ព័ត៌មានក្នុងខេត្ត

ពោធិ៍សាត់៖ លោក ធាង ឡេង អភិបាលស្រុកវាលវែង បានដឹកនាំក្រុមការងារ ចុះដាំកូនឈើប្រភេទផ្កាត្រែមាស (ឬភួងម៉ាឡៃ) ចំនួន ៣០ដើម នៅតាមបណ្តោយផ្លូវអន្ទង់អាំង តំបន់ភ្នំ១៥០០ ស្ថិតក្នុងស្រុកវាលវែង ខេត្តពោធិ៍សាត់ នារសៀលថ្ងៃទី២០ ខែសីហា ឆ្នាំ២០២៦ ។ សកម្មភាពដាំដើមផ្កាលម្អនេះ ធ្វើឡើងដើម្បីចូលរួមលើកកម្ពស់សោភ័ណភាព បង្កើនគម្របបៃតង និងទាក់ទាញភ្ញៀវទេសចរដែលធ្វើដំណើរឆ្លងកាត់តំបន់ទេសចរណ៍ភ្នំ១៥០០ ដ៏ល្បីល្បាញមួយនេះឱ្យកាន់តែមានភាពស្រស់ស្អាតបន្ថែមទៀត៕

(ពោធិ៍សាត់)៖ លោក ពិន មួន សមាជិកក្រុមប្រឹក្សាស្រុក (តំណាងប្រធានក្រុមប្រឹក្សាស្រុក) និងលោក អ៊ន សុផល្លា អភិបាលស្រុកក្រគរ បានអញ្ជើញជាអធិបតីក្នុងកិច្ចប្រជុំថ្នាក់ស្រុក ស្តីពីកិច្ចពិភាក្សារវាងរដ្ឋបាលស្រុក និងតំណាងអង្គការសហគមន៍មូលដ្ឋាន នៅសាលប្រជុំរដ្ឋបាលស្រុកក្រគរ នាព្រឹកថ្ងៃទី២០ ខែសីហា ឆ្នាំ២០២៦ ។ កិច្ចប្រជុំនេះរៀបចំឡើងក្នុងគោលបំណងពង្រឹងកិច្ចសហការដោះស្រាយបញ្ហារួមគ្នាក្នុងមូលដ្ឋាន ព្រមទាំងធានានូវការចូលរួមយ៉ាងសកម្មរបស់ប្រជាពលរដ្ឋ ក្នុងដំណើរការរៀបចំផែនការ និងថវិកាអភិវឌ្ឍន៍ស្រុកឱ្យកាន់តែមានប្រសិទ្ធភាព និងឆ្លើយតបចំតម្រូវការជាក់ស្តែង៕

ក្រុមការងារចុះផ្សព្វផ្សាយការប្រើប្រាស់កម្មវិធី «មតិយើង» ជូនដល់មន្ត្រីរាជការនៃរដ្ឋបាលស្រុកក្រគរ ក្នុងកិច្ចប្រជុំគណៈបញ្ជាការឯកភាពរដ្ឋបាលស្រុក ដែលប្រារព្ធធ្វើឡើងនៅសាលាស្រុកក្រគរ ក្រោមអធិបតីភាព លោក អ៊ន សុផល្លា អភិបាលនៃគណៈអភិបាលស្រុកក្រគរ។

ការិយាល័យគាំពារបរិស្ថាន បានសហការជាមួយក្រុមការងារបច្ចេកទេសនៃក្រសួងបរិស្ថាន ដឹកនាំដោយលោក ធាន សុវណ្ណារិន អនុប្រធានការិយាល័យ បានចុះពិនិត្យទីតាំងជាក់ស្តែង ដើម្បីសិក្សា និងវាយតម្លៃលើគម្រោងស្នើសុំពិនិត្យ ព្រមទាំងផ្តល់របាយការណ៍វាយតម្លៃហេតុប៉ះពាល់បរិស្ថានដំបូង (IEIA) ។

លោក ធាង ឡេង អភិបាលស្រុកវាលវែង និងមន្ត្រីរាជការសាលាស្រុក បានចុះពិនិត្យវឌ្ឍនភាពការសាងសង់អគារសិក្សា ១ខ្នង ស្មើនឹង ៣បន្ទប់ អគារសិក្សានេះជាអំណោយរបស់ឯកឧត្តម ខូយ រីដា និងលោកជំទាវ អាំង សុជាតា ខូយ រីដា ដើម្បីរួមចំណែកលើកកម្ពស់វិស័យអប់រំនៅមូលដ្ឋាន។

លោក អេង រស្មី ប្រធានមន្ទីរបរិស្ថានខេត្តពោធិ៍សាត់ បានដឹកនាំប្រធានការិយាល័យឧទ្យានជាតិ ការិយាល័យអភិវឌ្ឍសហគមន៍មូលដ្ឋាន និងអនុប្រធានការិយាល័យដែនជម្រកសត្វព្រៃ ចូលរួមកិច្ចប្រជុំពិភាក្សាការងារជាមួយតំណាងអង្គការសម្ព័ន្ធមិត្តសត្វព្រៃ (Wildlife Alliance) ដើមី្បពិនិត្យ និងពិភាក្សាលើដំណើរការអនុវត្ត គម្រោងរេដបូកភ្នំសំកុស នាថ្ងៃទី២០ ខែសីហា ឆ្នាំ២០២៦។

ពោធិ៍សាត់៖ វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្រ្តី បានសហការជាមួយរដ្ឋបាលខេត្តពោធិ៍សាត់ រៀបចំវេទិកាសន្ទនាក្រោមប្រធានបទ «ការពង្រឹងសមត្ថភាពអង្គការសង្គមស៊ីវិលក្នុងយុគសម័យឌីជីថល» ដែលរៀបចំឡើងកាលពីពេលថ្មីៗនេះ នៅសាលាខេត្តពោធិ៍សាត់។ ពិធីនេះបានប្រព្រឹត្តទៅក្រោមអធិបតីភាព ឯកឧត្តម ប៉ៃ សំបូរ អគ្គលេខាធិការនៃអគ្គលេខាធិការដ្ឋាន វ.ស.ស. តំណាងដ៏ខ្ពង់ខ្ពស់ ឯកឧត្តម កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានក្រុមប្រឹក្សាភិបាល វ.ស.ស. ព្រមទាំង លោក សំ ណារិទ្ធិ អភិបាលរងនៃគណៈអភិបាលខេត្តពោធិ៍សាត់ ដើម្បីលើកកម្ពស់សមត្ថភាព និងការប្រើប្រាស់បច្ចេកវិទ្យាឌីជីថលក្នុងជួរអង្គការសង្គមស៊ីវិលឱ្យកាន់តែមានប្រសិទ្ធភាព៕

ពោធិ៍សាត់៖ យោងតាមកិច្ចចង្អុលការរបស់ លោក ផាយ ឡេង អភិបាលនៃគណៈអភិបាលក្រុងពោធិ៍សាត់ កម្លាំងការិយាល័យជំនាញបានបន្តសហការចុះដឹកនាំការងារតុបតែង កាត់តមែកឈើ រៀបចំសណ្តាប់ធ្នាប់សាធារណៈ និងសម្អាតអនាម័យបរិស្ថាន នៅតាមបណ្តោយផ្លូវជាតិលេខ៥ ស្ថិតក្នុងសង្កាត់ស្វាយអាត់ ក្រុងពោធិ៍សាត់។ សកម្មភាពនេះធ្វើឡើងក្នុងគោលបំណងលើកកម្ពស់សោភ័ណភាពក្រុងឱ្យកាន់តែស្រស់ស្អាត មានរបៀបរៀបរយ បង្កើនសុវត្ថិភាពដល់អ្នកធ្វើដំណើរតាមដងផ្លូវ និងកាត់បន្ថយហានិភ័យផ្សេងៗដែលកើតចេញពីមែកឈើស៊ុបទ្រុបនៅរដូវវស្សា៕

ពោធិ៍សាត់៖ អាជ្ញាធរក្រុមប្រឹក្សាឃុំកំពង់លួង បានដឹកនាំអាជ្ញាធរភូមិ និងប្រជាការពារភូមិ ចុះយុទ្ធនាការប្រមូល និងសម្អាតសំរាមតាមបណ្តោយមាត់ទឹក ស្ថិតក្នុងឃុំកំពង់លួង ស្រុកក្រគរ ខេត្តពោធិ៍សាត់ ដើម្បីកែលម្អសោភ័ណភាព និងថែរក្សាបរិស្ថានក្នុងមូលដ្ឋាន។ ជាមួយគ្នានេះ អាជ្ញាធរឃុំបានអំពាវនាវយ៉ាងទទូចដល់បងប្អូនប្រជាពលរដ្ឋទាំងអស់ មេត្តាចូលរួមសហការទុកដាក់សំរាមឱ្យបានត្រឹមត្រូវ និងចៀសវាងការបោះចោលសំរាមពាស់វាលពាស់កាលតាមប្រភពទឹក ក្រោមបាវចនា «ឃុំស្អាត អនាម័យស្អាត សុខភាពល្អ» ដើម្បីរួមគ្នាកសាងសហគមន៍ឱ្យមានបរិស្ថានល្អ និងសុខុមាលភាពមាំមួន៕

ពោធិ៍សាត់៖ មន្ទីរអភិវឌ្ឍន៍ជនបទខេត្តពោធិ៍សាត់ បានបើកកិច្ចប្រជុំបូកសរុបលទ្ធផលការងារប្រចាំខែសីហា ឆ្នាំ២០២៦ និងលើកទិសដៅការងារបន្តសម្រាប់ខែកញ្ញា ក្រោមអធិបតីភាព លោក ធីម សុធារ៉ា ប្រធានមន្ទីរ ដោយមានការចូលរួមពីថ្នាក់ដឹកនាំមន្ទីរ និងប្រធាន-អនុប្រធានការិយាល័យជំនាញទាំង១០ នាព្រឹកថ្ងៃព្រហស្បតិ៍ ទី២០ ខែសីហា ឆ្នាំ២០២៦ ។ កិច្ចប្រជុំនេះបានផ្តោតលើការពិភាក្សាយ៉ាងម៉ត់ចត់លើរបាយការណ៍វឌ្ឍនភាពការងារដែលសម្រេចបានក្នុងខែសីហា ការប្រមូលផ្តុំបញ្ហាប្រឈម និងសំណូមពរផ្សេងៗពីតាមការិយាល័យជំនាញ ព្រមទាំងបានដាក់ចេញនូវទិសដៅការងារអាទិភាពសម្រាប់អនុវត្តបន្តក្នុងខែកញ្ញា ឆ្នាំ២០២៦ ដើម្បីជំរុញការងារអភិវឌ្ឍន៍ជនបទក្នុងខេត្តឱ្យកាន់តែមានប្រសិទ្ធភាព៕

ពោធិ៍សាត់៖ លោក លឹម វុទ្ធី ប្រធានមន្ទីរអប់រំ យុវជន និងកីឡាខេត្តពោធិ៍សាត់ បានអញ្ជើញជាអធិបតីក្នុងកិច្ចប្រជុំស្តីអំពី «ស្តង់ដាសាលាគំរូ» នៅសាលាបឋមសិក្សាកោះចម្លង ព្រមទាំងសាលាបឋមសិក្សា និងអនុវិទ្យាល័យវត្តហ្លួង សង្កាត់លលកស ក្រុងពោធិ៍សាត់ ខេត្តពោធិ៍សាត់ នាព្រឹកថ្ងៃព្រហស្បតិ៍ ទី២០ ខែសីហា ឆ្នាំ២០២៦ ។ ក្នុងឱកាសនោះដែរ លោកប្រធានមន្ទីរបានអញ្ជើញចុះពិនិត្យផ្ទាល់លើស្ថានភាពបរិស្ថាន អនាម័យ និងភាពបៃតងជុំវិញបរិវេណសាលារៀន ដើម្បីជំរុញការលើកកម្ពស់គុណភាពអប់រំ និងការរៀបចំសាលារៀនឱ្យស្របតាមស្តង់ដាសាលាគំរូ ប្រកបដោយបរិស្ថានសិក្សាស្អាត និងមានសុវត្ថិភាពសម្រាប់សិស្សានុសិស្ស៕

ពោធិ៍សាត់៖ សកម្មភាព និងទិដ្ឋភាពទូទៅនៅស្ថានីយឧតុនិយម និងជលសាស្ត្រ ដែលស្ថិតនៅក្នុងមន្ទីរធនធានទឹក និងឧតុនិយមខេត្តពោធិ៍សាត់ ត្រូវបានដំណើរការយ៉ាងរលូន ក្នុងការតាមដាន ត្រួតពិនិត្យ និងវាស់វែងស្ថានភាពអាកាសធាតុ ព្រមទាំងកម្រិតកម្ពស់ទឹក ដើម្បីប្រមូលទិន្នន័យចាំបាច់សម្រាប់បម្រើឱ្យការងារព្យាករណ៍ និងជូនដំណឹងទាន់ពេលវេលាដល់ប្រជាពលរដ្ឋក្នុងខេត្តពោធិ៍សាត់ នាព្រឹកថ្ងៃទី២០ ខែសីហា ឆ្នាំ២០២៦ នេះ៕