ព័ត៌មានក្នុងខេត្ត

ពោធី៍សាត់៖ នៅថ្ងៃទី១៥ ខែកក្កដា ឆ្នាំ២០២៦ ថ្នាក់ដឹកនាំរដ្ឋបាលស្រុកក្រគរ រួមមាន លោក ពិន មួន សមាជិកក្រុមប្រឹក្សាស្រុក (តំណាងប្រធានក្រុមប្រឹក្សាស្រុក) និងលោក អ៊ន សុផល្លា អភិបាលស្រុកក្រគរ បានអញ្ជើញជាអធិបតីក្នុង សិក្ខាសាលាផ្សព្វផ្សាយប្រកាសអន្តរក្រសួង ស្តីពីការផ្តល់សេវារដ្ឋបាល របស់រដ្ឋបាលក្រុង ស្រុក ខណ្ឌ។ សិក្ខាសាលានេះ ត្រូវបានរៀបចំឡើងនៅសាលប្រជុំរដ្ឋបាលស្រុកក្រគរ ដោយធ្វើឡើងតាមរយៈប្រព័ន្ធអនឡាញ (Zoom Meeting)៕

លទ្ធផលដែលទទួលបានក្នុងការចូលរួមប្រឡងប្រណាំងអង្គភាពផ្តល់សេវាសាធារណៈគំរូក្នុងវិស័យអប់រំ​និងវិស័យសុខាភិបាលប្រចាំឆ្នាំ២០២៥​ គឺជ័យលាភី​ ចំណាត់ថ្នាក់លេខ៦

ពោធិ៍សាត់៖ លោក ពៅ ពិសិដ្ឋ ប្រធានក្រុមការងារគណបក្សចុះមូលដ្ឋានសង្កាត់ផ្ទះព្រៃ បានដឹកនាំក្រុមការងារ អមដំណើរដោយលោក ប៊ូ ប៊ុនថន នាយកវិទ្យាល័យទាចំរ៉ាត់ លោកគ្រូ-អ្នកគ្រូ ព្រមទាំងប្រធាន អនុប្រធានគណបក្សសង្កាត់ និងសមាជិកសាខាបក្សភូមិសំពៅមាស ចុះសំណេះសំណាល និងសួរសុខទុក្ខសមាជិកគណបក្សដែលមានជំងឺ និងជីវភាពខ្វះខាតក្នុងមូលដ្ឋាន នារសៀលថ្ងៃអង្គារ ទី១៤ ខែកក្កដា ឆ្នាំ២០២៦។ នៅក្នុងឱកាសនោះ ក្រុមការងារបាននាំយកគ្រឿងឧបភោគបរិភោគ និងថវិកាផ្តល់ជូនបងប្អូនសមាជិកបក្ស ដោយក្នុងមួយគ្រួសារទទួលបាន អង្ករ ១០ គីឡូក្រាម និងថវិកា ២ ម៉ឺនរៀល។ ជាមួយគ្នានោះដែរ លោកប្រធានក្រុមការងារ ក៏បានបន្តដំណើរចុះសួរសុខទុក្ខ លោកស្រី ឃឹម ហៀត សមាជិកបក្សរស់នៅភូមិរ៉ា ព្រមទាំងបានឧបត្ថម្ភថវិកាមួយចំនួនបន្ថែមទៀត សម្រាប់ជួយសម្រួលដល់ការព្យាបាលជំងឺរបស់គាត់ផងដែរ។ សកម្មភាពនេះបានស្តែងឱ្យឃើញពីការយកចិត្តទុកដាក់ និងការគិតគូរខ្ពស់ចំពោះសុខទុក្ខ និងជីវភាពរស់នៅរបស់សមាជិកគណបក្សនៅតាមមូលដ្ឋាន ដោយមិនបោះបង់ចោលនរណាម្នាក់ឡើយ៕

ពោធិ៍សាត់៖ លោក មាស សេត ប្រធានការិយាល័យក្សេត្រសាស្រ្ត បានអញ្ជើញជាគ្រូឧទ្ទេសក្នុងវគ្គបណ្តុះបណ្តាលស្តីពី ការគ្រប់គ្រងកត្តាចង្រៃលើដំណាំស្រូវ ជូនដល់សមាជិកសហគមន៍ធម្មជាតិទេសចរណ៍ច្រកល្អៀង ស្ថិតក្នុងភូមិបំណាក់ ឃុំឈើតុំ ស្រុកក្រគរ ខេត្តពោធិ៍សាត់ នៅថ្ងៃទី១៤ ខែកក្កដា ឆ្នាំ២០២៦ ។ វគ្គបណ្តុះបណ្តាលនេះរៀបចំឡើងក្រោមការឧបត្ថម្ភថវិកាពីគម្រោង PCRL អនុវត្តដោយអង្គការ WCS សហការជាមួយមន្ទីរកសិកម្ម រុក្ខាប្រមាញ់ និងនេសាទ និងមន្ទីរបរិស្ថានខេត្ត ដោយមានសមាជិកសហគមន៍ចូលរួមសរុបចំនួន ២៩នាក់ (ក្នុងនោះស្រី ២០នាក់)។ វគ្គបណ្តុះបណ្តាលនេះ ធ្វើឡើងក្នុងគោលបំណងបង្កើន năngប្បញ្ញត្តិ និងកែលម្អបច្ចេកទេសកសិកម្មជូនប្រជាសហគមន៍ ក្នុងការកំណត់អត្តសញ្ញាណ និងការពារដំណាំស្រូវពីសត្វល្អិត និងជំងឺចង្រៃផ្សេងៗ ធានាបាននូវទិន្នផលខ្ពស់ និងសុវត្ថិភាព ស្របតាមគោលការណ៍កសិកម្មធម្មជាតិ និងការអភិរក្សតំបន់ទេសចរណ៍សហគមន៍៕

ពោធិ៍សាត់៖ អង្គភាពច្រកចេញចូលតែមួយ បានរៀបចំកិច្ចប្រជុំពិនិត្យវឌ្ឍនភាពការងារប្រចាំខែមិថុនា ត្រីមាសទី២ និងឆមាសទី១ ព្រមទាំងលើកទិសដៅការងារសម្រាប់អនុវត្តបន្ត ឆ្នាំ២០២៦ នៅសាលប្រជុំរបស់អង្គភាព នៅរសៀលថ្ងៃទី១៤ ខែកក្កដា ឆ្នាំ២០២៦។ កិច្ចប្រជុំនេះដឹកនាំដោយ លោក លី សេង ប្រធានស្ដីទីអង្គភាពច្រកចេញចូលតែមួយ ដោយមានការអញ្ជើញចូលរួមពី លោក លោកស្រី ជាមន្ត្រីជួរមុខ មន្រ្តីជួរក្រោយ និងបុគ្គលិកទាំងអស់ក្នុងអង្គភាព សរុបចំនួន ២៣រូប។ របៀបវារៈសំខាន់ៗនៃកិច្ចប្រជុំរួមមាន៖ មតិបើកកិច្ចប្រជុំ ដោយប្រធានអង្គភាព, សេចក្តីរាយការណ៍ អំពីលទ្ធផលការងារតាមវិស័យជំនាញ, ការពិភាក្សា និងផ្លាស់ប្តូរមតិ លើបញ្ហាប្រឈម ព្រមទាំងសំណូមពរនានាពីសមាជិក សមាជិកា។ មតិបូកសរុប និងការដាក់ចេញទិសដៅការងារ សម្រាប់ខែកក្កដា បន្ត ដើម្បីពង្រឹងប្រសិទ្ធភាពសេវាសាធារណៈជូនប្រជាពលរដ្ឋឱ្យកាន់តែប្រសើរឡើង៕

ពោធិ៍សាត់៖ ក្រោមការដឹកនាំ និងយកចិត្តទុកដាក់ខ្ពស់ពីរដ្ឋបាលឃុំកញ្ជរ ក្រុមគ្រូពេទ្យនៃមណ្ឌលសុខភាព បានចុះបំពេញបេសកកម្មយ៉ាងសកម្ម ក្នុងការពិនិត្យ និងថែទាំសុខភាពបឋមជូនដល់បងប្អូនប្រជាពលរដ្ឋ ដោយឥតគិតថ្លៃ។ សកម្មភាពមនុស្សធម៌នេះ បានធ្វើឡើងស្របពេលដែលរដ្ឋបាលឃុំកំពុងរៀបចំ «កម្មវិធីចែកគ្រាប់ពូជដំណាំ» ជូនដល់ប្រជាកសិករ។ នៅក្នុងឱកាសនោះ ក្រុមគ្រូពេទ្យបានផ្តល់សេវាវាស់សម្ពាធឈាម ពិនិត្យជំងឺទូទៅ ផ្តល់ថ្នាំសង្កូវ ព្រមទាំងផ្តល់ការប្រឹក្សាយោបល់ និងអប់រំសុខភាព យ៉ាងយកចិត្តទុកដាក់។ នេះជាការរួមផ្សំគ្នាយ៉ាងសំខាន់ មិនត្រឹមតែជួយទ្រទ្រង់ដល់ជីវភាពបង្កបង្កើនផលរបស់ប្រជាពលរដ្ឋតាមរយៈការផ្តល់គ្រាប់ពូជប៉ុណ្ណោះទេ ប៉ុន្តែថែមទាំងធានាបាននូវ សុខុមាលភាព និងកម្លាំងមាំមួនរបស់បងប្អូនប្រជាពលរដ្ឋ ក្នុងការអភិវឌ្ឍសហគមន៍ផងដែរ៕

សូមចូលរួមអបអរសាទរយ៉ាងក្លៀវក្លា ចំពោះការខិតខំប្រឹងប្រែងរបស់ស្ថាប័នទាំង ៣ ដែលត្រូវបានទទួលស្គាល់ជា អង្គភាពផ្តល់សេវាសាធារណៈគំរូ ប្រចាំឆ្នាំ ២០២៥៖ -ក្នុងវិស័យអប់រំ៖ សាលាបឋមសិក្សាពោធិ៍សាត់ ទទួលបានជ័យលាភី ចំណាត់ថ្នាក់លេខ ៦។ -ក្នុងវិស័យសុខាភិបាល៖ មណ្ឌលសុខភាពសំរោង (ស្រុកភ្នំក្រវាញ) ទទួលបានជ័យលាភី ចំណាត់ថ្នាក់លេខ ២។ មណ្ឌលសុខភាពបឹងបត់កណ្តោល (ស្រុកបាកាន) ទទួលបានជ័យលាភី ចំណាត់ថ្នាក់លេខ ៦។ សមិទ្ធផលដ៏ត្រចះត្រចង់នេះ គឺជាសក្ខីភាពបញ្ជាក់ពីការប្តេជ្ញាចិត្តខ្ពស់របស់ថ្នាក់ដឹកនាំ និងបុគ្គលិកទាំងអស់ក្នុងការផ្តល់សេវាជូនប្រជាពលរដ្ឋដោយភាពស្មោះត្រង់ តម្លាភាព និងគុណភាព។ សូមកោតសរសើរ និងលើកទឹកចិត្តឱ្យរក្សាស្មារតីនេះបន្តទៀត ដើម្បីភាពរីកចម្រើននៃខេត្តពោធិ៍សាត់យើង!

ខេត្តពោធិ៍សាត់៖ កិច្ចប្រជុំ រៀបចំផែនការសកម្មភាពអាទិភាពរួម ឆ្នាំ២០២៦ របស់ក្រុមការងារស្នូលសម្របសម្រួលកិច្ចអន្តរាគមន៍សេវាផ្គត់ផ្គង់ទឹកស្អាត និងអនាម័យ ដែលគិតគូរដល់អាហាររូបត្ថម្ភ ខេត្តពោធិ៍សាត់ នាថ្ងៃថ្ងៃទី១៣ ខែកក្កដា ឆ្នាំ២០២៦។ កិច្ចប្រជុំនេះបានប្រព្រឹត្តទៅក្រោមអធិបតីភាព លោក លឹម សុខតូ អភិបាលរង នៃគណៈអភិបាលខេត្តពោធិ៍សាត់ នៅសាលប្រជុំថ្មកែវ (ជាន់ទី២) នៃអគាររដ្ឋបាលខេត្ត ដោយមានការអញ្ជើញចូលរួមពី ថ្នាក់ដឹកនាំមន្ទីរ-អង្គភាពពាក់ព័ន្ធ និងតំណាងអង្គការនានា សរុបចំនួន ១៣រូប (ស្រី ២រូប)។ កិច្ចប្រជុំនេះរៀបចំឡើងក្នុងគោលបំណងប្រមូលធាតុចូល និងកំណត់ទិសដៅការងារអាទិភាពសម្រាប់ឆ្នាំ២០២៦ ឆ្លើយតបទៅនឹងការផ្គត់ផ្គង់ទឹកស្អាត អនាម័យ និងការលើកកម្ពស់អាហាររូបត្ថម្ភក្នុងខេត្តឱ្យកាន់តែមានប្រសិទ្ធភាពខ្ពស់៕

ខេត្តពោធិ៍សាត់៖ រដ្ឋបាលស្រុកតាលោសែនជ័យ សូមថ្លែងអំណរគុណយ៉ាងជ្រាលជ្រៅបំផុតជូនចំពោះ លោក ទី ណាក់ និងភរិយា ដែលជាអាជីវករលក់ដូរនៅផ្សារថ្លុកដង្កោ ចំពោះទឹកចិត្តសប្បុរសធម៌ក្នុងការជួយឧបត្ថម្ភសម្ភារ និងថវិកាដល់រដ្ឋបាលស្រុក។ អំណោយដែលបានឧបត្ថម្ភរួមមាន៖ អង្ករ ១,០០០ គីឡូក្រាម, ទឹកបរិសុទ្ធ ១០ កេស និង ថវិកា ៥០០,០០០ រៀល។ រដ្ឋបាលស្រុកនឹងយកអំណោយទាំងអស់នេះ ទៅប្រើប្រាស់ក្នុងសកម្មភាពជាប្រយោជន៍សាធារណៈ ក៏ដូចជាឆ្លើយតបទៅនឹងតម្រូវការចាំបាច់នានារបស់បងប្អូនប្រជាពលរដ្ឋនៅក្នុងមូលដ្ឋាន៕

ខេត្តពោធិ៍សាត់៖ នៅថ្ងៃទី១៤ ខែកក្កដា ឆ្នាំ២០២៦ ក្រុមការងារបច្ចេកទេសខេត្ត ស្រុក និងអាជ្ញាធរមូលដ្ឋាន បានអញ្ជើញចុះពិនិត្យរួមគ្នាលើគម្រោងសាងសង់ផ្លូវក្រាលក្រួសក្រហម ដែលតភ្ជាប់រវាងភូមិបឹងប្រីយ៍ ភូមិស្រែល្វា និងភូមិកណ្ដឹងមាស ស្ថិតក្នុងឃុំត្រពាំងជង ស្រុកបាកាន។ សមាសភាពអញ្ជើញចូលរួមក្នុងសកម្មភាពចុះពិនិត្យនេះ រួមមាន៖ លោក ប៉ុង តាំងឡាយ នាយកទីចាត់ការផែនការ និងវិនិយោគខេត្តពោធិ៍សាត់ លោក ឆឹង សារឹម មន្ត្រីបច្ចេកទេសប្រចាំស្រុកបាកាន លោកស្រី ខៀវ រីងណា ប្រធានការិយាល័យផែនការ និងគាំទ្រឃុំ-សង្កាត់ លោក អ៊ឹម សាមិន ស្មៀនឃុំត្រពាំងជង ព្រមទាំងក្រុមប្រឹក្សាឃុំ មេភូមិ អនុភូមិ សមាជិកភូមិ និងគណៈកម្មការថែទាំផ្លូវថ្នល់។ ការចុះពិនិត្យផ្ទាល់នេះ ធ្វើឡើងក្នុងគោលបំណងធានាឱ្យបាននូវគុណភាព បច្ចេកទេស និងវឌ្ឍនភាពនៃការស្ថាបនាផ្លូវ ដើម្បីសម្រួលដល់ការធ្វើដំណើរ និងការដឹកជញ្ជូនកសិផលរបស់ប្រជាពលរដ្ឋនៅក្នុងមូលដ្ឋានឱ្យកាន់តែមានភាពងាយស្រួល និងរហ័សទាន់ចិត្ត៕

ខេត្តពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ នៅព្រឹកថ្ងៃទី១៤ ខែកក្កដា ឆ្នាំ២០២៦ នេះបានអញ្ជើញចុះពិនិត្យស្ថានភាពទូទៅ និងការលក់ដូររបស់ប្រជាពលរដ្ឋ នៅតាមបណ្តោយច្រាំងស្ទឹងត្រើយខាងលិច (ចាប់ពីស្ពានថ្មចាស់ ដល់ស្ពានដែកផ្លូវរទេះភ្លើង) ដែលទើបនឹងកែលម្អ និងចាក់ដីពង្រីកបន្ថែមរួចរាល់ ។ គោលបំណងសំខាន់នៃការចុះពិនិត្យ៖ ពង្រឹងសណ្តាប់ធ្នាប់ រៀបចំទីតាំងលក់ដូរឱ្យមានរបៀបរៀបរយ ជៀសវាងការរំលោភយកចិញ្ចើមផ្លូវ ដែលបង្កការកកស្ទះចរាចរណ៍ និងប៉ះពាល់សោភ័ណភាព, អភិវឌ្ឍន៍វិស័យទេសចរណ៍ អោយប្រែក្លាយតំបន់ច្រាំងស្ទឹងនេះ ទៅជាចំណុចទាក់ទាញថ្មីមួយ សម្រាប់ប្រជាពលរដ្ឋ និងភ្ញៀវទេសចរមកកម្សាន្ត និងលម្ហែកាយ។ ក្នុងឱកាសនោះ ឯកឧត្តមអភិបាលខេត្ត បានកោតសរសើរដល់ក្រុមការងារ ព្រមទាំងបានអំពាវនាវដល់អាជីវករទាំងអស់ ឱ្យចូលរួមសហការជាមួយអាជ្ញាធរក្នុងការថែរក្សាអនាម័យ បរិស្ថាន ទុកដាក់សម្រាមឱ្យបានត្រឹមត្រូវ ដើម្បីរួមគ្នាលើកកម្ពស់មុខមាត់ក្រុងពោធិ៍សាត់។ សូមបញ្ជាក់ថា៖ គម្រោងកែលម្អ និងចាក់ដីពង្រីកច្រាំងស្ទឹងត្រើយខាងលិចនេះ គឺជាផ្នែកមួយនៃផែនការមេរបស់រដ្ឋបាលខេត្ត ក្នុងការកែប្រែសោភ័ណភាពក្រុងពោធិ៍សាត់ ឱ្យក្លាយជាទីក្រុងស្អាត និងគួរជាទីមនោរម្យ៕

ខេត្តពោធិ៍សាត់៖ លោក អ៊ន សុផល្លា អភិបាលស្រុកក្រគរ បានអញ្ជើញចុះសម្របសម្រួល និងដឹកនាំការងាររៀបចំសោភ័ណភាព សណ្តាប់ធ្នាប់ ព្រមទាំងសម្អាតអនាម័យបរិស្ថាន នៅជុំវិញបរិវេណផ្សារសាមគ្គីក្រគរ។ នៅព្រឹកថ្ងៃទី១៤ ខែកក្កដា ឆ្នាំ២០២៦ សកម្មភាពចុះពង្រឹងសណ្តាប់ធ្នាប់ និងអនាម័យនេះ បានផ្តោតការយកចិត្តទុកដាក់ខ្លាំង ជាពិសេសនៅតាមបណ្តោយច្រកផ្លូវឆ្ពោះទៅកាន់កំពង់លួង ស្ថិតក្នុងឃុំអន្លង់ត្នោត ស្រុកក្រគរ ដើម្បីលើកកម្ពស់សោភ័ណភាព និងបង្កលក្ខណៈងាយស្រួលដល់ការធ្វើដំណើររបស់ប្រជាពលរដ្ឋ៕