ពិធីក្រុងពាលី បើកដំណើរការចាក់ប្លង់សេព្រះវិហារ វត្តគិរីបុទុម្ពិសី (វត្តអន្លង់រាប)
ខេត្តពោធិ៍សាត់៖ លោកព្រឹទ្ធាចារ្យ អួន យ៉ង់ ប្រធានក្រុមប្រឹក្សាស្រុកវាលវែង និងលោក ធាង ឡេង អភិបាលនៃគណៈអភិបាលស្រុកវាលវែង បានអញ្ជើញចូលរួមជាអធិបតីក្នុងកម្មវិធីក្រុងពាលី ដើម្បីបើកដំណើរការចាក់ប្លង់សេព្រះវិហារ វត្តគិរីបុទុម្ពិសី (ហៅវត្តអន្លង់រាប) ស្ថិតក្នុងភូមិចំការជ្រៃខាងជើង ឃុំអន្លង់រាប ស្រុកវាលវែង នាព្រឹកថ្ងៃទី០១ ខែកក្កដា ឆ្នាំ២០២៦នេះ។ ពិធីនេះក៏មានការអញ្ជើញ និងនិមន្តចូលរួមពីសំណាក់ សមាជិកក្រុមប្រឹក្សាស្រុក លោក-លោកស្រីប្រធាន អនុប្រធានការិយាល័យជុំវិញស្រុក អាជ្ញាធរមូលដ្ឋាន ព្រមទាំងព្រះចៅអធិការវត្ត អាចារ្យ គណៈកម្មការវត្ត និងបងប្អូនពុទ្ធបរិស័ទចំណុះជើងវត្តយ៉ាងកុះករ។ ពិធីក្រុងពាលីនេះប្រព្រឹត្តទៅតាមគន្លងប្រពៃណីព្រះពុទ្ធសាសនា ដើម្បីបួងសួងសុំសេចក្តីសុខចម្រើន និងជានិមិត្តរូបនៃការចាប់ផ្តើមការដ្ឋានសំណង់ព្រះវិហារថ្មីនេះ ឱ្យដំណើរការទៅដោយរលូន សុវត្ថិភាព ដើម្បីទុកជាទីសក្ការបូជារបស់ពុទ្ធបរិស័ទ និងជួយលើកកម្ពស់វិស័យព្រះពុទ្ធសាសនា ដែលជាសាសនារបស់រដ្ឋឱ្យកាន់តែរីកចម្រើនថែមទៀតនៅក្នុងមូលដ្ឋាន៕
