ព័ត៌មានក្នុងខេត្ត

ពោធិ៍សាត់៖ ឯកឧត្តម ម៉ក់ រ៉ា ប្រធានក្រុមប្រឹក្សាខេត្តពោធិ៍សាត់ និងឯកឧត្តម ខូយ រីដា អភិបាលខេត្តពោធិ៍សាត់ ព្រមទាំងថ្នាក់ដឹកនាំបានអញ្ជើញចូលរួមកិច្ចប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា តាមរយៈប្រព័ន្ធអនឡាញ (Zoom) នៅព្រឹកថ្ងៃទី២៦ ខែមិថុនា ឆ្នាំ២០២៦ នេះ។ កិច្ចប្រជុំព្រឹកនេះបានលើកយករបៀបវារៈចំនួន ០៦ មកពិនិត្យនិងពិភាក្សា ដែលក្នុងនោះរួមមាន៖ របាយការណ៍វឌ្ឍនភាពវិស័យទេសចរណ៍រដូវកាលបៃតង, សេចក្តីព្រាងផែនការជាតិទប់ស្កាត់អំពើហិង្សាលើស្ត្រី (២០២៥-២០៣០), ព្រមទាំងសេចក្តីព្រាងច្បាប់សំខាន់ៗចំនួន ០៤ ទៀត ពាក់ព័ន្ធនឹងអនុសញ្ញាឧបករណ៍អាកាសយាន និងកិច្ចសម្រុះសម្រួលទទួលស្គាល់ទៅវិញទៅមកក្នុងក្របខ័ណ្ឌអាស៊ាន លើផ្នែកសម្ភារៈសំណង់ និងផលិតផលយានយន្ត៕

ពោធិ៍សាត់៖ លោកមេឃុំព្រងិល រួមជាមួយក្រុមការងារឃុំ បានចុះពិនិត្យស្ថានភាពជាក់ស្តែងនៃគម្រោងស្ថាបនាផ្លូវបេតុងអាមេ ស្ថិតនៅចំណុចភូមិអូរ ឃុំព្រងិល (ខ្សែផ្លូវចូលបន្ទាយទាហាន) នៅថ្ងៃទី២៦ ខែមិថុនា ឆ្នាំ២០២៦ នេះ ។ ការចុះត្រួតពិនិត្យនេះ ធ្វើឡើងក្នុងគោលបំណងតាមដានវឌ្ឍនភាពការងារ និងធានាឱ្យបាននូវគុណភាព ស្របតាមស្តង់ដារបច្ចេកទេស ដើម្បីឱ្យខ្សែផ្លូវថ្មីនេះមានភាពរឹងមាំ ជាប់បានយូរ សម្រាប់បម្រើដល់ផលប្រយោជន៍ និងការធ្វើដំណើររបស់បងប្អូនប្រជាពលរដ្ឋ ក៏ដូចជាកងកម្លាំងក្នុងមូលដ្ឋាន។

ពោធិ៍សាត់៖ នៅព្រឹកថ្ងៃទី២៦ ខែមិថុនា ឆ្នាំ២០២៦ នេះ មូលនិធិអភិវឌ្ឍន៍សង្កាត់បន្ទាយដី បានបើកការដ្ឋានឈូសឆាយ និងស្ថាបនាផ្លូវបេតុងថ្មីមួយខ្សែ ស្ថិតនៅភូមិកែវសុវណ្ណ សង្កាត់បន្ទាយដី ក្រុងពោធិ៍សាត់ (ខាងជើងជាប់របងវត្តកែវសុវណ្ណ)។ ផ្លូវបេតុងថ្មីនេះ ជាសមិទ្ធផលខ្សែទី២ នៅក្នុងមូលដ្ឋាន ដែលមានទំហំទទឹង ៥ម៉ែត្រ និងបណ្តោយ ១៣៥ម៉ែត្រ។ ការទទួលបានផ្លូវបេតុងថ្មីនេះ បានធ្វើឱ្យបងប្អូនប្រជាពលរដ្ឋរស់នៅក្នុងភូមិ សម្តែងនូវការត្រេកអរ និងអបអរសាទរយ៉ាងខ្លាំង ព្រោះវាជួយសម្រួលដល់ការធ្វើដំណើរ និងលើកកម្ពស់ជីវភាពរស់នៅរបស់ពួកគាត់ឱ្យកាន់តែប្រសើរឡើង។

ព្រឹកថ្ងៃទី២៦ ខែមិថុនា ឆ្នាំ២០២៦ នេះ កម្លាំងការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់ បានចុះអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក ដល់បងប្អូនប្រជាពលរដ្ឋ និងក្មួយៗសិស្សានុសិស្សដែលជាអ្នកបើកបរយានយន្តគ្រប់ប្រភេទ។ សមត្ថកិច្ចបានសង្កត់ធ្ងន់ និងណែនាំឱ្យអ្នកបើកបរទាំងអស់ ត្រូវពាក់មួកសុវត្ថិភាពឱ្យបានត្រឹមត្រូវ, បើកបរប្រកាន់ស្តាំ និងតាមគន្លងផ្លូវ, មិនត្រូវនិយាយទូរស័ព្ទពេលបើកបរ, ជាពិសេសត្រូវបន្ថយល្បឿននៅពេលដល់ផ្លូវប្រសព្វ និងគោរពផ្លាកសញ្ញាចរាចរណ៍ ដើម្បីសុវត្ថិភាពទាំងអស់គ្នា។

ឃុំអូរសោម នៃស្រុកវាលវែង ដែលជាតំបន់ខ្ពង់រាបមានអំណោយផលខ្លាំងលើកត្តាអាកាសធាតុត្រជាក់ និងដីមានជីវជាតិ កំពុងតែបង្ហាញសក្តានុពលយ៉ាងខ្លាំងលើការដាំដុះបន្លែ និងផ្លែឈើ រួមមានដំណាំការ៉ុត និងឪឡឹក ដែលជាស្នាដៃផ្ទាល់របស់បងប្អូនកសិករនៅក្នុងមូលដ្ឋាន។

សកម្មភាពចុះដាំកូនឈើលម្អនាពេលនេះ ធ្វើឡើងក្នុងគោលបំណងបង្កើនគម្របបៃតង លើកកម្ពស់សោភ័ណភាពស្រស់ត្រកាលនៅតាមដងផ្លូវ និងដើម្បីទាក់ទាញភ្ញៀវទេសចរជាតិ-អន្តរជាតិ ឱ្យមកកម្សាន្តនៅតំបន់ប្រវត្តិសាស្ត្រ និងសំណង់វិស្វកម្មដ៏អស្ចារ្យមួយនេះកាន់តែច្រើនឡើង។

កិច្ចប្រជុំនេះមានការអញ្ជើញចូលរួមពី លោក បេង ឆវីរៈ អនុប្រធានមន្ទីរ, តំណាងសាលាគរុកោសល្យ និងវិក្រឹតការខេត្ត, លោក-លោកស្រីប្រធាន-អនុប្រធានការិយាល័យជំនាញ, ព្រមទាំងប្រធាន-អនុប្រធានការិយាល័យអប់រំក្រុង-ស្រុក និងមន្ត្រីទទួលបន្ទុកតាមផ្នែកនានា។

នៅក្នុងយុទ្ធនាការនេះ មានរដ្ឋបាលក្រុង-ស្រុកទាំង៧ ព្រមទាំងរដ្ឋបាលឃុំ វត្តអារាម និងសាលារៀនចំនួន ១៤ ទីតាំង/អង្គភាព បានចូលរួមធ្វើជាគំរូ ក្នុងនោះរួមមាន៖ រដ្ឋបាលក្រុងពោធិ៍សាត់, ស្រុកកណ្តៀង, ស្រុកបាកាន, ស្រុកភ្នំក្រវាញ, ស្រុកក្រគរ, ស្រុកវាលវែង, ស្រុកតាលោសែនជ័យ, វត្តស្រះស្រង់, រដ្ឋបាលឃុំត្រពាំងជង, ឃុំសំរោង, ឃុំបឹងបត់កណ្ដាល, ឃុំត្នោតជុំ ព្រមទាំងសាលាបឋមសិក្សាដូងជុំ និងសាលាបឋមសិក្សាក្បាលទាហាន។

កិច្ចប្រជុំត្រៀមនេះ ធ្វើឡើងក្នុងគោលបំណងធានាឱ្យកម្មវិធីសំណេះសំណាលខាងមុខ ប្រព្រឹត្តទៅដោយរលូន ជោគជ័យ និងមានសណ្តាប់ធ្នាប់ ស្របពេលដែលពិធីផ្លូវការនឹងត្រូវរៀបចំឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តម កែវ រតនៈ ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តពោធិ៍សាត់។

ពោធិ៍សាត់៖ នៅព្រឹកថ្ងៃទី២៤ ខែមិថុនា ឆ្នាំ២០២៦ នៅមណ្ឌលសុខភាពប្រម៉ោយ ឃុំប្រម៉ោយ ស្រុកវាលវែង តំណាងលោកវេជ្ជបណ្ឌិត តឹក សុភាព ប្រធានមន្ទីរសុខាភិបាលនៃរដ្ឋបាលខេត្តពោធិ៍សាត់ ព្រមទាំងក្រុមគ្រូពេទ្យ បានជួបប្រជុំពិភាក្សាការងារយ៉ាងសំខាន់ជាមួយ ឯកឧត្តម ឧត្តមសេនីយ៍ទោ ញ៉ែម សុខ័ន្ធី នាយកទីចាត់ការសុខាភិបាលនៃអគ្គបញ្ជាការដ្ឋានកងយោធពលខេមរភូមិន្ទ និងជាសមាជិកគណៈបញ្ជាការឯកភាពសមរភូមិព្រំដែនកម្ពុជា-ថៃ ព្រមទាំងក្រុមការងារ។ កិច្ចប្រជុំនេះបានផ្តោតសំខាន់លើការពិនិត្យ ព្យាបាល និងសង្គ្រោះដល់វីរកងទ័ពការពារព្រំដែន ព្រមទាំងការត្រៀមបម្រុងឱសថ និងបរិក្ខារពេទ្យឱ្យបានគ្រប់គ្រាន់។ ជាមួយគ្នានោះដែរ ភាគីទាំងពីរក៏បានប្តេជ្ញាបន្តពង្រឹងកិច្ចសហប្រតិបត្តិការឱ្យកាន់តែរឹងមាំបន្ថែមទៀត ដើម្បីធានាដល់ការថែទាំ និងលើកកម្ពស់សុខភាពរបស់កងកម្លាំងការពារព្រំដែន នៅក្នុងភូមិសាស្ត្រខេត្តពោធិ៍សាត់ ឱ្យបានកាន់តែល្អប្រសើរឡើង។

វគ្គបណ្តុះបណ្តាលនេះមានសិក្ខាកាមចូលរួមសរុប ១១៣នាក់ ក្នុងនោះមានស្ត្រី ៩នាក់ ដែលភាគច្រើនមកពីមន្ទីរព័ត៌មានរាជធានី-ខេត្ត។ វគ្គនេះរៀបចំឡើងក្នុងគោលបំណងពង្រឹងសមត្ថភាពមន្ត្រីព័ត៌មាន លើការផលិតមាតិកាឌីជីថលប្រកបដោយគុណភាព និងវិជ្ជាជីវៈ ដោយផ្តោតលើការរៀបចំខ្លឹមសារ ការសរសេរចំណងជើង ការផលិតបទយកការណ៍ខ្លី និងការប្រើប្រាស់រូបភាពឱ្យមានភាពទាក់ទាញ ស្របតាមបរិបទប្រព័ន្ធផ្សព្វផ្សាយសម័យថ្មី។

រដ្ឋបាលក្រុងបានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាក្រុងពោធិ៍សាត់ អាណត្តិទី៤។ ពិធីនេះប្រព្រឹត្តទៅក្រោមអធិបតីភាព លោក សំរិទ្ធិ អេង ប្រធានក្រុមប្រឹក្សាក្រុង និងលោក ផាយ ឡេង អភិបាលក្រុងពោធិ៍សាត់ ដោយមានការចូលរួមពីតំណាងប្រជាពលរដ្ឋមកពីសង្កាត់ចំនួន៤ រួមមាន៖ សង្កាត់ចំរើនផល លលកស រលាប និងសង្កាត់ស្វាយអាត់ សរុបចំនួន ២៩០នាក់ ស្រី ៦០នាក់។