ព័ត៌មានក្នុងខេត្ត

អភិបាលស្រុកបាកាន បានដឹកនាំក្រុមការងារចុះអប់រំ និងតម្រូវឱ្យម្ចាស់ស្ថានីយប្រេង យានដ្ឋាន និងចំណតឡានខ្សាច់ក្នុងឃុំត្រពាំងជង និងឃុំបឹងខ្នារ ធ្វើកិច្ចសន្យាគោរពសណ្តាប់ធ្នាប់សាធារណៈ និងគ្របខ្សាច់ឱ្យបានត្រឹមត្រូវដើម្បីការពារការហូរជ្រុះលើដងផ្លូវ ដោយអាជ្ញាធរនឹងចាត់វិធានការច្បាប់តឹងរ៉ឹងចំពោះអ្នកខកខាន។

ពោធិ៍សាត់៖ លោក ផាយ ឡេង អភិបាលក្រុងពោធិ៍សាត់ បានចុះត្រួតពិនិត្យផ្ទាល់នៅទីតាំងពូនដាក់ដាំកូនឈើក្ងោកបន្តតាមបណ្តោយផ្លូវជាតិលេខ៥ ក្នុងតំបន់សង្កាត់ព្រៃញី ក្រុងពោធិ៍សាត់។ ការចុះពិនិត្យនេះធ្វើឡើងក្នុងគោលបំណងពន្លឿន និងធានាឱ្យការរៀបចំកែលម្អសោភ័ណភាពបៃតងតាមដងផ្លូវសាធារណៈប្រព្រឹត្តទៅដោយរលូន ស្របតាមផែនការអភិវឌ្ឍន៍បរិស្ថានទីក្រុងស្អាត។ ក្នុងឱកាសនោះ លោកអភិបាលក្រុងបានណែនាំដល់ក្រុមការងារបច្ចេកទេស និងអាជ្ញាធរមូលដ្ឋានឱ្យយកចិត្តទុកដាក់ខ្ពស់លើការថែទាំ ការដាក់ជី និងការការពារកូនឈើទាំងនោះ ដើម្បីធានាឱ្យកូនឈើក្ងោកលូតលាស់បានល្អ បង្កើតបានជាម្លប់ និងសោភ័ណភាពស្រស់បំព្រងសម្រាប់ភ្ញៀវទេសចរ ក៏ដូចជាប្រជាពលរដ្ឋធ្វើដំណើរឆ្លងកាត់៕សាយយ័ន្ត វុន្នីយ៉ា

ពោធិ៍សាត់៖ តំបន់នេះត្រូវបានរដ្ឋាភិបាលសម្រេចបង្កើត និងកំណត់ជាផ្លូវការនូវឈ្មោះថា ភូមិប៊ុនរ៉ានីសែនជ័យ ដំណាក់ត្រយឹង ដែលជាតំបន់អភិវឌ្ឍន៍ថ្មីមួយ កើតចេញពីការផ្តួចផ្តើមដ៏ថ្លៃថ្លារបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងគោលបំណងរៀបចំកសាងហេដ្ឋារចនាសម្ព័ន្ធ ផ្តល់ដីឡូតិ៍ លំនៅឋាន និងបង្កើតជាសហគមន៍ថ្មី ជូនដល់គ្រួសារអតីតយុទ្ធជន និងកងកម្លាំងប្រដាប់អាវុធ ដើម្បីលើកកម្ពស់ជីវភាពរស់នៅ និងបង្កើនការអភិវឌ្ឍមូលដ្ឋានក្នុងតំបន់ជួរភ្នំក្រវាញ។ក្រៅពីការរៀបចំជាភូមិអភិវឌ្ឍន៍និងទីលំនៅឋាន តំបន់ធម្មជាតិ ដំណាក់ត្រយឹង ស្ថិតក្នុងភូមិប៊ុនរ៉ានីសែនជ័យ ឃុំព្រងិល ស្រុកភ្នំក្រវាញ ខេត្តពោធិ៍សាត់ ក៏កំពុងមានសក្តានុពលខ្ពស់ក្នុងការអភិវឌ្ឍទៅជា គោលដៅអេកូទេសចរណ៍ធម្មជាតិ (Eco-Tourism) ដ៏ទាក់ទាញមួយផងដែរ ដោយសារកត្តាដូចជា៖ ទេសភាពព្រៃភ្នំ និងខ្យល់អាកាសបរិសុទ្ធ, ការតភ្ជាប់ជាមួយផ្លូវទេសចរណ៍ និងតំបន់ជុំវិញ, ការអភិវឌ្ឍសហគមន៍ទេសចរណ៍មូលដ្ឋាន ៕

លោក គិត ផល អនុប្រធានគ្រប់រួមមន្ទីរធនធានទឹក និងឧតុនិយមខេត្តពោធិ៍សាត់ បានចុះផ្សព្វផ្សាយ និងពង្រឹងការងារសហគមន៍កសិករប្រើប្រាស់ទឹកកំប៉ាង ឃុំស្វាយដូនកែវ ស្រុកបាកាន។ សកម្មភាពសំខាន់ៗរួមមាន ការប្រជុំជាមួយអាជ្ញាធរនិងគណៈកម្មាធិការសហគមន៍ ការផ្សព្វផ្សាយផែនការគ្រប់គ្រងទឹក ការណែនាំលក្ខន្តិកៈសមាជិក និងការបណ្តុះបណ្តាលលើមេរៀនរដ្ឋបាល ហិរញ្ញវត្ថុ ការគ្រប់គ្រង ការបែងចែកទឹក និងប្រព័ន្ធ PIMD នាថ្ងៃទី៣១ ខែសីហា ឆ្នាំ២០២៦ ។

អភិបាលក្រុងនិងជាប្រធានសមាគមអតីតយុទ្ធជន និងនិវត្តជនកម្ពុជាក្រុងពោធិ៍សាត់ តំណាង ឯកឧត្ដម ខូយ រីដា បាននាំយកប្រាក់បេឡាមរណសង្គ្រោះសរុប ៨.០០០.០០០ រៀល ទៅប្រគល់ជូនគ្រួសារសពអតីតយុទ្ធជនចំនួន ២ គ្រួសារ រួមមានគ្រួសារលោក ឈុត សំអ៊ុល និងគ្រួសារលោក អ៊ុច ហ៉ឹង ដែលរស់នៅសង្កាត់ផ្ទះព្រៃ ក្រុងពោធិ៍សាត់ ព្រមទាំងបានពាំនាំនូវសាររំលែកទុក្ខ និងលិខិតចូលរួមរំលែកទុក្ខរបស់គណបក្សប្រជាជនកម្ពុជាខេត្តផងដែរ។

រដ្ឋបាលខេត្តពោធិ៍សាត់ បានរៀបចំដំណើរទស្សនកិច្ចសិក្សា នៅខេត្តសៀមរាប កាលពីថ្ងៃទី២៩-៣០ ខែសីហា ឆ្នាំ២០២៦ ជូនមន្ត្រីរាជការ និងមន្ត្រីកិច្ចសន្យា នៃសាលាខេត្តពោធិ៍សាត់ ក្រោមការឧបត្ថម្ភរបស់ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងលោកជំទាវ អាំង សុជាតា ខូយ រីដា។

ពោធិ៍សាត់៖ លោក ចាន់ វិចិត្រ អភិបាលនៃគណៈអភិបាលស្រុកតាលោសែនជ័យ បានអញ្ជើញចុះជួបសំណេះសំណាល ដោយផ្ទាល់ជាមួយប្រជាពលរដ្ឋ ស្ថិតនៅភូមិស្តុកខ្ទុម ភូមិក្រញាំ និងភូមិឆ្នាល់មាន់ ដើម្បីសួរសុខទុក្ខ និងពិនិត្យមើលស្ថានភាពជីវភាពរស់នៅជាក់ស្តែង។ ក្នុងឱកាសនោះ លោកអភិបាលស្រុក បានពិនិត្យលើការងារសំខាន់ៗ៖ តាមដាន និងជួយសម្រួលដល់ការសាងសង់ផ្ទះសម្បែងឡើងវិញ ជូនគ្រួសារដែលរងគ្រោះថ្នាក់ដោយសារគ្រោះធម្មជាតិ, ពិនិត្យ និងរៀបចំដំណើរការចុះបញ្ជីដីធ្លីជូនប្រជាពលរដ្ឋ ដើម្បីធានាកម្មសិទ្ធិស្របច្បាប់ និងបង្កើនទំនុកចិត្តក្នុងសហគមន៍៕

តបតាមបណ្តឹង និងសំណូមពររបស់ប្រជាពលរដ្ឋ អាជ្ញាធរស្រុកបាកាន បានដឹកនាំមន្ត្រីជំនាញ និងសមត្ថកិច្ច ចុះពិនិត្យស្ថានភាពជាក់ស្តែងករណីហុយធូលីចេញពីអាជីវកម្មម៉ាស៊ីនកិនស្រូវ ស្ថិតនៅភូមិព្រៃផ្ដៅ ឃុំបឹងខ្នារ ស្រុកបាកាន ដើម្បីសម្របសម្រួលស្វែងរកដំណោះស្រាយសមស្រប។

ពោធិ៍សាត់៖ រដ្ឋបាលស្រុកបាកាន បានរៀបចំ «វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ» ក្រោមអធិបតីភាព ឯកឧត្តម ឡេង សែ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ នៅសាលាស្រុកបាកាន ខេត្តពោធិ៍សាត់។ កម្មវិធីនេះ មានការអញ្ជើញចូលរួមពីសំណាក់ អភិបាលរងខេត្ត អភិបាលស្រុក ប្រធានមន្ទីរការងារ និងបណ្តុះបណ្តាលវិជ្ជាជីវៈ ប្រធានមជ្ឈមណ្ឌលការងារខេត្ត ក្រុមប្រឹក្សាឃុំទាំង ៩ ព្រមទាំងប្រជាពលរដ្ឋ និងយុវជនសរុបប្រមាណជាង ៧០០នាក់។ វេទិកានេះ រៀបចំឡើងក្នុងគោលបំណងផ្សព្វផ្សាយ និងផ្តល់ព័ត៌មានដោយផ្ទាល់អំពី៖ ឱកាសការងារ នៃការតភ្ជាប់រវាងនិយោជក និងអ្នកស្វែងរកការងារធ្វើ, សេវាសន្តិសុខសង្គម (ប.ស.ស.) ការស្វែងយល់ពីអត្ថប្រយោជន៍ និងកិច្ចគាំពារសង្គម, ការបណ្តុះបណ្តាលជំនាញវិជ្ជាជីវៈ ការផ្តល់ឱកាសសិក្សាជំនាញបច្ចេកទេស ដើម្បីបង្កើនប្រាក់ចំណូល និងលើកកម្ពស់ជីវភាពប្រជាពលរដ្ឋក្នុងមូលដ្ឋាន៕

ពោធិ៍សាត់៖ ស្ពានបេតុងអាមេថ្មីឆ្លងកាត់ស្ទឹងពោធិ៍សាត់ ស្ថិតក្នុងស្រុកភ្នំក្រវាញ ខេត្តពោធិ៍សាត់ បាននិងកំពុងលេចរូបរាងឡើងយ៉ាងស្កឹមស្កៃ ដោយបានប្តូរមុខមាត់ថ្មីជំនួសស្ពានចាស់ ព្រមទាំងបន្ថែមសោភ័ណភាពយ៉ាងត្រកាលដល់តំបន់ប្រជុំជនស្រុកភ្នំក្រវាញ។ សមិទ្ធផលប្រវត្តិសាស្ត្រមួយនេះ មិនត្រឹមតែលើកកម្ពស់សោភ័ណភាព និងសម្រស់ក្នុងមូលដ្ឋានប៉ុណ្ណោះទេ ប៉ុន្តែថែមទាំងបានសម្រួលដល់ការធ្វើដំណើរ សម្រួលការដឹកជញ្ជូនកសិផល និងជួយជំរុញសេដ្ឋកិច្ច ទេសចរណ៍ ក្នុងស្រុកភ្នំក្រវាញឱ្យកាន់តែមានការរីកចម្រើនយ៉ាងឆាប់រហ័សផងដែរ៕

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យទីតាំងដីតំបន់ «ភ្នំបាក់ត្រា» (ចំណុចប្រោសសត្វ) ដែលស្ថិតនៅក្នុងឃុំព្រងិល ស្រុកភ្នំក្រវាញ ខេត្តពោធិ៍សាត់។ ការចុះពិនិត្យផ្ទាល់ដល់ទីតាំងនេះ គឺដើម្បីសិក្សា និងវាយតម្លៃលើស្ថានភាពជាក់ស្តែង ក្នុងការរៀបចំគ្រប់គ្រងដីធ្លី ការពារធនធានធម្មជាតិ និងពិនិត្យលើប្រព័ន្ធហេដ្ឋារចនាសម្ព័ន្ធ ដើម្បីបម្រើឱ្យផលប្រយោជន៍សាធារណៈ និងការអភិវឌ្ឍក្នុងមូលដ្ឋាននាពេលខាងមុខ៕

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះត្រួតពិនិត្យផ្ទាល់នូវសមិទ្ធផលអគារសិក្សាថ្មី ដែលត្រូវបានសាងសង់រួចរាល់ជាស្ថាពរ ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី៣០ ខែសីហា ឆ្នាំ២០២៦។ ក្នុងឱកាសអញ្ជើញចុះពិនិត្យនោះដែរ ឯកឧត្តមអភិបាលខេត្ត ក៏បានផ្តល់អនុសាសន៍ និងការណែនាំសំខាន់ៗដល់អាជ្ញាធរពាក់ព័ន្ធ អំពីការរៀបចំកែលម្អទីធ្លាបរិវេណអនុវិទ្យាល័យអន្លង់រាប ឱ្យមានសោភ័ណភាព បរិស្ថានល្អប្រសើរ និងផាសុកភាព សម្រួលដល់ការសិក្សារបស់សិស្សានុសិស្ស និងលោកគ្រូ អ្នកគ្រូ៕