ព័ត៌មានក្នុងខេត្ត

ពោធិ៍សាត់៖ កម្លាំងផ្នែករដ្ឋបាលព្រៃឈើក្រគរ បានសហការជាមួយគណៈបញ្ជាការឯកភាពរដ្ឋបាលស្រុកក្រគរ ចុះត្រួតពិនិត្យ និងធ្វើការអប់រំណែនាំដល់ប្រជាពលរដ្ឋចំនួន ៣ទីតាំង ដែលបានទទួលទិញអុសចម្រុះដោយគ្មានប្រភពស្របច្បាប់ ស្ថិតក្នុងភូមិសាស្ត្រស្រុកក្រគរ ខេត្តពោធិ៍សាត់ កាលពីថ្ងៃទី៨ ខែកញ្ញា ឆ្នាំ២០២៦ ។ ក្នុងប្រតិបត្តិការចុះពិនិត្យនោះ សមត្ថកិច្ចបានរកឃើញទីតាំងទទួលទិញអុសគ្មានច្បាប់អនុញ្ញាតចំនួន ៣កន្លែង រួមមាន៖ ទីតាំងទី១ លោកស្រី ឈឿន លី ស្ថិតនៅភូមិអូរចាប់ ឃុំស្វាយស, ទីតាំងទី២ លោកស្រី ដែន រក្សា ស្ថិតនៅភូមិអូរចាប់ ឃុំស្វាយស និងទីតាំងទី៣ លោកស្រី គុណ ចាន់នី ស្ថិតនៅភូមិដំបូក១០០ ឃុំត្នោតជុំ ស្រុកក្រគរ ខេត្តពោធិ៍សាត់។ នាឱកាសនោះ ក្រុមការងារចម្រុះបានធ្វើការអប់រំណែនាំ និងពន្យល់អំពីទិដ្ឋភាពច្បាប់ស្តីពីព្រៃឈើ ដល់ម្ចាស់ទីតាំងទាំង ៣រូប ដើម្បីឱ្យពួកគាត់បញ្ឈប់រាល់ការទទួលទិញផល-ផលតបព្រៃឈើដែលគ្មានប្រភពច្បាស់លាស់ ឬគ្មានលិខិតអនុញ្ញាត ព្រមទាំងចូលរួមសហការជាមួយអាជ្ញាធរក្នុងការការពារ និងថែរក្សាធនធានធម្មជាតិនៅក្នុងមូលដ្ឋាន៕

ពោធិ៍សាត់៖ លោក អ៊ុំ សុខណា អភិបាលរងស្រុកបាកាន តំណាងលោក ឆាយ គឹមម៉ុង អភិបាលស្រុក បានអញ្ជើញដឹកនាំមន្ត្រីរាជការ និងអាជ្ញាធរមូលដ្ឋាន ចុះយុទ្ធនាការដាំកូនឈើនៅតាមបណ្តោយសងខាងផ្លូវ ស្ថិតក្នុងឃុំខ្នារទទឹង ស្រុកបាកាន ខេត្តពោធិ៍សាត់ នាព្រឹកថ្ងៃទី៩ ខែកញ្ញា ឆ្នាំ២០២៦។ សកម្មភាពដាំដើមឈើដើម្បីបរិស្ថាននេះ មានការចូលរួមយ៉ាងផុសផុលពីសំណាក់សមាជិកក្រុមប្រឹក្សាឃុំខ្នារទទឹង លោកគ្រូ អ្នកគ្រូ មេភូមិ អនុភូមិ កម្លាំងប្រជាការពារ ក្រុមយុវជន ព្រមទាំងបងប្អូនប្រជាពលរដ្ឋនៅក្នុងសហគមន៍យ៉ាងច្រើនកុះករ។ ការរួមគ្នាចុះដាំកូនឈើនាឱកាសនេះ ធ្វើឡើងក្នុងគោលបំណងបង្កើតគម្របបៃតង បង្កើនសោភ័ណភាពតាមដងផ្លូវសាធារណៈ និងជួយកាត់បន្ថយកម្ដៅបរិស្ថាន ព្រមទាំងបំផុសស្មារតីឱ្យប្រជាពលរដ្ឋក្នុងមូលដ្ឋានចូលរួមស្រឡាញ់ និងថែរក្សាដើមឈើឱ្យបានគង់វង្ស ដើម្បីជាប្រយោជន៍ដល់សហគមន៍ទាំងមូល៕

ពោធិ៍សាត់៖ ក្រោមកិច្ចចង្អុលការណែនាំពី លោក ធាម សុផាត អភិបាលនៃគណៈអភិបាលស្រុកភ្នំក្រវាញ នៅព្រឹកថ្ងៃទី៩ ខែកញ្ញា ឆ្នាំ២០២៦ នេះ មន្ត្រីរាជការ អាជ្ញាធរមូលដ្ឋាន ព្រមទាំងកម្លាំងសហការ បានចុះយុទ្ធនាការដាំកូនឈើដើម្បីកែលម្អបរិស្ថាន និងលើកកម្ពស់សោភ័ណភាពនៅតាមដងផ្លូវជាតិលេខ១៥៥ ក្នុងតំបន់ទីប្រជុំជនស្រុក។ សកម្មភាពបៃតងនេះ មានការចូលរួមយ៉ាងសកម្មពីសំណាក់អាជ្ញាធរមូលដ្ឋានឃុំលាច ឃុំរកាត ក្រុមយុវជន និងប្រជាការពារភូមិ ដោយបានរួមគ្នានាំយកកូនឈើមកដាំតាមបណ្តោយដងផ្លូវ ដើម្បីបង្កើនគម្របបៃតង ផ្តល់រមណីយភាព និងកាត់បន្ថយកម្ដៅបរិស្ថាន។ ការប្រមូលផ្តុំគ្នាចុះដាំកូនឈើស្របតាមការចង្អុលការនេះ បង្ហាញពីការយកចិត្តទុកដាក់ខ្ពស់របស់រដ្ឋបាលស្រុកភ្នំក្រវាញ ក្នុងការថែរក្សាបរិស្ថានស្អាត និងរៀបចំសោភ័ណភាពទីក្រុង/ស្រុកឱ្យកាន់តែមានភាពទាក់ទាញ សម្រាប់បម្រើដល់ជីវភាពរស់នៅរបស់ប្រជាពលរដ្ឋក្នុងមូលដ្ឋាន និងភ្ញៀវធ្វើដំណើរឆ្លងកាត់៕

ពោធិ៍សាត់៖ លោក ធាង ឡេង អភិបាលនៃគណៈអភិបាលស្រុកវាលវែង បានអញ្ជើញដឹកនាំក្រុមការងារស្រុក រួមមានសមាជិកក្រុមប្រឹក្សាស្រុក ប្រធានការិយាល័យស្រុក អាជ្ញាធរមូលដ្ឋាន និងក្រុមយុវជន ចុះធ្វើសកម្មភាពដាំដើមផ្កា និងដើមឈើលម្អបន្ថែម ដើម្បីលើកកម្ពស់ និងសោភ័ណភាពតំបន់ទេសចរណ៍ នៅព្រឹកថ្ងៃទី៩ ខែកញ្ញា ឆ្នាំ២០២៦ ។ សកម្មភាពដាំដើមឈើ និងផ្កានេះ បានធ្វើឡើងនៅចំណុចសួនផ្កាបុប្ផាលាក់ខ្លួន តំបន់ភ្នំ១៥០០ (ផ្លូវអន្ទង់អាំង) ស្ថិតក្នុងភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់។ ដើមឈើ និងផ្កាដែលបានដាំបន្ថែមនាឱកាសនោះ រួមមាន ផ្កាភួងម៉ាឡៃ (ផ្កាត្រែមាស) ចំនួន ១២០ដើម និងដើមក្ងោកផ្កាលឿង ចំនួន ៧ដើម។ ការដាំបន្ថែមនេះ ធ្វើឡើងក្នុងគោលបំណងបង្កើនគម្របបៃតង និងបន្ថែមពណ៌សោភ័ណភាពដល់តំបន់ភ្នំ១៥០០ ដែលជាតំបន់ទេសចរណ៍ដ៏ទាក់ទាញមួយក្នុងខេត្តពោធិ៍សាត់ សំដៅទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាកាន់តែច្រើនឡើង៕

ពោធិ៍សាត់៖ លោក ធាង ឡេង អភិបាល នៃគណៈអភិបាលស្រុកវាលវែង បានដឹកនាំក្រុមការងារបច្ចេកទេសថ្នាក់ស្រុក ចុះពិនិត្យដោយផ្ទាល់នូវវឌ្ឍនភាពនៃការរៀបចំសួន «ភ្នំ១៥០០» នៅតំបន់ផ្លូវអន្ទង់អាំង (បុប្ផាលាក់ខ្លួន) ស្ថិតក្នុងភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់ កាលពីល្ងាចថ្ងៃទី៨ ខែកញ្ញា ឆ្នាំ២០២៦ ។ ការចុះពិនិត្យនេះធ្វើឡើងក្នុងគោលបំណងជំរុញការងាររៀបចំសោភ័ណភាព និងលើកកម្ពស់សម្រស់ធម្មជាតិនៃតំបន់ទេសចរណ៍ដ៏មានប្រជាប្រិយភាពមួយនេះ ឱ្យកាន់តែមានភាពទាក់ទាញបន្ថែមទៀត។ រដ្ឋបាលស្រុកវាលវែងរំពឹងថា ការរៀបចំសួន និងហេដ្ឋារចនាសម្ព័ន្ធជុំវិញតំបន់នេះ នឹងជួយទាក់ទាញភ្ញៀវទេសចរទាំងជិត ឆ្ងាយ ជាតិ និងអន្តរជាតិ ឱ្យចូលមកទស្សនាកម្សាន្តកាន់តែច្រើនកុះករ ដែលជាផ្នែកមួយយ៉ាងសំខាន់ក្នុងការបង្កើតចំណូល និងលើកស្ទួយសេដ្ឋកិច្ចរបស់ប្រជាពលរដ្ឋក្នុងមូលដ្ឋាន៕

ពោធិ៍សាត់៖ អាជ្ញាធរស្រុកវាលវែងបានរៀបចំពិធីសម្ពោធដាក់ឱ្យដំណើរការជាផ្លូវការនូវប្រព័ន្ធទុយោចែកចាយទឹកស្អាតក្នុងសហគមន៍ភូមិទំព័រ ស្ថិតនៅភូមិទំព័រ ឃុំប្រម៉ោយ ស្រុកវាលវែង ខេត្តពោធិ៍សាត់ ដើម្បីឆ្លើយតបទៅនឹងតម្រូវការប្រើប្រាស់ទឹកស្អាតប្រចាំថ្ងៃរបស់ប្រជាពលរដ្ឋក្នុងមូលដ្ឋាន កាលពីថ្ងៃទី៨ ខែកញ្ញា ឆ្នាំ២០២៦ ។ ពិធីនេះបានប្រព្រឹត្តទៅក្រោមអធិបតីភាព លោក ធាង ឡេង អភិបាល នៃគណៈអភិបាលស្រុកវាលវែង ដោយមានការចូលរួមពីក្រុមការងារថ្នាក់ស្រុក អាជ្ញាធរភូមិ-ឃុំ តំណាងមន្ទីរបរិស្ថានខេត្តពោធិ៍សាត់ ក្រុមការងារគម្រោងអង្គការទឹកភ្លៀងកម្ពុជា និងប្រជាពលរដ្ឋជាសមាជិកសហគមន៍ភូមិទំព័រយ៉ាងច្រើនកុះករ។ ព្រឹត្តិការណ៍នេះក៏មានវត្តមានជាកិត្តិយសពីសំណាក់តំណាងម្ចាស់ជំនួយនៃអង្គការទឹកភ្លៀងដែលអញ្ជើញមកពី ៥ ប្រទេសផ្សេងៗគ្នាផងដែរ។ ការដាក់ឱ្យដំណើរការប្រព័ន្ធទុយោចែកចាយទឹកស្អាតនាពេលនេះ គឺជាសមិទ្ធផលដ៏សំខាន់មួយដែលកើតចេញពីកិច្ចសហប្រតិបត្តិការរវាងអាជ្ញាធរដែនដី និងអង្គការដៃគូអភិវឌ្ឍន៍ ក្នុងគោលបំណងលើកកម្ពស់សុខុមាលភាព អនាម័យ និងជីវភាពរស់នៅរបស់ប្រជាសហគមន៍ភូមិទំព័រឱ្យកាន់តែប្រសើរឡើងជាលំដាប់៕

ពោធិ៍សាត់៖ លោក ចាន់ វិចិត្រ អភិបាលស្រុកតាលោសែនជ័យ បានអញ្ជើញដឹកនាំក្រុមការងាររដ្ឋបាលស្រុក អាជ្ញាធរឃុំ ភូមិ និងក្រុមយុវជនគណបក្សស្រុក ចុះសំណេះសំណាលសួរសុខទុក្ខ និងនាំយកអំណោយស្បៀងអាហារ ចែកជូនប្រជាពលរដ្ឋក្រីក្រខ្វះខាតជីវភាពចំនួន ១៥គ្រួសារ នៅភូមិតាសាស់ ឃុំផ្ទះរុង នារសៀលថ្ងៃអង្គារ ទី៨ ខែ កញ្ញា ឆ្នាំ២០២៦។ ក្នុងឱកាសនោះ លោកអភិបាលស្រុកបានពាំនាំការផ្តាំផ្ញើសួរសុខទុក្ខ និងក្តីនឹករលឹកពីថ្នាក់ដឹកនាំ ព្រមទាំងបានលើកទឹកចិត្តដល់បងប្អូនប្រជាពលរដ្ឋឱ្យខិតខំប្រកបរបររកស៊ី និងថែទាំសុខភាពឱ្យបានល្អ ខណៈប្រជាពលរដ្ឋដែលទទួលបានអំណោយបានសម្តែងក្តីរំភើប និងថ្លែងអំណរគុណយ៉ាងជ្រាលជ្រៅចំពោះការគិតគូរជួយយកអាសន្នបានទាន់ពេលវេលានេះ៕សាយយ័ន្ត វុន្នីយ៉ា

អភិបាលរងស្រុកក្រគរ បានអញ្ជើញជាអធិបតីក្នុងកិច្ចប្រជុំប្រចាំខែសីហា របស់ការិយាល័យអប់រំ យុវជន និងកីឡាស្រុក ដើម្បីពិនិត្យវឌ្ឍនភាពការងារ និងដាក់ចេញទិសដៅបន្ត។

ខេត្តពោធិ៍សាត់៖ លោក ធាម សុផាត អភិបាល នៃគណៈអភិបាលស្រុកភ្នំក្រវាញ បានអញ្ជើញជាអធិបតីភាពដ៏ខ្ពង់ខ្ពស់ក្នុងកម្មវិធីសំណេះសំណាលជាមួយលោកនាយក និងលោកស្រីនាយិកាសាលា confrontations មកពីតាមបណ្តាគ្រឹះស្ថានសិក្សាទូទាំងស្រុកភ្នំក្រវាញ នាព្រឹកថ្ងៃទី៩ ខែកញ្ញា ឆ្នាំ២០២៦។ នៅក្នុងឱកាសនោះ លោកអភិបាលស្រុកបានគូសបញ្ជាក់ពីតួនាទី និងភារកិច្ចដ៏មានសារៈសំខាន់របស់ថ្នាក់ដឹកនាំសាលារៀន ក្នុងការលើកកម្ពស់គុណភាពអប់រំ ការពង្រឹងវិន័យ សីលធម៌ និងការកសាងសមត្ថភាពយុវជនទំពាំងស្នងឫស្សីក្នុងមូលដ្ឋាន។ លោកក៏បានអំពាវនាវដល់លោកនាយក នាយិកាទាំងអស់ បន្តពង្រឹងកិច្ចសហការគ្នាយ៉ាងជិតស្និទ្ធជាមួយអាជ្ញាធរដែនដី និងមាតាបិតា ឬអាណាព្យាបាលសិស្ស ដើម្បីរួមគ្នាអភិវឌ្ឍវិស័យអប់រំនៅស្រុកភ្នំក្រវាញឱ្យកាន់តែរីកចម្រើនថែមទៀត៕​

ខេត្តពោធិ៍សាត់៖ លោក ចាន់ វិចិត្រ អភិបាលស្រុកតាលោសែនជ័យ បានអញ្ជើញដឹកនាំក្រុមការងាររដ្ឋបាលស្រុក មន្ត្រីជំនាញ និងក្រុមការងារឃុំ ភូមិ ចុះពិនិត្យផ្ទាល់ និងរៀបចំវិធានការអន្តរាគមន៍ទឹកជូនប្រជាពលរដ្ឋ ដែលកំពុងជួបប្រទះការខ្វះខាតទឹកក្នុងមូលដ្ឋានឃុំផ្ទះរុង។ ការចុះមូលដ្ឋាននេះធ្វើឡើងក្នុងគោលបំណងដើម្បីដោះស្រាយបញ្ហាប្រឈម និងឆ្លើយតបឱ្យបានទាន់ពេលវេលាចំពោះតម្រូវការទឹកប្រើប្រាស់ប្រចាំថ្ងៃរបស់បងប្អូនប្រជាពលរដ្ឋ ដោយមានការចាត់ចែងដឹកជញ្ជូន និងចែកចាយទឹកស្អាតទៅកាន់តំបន់ដែលកំពុងរងផលប៉ះពាល់ ដើម្បីធានាថាពលរដ្ឋគ្រប់រូបមានទឹកគ្រប់គ្រាន់សម្រាប់ប្រើប្រាស់ក្នុងជីវភាពរស់នៅ។ ក្រៅពីកិច្ចអន្តរាគមន៍ផ្នែករដ្ឋបាលនិងបច្ចេកទេស លោក ចាន់ វិចិត្រ ព្រមទាំងក្រុមការងារ ក៏បានអញ្ជើញចូលរួមក្នុងពិធីបន់ស្រន់សុំទឹកភ្លៀង ដែលរៀបចំឡើងយ៉ាងគំរូតាមទំនៀមទម្លាប់ និងប្រពៃណីដ៏យូរលង់របស់អ្នកភូមិកណ្តាល ឃុំផ្ទះរុង ផងដែរ។ ពិធីនេះ គឺជាជំនឿ និងជាស្មារតីរួមគ្នាក្នុងការបួងសួងសុំព្រះពិរុណឱ្យជួយផ្តល់ទឹកភ្លៀងធ្លាក់មកបំពេញតាមតម្រូវការកសិកម្ម និងការប្រើប្រាស់ ព្រមទាំងផ្តល់នូវសេចក្តីសុខសប្បាយ ការរស់នៅប្រកបដោយភោគផលបរិបូរណ៍ជូនដល់ប្រជាកសិករក្នុងមូលដ្ឋានទាំងមូល៕

ខេត្តពោធិ៍សាត់៖ លោក ធាង ឡេង អភិបាលស្រុកវាលវែង បានអញ្ជើញដឹកនាំក្រុមការងារស្រុក ដែលមានលោកសមាជិកក្រុមប្រឹក្សាស្រុក លោកនាយករងរដ្ឋបាលសាលាស្រុក លោកប្រធាន និងអនុប្រធានការិយាល័យស្រុក ព្រមទាំងអាជ្ញាធរឃុំ និងភូមិ ចុះពិនិត្យការជួសជុលផ្លូវលំ១ខ្សែ ចាប់ពីចំណុចថ្មសំលៀង ភូមិសំឡាញ ទៅកាន់ភូមិក្រសាំងព្នៅ ឃុំក្រពើពីរ ស្រុកវាលវែង ខេត្តពោធិ៍សាត់ រសៀលថ្ងៃទី៨ ខែកញ្ញា ឆ្នាំ២០២៦ ។ ការចុះពិនិត្យការដ្ឋានជួសជុលផ្លូវនេះ គឺធ្វើឡើងក្នុងគោលបំណងដើម្បីសម្រួលដល់ការធ្វើដំណើរជូនប្រជាពលរដ្ឋក្នុងមូលដ្ឋាន ព្រមទាំងបងប្អូនប្រជាពលរដ្ឋ និងភ្ញៀវទេសចរណ៍នានា ដែលអញ្ជើញឆ្លងកាត់ក្នុងភូមិសាស្ត្រស្រុកវាលវែង ឱ្យកាន់តែមានភាពងាយស្រួល សុវត្ថិភាព និងឆាប់រហ័សជាងមុន៕

អភិបាលរងស្រុកក្រគរ ព្រមទាំងលោក លោកស្រីមេឃុំ បានចូលរួមសិក្ខាសាលាតម្រង់ទិសស្តីពីសារាចរណែនាំលេខ ០០៧ ដល់មន្ត្រីពាក់ព័ន្ធថ្នាក់ក្រោមជាតិ ដែលប្រារព្ធធ្វើឡើងនៅសាលប្រជុំសាលាខេត្តពោធិ៍សាត់ ក្រោមអធិបតីភាព លោក លឹម សុខតូ អភិបាលរងខេត្តតំណាង ឯកឧត្តម ខូយ រីដា អភិបាលខេត្តពោធិ៍សាត់។