ព័ត៌មានក្នុងខេត្ត

នៅព្រឹកថ្ងៃព្រហស្បតិ៍ ទី១១ ខែមិថុនា ឆ្នាំ២០២៦ ក្រុមប្រឹក្សាខេត្តពោធិ៍សាត់ បានរៀបចំកិច្ចប្រជុំសាមញ្ញលើកទី២៥ ឆ្នាំទី២ អាណត្តិទី៤ នៅសាលប្រជុំទេពឧកញ៉ាឃ្លាំងមឿង ក្រោមអធិបតីភាព ឯកឧត្តម ម៉ក់ រ៉ា ប្រធានក្រុមប្រឹក្សាខេត្ត និងឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់។ កិច្ចប្រជុំនេះ មានការអញ្ជើញចូលរួមពីឯកឧត្តម លោកជំទាវ សមាជិក សមាជិកាក្រុមប្រឹក្សាខេត្ត, លោក លោកស្រី អភិបាលរងខេត្ត, លោកនាយក នាយករងរដ្ឋបាលសាលាខេត្ត, តំណាងសាលាដំបូងខេត្ត, អភិបាលស្រុក-ក្រុង, ថ្នាក់ដឹកនាំមន្ទីរអង្គភាពជុំវិញខេត្ត, មេបញ្ជាការកងកម្លាំងប្រដាប់អាវុធទាំង៣ និងមន្ត្រីពាក់ព័ន្ធមួយចំនួនទៀត។ ក្នុងកិច្ចប្រជុំដ៏មានសារៈសំខាន់នេះ បានពិភាក្សា ពិនិត្យ និងអនុម័តលើរបៀបវារៈ ចំនួន៦ចំណុចសំខាន់ៗ រួមមាន៖ ទី១៖ ពិនិត្យ និងអនុម័តសេចក្តីព្រាងកំណត់ហេតុកិច្ចប្រជុំសាមញ្ញលើកទី២៤ ឆ្នាំទី២ អាណត្តិទី៤ របស់ក្រុមប្រឹក្សាខេត្ត។ ទី២៖ ពិនិត្យ និងអនុម័តសេចក្តីព្រាងរបាយការណ៍ ស្តីពីលទ្ធផលការងារប្រចាំខែឧសភា ឆ្នាំ២០២៦ របស់រដ្ឋបាលខេត្ត។ ទី៣៖ ពិនិត្យ និងអនុម័តសេចក្តីព្រាងតារាងបែងចែកប្រាក់រង្វាន់លើកទឹកចិត្ត ជូនថ្នាក់ដឹកនាំ និងមន្ត្រីរាជការសាលាខេត្តពោធិ៍សាត់ សម្រាប់ខែឧសភា ឆ្នាំ២០២៦។ ទី៤៖ ពិនិត្យ និងអនុម័តសេចក្តីព្រាងសេចក្តីសម្រេច ស្តីពីប្រតិទិនកិច្ចប្រជុំសាមញ្ញរបស់ក្រុមប្រឹក្សាខេត្ត សម្រាប់ឆ្នាំទី៣ អាណត្តិទី៤ (ឆ្នាំ២០២៦) រយៈពេល១២ខែ។ ទី៥៖ ការធ្វើរបាយការណ៍របស់គណៈកម្មាធិការនានា របស់ក្រុមប្រឹក្សាខេត្ត។ និងទី៦៖ បញ្ហាផ្សេងៗ៕

ដោយអនុវត្តតាមបទបញ្ជា លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ នៅព្រឹកថ្ងៃទី១១ ខែមិថុនា ឆ្នាំ២០២៦ ដឹកនាំដោយ លោកឧត្តមសេនីយ៍ត្រី នូវ តាល់ ស្នងការរងផែនការងារនគរបាលសណ្ដាប់ធ្នាប់និងចរាចរណ៍ កម្លាំង​ជំនាញ នៃការិយាល័យនគរបាលចរាចរណ៍​ផ្លូវ​គោក​​ សហការ​ជាមួយ​កម្លាំង​ការិយាល័យ​នគរបាល​ប្រឆាំង​គ្រឿងញៀន​ ចុះ​រឹតបន្តឹងអនុវត្តច្បាប់ស្តីពីចរាចរណ៍ផ្លូវគោក​ ត្រួតពិនិត្យលក្ខណៈបច្ចេកទេសរថយន្ត​និង​ធ្វើ​តេស្ដ​​រក​សារធាតុ​គ្រឿងញៀន​ អ្នកបើកបរ​រថយន្ត​ធុនតូចនិងធំ​៕

ក្រុមការងារពិសេសខេត្ត បើកកិច្ចប្រជុំត្រីមាសទី១ ឆ្នាំ២០២៦ ដើម្បីពន្លឿនការលុបបំបាត់ និងទប់ស្កាត់ការកើតឡើងវិញនៃជំងឺគ្រុនចាញ់ ក្នុងខេត្តពោធិ៍សាត់។

វេទិកានេះមានគោលបំណងផ្តល់ឱកាសឱ្យប្រជាពលរដ្ឋលើកឡើងពីបញ្ហា ក្តីកង្វល់ និងសំណូមពរ ដើម្បីឱ្យអាជ្ញាធរ និងមន្ទីរជំនាញដឹង និងដោះស្រាយបានទាន់ពេលវេលា ព្រមទាំងលើកកម្ពស់តម្លាភាព គណនេយ្យភាព និងប្រសិទ្ធភាពនៃការគ្រប់គ្រងរដ្ឋបាលមូលដ្ឋាន។

ឯកឧត្តមបណ្ឌិត លី ធុជ រួមជាមួយឯកអគ្គរដ្ឋទូតសាធារណរដ្ឋកូរ៉េ និងតំណាង UNDP បានចុះពិនិត្យសកម្មភាពមជ្ឈមណ្ឌលស្តារលទ្ធភាពពលកម្មកាយសម្បទា ក្រោមគម្រោងបោសសម្អាតមីនដំណាក់កាលទី៤ (CfR-IV)។ គណៈប្រតិភូក៏បានចុះសួរសុខទុក្ខ និងស្វែងយល់ពីជីវភាពរស់នៅរបស់ជនរងគ្រោះដោយសារមីន នៅស្រុកតាលោសែនជ័យ ដែលកំពុងទទួលបានការគាំទ្រផ្នែកជីវភាព និងការគាំពារសង្គម។

ឯកឧត្តមទេសរដ្ឋមន្ត្រី ពេជ សោភ័ន បានអញ្ជើញជាអធិបតីក្នុង «កិច្ចប្រជុំឆ្លុះបញ្ចាំង និងចែករំលែកបទពិសោធនៃការឧត្តមានុវត្តន៍» ដល់គណៈគ្រប់គ្រងសាលា និងគ្រូបង្រៀន គ.វ.អ។ កិច្ចប្រជុំនេះមានការចូលរួមពីមន្ត្រីរាជការ អាជ្ញាធរដែនដី លោកគ្រូ-អ្នកគ្រូ អាណាព្យាបាល និងសិស្សានុសិស្ស សរុបប្រមាណ ៤០០ នាក់។

កិច្ចប្រជុំមានគោលបំណងវាយតម្លៃលទ្ធផលការងារ ពិនិត្យវឌ្ឍនភាព និងបញ្ហាប្រឈម ព្រមទាំងកំណត់ទិសដៅបន្ត ដើម្បីពង្រឹងប្រសិទ្ធភាពនៃការប្រើប្រាស់កម្មវិធី NoDrug ក្នុងការបង្ការ ទប់ស្កាត់ និងប្រយុទ្ធប្រឆាំងគ្រឿងញៀននៅមូលដ្ឋាន។

លោក អេង រស្មី ប្រធានមន្ទីរបរិស្ថានខេត្តពោធិ៍សាត់ បានដឹកនាំការិយាល័យអភិវឌ្ឍន៍សហគមន៍មូលដ្ឋាន ការិយាល័យដែនជម្រកសត្វព្រៃ និងការិយាល័យរដ្ឋបាលធនធានមនុស្សនិងហិរញ្ញវត្ថុ ចូលរួមកិច្ចប្រជុំពិភាក្សា ជាមួយប្រតិភូមកពីប្រទេសបារាំង និងតំណាងអង្គការទឹកភ្លៀងកម្ពុជា លើដំណើរការសិក្សាតំបន់សក្តានុពលទឹកធ្លាក់ថ្មចាំង ដែលស្ថិតក្នុងដែនជម្រកសត្វព្រៃភ្នំសំកុស ស្រុកវាលវែង ត្រៀមរៀបចំគម្រោងអភិវឌ្ឍតបណ្តាញទឹកស្អាត ពិនិត្យមើលលទ្ធភាពជាក់ស្តែង តបណ្តាញចរន្តអគ្គិសនីសម្រាប់ប្រើប្រាស់ក្នុងតំបន់ និងរៀបចំបង្គន់អនាម័យ។ ក្នុងឱកាសនោះដែរលោកប្រធានមន្ទីរ បានបង្ហាញដោយសង្ខេប អំពីសក្តានុពលផ្នែកអេកូទេសចរណ៍ធម្មជាតិនៃតំបន់ទឹកធ្លាក់ថ្មចាំង និងស្នើសុំឱ្យភាគីម្ចាស់គម្រោង និងអង្គការទឹកភ្លៀងកម្ពុជា សហការជាមួយមន្រ្តីជំនាញមន្ទីរបរិស្ថានអនុវត្តគម្រោងនេះឱ្យទទួលបានជោគជ័យ ដើម្បីជាប្រយោជន៍ក្នុងសហគមន៍របស់យើង។ ព្រឹកថ្ងៃទី១០ ខែមិថុនា ឆ្នាំ២០២៦។

សម្តេចកិត្តិសង្គហបណ្ឌិត ម៉ែន សំអន (ឧត្ដមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា) រួមជាមួយ ឯកឧត្តម ឧត្តមសេនីយ៍ឯក ងៀន វ៉ន់ហ្គូវ (អនុរដ្ឋមន្ត្រីក្រសួងការពារប្រទេសវៀតណាម) បានអញ្ជើញជាគណៈអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការនូវ «ស្តូបមិត្តភាពកម្ពុជា-វៀតណាម» នៅក្នុងខេត្តពោធិ៍សាត់ ដើម្បីជានិមិត្តរូបនៃការរំលឹក និងពង្រឹងចំណងមិត្តភាព សាមគ្គីភាពរវាងប្រទេសទាំងពីរ។

នៅរសៀលថ្ងៃទី៩ ខែមិថុនា ឆ្នាំ២០២៦ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានគណៈកម្មាធិការ សមាគមនារីកម្ពុជា ដើម្បីសន្តិភាព និងអភិវឌ្ឍន៍ បន្ទាប់ពីចុះសួរសុខទុក្ខកងកម្លាំងនៅទិសថ្មដា បានអញ្ជើញថ្វាយគ្រឿងសក្ការៈបូជា និងបួងសួងនៅបូជនីយដ្ឋាន ឃ្លាំង មឿង និង ខាន់ ខៀវ ស្ថិតនៅ ស្រុកបាកាន ដើម្បីសុំសេចក្តីសុខ សន្តិភាព និងភាពចម្រើនជូនប្រទេសកម្ពុជា។ក្នុងពិធីនោះ សម្តេចបានបួងសួងសុំឱ្យបារមីទេពឧកញ៉ា ឃ្លាំង មឿង និងជំទាវ ខាន់ ខៀវ ជួយថែរក្សាថ្នាក់ដឹកនាំកម្ពុជា ជាពិសេស ហ៊ុន សែន និង ហ៊ុន ម៉ាណែត ឱ្យទទួលបានជោគជ័យក្នុងការដោះស្រាយបញ្ហាព្រំដែនកម្ពុជា-ថៃដោយសន្តិវិធី និងតាមយន្តការច្បាប់អន្តរជាតិ។សម្តេចក៏បានជូនពរកងកម្លាំងការពារព្រំដែនឱ្យមានសុខភាពល្អ និងសុវត្ថិភាពក្នុងការបំពេញភារកិច្ចការពារបូរណភាពទឹកដីជាតិ។

សម្តេចកិត្តិសង្គហបណ្ឌិត ម៉ែន សំអន ឧត្ដមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា ដោយអញ្ជើញចូលរួមពី ឯកឧត្តម ឧត្តមសេនីយ៍ឯក ងៀន វ៉ន់ហ្គូវ សមាជិកគណៈកម្មាធិការមជ្ឈិមកុម្មុយនីស្តវៀតណាម និងជាអនុរដ្ឋមន្ត្រីក្រសួងការពារប្រទេស នៃសាធារណរដ្ឋសង្គមនិយមវៀតណាម បានអញ្ជើញជាគណៈអធិបតីដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវ «ស្តូបមិត្តភាពកម្ពុជា-វៀតណាម» ខេត្តពោធិ៍សាត់ នាព្រឹកថ្ងៃទី១០ ខែមិថុនា ឆ្នាំ២០២៦នេះ។ ពិធីដ៏មហោឡារិកនេះ មានការអញ្ជើញចូលរួមពី ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ, ថ្នាក់ដឹកនាំព្រឹទ្ធសភា រដ្ឋសភា, មន្ត្រីជាន់ខ្ពស់នៃក្រសួងការពារប្រទេសវៀតណាម, ថ្នាក់ដឹកនាំខេត្តពោធិ៍សាត់ និងខេត្តដុងថាប់ ព្រមទាំងភ្ញៀវកិត្តិយសជាតិ-អន្តរជាតិយ៉ាងច្រើនកុះករ៕

លោក ហុង តរ៉ាវុធ ប្រធាននាយកដ្ឋានអភិរក្សដីគោកខាងត្បូងបឹងទន្លេសាប នៃក្រសួងបរិស្ថាន និងលោក អេង រស្មី ប្រធានមន្ទីរបរិស្ថាន បានដឹកនាំមន្ត្រីឧទ្យានុរក្ស នៃតំបន់ការពារធម្នជាតិភូមិសាស្រ្តខេត្តពោធិ៍សាត់ ចូលរួមវគ្គបណ្តុះបណ្តាលស្តីពី «វិធីសាស្ត្រក្នុងការប្រើប្រាស់ឧបករណ៍ដ្រូនក្នុងការផលិតផែនទី»។ ពិធីប្រារព្វធ្វើនៅព្រឹកថ្ងៃទី៩ ខែមិថុនា ឆ្នាំ២០២៦៕