ព័ត៌មានក្នុងខេត្ត

(ពោធិ៍សាត់)៖ លោក ពៅ ពិសិដ្ឋ អភិបាលរងខេត្ត តំណាងដ៏ខ្ពង់ខ្ពស់ ឯកឧត្ដម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលស្រុកតាលោសែនជ័យ ចំនួន ០១រូប នារសៀលថ្ងៃទី០២ ខែកក្កដា ឆ្នាំ២០២៦។ ពិធីនេះត្រូវបានរៀបចំឡើងនៅសាលាស្រុកតាលោសែនជ័យ ដោយមានការចូលរួមពីសំណាក់ ថ្នាក់ដឹកនាំក្រុមប្រឹក្សា និងគណៈអភិបាលស្រុក តំណាងសាលាដំបូង និងអយ្យការអមសាលាដំបូងខេត្ត មន្ទីរ-អង្គភាពជុំវិញខេត្ត កងកម្លាំងប្រដាប់អាវុធ មន្ត្រីរាជការ លោកគ្រូ-អ្នកគ្រូ យុវជន និងបងប្អូនប្រជាពលរដ្ឋយ៉ាងច្រើនកុះករ។ ការប្រកាសចូលកាន់មុខតំណែងនេះ ធ្វើឡើងក្នុងគោលបំណងពង្រឹងរចនាសម្ព័ន្ធដឹកនាំ បង្កើនប្រសិទ្ធភាពការងាររដ្ឋបាល និងជំរុញការអភិវឌ្ឍមូលដ្ឋានស្រុកតាលោសែនជ័យឱ្យកាន់តែរីកចម្រើនបន្ថែមទៀត៕

(ពោធិ៍សាត់)៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលក្រុងពោធិ៍សាត់ ចំនួន២រូប នៅបរិវេណសាលាក្រុងពោធិ៍សាត់ ដោយមានការចូលរួមពីថ្នាក់ដឹកនាំខេត្ត មន្ទីរ-អង្គភាព កងកម្លាំងប្រដាប់អាវុធ និងមន្ត្រីរាជការយ៉ាងច្រើនកុះករ នាថ្ងៃទី០៣ ខែកក្កដា ឆ្នាំ២០២៦ ។ យោងតាមប្រកាសលេខ ៦៦៧៤.ប្រក របស់ក្រសួងមហាផ្ទៃ ចុះថ្ងៃទី០៨ ខែមិថុនា ឆ្នាំ២០២៦ សមាសភាពអភិបាលរងក្រុងពោធិ៍សាត់ដែលត្រូវប្រកាសចូលកាន់មុខតំណែងរួមមាន៖ លោកស្រី ខៀវ រ៉ានីង (អតីតអភិបាលរងស្រុកបាកាន) ត្រូវបានផ្ទេរភារកិច្ចមកជា អភិបាលរងក្រុងពោធិ៍សាត់។ លោក ភោគ សារិទ្ធ (អតីតអភិបាលរងស្រុកក្រគរ) ត្រូវបានផ្ទេរភារកិច្ចមកជា អភិបាលរងក្រុងពោធិ៍សាត់។ ពិធីនេះធ្វើឡើងដើម្បីបំពេញរចនាសម្ព័ន្ធដឹកនាំ និងពង្រឹងប្រសិទ្ធភាពការងារគ្រប់គ្រងរដ្ឋបាលនៅក្រុងពោធិ៍សាត់ឱ្យកាន់តែរីកចម្រើនបន្ថែមទៀត៕

(ពោធិ៍សាត់)៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្ត បានអញ្ជើញជាអធិបតីដ៏ខ្ពង់ខ្ពស់ ក្នុងពិធីប្រកាសតែងតាំងសមាសភាព សាខាសមាគមអតីតយុទ្ធជន និងនិវត្តជនកម្ពុជា ទាំង១១ឃុំ នៃស្រុកក្រគរ នាថ្ងៃទី០២ ខែកក្កដា ឆ្នាំ២០២៦ ។ ពិធីនេះត្រូវបានរៀបចំឡើងនៅបរិវេណសាលាស្រុកក្រគរ ក្នុងគោលបំណងពង្រឹងរចនាសម្ព័ន្ធដឹកនាំ និងបង្កើនប្រសិទ្ធភាពក្នុងការគ្រប់គ្រង គិតគូរពីសុខទុក្ខ ព្រមទាំងផ្តល់សេវាគាំពារសង្គមនានា ជូនដល់បងប្អូនអតីតយុទ្ធជន និងនិវត្តជននៅតាមមូលដ្ឋានផ្ទាល់ ឱ្យកាន់តែល្អប្រសើរឡើងបន្ថែមទៀត៕

លោក ញឹក បានខេង អភិបាលរងខេត្ត តំណាងឯកឧត្តម ខូយ រីដា អភិបាលខេត្តពោធិ៍សាត់ បានដឹកនាំកិច្ចប្រជុំតាមប្រព័ន្ធអនឡាញ (Zoom) ដោយមានការចូលរួមពីមន្ត្រីជំនាញនៃមន្ទីរ អង្គភាពពាក់ព័ន្ធជុំវិញខេត្ត ដើម្បីត្រួតពិនិត្យ និងវាយតម្លៃលើផលិតផលទំនិញនិងសេវាកម្មក្នុងមូលដ្ឋាន។ គណៈកម្មាធិការខេត្តបានសម្រេចជ្រើសរើសផលិតផលទំនិញ និងសេវាកម្មឆ្នើមចំនួន ១៣មុខ ដើម្បីដាក់សំណើសុំចុះបញ្ជីផ្លូវការជូន ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានគណៈកម្មាធិការជាតិជំរុញចលនាភូមិមួយផលិតផលមួយ ពិនិត្យនិងសម្រេច។

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំថ្នាក់ដឹកនាំ និងមន្ត្រីពាក់ព័ន្ធ ចូលរួមកិច្ចប្រជុំបូកសរុបលទ្ធផលការងារ ៦ខែដើមឆ្នាំ ប្រចាំឆមាសទី១ និងលើកទិសដៅអនុវត្តបន្តសម្រាប់ឆមាសទី២ ឆ្នាំ២០២៦ របស់គណៈអភិបាលរាជធានី-ខេត្ត នៅថ្ងៃទី០២ ខែកក្កដា ឆ្នាំ២០២៦ នេះ នៅសាលប្រជុំសាលាខេត្តពោធិ៍សាត់។ កិច្ចប្រជុំដ៏មានសារៈសំខាន់នេះ ប្រព្រឹត្តទៅតាមរយៈប្រព័ន្ធវីដេអូ Zoom Meeting ស្ថិតក្រោមអធិបតីភាពដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីឆ្លុះបញ្ចាំងពីសមិទ្ធផលការងាររដ្ឋបាល ការរក្សាសន្តិសុខសណ្តាប់ធ្នាប់សាធារណៈ និងការផ្តល់សេវាជូនប្រជាពលរដ្ឋនៅតាមមូលដ្ឋានទូទាំងប្រទេស ព្រមទាំងដាក់ចេញនូវទិសដៅយុទ្ធសាស្ត្រសម្រាប់អនុវត្តបន្តឱ្យកាន់តែមានប្រសិទ្ធភាព៕

គោលបំណងពង្រឹងសមត្ថភាពយល់ដឹង និងបង្កើនភាពស៊ាំដល់យុវជន ចំពោះការវាយលុកនៃព័ត៌មានមិនពិត ថ្ងៃទី០២ ខែកក្កដា ឆ្នាំ២០២៦ នៅបរិវេណវិទ្យាល័យពោធិ៍សាត់ បានរៀបចំពិធីផ្សព្វផ្សាយយុទ្ធនាការ «និយាយថាទេ ចំពោះព័ត៌មានក្លែងក្លាយ» ជំហានទី២ ជូនដល់សិស្សានុសិស្ស នៃវិទ្យាល័យពោធិ៍សាត់ ប្រមាណជាង១ពាន់នាក់។

ភ្នំពេញ៖ កិច្ចប្រជុំស្តីពីការផ្សព្វផ្សាយការដាក់ឱ្យអនុវត្តយន្តការផ្តល់អត្តសញ្ញាណបណ្ណសញ្ជាតិខ្មែរ នាព្រឹកថ្ងៃទី០១ ខែកក្កដា ឆ្នាំ២០២៦ នេះ នៅបន្ទប់ប្រជុំទីស្តីការក្រសួងមហាផ្ទៃ។ នៅក្នុងឱកាសនោះ លោក ញឹក បានខេង អភិបាលរងខេត្តពោធិ៍សាត់ តំណាងរបស់ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ ចូលរួមកិច្ចប្រជុំក្នុងគោលបំណងផ្សព្វផ្សាយ និងជម្រុញការអនុវត្តយន្តការថ្មី នៃការផ្តល់អត្តសញ្ញាណបណ្ណសញ្ជាតិខ្មែរ ឱ្យកាន់តែមានភាពងាយស្រួល ឆាប់រហ័ស និងមានប្រសិទ្ធភាពខ្ពស់ ជូនដល់ប្រជាពលរដ្ឋនៅតាមមូលដ្ឋាន៕

«ទិវាមច្ឆជាតិ ១ កក្កដា ២០២៦» ត្រូវបានប្រារព្ធឡើងក្នុងគោលបំណងបំផុសស្មារតី និងជម្រុញឱ្យប្រជាពលរដ្ឋទូទាំងប្រទេស ចូលរួមយ៉ាងសកម្មក្នុងការអភិរក្ស និងអភិវឌ្ឍធនធានជលផលឱ្យមានភាពគង់វង្សប្រកបដោយនិរន្តរភាព។ ជាមួយគ្នានេះ ទិវានេះក៏ជាការដាស់តឿនឱ្យរួមគ្នាបង្ការ និងទប់ស្កាត់រាល់ការនេសាទខុសច្បាប់គ្រប់ទម្រង់ សំដៅបង្កើនផលស្តុកមច្ឆជាតិនៅក្នុងធម្មជាតិឡើងវិញ។ ការចូលរួមរបស់បងប្អូនទាំងអស់គ្នា គឺដើម្បីធានាការផ្គត់ផ្គង់អាហារមូលដ្ឋានប្រចាំថ្ងៃ ធានាសន្តិសុខស្បៀង និងជួយទ្រទ្រង់ជីវភាពរស់នៅរបស់ប្រជាពលរដ្ឋយើងឱ្យកាន់តែប្រសើរឡើង។ «មានត្រី មានជីវិត! រួមគ្នាការពារព្រៃលិចទឹក និងមច្ឆជាតិខ្មែរ!»

ឯកឧត្តម ទៀ វិញ រដ្ឋលេខាធិការក្រសួងការពារជាតិ និងលោកជំទាវ រួមជាមួយថ្នាក់ដឹកនាំខេត្តពោធិ៍សាត់ និងមន្ត្រីរាជការជាច្រើនរូប បានរៀបចំពិធីវេរប្រគេនទៀនចំណាំព្រះវស្សា និងទេយ្យទាន ជូនដល់ព្រះសង្ឃដែលគង់ចាំព្រះវស្សាអស់ត្រីមាស នៅតាមវត្តអារាម និងទីសក្ការបូជាចំនួន ០៥កន្លែង ក្នុងខេត្តពោធិ៍សាត់។ ពិធីនេះត្រូវបានប្រារព្ធធ្វើឡើងនៅបូជនីយដ្ឋានប្រវត្តិសាស្ត្រឧកញ៉ាឃ្លាំងមឿង ជំទាវខាន់ខៀវ ស្ថិតក្នុងស្រុកបាកាន ខេត្តពោធិ៍សាត់។

សកម្មភាពចុះមូលដ្ឋានជាលក្ខណៈគ្រួសារនេះ ធ្វើឡើងក្នុងគោលបំណងផ្សារភ្ជាប់ទំនាក់ទំនងជិតស្និទ្ធរវាងអាជ្ញាធរ និងប្រជាពលរដ្ឋ ព្រមទាំងដើម្បីក្តាប់ឱ្យបាននូវរាល់សំណូមពរ កង្វល់ និងតម្រូវការខ្វះខាតជាក់ស្តែងរបស់បងប្អូននៅតាមផ្ទះនីមួយៗ។

(ពោធិ៍សាត់)៖ ឯកឧត្តម លៀង ពេជ្រ សមាជិកក្រុមប្រឹក្សាខេត្ត តំណាងឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ រួមដំណើរជាមួយ លោក ផាយ ឡេង អភិបាលក្រុងពោធិ៍សាត់ បានដឹកនាំក្រុមការងារចុះជួបសំណេះសំណាល និងដោះស្រាយបញ្ហាប្រឈមនានា ជូនប្រជាពលរដ្ឋ នៅសង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់ កាលពីព្រឹកថ្ងៃទី២៩ ខែមិថុនា ឆ្នាំ២០២៦ ។ សកម្មភាពចុះមូលដ្ឋានផ្ទាល់នេះ ធ្វើឡើងក្នុងគោលបំណងក្តាប់ឱ្យបានច្បាស់លាស់នូវរាល់កង្វល់ សំណូមពរ និងបញ្ហាប្រឈមជាក់ស្តែងដែលប្រជាពលរដ្ឋកំពុងជួបប្រទះ ដើម្បីស្វែងរកដំណោះស្រាយសមស្រប និងទាន់ពេលវេលា។ នេះជាការស្តែងឱ្យឃើញពីការយកចិត្តទុកដាក់ខ្ពស់របស់ថ្នាក់ដឹកនាំខេត្ត និងអាជ្ញាធរក្រុង ក្នុងការបម្រើសេវាសាធារណៈ និងលើកកម្ពស់ជីវភាពរស់នៅរបស់ប្រជាពលរដ្ឋនៅតាមមូលដ្ឋានឱ្យកាន់តែប្រសើរឡើង៕

(ពោធិ៍សាត់)៖ លោក លឹម សុខតូ អភិបាលរងខេត្ត និងជាតំណាងដ៏ខ្ពង់ខ្ពស់របស់ ឯកឧត្តមអភិបាលនៃគណៈអភិបាលខេត្តពោធិ៍សាត់ បានទទួលជួបសម្តែងការគួរសម និងពិភាក្សាការងារជាមួយ លោក Fumitsugu Tosu នាយករង និងជាប្រធានកម្មវិធីស្បៀងអាហារពិភពលោក (World Food Program - WFP) ប្រចាំប្រទេសកម្ពុជា ព្រមទាំងប្រតិភូអមដំណើរ នាថ្ងៃទី៣០ ខែមិថុនា ឆ្នាំ ២០២៦។ ជំនួបនេះរៀបចំឡើងក្នុងគោលបំណងពិភាក្សា និងពង្រឹងកិច្ចសហប្រតិបត្តិការលើការងាររបស់ គណៈកម្មាធិការគ្រប់គ្រងគ្រោះមហន្តរាយខេត្តពោធិ៍សាត់។ ក្នុងឱកាសនោះ ភាគីទាំងពីរបានផ្លាស់ប្តូរមតិយោបល់ និងស្វែងរកយន្តការរួមគ្នា ក្នុងការលើកកម្ពស់សមត្ថភាពឆ្លើយតប សង្គ្រោះបន្ទាន់ និងការគ្រប់គ្រងប្រព័ន្ធសន្តិសុខស្បៀង ដើម្បីធានាបាននូវការជួយសង្គ្រោះប្រជាពលរដ្ឋរងគ្រោះក្នុងភូមិសាស្ត្រខេត្ត ឱ្យបានទាន់ពេលវេលា និងមានប្រសិទ្ធភាពខ្ពស់៕