក្នុងមូលដ្ឋាន។

សេចក្តីជូនដំណឹងអំពីស្ថានភាពធាតុអាកាសខេត្តពោធិ៍សាត់ សម្រាប់ថ្ងៃទី ០១ ខែ កក្កដា ឆ្នាំ២០២៦

នៅក្នុងសប្តាហ៍នេះ បងប្អូនប្រជាពលរដ្ឋបានអញ្ជើញមកទទួលសេវារដ្ឋបាល និងសេវាសាធារណៈនានា យ៉ាងកុះករ និងប្រកបដោយទឹកមុខរីករាយ នៅការិយាល័យច្រកចេញចូលតែមួយស្រុកភ្នំក្រវាញ ខេត្តពោធិ៍សាត់។ ការិយាល័យច្រកចេញចូលតែមួយស្រុក តែងតែរង់ចាំស្វាគមន៍ និងផ្តល់សេវាជូនបងប្អូនប្រជាពលរដ្ឋយ៉ាងយកចិត្តទុកដាក់ ស្របតាមគោលការណ៍ «ធ្វើឱ្យបានឆាប់រហ័ស ងាយស្រួល មានតម្លាភាព និងប្រកបដោយប្រសិទ្ធភាព» ដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋក្នុងមូលដ្ឋាន លើការងារដោះស្រាយឯកសារគតិយុត្តផ្សេងៗ៕

ក្រសួងមហាផ្ទៃ ចេញសេចក្ដីជូនដំណឹង ស្ដីពីការដាក់ឱ្យអនុវត្តយន្តការផ្ដល់អត្តសញ្ញាណបណ្ណសញ្ជាតិខ្មែរ នៅតាមបណ្ដាស្នងការដ្ឋាននគរបាលរាជធានី ខេត្ត ជូនប្រជាពលរដ្ឋចំណាកស្រុក។ ឧទាហរណ៍៖ ពលរដ្ឋមានលំនៅឋានអចិន្ត្រៃយ៍នៅខេត្តរតនគិរី ដែលមកប្រកបរបរនៅខេត្តព្រៃវែង អាចស្នើសុំធ្វើអត្តសញ្ញាណបណ្ណនៅស្នងការដ្ឋាននគរបាលខេត្តព្រៃវែង ដោយពុំចាំបាច់ត្រឡប់ទៅធ្វើនៅខេត្តរតនគិរីឡើយ៕

ភ្នំពេញ៖ កិច្ចប្រជុំស្តីពីការផ្សព្វផ្សាយការដាក់ឱ្យអនុវត្តយន្តការផ្តល់អត្តសញ្ញាណបណ្ណសញ្ជាតិខ្មែរ នាព្រឹកថ្ងៃទី០១ ខែកក្កដា ឆ្នាំ២០២៦ នេះ នៅបន្ទប់ប្រជុំទីស្តីការក្រសួងមហាផ្ទៃ។ នៅក្នុងឱកាសនោះ លោក ញឹក បានខេង អភិបាលរងខេត្តពោធិ៍សាត់ តំណាងរបស់ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ ចូលរួមកិច្ចប្រជុំក្នុងគោលបំណងផ្សព្វផ្សាយ និងជម្រុញការអនុវត្តយន្តការថ្មី នៃការផ្តល់អត្តសញ្ញាណបណ្ណសញ្ជាតិខ្មែរ ឱ្យកាន់តែមានភាពងាយស្រួល ឆាប់រហ័ស និងមានប្រសិទ្ធភាពខ្ពស់ ជូនដល់ប្រជាពលរដ្ឋនៅតាមមូលដ្ឋាន៕

«ទិវាមច្ឆជាតិ ១ កក្កដា ២០២៦» ត្រូវបានប្រារព្ធឡើងក្នុងគោលបំណងបំផុសស្មារតី និងជម្រុញឱ្យប្រជាពលរដ្ឋទូទាំងប្រទេស ចូលរួមយ៉ាងសកម្មក្នុងការអភិរក្ស និងអភិវឌ្ឍធនធានជលផលឱ្យមានភាពគង់វង្សប្រកបដោយនិរន្តរភាព។ ជាមួយគ្នានេះ ទិវានេះក៏ជាការដាស់តឿនឱ្យរួមគ្នាបង្ការ និងទប់ស្កាត់រាល់ការនេសាទខុសច្បាប់គ្រប់ទម្រង់ សំដៅបង្កើនផលស្តុកមច្ឆជាតិនៅក្នុងធម្មជាតិឡើងវិញ។ ការចូលរួមរបស់បងប្អូនទាំងអស់គ្នា គឺដើម្បីធានាការផ្គត់ផ្គង់អាហារមូលដ្ឋានប្រចាំថ្ងៃ ធានាសន្តិសុខស្បៀង និងជួយទ្រទ្រង់ជីវភាពរស់នៅរបស់ប្រជាពលរដ្ឋយើងឱ្យកាន់តែប្រសើរឡើង។ «មានត្រី មានជីវិត! រួមគ្នាការពារព្រៃលិចទឹក និងមច្ឆជាតិខ្មែរ!»