ព័ត៌មានក្នុងខេត្ត

ពោធិ៍សាត់៖ កម្លាំងកងពលតូចថ្មើរជើងលេខ៥៣ (យោធភូមិភាគ៥) ប្រចាំការនៅភូមិកំពង់ថ្គោល ឃុំអន្សាចំបក់ ស្រុកក្រគរ បានឃាត់ខ្លួនជនសង្ស័យម្នាក់ ពាក់ព័ន្ធករណីនេសាទដោយឧបករណ៍ឆក់ រួចប្រគល់ជូនផ្នែករដ្ឋបាលជលផលក្រគរ និងសង្កាត់រដ្ឋបាលជលផលកំពង់លួង ដើម្បីចាត់ការបន្ត នៅថ្ងៃទី១២ ខែកក្កដា ឆ្នាំ២០២៦។ នៅក្នុងប្រតិបត្តិការនេះ សមត្ថកិច្ចដកហូតបានវត្ថុតាងរួមមាន៖ អាំងទែវ៉ិចទ័រ ១គ្រឿង, អាគុយ៤០អំពែ ១គ្រឿង, ដងឆក់ ១គូ និងខ្សែភ្លើងប្រវែង ៣ម៉ែត្រ។ បច្ចុប្បន្ន ជនសង្ស័យត្រូវបានក្រុមការងារកសាងសំណុំរឿងបញ្ជូនទៅកាន់តុលាការ ចំណែកវត្ថុតាងត្រូវបានរក្សាទុកនៅខណ្ឌរដ្ឋបាលជលផលពោធិ៍សាត់ ដើម្បីអនុវត្តតាមនីតិវិធីច្បាប់៕

ពោធិ៍សាត់៖ ក្រុមការងារខណ្ឌរដ្ឋបាលព្រៃឈើពោធិ៍សាត់ សហការជាមួយមន្ត្រីបរិស្ថាន និងកម្លាំងប៉ុស្តិ៍នគរបាលរដ្ឋបាលឃុំស្វាយស បានចុះបង្ក្រាបបទល្មើសព្រៃឈើជាក់ស្តែងមួយករណី ត្រង់ចំណុចក្រោយភ្នំខុស (និយាមកា UTM 408161-1355776) ស្ថិតក្នុងភូមិអន្សាចំបក់ ឃុំស្វាយស ស្រុកក្រគរ ខេត្តពោធិ៍សាត់។ នៅក្នុងប្រតិបត្តិការនោះ សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ឈុំ រុំ អាយុ ៥៨ឆ្នាំ រស់នៅភូមិក្បាលទាហាន ឃុំឈើតុំ ស្រុកក្រគរ ដែលបានប្រព្រឹត្តសកម្មភាពលួចកាប់រំលំដើមឈើផ្ចឹក ដើម្បីយកមកធ្វើជាបង្គោលរបង។ វត្ថុតាងដែលដកហូតបានរួមមាន ឈើផ្ចឹកចំនួន ០៧ កំណាត់ (ទំហំមុខកាត់ ១២សង់ទីម៉ែត្រ x ១២សង់ទីម៉ែត្រ និងប្រវែង ២ម៉ែត្រ) ព្រមទាំងពូថៅដៃចំនួន ១ ផងដែរ។ យោងតាមការណែនាំពីគណៈបញ្ជាការឯកភាពស្រុកក្រគរ ក្រុមការងារចម្រុះបានសម្រេចធ្វើការអប់រំណែនាំ និងឱ្យជនល្មើសធ្វើកិច្ចសន្យាបញ្ឈប់សកម្មភាពកាប់បំផ្លាញព្រៃឈើនេះតទៅទៀត។ ចំណែកឯវត្ថុតាងពូថៅ និងបង្គោលឈើទាំង ៧ដើម ត្រូវបានសមត្ថកិច្ចដកហូតយកមករក្សាទុកជាបណ្តោះអាសន្ននៅប៉ុស្តិ៍នគរបាលរដ្ឋបាលឃុំស្វាយស ដើម្បីចាត់ការតាមនីតិវិធី៕

តាមការពិនិត្យជាក់ស្តែង ទឹកស្ទឹងស្វាយដូនកែវ (ស្រុកបាកាន) ត្រង់ចំណុចស្ពានស្វាយដូនកែវ មានកម្ពស់ ១,៣៨ ម៉ែត្រ និងបានធ្លាក់ដល់ទំនប់បង្ហៀរច្រប់ហើយ។ ទោះជាយ៉ាងណា បណ្តាឃុំមួយចំនួននៅផ្នែកខាងក្រោមផ្លូវជាតិ រួមមាន ឃុំមេទឹក អូរតាប៉ោង បឹងបត់កណ្តោល និងឃុំស្រែស្តុក (ស្រុកកណ្តៀង) នៅតែមានតម្រូវការទឹកបន្ថែមសម្រាប់ដីស្រែដែលនៅឆ្ងាយពីប្រភពទឹក។

ពោធិ៍សាត់៖ លោក ហេង សុភាណា អភិបាលរងខេត្ត និងជាប្រធានក្រុមការងារគណបក្សប្រជាជនកម្ពុជា ចុះជួយមូលដ្ឋានសង្កាត់លលកស រួមជាមួយលោក លាង ទិតដ្ឋាន ប្រធានមន្ទីរព័ត៌មាន និងជាប្រធានក្រុមការងារគណបក្សចុះជួយមូលដ្ឋានភូមិជំរុំសៀម ព្រមទាំងសហការី បានអញ្ជើញចុះសំណេះសំណាល និងសួរសុខទុក្ខបងប្អូនប្រជាពលរដ្ឋនៅក្នុងមូលដ្ឋានផ្ទាល់ នាព្រឹកថ្ងៃទី១២ ខែកក្កដា ឆ្នាំ២០២៦។ ការចុះជួបសំណេះសំណាលនេះ គឺជាការបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំ ចំពោះជីវភាពរស់នៅ និងសុខទុក្ខរបស់ប្រជាពលរដ្ឋនៅតាមមូលដ្ឋាន ដើម្បីស្វែងយល់ពីសុខទុក្ខជាក់ស្តែង និងពង្រឹងភាពជិតស្និទ្ធរវាងអាជ្ញាធរជាមួយប្រជាពលរដ្ឋ។ នៅក្នុងឱកាសដ៏មានអត្ថន័យនោះ ថ្នាក់ដឹកនាំ និងក្រុមការងារក៏បាននាំយកនូវវត្ថុអនុស្សាវរីយ៍បន្តិចបន្តួចជាកាដូកំដរដៃ ចែកជូនដល់បងប្អូនប្រជាពលរដ្ឋយើង ដោយក្នុងមួយគ្រួសារទទួលបាន៖ សារ៉ុង ចំនួន ១ សាប៊ូ ចំនួន ១ កញ្ចប់ (ថង់) និងប្រជាការពារទទួលបានអាយកូមសម្រាប់បំរើការងារក្នុងភូមិផងដែរ៕

ពហុកីឡដ្ឋានសម្តេចតេជោក្រគរ ស្ថិតក្នុងឃុំស្នាអន្សា ស្រុកក្រគរ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ បានបង្ហាះចក្ខុវិស័យអភិវឌ្ឍន៍ខេត្តនិងកសាងសមត្ថភាពយុវជន ជាពិសេសសិស្សានុសិស្ស រួមគ្នាដើម្បីអនាគត។

ពោធិ៍សាត់៖ លោក ភុន សុវណ្ណា នាយខណ្ឌរដ្ឋបាលជលផលពោធិ៍សាត់ បានដឹកនាំក្រុមការងារ រួមមាននាយផ្នែករដ្ឋបាលជលផលក្រគរ និងនាយសង្កាត់រដ្ឋបាលជលផលកំពង់លួង សហការជាមួយគណ:បញ្ជាការឯកភាពស្រុកក្រគរ ដឹកនាំដោយលោក គឺ គឹមណូ អភិបាលរងស្រុក បានចុះត្រួតពិនិត្យ និងបង្ក្រាបបទល្មើសនេសាទខុសច្បាប់ កាលពីថ្ងៃទី១១ ខែកក្កដា ឆ្នាំ២០២៦។ ប្រតិបត្តិការនេះ មានការចូលរួមពី លោក កុល ចាន់ដារ៉ា នាយសេនាធិការតំបន់ប្រតិបត្តិការសឹករងពោធិ៍សាត់ និងកងរាជអាវុធហត្ថស្រុកក្រគរ ដោយប្រើប្រាស់កម្លាំងសរុបចំនួន ១៦ នាក់ និងកាណូតចំនួន ៤ គ្រឿង ចុះពិនិត្យចាប់ពីចំណុចមុខកំពង់លួង ដល់មុខភូមិកំពង់ថ្គោល ឃុំអន្សាចំបក់ ស្រុកក្រគរ។ ជាលទ្ធផល ក្នុងកិច្ចប្រតិបត្តិការនេះ កម្លាំងចម្រុះបង្ក្រាបបានចំនួន ១ករណី ដោយដកហូត និងបំផ្លាញចោលនូវវត្ថុតាងរួមមាន៖ របាំងស្បៃមុង ចំនួន ១២ ខ្សែ (ប្រវែង ១.៣៥០ ម៉ែត្រ), លូកងស្បៃមុង ចំនួន ១២ មាត់ និង ផលត្រី៖ ចំនួន ៦ គីឡូក្រាម ត្រូវបានចាក់លែងចូលទៅក្នុងធម្មជាតិវិញ៕

ពោធិ៍សាត់៖ កិច្ចប្រជុំផ្សព្វផ្សាយស្តីពីការអនុវត្តគម្រោងលើកកម្ពស់ជីវភាពប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹងភាពធន់ (EMPOWER) នៅសាលាស្រុកបាកាន កាលពីថ្ងៃសៅរ៍ ទី១១ ខែកក្កដា ឆ្នាំ២០២៦។ កិច្ចប្រជុំនេះបានប្រព្រឹត្តទៅក្រោមអធិបតីភាព ឯកឧត្តម ទី នរិន្ទ រដ្ឋលេខាធិការប្រចាំការក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាលចុះជួយស្រុកបាកាន ព្រមទាំង លោកជំទាវ វ៉ាន់ សែនពិសី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីអាជ្ញាធរមូលដ្ឋាន និងប្រជាពលរដ្ឋជិត ១,០០០នាក់។ គម្រោង EMPOWER នេះ នឹងផ្តោតការយកចិត្តទុកដាក់គាំទ្រដល់ប្រជាពលរដ្ឋក្រីក្រនៅក្នុងតំបន់គោលដៅនៃឃុំចំនួន៣ គឺ ឃុំខ្នារទទឹង ឃុំត្រពាំងជង និងឃុំស្នាមព្រះ ដោយជំរុញលើសកម្មភាពផលិតកម្មចំនួន២ សំខាន់ៗ រួមមាន៖ ការដាំបន្លែផ្ទះសំណាញ់ និងការចិញ្ចឹមមាន់ស្រែ។ ក្នុងឱកាសនោះ ក្រុមការងារក៏បានធ្វើការផ្សព្វផ្សាយ និងចែកខិតប័ណ្ណព័ត៌មានរបស់គម្រោងទៅដល់ប្រជាពលរដ្ឋផ្ទាល់ ដើម្បីត្រៀមខ្លួនចូលរួមអនុវត្តគម្រោងឱ្យទទួលបានជោគជ័យ និងមានប្រសិទ្ធភាពខ្ពស់៕

ទីស្នាក់ការគណបក្សប្រជាជនកម្ពុជាខេត្តពោធិ៍សាត់ ឯកឧត្តម បណ្ឌិត ជ្រុន ថេរ៉ាវ៉ាត សមាជិកគណៈកម្មាធិការកណ្តាល អនុប្រធានយុវជនគណបក្សថ្នាក់កណ្តាល និងជាប្រធានគណៈប្រចាំការនៃគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្តាល តំណាងដ៏ខ្ពង់ខ្ពស់សម្តេចបវរធិបតី ហ៊ុន ម៉ាណែត អនុប្រធានគណបក្ស និងជាប្រធានយុវជនគណបក្សថ្នាក់កណ្តាល បានអញ្ជើញជាអធិបតីក្នុងពិធីជួបសំណេះសំណាល និងបើកវេទិកាពិភាក្សាជាមួយសមាជិក សមាជិកាយុវជនគណបក្សខេត្តពោធិ៍សាត់ ប្រមាណ១,៣០០នាក់។

ស្រុកក្រគរ៖ មន្ត្រីរដ្ឋបាលស្រុកក្រគរ បានរួមគ្នាដាំកូនឈើ និងចុះសម្អាតបរិស្ថាន ដើម្បលើកកម្ពស់សោភ័ណភាពតាមបណ្តោយផ្លូវជាតិលេខ៥ នាថ្ងៃសៅរ៍ ទី១១ ខែកក្កដា ឆ្នាំ២០២៦ នេះ។ សកម្មភាពនេះ បានធ្វើឡើងចាប់ពីចំណុចក្លោងទ្វារវត្តសម្តេចយស រហូតដល់ពហុកីឡដ្ឋានថ្មី ស្ថិតក្នុងភូមិសាស្ត្រឃុំតាមបណ្តោយផ្លូវជាតិលេខ៥។ ក្រៅពីការប្រមូល និងវេចខ្ចប់សំរាមឱ្យមានរបៀបរៀបរយ ក្រុមការងារក៏បានដាំកូនឈើបន្ថែមនៅតាមបណ្តោយផ្លូវជាតិ ដើម្បីបង្កើនគម្របបៃតង ផ្តល់ម្លប់ និងកាត់បន្ថយកម្តៅ បង្កើតបានជាបរិស្ថានរស់នៅប្រកបដោយភាពស្រស់បំព្រងសម្រាប់ប្រជាពលរដ្ឋក្នុងមូលដ្ឋាន ក៏ដូចជាអ្នកធ្វើដំណើរផងដែរ៕

ពហុកីឡដ្ឋានសម្តេចតេជោក្រគរ ពិតជាសមិទ្ធផលដ៏អស្ចារ្យ និងជាមោទនភាពថ្មីមួយសម្រាប់បងប្អូនប្រជាពលរដ្ឋក្នុងស្រុកក្រគរ ក៏ដូចជាខេត្តពោធិ៍សាត់ទាំងមូល! ជាមួយនឹងទំហំផ្ទៃដីដ៏ធំល្វឹងល្វើយរហូតដល់ទៅជាង ២៥ហិកតា ស្ថិតក្នុងភូមិថ្មី ឃុំស្នាអន្សា ទីតាំងនេះមិនត្រឹមតែជាកន្លែងសម្រាប់បម្រើឱ្យវិស័យកីឡាប៉ុណ្ណោះទេ ប៉ុន្តែថែមទាំងជា៖ មជ្ឈមណ្ឌលសុខភាព និងកម្សាន្ត៖ ជាទីតាំងដ៏ស្រឡះល្អសម្រាប់បងប្អូនប្រជាពលរដ្ឋមកហាត់ប្រាណ រត់ រដើរ កម្សាន្ត និងស្រូបយកខ្យល់អាកាសបរិសុទ្ធនៅពេលព្រឹក និងពេលល្ងាច។ បេះដូងបៃតងថ្មី៖ ផ្សារភ្ជាប់ទៅនឹងសកម្មភាពដាំកូនឈើរបស់មន្ត្រីរដ្ឋបាលស្រុកនាពេលថ្មីៗនេះ តំបន់ជុំវិញពហុកីឡដ្ឋាននេះនឹងក្លាយជាតំបន់បៃតងដ៏ទាក់ទាញ និងមានសោភ័ណភាពស្រស់បំព្រង។ កន្លែងរៀបចំទិវាសំខាន់ៗ៖ ផ្ទៃដីដ៏ធំនេះផ្តល់លទ្ធភាពខ្ពស់ក្នុងការរៀបចំកម្មវិធីប្រកួតកីឡាខ្នាតធំ ពិព័រណ៍ ឬព្រឹត្តិការណ៍វប្បធម៌នានាប្រចាំខេត្ត។ ទិដ្ឋភាពដ៏ធំទូលាយ និងការអភិវឌ្ឍហេដ្ឋារចនាសម្ព័ន្ធបែបនេះ ពិតជាបានលើកមុខមាត់ស្រុកក្រគរឱ្យកាន់តែលេចធ្លោខ្លាំងឡើង៕

សកម្មភាពក្រុមការងារសំអាតអនាម័យបរិស្ថាន នៃរដ្ឋបាលស្រុកក្រគរ បានធ្វើការកាត់ស្មៅតាមទ្រូងផ្លូវ និងប្រមូលសំរាមតាមបណ្តោយផ្លូវជាតិលេខ៥ ក្នុងភូមិសាស្ត្រស្រុកក្រគរ។

ពោធិ៍សាត់៖ សង្កាត់រដ្ឋបាលព្រៃឈើព្រងិល សហការជាមួយគណៈកម្មការសហគមន៍ព្រៃឈើភូមិអូរបាក់ត្រា បានធ្វើការដោះលែងសត្វពស់ថ្លាន់មួយក្បាល ទម្ងន់ ១៥គីឡូក្រាម ឱ្យរស់នៅក្នុងព្រៃធម្មជាតិវិញ នៅថ្ងៃទី១០ ខែកក្កដា ឆ្នាំ២០២៦ ។ ពស់ថ្លាន់មួយក្បាលនេះ ត្រូវបានប្រជាពលរដ្ឋប្រទះឃើញ និងចាប់បាននៅក្នុងភូមិ រួចក៏បានស្ម័គ្រចិត្តប្រគល់ជូនគណៈកម្មការសហគមន៍ ដើម្បីយកទៅដោះលែង។ សកម្មភាពដោះលែងនេះ ត្រូវបានធ្វើឡើងដោយមានសមាសភាពចូលរួមចំនួន ៤នាក់ ត្រង់ចំណុចតំបន់ជ្រោះជ្រៅ ស្ថិតនៅក្នុងសហគមន៍ព្រៃឈើភូមិអូរបាក់ត្រា ដើម្បីធានាសុវត្ថិភាព និងការរស់រានមានជីវិតរបស់សត្វព្រៃប្រភេទនេះបន្តទៀត៕