ព័ត៌មានក្នុងខេត្ត

ខេត្តពោធិ៍សាត់៖ កិច្ចប្រជុំ រៀបចំផែនការសកម្មភាពអាទិភាពរួម ឆ្នាំ២០២៦ របស់ក្រុមការងារស្នូលសម្របសម្រួលកិច្ចអន្តរាគមន៍សេវាផ្គត់ផ្គង់ទឹកស្អាត និងអនាម័យ ដែលគិតគូរដល់អាហាររូបត្ថម្ភ ខេត្តពោធិ៍សាត់ នាថ្ងៃថ្ងៃទី១៣ ខែកក្កដា ឆ្នាំ២០២៦។ កិច្ចប្រជុំនេះបានប្រព្រឹត្តទៅក្រោមអធិបតីភាព លោក លឹម សុខតូ អភិបាលរង នៃគណៈអភិបាលខេត្តពោធិ៍សាត់ នៅសាលប្រជុំថ្មកែវ (ជាន់ទី២) នៃអគាររដ្ឋបាលខេត្ត ដោយមានការអញ្ជើញចូលរួមពី ថ្នាក់ដឹកនាំមន្ទីរ-អង្គភាពពាក់ព័ន្ធ និងតំណាងអង្គការនានា សរុបចំនួន ១៣រូប (ស្រី ២រូប)។ កិច្ចប្រជុំនេះរៀបចំឡើងក្នុងគោលបំណងប្រមូលធាតុចូល និងកំណត់ទិសដៅការងារអាទិភាពសម្រាប់ឆ្នាំ២០២៦ ឆ្លើយតបទៅនឹងការផ្គត់ផ្គង់ទឹកស្អាត អនាម័យ និងការលើកកម្ពស់អាហាររូបត្ថម្ភក្នុងខេត្តឱ្យកាន់តែមានប្រសិទ្ធភាពខ្ពស់៕

ខេត្តពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ នៅព្រឹកថ្ងៃទី១៤ ខែកក្កដា ឆ្នាំ២០២៦ នេះបានអញ្ជើញចុះពិនិត្យស្ថានភាពទូទៅ និងការលក់ដូររបស់ប្រជាពលរដ្ឋ នៅតាមបណ្តោយច្រាំងស្ទឹងត្រើយខាងលិច (ចាប់ពីស្ពានថ្មចាស់ ដល់ស្ពានដែកផ្លូវរទេះភ្លើង) ដែលទើបនឹងកែលម្អ និងចាក់ដីពង្រីកបន្ថែមរួចរាល់ ។ គោលបំណងសំខាន់នៃការចុះពិនិត្យ៖ ពង្រឹងសណ្តាប់ធ្នាប់ រៀបចំទីតាំងលក់ដូរឱ្យមានរបៀបរៀបរយ ជៀសវាងការរំលោភយកចិញ្ចើមផ្លូវ ដែលបង្កការកកស្ទះចរាចរណ៍ និងប៉ះពាល់សោភ័ណភាព, អភិវឌ្ឍន៍វិស័យទេសចរណ៍ អោយប្រែក្លាយតំបន់ច្រាំងស្ទឹងនេះ ទៅជាចំណុចទាក់ទាញថ្មីមួយ សម្រាប់ប្រជាពលរដ្ឋ និងភ្ញៀវទេសចរមកកម្សាន្ត និងលម្ហែកាយ។ ក្នុងឱកាសនោះ ឯកឧត្តមអភិបាលខេត្ត បានកោតសរសើរដល់ក្រុមការងារ ព្រមទាំងបានអំពាវនាវដល់អាជីវករទាំងអស់ ឱ្យចូលរួមសហការជាមួយអាជ្ញាធរក្នុងការថែរក្សាអនាម័យ បរិស្ថាន ទុកដាក់សម្រាមឱ្យបានត្រឹមត្រូវ ដើម្បីរួមគ្នាលើកកម្ពស់មុខមាត់ក្រុងពោធិ៍សាត់។ សូមបញ្ជាក់ថា៖ គម្រោងកែលម្អ និងចាក់ដីពង្រីកច្រាំងស្ទឹងត្រើយខាងលិចនេះ គឺជាផ្នែកមួយនៃផែនការមេរបស់រដ្ឋបាលខេត្ត ក្នុងការកែប្រែសោភ័ណភាពក្រុងពោធិ៍សាត់ ឱ្យក្លាយជាទីក្រុងស្អាត និងគួរជាទីមនោរម្យ៕

នាយទាហាន នាយទាហានរង និងអាជ្ញាធរខេត្តពោធិ៍សាត់ បានដឹកនាំប្រតិភូចូលរួមដាក់កូរោនគោរពវិញ្ញាណក្ខន្ធ និងបំពាក់ឋានន្តរសក្តិជាកិច្ចបច្ឆាមរណៈជូនសពលោកនាយទោ គង់ សុភ័ក្ត្រ យុទ្ធជនកងការពារព្រំដែនលេខ៥០២ ដែលបានទទួលមរណភាពក្នុងអាយុ ២២ ឆ្នាំ ដោយគ្រោះថ្នាក់ពេលបំពេញបេសកកម្មនៅសមរភូមិមុខ។

ខេត្តពោធិ៍សាត់៖ នៅសាលប្រជុំទេពឧកញ៉ាឃ្លាំងមឿង មានរៀបចំកិច្ចប្រជុំផ្សព្វផ្សាយសារាចរណែនាំស្តីពីការរៀបចំផែនការយុទ្ធសាស្ត្រថវិកា និងនីតិវិធីបច្ចេកទេសនៃការរៀបចំគម្រោងថវិការបស់រដ្ឋបាលថ្នាក់ក្រោមជាតិ នៅព្រឹកថ្ងៃអង្គារ ទី១៤ ខែកក្កដា ឆ្នាំ២០២៦ នេះ។ កិច្ចប្រជុំនេះអញ្ជើញជាអធិបតីដោយ លោក ហៀម ឃួន អភិបាលរងខេត្តពោធិ៍សាត់ តំណាងឯកឧត្តម ខូយ រីដា អភិបាលខេត្ត, លោកស្រី មាស ច័ន្ទដាវណ្ណ អនុប្រធានលេខាធិការដ្ឋានក្រសួងសេដ្ឋកិច្ច និងហិរញ្ញវត្ថុ។ កិច្ចប្រជុំនេះធ្វើឡើងក្នុងគោលបំណងផ្សព្វផ្សាយនូវសារាចរណែនាំ លេខ០០៨ សហវ.ស.រ.ណ.អហក ចុះថ្ងៃទី១១ ខែមិថុនា ឆ្នាំ២០២៦ ដើម្បីតម្រង់ទិសលើការរៀបចំផែនការយុទ្ធសាស្ត្រថវិកា រាជធានី-ខេត្ត សម្រាប់ឆ្នាំ២០២៧-២០២៨ ព្រមទាំងការអនុវត្តនីតិវិធីបច្ចេកទេសឱ្យកាន់តែមានប្រសិទ្ធភាពខ្ពស់៕

ឯកឧត្តម ខូយ​ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យស្ថានភាពសាលារៀន និងដំណើរការសិក្សារបស់សិស្សានុសិស្ស នៅសាលាបឋមសិក្សាថ្មដា និងអនុវិទ្យាល័យ ហ៊ុន សែន ថ្មដា ដែលស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ នៅព្រឹកថ្ងៃទី១៣ ខែកក្កដា ឆ្នាំ២០២៦។ ឃុំថ្មដា គឺជាតំបន់ខ្សែបន្ទាត់ព្រំដែនដ៏សំខាន់មួយ ដែលជាសមរភូមិក្តៅ និងរងការរំលោភបំពានពីសំណាក់ភាគីថៃឈ្លានពាន។ ការអញ្ជើញចុះជួបសំណេះសំណាល និងពិនិត្យស្ថានភាពជាក់ស្តែងពីសំណាក់ឯកឧត្តមអភិបាលខេត្ត នាពេលនេះ គឺដើម្បី៖ ពិនិត្យលើហេដ្ឋារចនាសម្ព័ន្ធសិក្សា និងតម្រូវការចាំបាច់នានារបស់សាលារៀនទាំងពីរ, ផ្តល់ការលើកទឹកចិត្ត ដល់ក្មួយៗសិស្សានុសិស្ស ក៏ដូចជាលោកគ្រូ-អ្នកគ្រូ ដែលកំពុងបំពេញភារកិច្ចបង្រៀននៅតំបន់ដាច់ស្រយាលជួរមុខ។ ពង្រឹងស្មារតីស្នេហាជាតិ និងការពារទឹកដី តាមរយៈការអប់រំ និងការបង្កើនចំណេះដឹងដល់កូនចៅប្រជាពលរដ្ឋនៅតាមបណ្តោយព្រំដែន។ សកម្មភាពនេះបានបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំខេត្ត លើវិស័យអប់រំនៅតំបន់ព្រំដែន ដែលជាផ្នែកមួយក្នុងការអភិវឌ្ឍ និងការពារបូរណភាពទឹកដីឱ្យបានរឹងមាំតាមរយៈការបណ្តុះបណ្តាលធនធានមនុស្ស៕

លោក ហៀម ឃួន អភិបាលរងខេត្តពោធិ៍សាត់ តំណាងឯកឧត្តម ខូយ រីដា បានដឹកនាំប្រតិភូចូលរួមគោរពវិញ្ញាណក្ខន្ធ និងរំលែកមរណទុក្ខលោកពលទោ គង់ សុភ័ក្រ្ត យុទ្ធជនកងការពារព្រំដែនលេខ៥០២ ដែលបានទទួលមរណភាពក្នុងអាយុ ២២ ឆ្នាំ ដោយគ្រោះថ្នាក់ពេលបំពេញបេសកកម្មនៅសមរភូមិជួរមុខ នារសៀលថ្ងៃទី១៣ ខែកក្កដា ឆ្នាំ២០២៦។

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះជួបសំណេះសំណាល សាកសួរសុខទុក្ខ និងស្វែងយល់ពីស្ថានភាពរស់នៅ ក៏ដូចជាការប្រកបរបរទទួលទានរបស់បងប្អូនប្រជាពលរដ្ឋ និងអាជីវករលក់ដូរ (ផ្សារក្រមួន) នាព្រឹកថ្ងៃទី១៣ ខែកក្កដា ឆ្នាំ២០២៦។ សកម្មភាពចុះសាកសួរសុខទុក្ខផ្ទាល់នេះ ធ្វើឡើងនៅម្តុំចំការម៉ៃសាក់ តាមបណ្តោយដងផ្លូវលេខ ១៥៥ ស្ថិតក្នុងភូមិអូរថ្កូវ សង្កាត់រលាប ក្រុងពោធិ៍សាត់ ខេត្តពោធិ៍សាត់ ដើម្បីបង្កើនភាពស្និទ្ធស្នាល និងក្តាប់ជាប់នូវតម្រូវការ ក៏ដូចជាបញ្ហាប្រឈមនានារបស់ប្រជាពលរដ្ឋនៅក្នុងមូលដ្ឋាន៕

ពហុកីឡដ្ឋានសម្តេចតេជោក្រគរ ស្ថិតក្នុងឃុំស្នាអន្សា ស្រុកក្រគរ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ បានបង្ហាះចក្ខុវិស័យអភិវឌ្ឍន៍ខេត្តនិងកសាងសមត្ថភាពយុវជន ជាពិសេសសិស្សានុសិស្ស រួមគ្នាដើម្បីអនាគត។

ពោធិ៍សាត់៖ កិច្ចប្រជុំផ្សព្វផ្សាយស្តីពីការអនុវត្តគម្រោងលើកកម្ពស់ជីវភាពប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹងភាពធន់ (EMPOWER) នៅសាលាស្រុកបាកាន កាលពីថ្ងៃសៅរ៍ ទី១១ ខែកក្កដា ឆ្នាំ២០២៦។ កិច្ចប្រជុំនេះបានប្រព្រឹត្តទៅក្រោមអធិបតីភាព ឯកឧត្តម ទី នរិន្ទ រដ្ឋលេខាធិការប្រចាំការក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាលចុះជួយស្រុកបាកាន ព្រមទាំង លោកជំទាវ វ៉ាន់ សែនពិសី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីអាជ្ញាធរមូលដ្ឋាន និងប្រជាពលរដ្ឋជិត ១,០០០នាក់។ គម្រោង EMPOWER នេះ នឹងផ្តោតការយកចិត្តទុកដាក់គាំទ្រដល់ប្រជាពលរដ្ឋក្រីក្រនៅក្នុងតំបន់គោលដៅនៃឃុំចំនួន៣ គឺ ឃុំខ្នារទទឹង ឃុំត្រពាំងជង និងឃុំស្នាមព្រះ ដោយជំរុញលើសកម្មភាពផលិតកម្មចំនួន២ សំខាន់ៗ រួមមាន៖ ការដាំបន្លែផ្ទះសំណាញ់ និងការចិញ្ចឹមមាន់ស្រែ។ ក្នុងឱកាសនោះ ក្រុមការងារក៏បានធ្វើការផ្សព្វផ្សាយ និងចែកខិតប័ណ្ណព័ត៌មានរបស់គម្រោងទៅដល់ប្រជាពលរដ្ឋផ្ទាល់ ដើម្បីត្រៀមខ្លួនចូលរួមអនុវត្តគម្រោងឱ្យទទួលបានជោគជ័យ និងមានប្រសិទ្ធភាពខ្ពស់៕

ទីស្នាក់ការគណបក្សប្រជាជនកម្ពុជាខេត្តពោធិ៍សាត់ ឯកឧត្តម បណ្ឌិត ជ្រុន ថេរ៉ាវ៉ាត សមាជិកគណៈកម្មាធិការកណ្តាល អនុប្រធានយុវជនគណបក្សថ្នាក់កណ្តាល និងជាប្រធានគណៈប្រចាំការនៃគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្តាល តំណាងដ៏ខ្ពង់ខ្ពស់សម្តេចបវរធិបតី ហ៊ុន ម៉ាណែត អនុប្រធានគណបក្ស និងជាប្រធានយុវជនគណបក្សថ្នាក់កណ្តាល បានអញ្ជើញជាអធិបតីក្នុងពិធីជួបសំណេះសំណាល និងបើកវេទិកាពិភាក្សាជាមួយសមាជិក សមាជិកាយុវជនគណបក្សខេត្តពោធិ៍សាត់ ប្រមាណ១,៣០០នាក់។

(ពោធិ៍សាត់)៖ មន្ទីរព័ត៌មានខេត្តពោធិ៍សាត់ សហការជាមួយមន្ទីរអប់រំ យុវជន និងកីឡាខេត្ត បានរៀបចំពិធីយុទ្ធនាការប្រឆាំងព័ត៌មានក្លែងក្លាយ ជំហាន២ សម្រាប់ឆ្នាំ២០២៦ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»។ យុទ្ធនាការនេះត្រូវបានធ្វើឡើងនៅអនុវិទ្យាល័យ និងវិទ្យាល័យហ៊ុនសែនកណ្ដៀង ស្រុកកណ្តៀង ដោយមានការចូលរួមពីសិស្សានុសិស្ស ដែលជាក្រុមយុវជនប្រើប្រាស់សកម្មនូវបណ្តាញសង្គម សរុបប្រមាណជាង ១,០០០នាក់ នៅព្រឹកថ្ងៃទី១០ ខែកក្កដា ឆ្នាំ២០២៦។ ពិធីនេះត្រូវបានរៀបចំឡើងក្រោមអធិបតីភាពរួមមាន លោក លាង ទិតដ្ឋាន ប្រធានមន្ទីរព័ត៌មានខេត្តពោធិ៍សាត់ និងលោក ណារ៉ា ចំរើន អភិបាលនៃគណៈអភិបាលស្រុកកណ្ដៀង ព្រមទាំងមានការចូលរួមពីសំណាក់លោកនាយកវិទ្យាល័យ លោកគ្រូ និងអ្នកគ្រូផងដែរ។ យុទ្ធនាការជំហាន២ ឆ្នាំ២០២៦ នេះ រៀបចំឡើងក្នុងគោលបំណងសំខាន់ ដើម្បីពង្រឹងការយល់ដឹង បណ្តុះស្មារតី «អក្ខរកម្មព័ត៌មាន» និងរួមគ្នាទប់ស្កាត់ការរីករាលដាលនៃព័ត៌មានមិនពិតក្នុងស្រទាប់យុវវ័យ ព្រមទាំងជួយឱ្យពួកគាត់មានភាពវៃឆ្លាតក្នុងការទទួល វិភាគ និងចែករំលែកព័ត៌មាននៅលើប្រព័ន្ធផ្សព្វផ្សាយសង្គមប្រកបដោយសុវត្ថិភាពខ្ពស់៕

(ពោធិ៍សាត់)៖ លោក ងួន ប៉ោសេង អភិបាលរងខេត្ត និងជាសមាជិកក្រុមប្រឹក្សាភិបាលរដ្ឋាករទឹកពោធិ៍សាត់ តំណាងឯកឧត្ដម ខូយ រីដា អភិបាលខេត្តពោធិ៍សាត់ បានអញ្ជើញចូលរួមជាអធិបតីក្នុង កិច្ចប្រជុំក្រុមប្រឹក្សាភិបាលរដ្ឋាករទឹកពោធិ៍សាត់ លើកទី១២ អាណត្តិទី១ ដែលបានប្រព្រឹត្តទៅនៅទីស្នាក់ការរដ្ឋាករទឹកពោធិ៍សាត់ ស្ថិតក្នុងក្រុងពោធិ៍សាត់ នៅព្រឹកថ្ងៃទី១០ ខែកក្កដា ឆ្នាំ២០២៦ នេះ។ កិច្ចប្រជុំដ៏មានសារៈសំខាន់នេះ បានលើកយករបៀបវារៈសំខាន់ៗចំនួន ៥ មកពិភាក្សា និងឆ្លង ក្នុងនោះរួមមាន៖ ការត្រួតពិនិត្យការងារសេសសល់ពីកិច្ចប្រជុំលើកទី១១, ការវាយតម្លៃលើរបាយការណ៍លទ្ធផលផលិតកម្ម-អាជីវកម្មទឹកស្អាតប្រចាំឆមាសទី១ ព្រមទាំងដាក់ចេញទិសដៅការងារសម្រាប់ត្រីមាសទី៣ ឆ្នាំ២០២៦ ខាងមុខ។ ទន្ទឹមនឹងនេះ អង្គប្រជុំក៏បានធ្វើបច្ចុប្បន្នភាពលើការងារលទ្ធកម្ម និងបានពិនិត្យយ៉ាងហ្មត់ចត់លើរបាយការណ៍ស្តីពីការអនុវត្តគម្រោងពង្រីកហេដ្ឋារចនាសម្ព័ន្ធទឹកស្អាតបន្ថែមសម្រាប់ខេត្តពោធិ៍សាត់ ដែលជាគម្រោងប្រើប្រាស់ថវិកាជាតិ ដើម្បីធានាបាននូវការផ្គត់ផ្គង់ទឹកស្អាតជូនប្រជាពលរដ្ឋឱ្យកាន់តែមានវិសាលភាពធំទូលាយ ប្រកបដោយគុណភាព និងនិរន្តរភាព៕