ព័ត៌មានក្នុងខេត្ត

ពោធិ៍សាត់៖ សាលាបឋមសិក្សាពោធិ៍សាត់ បានចុះបង្វឹក និងចែករំលែកបទពិសោធន៍ការងារដោយផ្ទាល់ ជូនដល់សាលាបឋមសិក្សាកូលាប ក្នុងគោលបំណងពង្រឹងគុណភាពការងារគ្រប់គ្រង និងការបង្រៀនឱ្យកាន់តែមានប្រសិទ្ធភាព នាថ្ងៃទី១១ ខែកញ្ញា ឆ្នាំ២០២៦ ។ កម្មវិធីចុះបង្វឹកនាឱកាសនោះ បានផ្តោតសំខាន់លើការណែនាំពីវិធីសាស្ត្រនៃការចុះបង្វឹកការងារ និងការតម្រង់ទិសបច្ចេកទេស ដើម្បីអភិវឌ្ឍន៍សាលារៀនឱ្យឆ្លើយតបទៅនឹង «ស្តង់ដាសាលារៀនគំរូ»។ កិច្ចសហការ និងការចូលរួមយ៉ាងសកម្មពីសំណាក់ភាគីទាំងពីរ បានស្តែងឱ្យឃើញពីស្មារតីទទួលខុសត្រូវ និងការប្តេជ្ញាចិត្តខ្ពស់ក្នុងការលើកកម្ពស់វិស័យអប់រំនៅក្នុងមូលដ្ឋាន។ ជំនួប និងសកម្មភាពចែករំលែកបទពិសោធន៍នេះ គឺជាជំហានដ៏មានអត្ថន័យ និងជាគ្រឹះយ៉ាងរឹងមាំក្នុងការរួមចំណែកលើកកម្ពស់គុណភាពនៃការសិក្សារបស់សិស្សានុសិស្ស ព្រមទាំងបង្កើនប្រសិទ្ធភាពនៃការគ្រប់គ្រងសាលារៀនឱ្យកាន់តែរីកចម្រើនជាលំដាប់៕

ពិធីនេះបានប្រព្រឹត្តទៅក្រោមអធិបតីភាព ឯកឧត្តម ឈុន សុង សមាជិកគណៈអចិន្ត្រៃយ៍គណបក្សខេត្ត និងជាប្រធានគណៈចាត់តាំងគណបក្សខេត្ត (តំណាងដ៏ខ្ពង់ខ្ពស់ ឯកឧត្តម ខូយ រីដា សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សខេត្តពោធិ៍សាត់), លោក ទឹម សារិន ប្រធានគណៈកម្មាធិការគណបក្សស្រុក និង លោក អ៊ន សុផល្លា អនុប្រធានគណៈកម្មាធិការគណបក្សស្រុក។ ព្រឹត្តិការណ៍នេះក៏មានការអញ្ជើញចូលរួមពី ឯកឧត្ដម ញ៉ឹក សារ៉េត អនុប្រធានគណៈចាត់តាំងគណបក្សខេត្ត ព្រមទាំងគណៈអចិន្ត្រៃយ៍គណបក្សស្រុក ប្រធាន អនុប្រធាន និងសមាជិក-សមាជិកានៃគណៈកម្មាធិការគណបក្សមូលដ្ឋានទាំងបី សរុបប្រមាណ ១៨០នាក់ (ស្រ្តី ៨៩នាក់)។

ពោធិ៍សាត់៖ គណៈគ្រប់គ្រងសាលា ព្រមទាំងតំណាងគណៈកម្មាធិការទ្រទ្រង់សាលារៀន (គ.គ.ស) និងគណៈកម្មាធិការគ្រប់គ្រងថ្នាក់ (គ.គ.ថ) នៃសាលាបឋមសិក្សាពោធិ៍សាត់ បានចុះបង្វឹកការងារដោយផ្ទាល់ដល់សាលាបឋមសិក្សាកោះវត្ត ប្រកបដោយបរិយាកាសស្និទ្ធស្នាល និងសាមគ្គីភាព នាថ្ងៃទី១២ ខែកញ្ញា ឆ្នាំ២០២៦។ សកម្មភាពចុះបង្វឹកនាពេលនេះ បានផ្តោតសំខាន់លើការណែនាំលម្អិតអំពីកម្មវិធីចុះបង្វឹកការងារ ដើម្បីផ្លាស់ប្តូរបទពិសោធន៍ ពង្រឹងសមត្ថភាពការងារគ្រប់គ្រង និងបង្កើនកិច្ចសហប្រតិបត្តិការអប់រំរវាងសាលារៀនទាំងពីរឱ្យកាន់តែមានប្រសិទ្ធភាពខ្ពស់។ ការចូលរួមយ៉ាងសកម្មពីសំណាក់ថ្នាក់ដឹកនាំសាលា និងតំណាងគណៈកម្មាធិការពាក់ព័ន្ធទាំងអស់ បានស្តែងឱ្យឃើញយ៉ាងច្បាស់ពីការយកចិត្តទុកដាក់ និងការប្តេជ្ញាចិត្តខ្ពស់ក្នុងការលើកកម្ពស់គុណភាព នៃការសិក្សារបស់សិស្សានុសិស្សនៅក្នុងមូលដ្ឋាន។ ជំនួបបង្វឹកនេះបានប្រព្រឹត្តទៅដោយរលូន ព្រមទាំងទទួលបានលទ្ធផលយ៉ាងផ្លែផ្កាជាវិជ្ជមាន សម្រាប់យកទៅអនុវត្ត និងអភិវឌ្ឍន៍សាលារៀនឱ្យកាន់តែរីកចម្រើនបន្ថែមទៀត៕

ពោធិ៍សាត់៖ នាថ្ងៃសៅរ៍ ទី១២ ខែកញ្ញា ឆ្នាំ២០២៦ ដោយមានការគិតគូរ យកចិត្តទុកដាក់ និងក្រោមប្រធានកិច្ចចង្អុលការដ៏ខ្ពង់ខ្ពស់ពី ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ រដ្ឋបាលស្រុកតាលោសែនជ័យ ដឹកនាំដោយ លោក ចាន់ វិចិត្រ អភិបាល នៃគណៈអភិបាលស្រុក បានអញ្ជើញចុះសំណេះសំណាល សាកសួរសុខទុក្ខ និងនាំយកអំណោយមនុស្សធម៌ចែកជូនដល់បងប្អូនអតីតយុទ្ធជន និងប្រជាពលរដ្ឋជួបការលំបាកខ្វះខាតជីវភាពចំនួន ១១០គ្រួសារ ស្ថិតនៅក្នុងភូមិសំសាន្ត ឃុំតាលោ ស្រុកតាលោសែនជ័យ ខេត្តពោធិ៍សាត់។ អំណោយគ្រឿងឧបភោគបរិភោគដែលបានផ្តល់ជូននាឱកាសនោះ រួមមាន៖ អង្ករ, មី, ទឹកត្រី និងទឹកស៊ីអ៊ីវ។ សកម្មភាពមនុស្សធម៌នាពេលនេះ បានស្តែងឱ្យឃើញពីការយកចិត្តទុកដាក់ខ្ពស់របស់ថ្នាក់ដឹកនាំខេត្ត និងអាជ្ញាធរមូលដ្ឋានស្រុកតាលោសែនជ័យ ចំពោះសុខទុក្ខ និងជីវភាពរស់នៅរបស់ប្រជាពលរដ្ឋ និងបងប្អូនអតីតយុទ្ធជន ដើម្បីជួយសម្រាលការលំបាក និងលើកកម្ពស់ស្មារតីសាមគ្គីភាពក្នុងសហគមន៍ផងដែរ៕

ក្រុមហ៊ុន TK and D ដែលជាសហគ្រាសផលិតបំពង់បឺត (ទុយោ) ធ្វើពីអង្ករធម្មជាតិ និងក្រុមហ៊ុន TW Global ដែលជាក្រុមហ៊ុនចែកចាយដ៏ធំ បានរៀបចំពិធីចុះហត្ថលេខាលើកិច្ចព្រមព្រៀង សហប្រតិបត្តិការរួមគ្នាជាផ្លូវការ នៅទីស្នាក់ការក្រុមហ៊ុន TK and D ស្ថិតនៅភូមិតាកែវក្រោម ឃុំបឹងកន្ទួត ស្រុកក្រគរ ខេត្តពោធិ៍សាត់ ដើម្បីនាំយកផលិតផលទុយោបឺតធ្វើពីអង្កររបស់កម្ពុជា ទៅចែកចាយនៅលើទីផ្សារសហរដ្ឋអាមេរិក នាថ្ងៃទី១០ ខែកញ្ញា ឆ្នាំ២០២៦ ។

ពោធិ៍សាត់៖ ទីស្នាក់ការគណបក្សប្រជាជនកម្ពុជាសង្កាត់ផ្ទះព្រៃ បានរៀបចំពិធីប្រគល់ និងទទួលអង្ករចំនួន ៥តោន ក្រោមអធិបតីភាពលោក ពៅ ពិសិដ្ឋ ប្រធានក្រុមការងារគណបក្សចុះមូលដ្ឋានសង្កាត់ផ្ទះព្រៃ នាព្រឹកថ្ងៃទី១២ ខែកញ្ញា ឆ្នាំ២០២៦ ។ អង្ករចំនួន ៥តោននេះ គឺជាអំណោយដ៏ថ្លៃថ្លារបស់សប្បុរសជន លោក ផាន់ សារិទ្ធ និងលោកស្រី អោម ស្រីមុំ ដែលជាម្ចាស់ «ហាងលក់ផ្លែឈើស្រីមុំ» បានចូលរួមឧបត្ថម្ភ ដើម្បីបម្រើដល់សកម្មភាពមនុស្សធម៌ និងជួយសម្រាលជីវភាពដល់ប្រជាពលរដ្ឋក្នុងមូលដ្ឋាន។ ក្នុងឱកាសនោះផងដែរ គណៈអធិបតី និងរដ្ឋបាលគណបក្សប្រជាជនកម្ពុជាសង្កាត់ផ្ទះព្រៃ សូមសម្តែងនូវការថ្លែងអំណរគុណយ៉ាងជ្រាលជ្រៅ និងសូមប្រសិទ្ធពរជ័យសិរីសួស្តី ជ័យមង្គល ជូនចំពោះ លោក ផាន់ សារិទ្ធ និងលោកស្រី អោម ស្រីមុំ ព្រមទាំងក្រុមគ្រួសារ សូមមានសុខភាពល្អបរិបូណ៌ កម្លាំងមាំមួន និងទទួលបានជោគជ័យជានិច្ចក្នុងគ្រប់ភារកិច្ច និងអាជីវកម្ម៕

មន្ត្រីរដ្ឋបាលសាលាក្រុងពោធិ៍សាត់ បុគ្គលិកធនាគារ ហត្ថា (សាខាខេត្តពោធិ៍សាត់) និងអាជ្ញាធរមូលដ្ឋាន បានរួមគ្នាចុះដាំកូនឈើប្រភេទដើមក្ងោក និងផ្កាភួងម៉ាឡៃ ចំនួន ២៨ដើម តាមបណ្តោយមាត់ស្ទឹងពោធិ៍សាត់ត្រើយខាងកើត ស្ថិតក្នុងភូមិស្ពានថ្ម សង្កាត់រលាប ក្រុងពោធិ៍សាត់ ដើម្បីបង្កើនភាពបៃតង បរិស្ថានល្អ និងសោភ័ណភាពទីប្រជុំជនឱ្យកាន់តែស្រស់ស្អាត និងទាក់ទាញ នាថ្ងៃទី១២ ខែកញ្ញា ឆ្នាំ២០២៦ ។

បច្ចុប្បន្នភាពស្តីពីការវិវឌ្ឍន៍ស្ថានភាពព្រំដែនកម្ពុជាថៃ និង​ព្រឹត្តិការណ៍ថ្មីៗ ដែលកើតឡើង

ពោធិ៍សាត់៖ លោក ធាង ឡេង អភិបាល នៃគណៈអភិបាលស្រុកវាលវែង បានដឹកនាំក្រុមការងារបច្ចេកទេស និងអាជ្ញាធរពាក់ព័ន្ធ ចុះពិនិត្យ និងកែសម្រួលព្រមទាំងបើកធ្វើផ្លូវចូលទៅកាន់តំបន់ «ទឹកធ្លាក់ថ្មចាំង» ដែលជាផ្លូវបន្តពីគម្រោងមូលនិធិឃុំ ស្ថិតក្នុងភូមិក្រពើពីរលើ ឃុំក្រពើពីរ ស្រុកវាលវែង ខេត្តពោធិ៍សាត់ នាថ្ងៃទី១១ ខែកញ្ញា ឆ្នាំ២០២៦ ។ សកម្មភាពចុះជួយសម្រួល និងស្ថាបនាផ្លូវនាពេលនេះ មានការចូលរួមយ៉ាងសកម្មពីសំណាក់ លោកសមាជិកក្រុមប្រឹក្សាស្រុក លោកនាយករងរដ្ឋបាលសាលាស្រុក លោកប្រធានការិយាល័យជំនាញជុំវិញស្រុក ព្រមទាំងអាជ្ញាធរមូលដ្ឋានភូមិ-ឃុំផងដែរ។ ការបើកធ្វើ និងកែសម្រួលផ្លូវចូលទៅកាន់តំបន់ទឹកធ្លាក់ថ្មចាំងនេះ ធ្វើឡើងសម្រួលដល់ការធ្វើដំណើរ ដឹកជញ្ជូនកសិផលរបស់ប្រជាពលរដ្ឋក្នុងមូលដ្ឋាន ឱ្យកាន់តែមានភាពងាយស្រួល និងរហ័សទាន់ចិត្ត។ បន្ថែមពីនេះ ផ្លូវមួយខ្សែនេះក៏ជាសមិទ្ធផលថ្មីមួយដ៏សំខាន់ ក្នុងការទាក់ទាញភ្ញៀវទេសចរជាតិ និងអន្តរជាតិ ឱ្យមកកម្សាន្តនៅតំបន់ទឹកធ្លាក់ថ្មចាំងកាន់តែច្រើនឡើង ដែលចូលរួមចំណែកយ៉ាងសំខាន់ក្នុងការលើកកម្ពស់សេដ្ឋកិច្ចគ្រួសាររបស់ប្រជាសហគមន៍នៅក្នុងតំបន់នោះផងដែរ៕

ពោធិ៍សាត់៖ លោក លាង ទិតដ្ឋាន ប្រធានមន្ទីរព័ត៌មានខេត្តពោធិ៍សាត់ អញ្ជើញដឹកនាំក្រុមការងារ ចុះផ្សព្វផ្សាយ យុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ ត្រូវបានរៀបចំផ្សព្វផ្សាយយ៉ាងសកម្មនៅក្នុងព្រឹត្តិការណ៍ប្រកួតកីឡាបាល់ទាត់មហាជន ខេត្តពោធិ៍សាត់ ដែលបានប្រព្រឹត្តទៅនៅពហុកីឡដ្ឋានខេត្តពោធិ៍សាត់ នារសៀលថ្ងៃទី១១ ខែកញ្ញា ឆ្នាំ២០២៦ នេះ ។ យុទ្ធនាការដ៏មានសារៈសំខាន់នេះ រៀបចំឡើងដោយមន្ទីរព័ត៌មានខេត្តពោធិ៍សាត់ ក្រោមការសហការយ៉ាងជិតស្និទ្ធជាមួយការិយាល័យអប់រំកាយ និងកីឡា នៃមន្ទីរអប់រំ យុវជន និងកីឡាខេត្ត។ គោលបំណងចម្បងនៃការបញ្ចូលយុទ្ធនាការនេះទៅក្នុងព្រឹត្តិការណ៍កីឡា គឺដើម្បីបំផុសស្មារតី និងផ្សព្វផ្សាយដោយផ្ទាល់ទៅដល់សាធារណជន ជាពិសេសកីឡាករ កីឡាការិនី និងអ្នកគាំទ្រវ័យក្មេង ឱ្យយល់ដឹងកាន់តែច្បាស់ពីផលប៉ះពាល់នៃព័ត៌មានក្លែងក្លាយ និងរួមគ្នា «និយាយថាទេចំពោះព័ត៌មានក្លែងក្លាយ»។ សកម្មភាពនេះផ្តោតលើការជួយឱ្យប្រជាពលរដ្ឋចេះផ្ទៀងផ្ទាត់ព័ត៌មានមុនជឿ ឬចែករំលែក ដើម្បីធានាសុវត្ថិភាពព័ត៌មាន សម្រាប់ការពារគ្រួសារ សហគមន៍ និងរួមគ្នាសាងសង់សង្គមមួយដែលប្រកបដោយភាពស្អាតស្អំបែបឌីជីថល៕

ពោធិ៍សាត់៖ លោក ងួន ប៉ោសេង អភិបាលរង នៃគណៈអភិបាលខេត្តពោធិ៍សាត់ តំណាងឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញចូលរួមក្នុងវគ្គបណ្តុះបណ្តាលស្តីពី នីតិវិធីចុះឈ្មោះអ្នកសេដ្ឋកិច្ចក្រៅប្រព័ន្ធ និងការផ្សព្វផ្សាយកញ្ចប់អត្ថប្រយោជន៍ តាមប្រព័ន្ធអនឡាញ នារសៀលថ្ងៃទី១១ ខែកញ្ញា ឆ្នាំ២០២៦ នេះ។ វគ្គបណ្តុះបណ្តាលនេះបានប្រព្រឹត្តទៅនៅសាលប្រជុំមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តពោធិ៍សាត់ ក្រោមអធិបតីភាព ឯកឧត្តម ម៉ាត់ សារី អនុរដ្ឋលេខាធិការ និងជាប្រធានលេខាធិការដ្ឋាននៃគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ។ វគ្គបណ្តុះបណ្តាលនេះធ្វើឡើងក្នុងគោលបំណងពង្រឹងការយល់ដឹង និងសមត្ថភាពដល់មន្ត្រីពាក់ព័ន្ធអំពីនីតិវិធីនៃការចុះឈ្មោះចូលរួមក្នុងប្រព័ន្ធ ព្រមទាំងការប្រមូលទិន្នន័យអ្នកប្រកបមុខរបរក្នុងសេដ្ឋកិច្ចក្រៅប្រព័ន្ធឱ្យមានប្រសិទ្ធភាព និងភាពងាយស្រួល។ ការធ្វើបែបនេះ ធានាថាបងប្អូនប្រជាពលរដ្ឋដែលជាអ្នកស្វ័យនិយោជន៍ ឬអ្នកធ្វើការក្នុងវិស័យសេដ្ឋកិច្ចក្រៅប្រព័ន្ធ អាចទទួលបាននូវកញ្ចប់អត្ថប្រយោជន៍គាំពារសង្គម ការបណ្តុះបណ្តាលជំនាញ និងការគាំទ្រផ្សេងៗពីរាជរដ្ឋាភិបាលប្រកបដោយសមធម៌ និងបរិយាបន្ន៕

ពោធិ៍សាត់៖ លោក អ៊ន សុផល្លា អភិបាល នៃគណៈអភិបាលស្រុកក្រគរ និងជាប្រធានយុវជនគណបក្សស្រុក បានអញ្ជើញជាអធិបតីដឹកនាំកិច្ចប្រជុំតាមប្រព័ន្ធអនឡាញ (Online Meeting) ដើម្បីពិភាក្សា និងតម្រង់ទិសលើ «ការពង្រឹងការងារយុវជនគណបក្សស្រុក និងយុវជនគណបក្សទាំង ១១ ឃុំ» ក្នុងស្រុកក្រគរ ខេត្តពោធិ៍សាត់ ។ កិច្ចប្រជុំនេះមានការអញ្ជើញចូលរួមពីសំណាក់សមាជិក សមាជិកា នៃក្រុមការងារយុវជនគណបក្សស្រុក និងប្រធាន-អនុប្រធាន ព្រមទាំងតំណាងយុវជនគណបក្សមកពីឃុំទាំង ១១ ទូទាំងស្រុកក្រគរ។ នៅក្នុងកិច្ចប្រជុំតាមប្រព័ន្ធអនឡាញនេះ លោក អ៊ន សុផល្លា បានលើកឡើងអំពីទិសដៅការងារសំខាន់ៗ ក្នុងការបន្តពង្រឹងរចនាសម្ព័ន្ធ កម្លាំងសាមគ្គីភាព និងប្រសិទ្ធភាពនៃការអនុវត្តភារកិច្ចរបស់យុវជនគណបក្សនៅតាមមូលដ្ឋាន។ លោកប្រធានយុវជនគណបក្សស្រុក ក៏បានផ្តាំផ្ញើ និងជំរុញឱ្យយុវជនគណបក្សទាំង ១១ ឃុំ បន្តសហការគ្នាយ៉ាងជិតស្និទ្ធ ចុះផ្ទាល់ជាមួយប្រជាពលរដ្ឋ និងចូលរួមយ៉ាងសកម្មក្នុងសកម្មភាពសង្គម ដើម្បីបម្រើផលប្រយោជន៍ជូនប្រជាពលរដ្ឋក្នុងស្រុកក្រគរឱ្យកាន់តែមានប្រសិទ្ធភាពខ្ពស់៕