ព័ត៌មានក្នុងខេត្ត

ពោធិ៍សាត់៖ ដើម្បីឆ្លើយតបនឹងឥទ្ធិពលនៃបាតុភូតធម្មជាតិ អែល នីញ៉ូ (El Niño) នៅថ្ងៃទី២៩ ខែមិថុនា ឆ្នាំ២០២៦នេះ មន្ទីរធនធានទឹក និងឧតុនិយមខេត្តពោធិ៍សាត់ បាននិងកំពុងសហការយ៉ាងសកម្មជាមួយអាជ្ញាធរពាក់ព័ន្ធ ក្នុងការរៀបចំវិធានការរក្សាទឹកទុក និងត្រៀមលក្ខណៈអន្តរាគមន៍បង្ការគ្រោះរាំងស្ងួតដែលអាចកើតមានឡើងដោយយថាហេតុ។ បច្ចុប្បន្ន មន្ទីរជំនាញបាននិងកំពុងបំពេញទឹកបំពេញអាងស្តុកទឹកទី៣ ឡើងវិញ ក្រោយពីបានអន្តរាគមន៍ជួយសង្គ្រោះកន្លងមក។ ដោយឡែក សម្រាប់អាងទំនប់ទឹកទី៥ វិញ ទឹកបានពេញហៀរលើបង្ហៀរទំនប់រួចរាល់ហើយ ដែលជាប្រភពទឹកដ៏សំខាន់ ត្រៀមស្តុកទុកសម្រាប់ជួយផ្គត់ផ្គង់ដល់បណ្តាក្រុង/ស្រុកទូទាំងខេត្តពោធិ៍សាត់ នៅពេលជួបប្រទះការខ្វះខាតទឹកជាក់ស្តែង៕

លោក ធីម សុធារ៉ា ប្រធានមន្ទីរ រួមជាមួយលោក និន ស៊ីណាត អនុប្រធានមន្ទីរ និងមន្ត្រីបច្ចេកទេស បានចុះពិនិត្យវឌ្ឍនភាពការដ្ឋានស្ថាបនា «ស្ពានក្រវាញ» ដែលជាស្ពានបេតុងមានប្រវែង ១៤៤ម៉ែត្រ និងទទឹង ១០ម៉ែត្រ នៅថ្ងៃទី២៩ ខែមិថុនា ឆ្នាំ២០២៦។ ស្ពាននេះដើរតួនាទីយ៉ាងសំខាន់ក្នុងការតភ្ជាប់ពីភូមិបោះពួយ ឃុំលាច ទៅកាន់ភូមិព្រែក៣ ឃុំសំរោង ស្រុកភ្នំក្រវាញ ដោយបច្ចុប្បន្នការសាងសង់សម្រេចលទ្ធផលបាន ៧៦% ហើយ។ តាមផែនការ ស្ពានក្រវាញនេះនឹងត្រូវដាក់ឱ្យបងប្អូនប្រជាពលរដ្ឋប្រើប្រាស់ជាផ្លូវការ នៅមុនពិធីបុណ្យភ្ជុំបិណ្ឌនាពេលខាងមុខនេះ៕

ឯកឧត្តម យឹម វិសិដ្ឋ ប្រធានក្រុមការងារគណបក្សចុះមូលដ្ឋានស្រុកភ្នំក្រវាញ ខេត្តពោធិ៍សាត់ អញ្ជើញចូលរួមកិច្ចប្រជុំពិភាក្សា ដើម្បីស្ដាប់ និងដោះស្រាយរាល់បញ្ហាប្រឈមនានាជូនប្រជាពលរដ្ឋក្នុងមូលដ្ឋាន ព្រមទាំងដាក់ចេញនូវទិសដៅផែនការការងារសំខាន់ៗ ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ ខាងមុខ។ កិច្ចប្រជុំនេះបានប្រព្រឹត្តទៅកាលពីរសៀលថ្ងៃអាទិត្យ ទី២៨ ខែមិថុនា ឆ្នាំ២០២៦ សម្រាប់ភូមិសាស្ត្រឃុំលាច ស្រុកភ្នំក្រវាញ ខេត្តពោធិ៍សាត់៕

គម្រោងស្ថាបនាផ្លូវបេតុងថ្មី កំពុងតែដំណើរការចាក់យ៉ាងសកម្ម ដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងមូលដ្ឋាន នាព្រឹកថ្ងៃទី២៩ ខែមិថុនា ឆ្នាំ២០២៦ នេះ ស្ថិតនៅក្នុងសង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់។ ការស្ថាបនាផ្លូវបេតុងនេះ ធ្វើឡើងក្នុងគោលបំណងលើកកម្ពស់ហេដ្ឋារចនាសម្ព័ន្ធ បង្កើនភាពងាយស្រួល សុវត្ថិភាពក្នុងការធ្វើដំណើរ និងការដឹកជញ្ជូនរបស់ប្រជាពលរដ្ឋ៕

លោក លឹម វុទ្ធី ប្រធានមន្ទីរអប់រំ យុវជន និងកីឡាខេត្តពោធិ៍សាត់ បានអញ្ជើញចុះពិនិត្យមើលសកម្មភាពនៃការបង្រៀនបំប៉នបន្ថែមដោយផ្ទាល់ នាព្រឹកថ្ងៃចន្ទ ទី២៩ ខែមិថុនា ឆ្នាំ២០២៦ នៅក្នុងវិទ្យាល័យពោធិ៍សាត់។ លោកប្រធានមន្ទីរ បានប្រាប់ថាការចុះពិនិត្យនេះគឺដើម្បីតាមដាន និងជំរុញការបំប៉នសមត្ថភាពសិស្សានុសិស្សថ្នាក់ទី១២ ក្នុងការត្រៀមលក្ខណៈសម្បត្តិឱ្យបានល្អប្រសើរ សម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ដែលខិតជិតមកដល់៕

កាលពីពេលថ្មីៗនេះ ពលរដ្ឋទទួលបានផ្លូវលំកៅស៊ូថ្មីសន្លាង ១ខ្សែ ដែលមានប្រវែងសរុប ៥ គីឡូម៉ែត្រ ត្រូវបានសាងសង់រួចរាល់ និងលេចចេញជារូបរាងឡើង សម្រាប់បម្រើដល់ផលប្រយោជន៍ និងការធ្វើដំណើររបស់ប្រជាពលរដ្ឋ។ ផ្លូវមួយខ្សែនេះផ្តល់ផលប្រយោជន៍ផ្ទាល់ដល់អ្នកភូមិចំនួន ៤ រួមមាន ភូមិប៉ប៉ិត ភូមិបន្ទាយក្រង ភូមិឡបាក់ និងភូមិទន្សាយគល់ ស្ថិតក្នុងឃុំអន្លង់ត្នោត (ស្រុកក្រគរ ខេត្តពោធិ៍សាត់) ដែលនាំមកនូវភាពសប្បាយរីករាយ និងភាពងាយស្រួលក្នុងការធ្វើដំណើរ ក៏ដូចជាការដឹកជញ្ជូនកសិផលផ្សេងៗ៕

លោក ស៊ឹម សង្វាពិសិដ្ឋ ប្រធានមន្ទីរសាធារណការ និងដឹកជញ្ជូនខេត្តពោធិ៍សាត់ រួមជាមួយសហការី និងអាជ្ញាធរស្រុកក្រគរ បានចុះពិនិត្យសិក្សា ដើម្បីធ្វើការដោះស្រាយតាមបច្ចេកទេសជំនាញលើផ្លូវថ្នល់ នាថ្ងៃទី២៩ ខែមិថុនា ឆ្នាំ២០២៦ ។ លោក ប៉ិន វណ្ណា ក្រុមប្រឹក្សាស្រុក បានអោយដឹងថា ស្ថិតនៅចំណុច «ថ្នល់បត់ទី១ និងទី២» ក្នុងស្រុកក្រគរ ខេត្តពោធិ៍សាត់ ដែលជាទីតាំងឧស្សាហ៍កើតមានគ្រោះថ្នាក់ចរាចរណ៍ញឹកញាប់ ជាពិសេសនៅពេលមានភ្លៀងធ្លាក់ម្តងៗ។ សូមរំលឹកថា បើតាមការវាយតម្លៃជារួម គ្រោះថ្នាក់ដែលកើតឡើងគឺបណ្តាលមកពី «កត្តាល្បឿន»។ ជាមួយគ្នានោះដែរ លោក ក៏មានការអំពាវនាវដល់បងប្អូនប្រជាពលរដ្ឋឱ្យចូលរួមគោរពច្បាប់ចរាចរណ៍ ព្រោះវាជានិមិត្តរូបនៃពលរដ្ឋថ្លៃថ្នូរ និងជាការការពារអាយុជីវិតខ្លួនឯង ក៏ដូចជាអ្នកដទៃ៕

កេសកូល ឬដែលប្រជាជនទូទៅនិយមហៅថា «ផ្កាអ័រគីដេ» (Orchid) គឺជារុក្ខជាតិផ្កាដ៏ប្រណិត ស្រស់ស្អាត និងមានភាពចម្រុះពណ៌ទម្រង់យ៉ាងខ្លាំង។ នៅលើសកលលោក កេសកូលត្រូវបានគេចាត់ទុកជាស្តេចផ្កាព្រៃ ចំណែកឯនៅក្នុងព្រះរាជាណាចក្រកម្ពុជាវិញ រុក្ខជាតិនេះមិនត្រឹមតែជាផ្កាលម្អសោភ័ណភាពប៉ុណ្ណោះទេ ប៉ុន្តែវាគឺជាតំណាងឱ្យភាពសម្បូរបែបនៃដួងព្រលឹងព្រៃឈើត្រូពិច និងមានតម្លៃយ៉ាងជ្រាលជ្រៅផ្នែកវប្បធម៌ បរិស្ថាន និងសេដ្ឋកិច្ច។

លោក​ ធាង​ ឡេង​ អភិបាល​នៃគណៈ​អភិបាល​ស្រុក​ បាន​ដឹក​នាំ​ក្រុម​ការងារ​ស្រុក​ អភិបាលរងស្រុក​ សមាជិកក្រុមប្រឹក្សាស្រុក​ ប្រធាន​អនុប្រធានការិយាល័យស្រុក​ អាជ្ញាធរមូលដ្ឋាន​ ភូមិ​ និងយុវជនក្មេងវត្ត​ ដាំកូន​ឈេីនៅ​ វត្ត​សុខំព្រះ​ធម៌​មហា​កម្លាំង​ (ហៅ​វត្ត​ស្មែត​) ស្ថិត​ក្នុង​ភូមិ​ស្មែត​ ឃុំ​ក្រពេីពីរ​ ស្រុក​វាលវែង​ ខេត្ត​ពោធិ៍សាត់​សម្រេច​បាន​ ​៤៥០ដេីម​ ក្នុង​ផែនការ​ដែល​បាន​គ្រោង​ចំនួន​សរុប​ ​១៦០០ដេីម​ ​នៅព្រឹក​ថ្ងៃទី​២៨​ ខែមិថុនា​ ឆ្នាំ២០២៦​។

ឯកឧត្តម ខូយ រីដា ប្រធានគណៈកម្មាធិការគណបក្សប្រជាជនកម្ពុជាខេត្តពោធិ៍សាត់ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបិទវគ្គអប់រំនយោបាយ កម្រិត១ ជំនាន់ទី១ ជូនដល់មន្ត្រី និងសកម្មជនគណបក្សប្រជាជនកម្ពុជាសរុបប្រមាណជាង ៣០០នាក់ នារសៀលថ្ងៃទី២៨ ខែមិថុនា ឆ្នាំ២០២៦ ស្ថិតនៅទីស្នាក់ការគណបក្សស្រុកតាលោសែនជ័យ ខេត្តពោធិ៍សាត់៕

ព្រឹត្តិការណ៍៖ អគារសិក្សាថ្មី ១ខ្នង មាន ៥បន្ទប់ ព្រមទាំងគ្រឿងបរិក្ខារ ត្រូវបានសម្ពោធដាក់ឱ្យប្រើប្រាស់ជាផ្លូវការនៅសាលាបឋមសិក្សារាំងទិល ស្រុកកណ្តៀង ខេត្តពោធិ៍សាត់ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងមានការចូលរួមពី ឯកឧត្តម ខូយ រីដា អភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន និងអាជ្ញាធរដែនដី នាថ្ងៃទី២៨ ខែមិថុនា ឆ្នាំ២០២៦ ។ អគារសិក្សានេះជាអំណោយរបស់ក្រុមហ៊ុន Leader Energy តាមរយៈក្រុមការងារអគ្គិសនីកម្ពុជា សាងសង់ដោយក្រុមហ៊ុន Sakura Power Lines Co.,Ltd ដោយចំណាយថវិកាសាងសង់សរុបចំនួន ១៨៣,១០៣.១២ ដុល្លារអាមេរិក (និងថ្លៃដោះស្រាយផលប៉ះពាល់ ៥,៤០០ ដុល្លារ)។ ការសាងសង់បានចាប់ផ្តើមពីថ្ងៃទី០៩ ខែឧសភា ឆ្នាំ២០២base៥ និងបញ្ចប់នៅថ្ងៃទី១៥ ខែឧសភា ឆ្នាំ២០២៦។ ក្រុមហ៊ុន Leader Energy គឺជាក្រុមហ៊ុនអភិវឌ្ឍន៍ថាមពលកកើតឡើងវិញក្នុងតំបន់អាស៊ី ដែលមានក្រុមហ៊ុនបុត្រសម្ព័ន្ធ CTL ប្រតិបត្តិការខ្សែបញ្ជូនថាមពលអគ្គិសនីតង់ស្យុងខ្ពស់ភ្នំពេញ-ក្រចេះ ហើយបច្ចុប្បន្នកំពុងអភិវឌ្ឍគម្រោងថាមពលខ្យល់ថ្មីនៅខេត្តមណ្ឌលគិរី៕

ការកោតសរសើរ និងដឹងគុណចំពោះលោក តាន់ គឹមសួរ ដែលបានលះបង់កម្លាំងកាយចិត្តចុះផ្ទាល់ដើម្បីផ្សព្វផ្សាយពីសម្រស់ធម្មជាតិដ៏ស្រស់ត្រកាលនៃតំបន់ «ខ្នងព្រះ» ក្នុងខេត្តពោធិ៍សាត់។ សកម្មភាពនេះមិនត្រឹមតែជួយលើកស្ទួយសក្ដានុពលទេសចរណ៍ និងជីវភាពសហគមន៍មូលដ្ឋានប៉ុណ្ណោះទេ ប៉ុន្តែថែមទាំងបានបំផុសគំនិត និងដាស់ស្មារតីដល់មហាជនឱ្យរួមគ្នាស្រឡាញ់ ថែរក្សា និងការពារមរតកធម្មជាតិបៃតងរបស់កម្ពុជាឱ្យបានគង់វង្ស៕