ព័ត៌មានក្នុងខេត្ត

កម្លាំងការិយាល័យនគរបាលចរាចរណ៍ផ្លូវគោកខេត្តពោធិ៍សាត់ ក្រោមការដឹកនាំរបស់លោកវរសេនីយ៍ទោ ទូច សេងងន និងការចង្អុលបង្ហាញពីថ្នាក់ដឹកនាំស្នងការដ្ឋាន បានចុះអប់រំផ្សព្វផ្សាយច្បាប់ចរាចរណ៍ផ្លូវគោកដល់ប្រជាពលរដ្ឋ និងសិស្សានុសិស្សនាព្រឹកថ្ងៃទី៣១ ខែសីហា ឆ្នាំ២០២៦។ ការចុះផ្សព្វផ្សាយនេះផ្តោតលើការគោរពស្លាកសញ្ញា ពាក់មួកសុវត្ថិភាព មិនប្រើប្រាស់ទូរសព្ទពេលបើកបរ ប្រកាន់ស្តាំ និងបន្ថយល្បឿននៅផ្លូវប្រសព្វ ដើម្បីរួមចំណែកកាត់បន្ថយគ្រោះថ្នាក់ថ្នល់។

ពោធិ៍សាត់៖ ដើម្បីឆ្លើយតបយ៉ាងឆាប់រហ័សទៅនឹងបទបញ្ជាតឹងរ៉ឹងរបស់រដ្ឋបាលខេត្តពោធិ៍សាត់ នាថ្ងៃទី២៨ ខែសីហា ឆ្នាំ២០២៦ លោក ផាយ ឡេង អភិបាលនៃគណៈអភិបាលក្រុងពោធិ៍សាត់ បានដឹកនាំក្រុមការងារចម្រុះ ចុះបេសកកម្មផ្ទាល់នៅពេលរាត្រី ដើម្បីពិនិត្យ និងពង្រឹងសន្តិសុខ សណ្តាប់ធ្នាប់សាធារណៈ ក្នុងភូមិសាស្ត្រក្រុង។ សកម្មភាពចុះអនុវត្តវិធានការក្តៅភ្លាមៗនេះ ធ្វើឡើងក្នុងគោលបំណងបង្កើនប្រសិទ្ធភាពនៃការការពារសុវត្ថិភាព សន្តិសុខជូនប្រជាពលរដ្ឋ និងអ្នកធ្វើដំណើរ ព្រមទាំងទប់ស្កាត់រាល់បាតុភាពអសន្តិសុខផ្សេងៗនៅក្នុងមូលដ្ឋានឱ្យបានទាន់ពេលវេលា៕

(ពោធិ៍សាត់)៖ អនុវត្តតាមមតិចង្អុលការរបស់ លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ នាអធ្រាត្រថ្ងៃទី២៧ ខែសីហា ឆ្នាំ២០២៦ លោកវរសេនីយ៍ឯក មោក ភារម្យ អធិការនគរបាលស្រុកក្រគរ បានដឹកនាំកម្លាំងអន្តរាគមន៍ សហការជាមួយនគរបាលប៉ុស្តិ៍រដ្ឋបាល ចុះល្បាតដើម្បីបង្ការ និងទប់ស្កាត់បទល្មើសផ្សេងៗ ក្នុងភូមិសាស្ត្រស្រុកក្រគរ។ ក្នុងប្រតិបត្តិការនោះ កម្លាំងសមត្ថកិច្ចបានចុះណែនាំ និងត្រួតពិនិត្យតាមទីតាំងឈប់សម្រាករបស់រថយន្ត ដើម្បីឱ្យម្ចាស់រថយន្តទាំងអស់បង្កើនការប្រុងប្រយ័ត្ន ធានាសុវត្ថិភាពទ្រព្យសម្បត្តិ និងជីវិត។ ជាមួយគ្នានេះ នគរបាលស្រុកក្រគរ ក៏បានផ្តល់ និងផ្សព្វផ្សាយលេខទូរស័ព្ទទំនាក់ទំនងទាន់ហេតុការណ៍ ជូនដល់អ្នកបើកបរ ដើម្បីងាយស្រួលរាយការណ៍ និងសុំជំនួយអន្តរាគមន៍បានភ្លាមៗ ពេលមានហេតុការណ៍មិនប្រក្រតីណាមួយកើតឡើង៕

ពោធិ៍សាត់៖ ដោយអនុវត្តតាមបទបញ្ជាយ៉ាងម៉ឺងម៉ាត់ និងមតិដឹកនាំរបស់ លោកឧត្តមសេនីយ៍ទោ ស ថេង ស្នងការនៃស្នងការដ្ឋាននគរបាលខេត្តពោធិ៍សាត់ កម្លាំងអធិការដ្ឋាននគរបាលស្រុកវាលវែង ក្រោមការដឹកនាំផ្ទាល់របស់លោកអធិការ បានសហការជាមួយកម្លាំងប៉ុស្តិ៍នគរបាលរដ្ឋបាល ចុះធ្វើការល្បាត និងត្រួតពិនិត្យនៅតាមដងផ្លូវសាធារណៈយ៉ាងសកម្ម។ សកម្មភាពចុះល្បាតនេះ ធ្វើឡើងក្នុងគោលបំណងបង្ការ ទប់ស្កាត់ និងបង្រ្កាបបទល្មើសគ្រប់ប្រភេទ ព្រមទាំងការពារសុវត្ថិភាព របៀបរៀបរយ និងសន្តិសុខជូនប្រជាពលរដ្ឋក្នុងមូលដ្ឋានឲ្យបានល្អប្រសើរ៕

ពោធិ៍សាត់៖ ដោយអនុវត្តតាមបទបញ្ជារបស់ លោកឧត្តមសេនីយ៍ទោ ស ថេង ស្នងការនគរបាលខេត្ត និង លោកឧត្តមសេនីយ៍ត្រី នូវ តាល់ ស្នងការរង ទទួលផែនការងារនគរបាលសណ្ដាប់ធ្នាប់ កម្លាំងការិយាល័យនគរបាលចរាចរណ៍ផ្លូវគោក ដឹកនាំដោយ លោកវរសេនីយ៍ទោ ទូច សេងងន នាយការិយាល័យស្តីទី បានចុះអប់រំផ្សព្វផ្សាយច្បាប់ស្ដីពីចរាចរណ៍ផ្លូវគោក ជូនដល់ប្រជាពលរដ្ឋ និងសិស្សានុសិស្សក្នុងមូលដ្ឋាន នាព្រឹកថ្ងៃទី២៧ ខែសីហា ឆ្នាំ២០២៦ ។ ការចុះធ្វើចរាចរណ៍ដើម្បីធ្វើការផ្សព្វផ្សាយរួមមាន៖ ត្រូវគោរពស្លាកសញ្ញាចរាចរណ៍ បើកបរប្រកាន់ស្តាំ បើកបរតាមគន្លងផ្លូវ និងបន្ថយល្បឿននៅត្រង់ចំណុចផ្លូវប្រសព្វ, ត្រូវពាក់មួកសុវត្ថិភាពឱ្យបានត្រឹមត្រូវ រាល់ពេលធ្វើដំណើរតាមទោចក្រយានយន្ត, មិនត្រូវប្រើប្រាស់ទូរស័ព្ទដៃក្នុងពេលកំពុងបើកបរជាដាច់ខាត ដើម្បីចៀសវាងគ្រោះថ្នាក់ជាយថាហេតុ៕

ពោធិ៍សាត់៖ កម្លាំងការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់ បានចុះរៀបចំយុទ្ធនាការអប់រំផ្សព្វផ្សាយច្បាប់ស្ដីពីចរាចរណ៍ផ្លូវគោក ជូនដល់បងប្អូនប្រជាពលរដ្ឋ និងសិស្សានុសិស្សក្នុងមូលដ្ឋាន នាព្រឹកថ្ងៃទី២៤ ខែសីហា ឆ្នាំ២០២៦ ។ ប្រតិបត្តិការនេះធ្វើឡើងតាមបទបញ្ជាដ៏ខ្ពង់ខ្ពស់របស់ លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ និងក្រោមការចង្អុលបង្ហាញពី លោកឧត្តមសេនីយ៍ត្រី នូវ តាល់ ស្នងការរង ព្រមទាំងដឹកនាំផ្ទាល់ដោយ លោកវរៈសេនីយ៍ទោ ទូច សេងងន នាយការិយាល័យចរាចរណ៍ផ្លូវគោកស្តីទី។ ក្នុងសកម្មភាពនោះ សមត្ថកិច្ចបានផ្តោតលើការក្រើនរំលឹកអ្នកបើកបរគ្រប់ប្រភេទឱ្យចូលរួមគោរពច្បាប់ទាំងអស់គ្នា រួមមាន៖ គោរពតាមផ្លាកសញ្ញាចរាចរណ៍ និងបើកបរឱ្យត្រូវតាមគន្លងផ្លូវ, ពាក់មួកសុវត្ថិភាពឱ្យបានត្រឹមត្រូវជាប់ជាប្រចាំ, បើកបរប្រកាន់ស្តាំ និងបន្ថយល្បឿននៅត្រង់ចំណុចផ្លូវប្រសព្វ និងជៀសវាងដាច់ខាតការនិយាយទូរសព្ទពេលកំពុងបើកបរ៕

លោកស្នងការបានណែនាំដល់កម្លាំងនគរបាលប៉ុស្តិ៍ឱ្យយកចិត្តទុកដាក់ពង្រឹងការងារផ្សព្វផ្សាយគោលនយោបាយ «ភូមិ-ឃុំ-សង្កាត់ មានសុវត្ថិភាព» ដល់សិស្សានុសិស្សថ្នាក់បឋមសិក្សា និងប្រជាពលរដ្ឋ ដោយផ្តោតលើផលប៉ះពាល់នៃគ្រឿងញៀន ល្បែងស៊ីសង ការយល់ដឹងអំពីច្បាប់ចរាចរណ៍ផ្លូវគោក ការប្រើប្រាស់ផ្លូវប្រកបដោយសុវត្ថិភាព ព្រមទាំងការគ្រប់គ្រងស្ថិតិប្រជាពលរដ្ឋឱ្យបានត្រឹមត្រូវ និងទាន់ពេលវេលា។

លោកស្នងការបានណែនាំឱ្យកម្លាំងប៉ុស្តិ៍យកចិត្តទុកដាក់លើចំណុចសំខាន់ៗ រួមមាន៖ ជំរុញការអប់រំពីផលប៉ះពាល់នៃគ្រឿងញៀន ល្បែងស៊ីសង ច្បាប់ចរាចរណ៍ និងការគ្រប់គ្រងស្ថិតិប្រជាពលរដ្ឋដល់សិស្សានុសិស្ស និងពលរដ្ឋក្នុងមូលដ្ឋាន, នាំយកអនុសាសន៍ដឹកនាំរបស់ថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិមកផ្សព្វផ្សាយ ដោយតម្រូវឱ្យពង្រឹងការស្លៀកពាក់ឯកសណ្ឋាន រៀបចំផែនការការងារប្រចាំថ្ងៃ និងថែរក្សាអនាម័យបរិស្ថានប៉ុស្តិ៍, ធ្វើបច្ចុប្បន្នភាពស្ថិតិប្រជាពលរដ្ឋចំណាកស្រុក គ្រប់គ្រងមុខសញ្ញាបទល្មើស បង្ក្រាបក្មេងទំនើង គ្រឿងញៀន និងត្រួតពិនិត្យជនបរទេស/អន្តោប្រវេសន៍ ដើម្បីទប់ស្កាត់បទល្មើស Scam Online, អនុវត្តការងារដោយស្មោះត្រង់ យុត្តិធម៌ ព្រមទាំងកសាងបណ្តាញប្រជាពលរដ្ឋល្អដើម្បីទទួលបានព័ត៌មានទាន់ពេលវេលា។

ការផ្សព្វផ្សាយប្រកាសសំខាន់ៗចំនួនបី រួមមាន ការកំណត់ចំនួនមុខតំណែងរងក្នុងរចនាសម្ព័ន្ធនគរបាលជាតិ, ការកំណត់ចំនួនមុខតំណែងថ្នាក់ដឹកនាំរងតាមជួររដ្ឋបាលរាជធានី-ខេត្ត និងការកំណត់លក្ខខណ្ឌនីតិវិធីជ្រើសរើសចាត់បញ្ជូនមន្ត្រី សិស្ស និងនិស្សិតនគរបាលបន្តវេនឱ្យទៅសិក្សាវគ្គបណ្តុះបណ្តាលក្នុងនិងក្រៅប្រទេស។

ពោធិ៍សាត់៖ លោកវរសេនីយ៍ឯក មោក ភារម្យ អធិការនគរបាលស្រុកក្រគរ បានដឹកនាំកម្លាំងចុះតាមដាន និងពង្រឹងការងារផ្ទាល់ នៅប៉ុស្ដិ៍នគរបាលរដ្ឋបាលស្វាយស និងប៉ុស្ដិ៍នគរបាលរដ្ឋបាលឈើតុំ នៅថ្ងៃទី១៣ ខែសីហា ឆ្នាំ២០២៦ ។ ក្នុងឱកាសចុះពិនិត្យ និងតាមដានការងារនោះ លោកអធិការបានណែនាំ និងជំរុញដល់កងកម្លាំងនគរបាលប៉ុស្តិ៍ទាំង២ឱ្យ៖ បង្កើនការយកចិត្តទុកដាក់ក្នុងការបំពេញតួនាទី ភារកិច្ច ដោយបង្កើនការចេញល្បាត និងត្រួតពិនិត្យតាមមូលដ្ឋាន ដើម្បីបង្ការ ទប់ស្កាត់បទល្មើសផ្សេងៗ និងរក្សាសន្តិសុខ សណ្តាប់ធ្នាប់ជូនប្រជាពលរដ្ឋ, ប្រកាន់ខ្ជាប់នូវវិន័យ ក្រមសីលធម៌ និងវិជ្ជាជីវៈនគរបាលជាតិ ព្រមទាំងត្រូវមានស្មារតីទទួលខុសត្រូវខ្ពស់ក្នុងការបម្រើប្រជាពលរដ្ឋ និងដោះស្រាយបញ្ហាប្រឈមក្នុងមូលដ្ឋានឱ្យបានទាន់ពេលវេលា និងមានប្រសិទ្ធភាព។ ការចុះត្រួតពិនិត្យ និងពង្រឹងការងារជាប្រចាំ របស់លោកអធិការនគរបាលស្រុកក្រគរ គឺជាការបង្ហាញពីការយកចិត្តទុកដាក់ខ្ពស់លើការអនុវត្តភារកិច្ចរបស់កងកម្លាំងនគរបាលមូលដ្ឋាន សំដៅធានាឱ្យបាននូវសន្តិសុខ សុវត្ថិភាព និងភាពសុខសាន្តជូនប្រជាពលរដ្ឋទូទាំងស្រុកក្រគរ៕

ពោធិ៍សាត់៖ ដើម្បីសម្រួលដល់ការប្រឡង និងកាត់បន្ថយបន្ទុកចំណាយរបស់បេក្ខជន សហភាពសហព័ន្ធយុវជនកម្ពុជា (ស.ស.យ.ក) ខេត្តពោធិ៍សាត់ បានសហការជាមួយអាជ្ញាធរ និងកងកម្លាំងសមត្ថកិច្ច រៀបចំទីតាំងផ្ញើកង់ និងម៉ូតូដោយឥតគិតថ្លៃ នៅគ្រប់មណ្ឌលប្រឡងបាក់ឌុបទូទាំងខេត្ត។ ការរៀបចំនេះធ្វើឡើងក្នុងគោលបំណងថែរក្សាសុវត្ថិភាព សណ្តាប់ធ្នាប់ និងផ្តល់ភាពកក់ក្តៅជូនដល់ប្អូនៗសិស្សានុសិស្ស ព្រមទាំងបានជូនពរឲ្យបេក្ខជនទាំងអស់ទទួលបានជោគជ័យ និងសំណាងល្អក្នុងការប្រឡងនេះផងដែរ៕

ពោធិ៍សាត់៖ ក្នុងឱកាសដំណើរការប្រឡងសញ្ញាបត្រមធ្យមសិក្សាទុតិយភូមិ នាព្រឹកថ្ងៃទី១០ ខែសីហា ឆ្នាំ២០២៦នេះ លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ បានចាត់តាំងកម្លាំងជំនាញចរាចរណ៍ផ្លូវគោក កម្លាំងអន្តរាគមន៍ និងកម្លាំងអធិការដ្ឋាននគរបាលក្រុង ចុះពង្រាយការពារសន្តិសុខ និងសម្រួលចរាចរណ៍យ៉ាងសកម្ម។ ទោះបីជាមានភ្លៀងធ្លាក់យ៉ាងណាក៏ដោយ ក៏កងកម្លាំងនៅតែប្រចាំការយ៉ាងយកចិត្តទុកដាក់ ដើម្បីធានាបាននូវសុវត្ថិភាព និងសណ្តាប់ធ្នាប់ជូនប្អូនៗសិស្សានុសិស្សក្នុងដំណើរការប្រឡងរយៈពេល២ថ្ងៃ។