ព័ត៌មានក្នុងខេត្ត

សៀមរាប៖ លោក សៅ វណ្ណៈ ប្រធានការិយាល័យអភិវឌ្ឍន៍សហគមន៍កសិកម្មខេត្តពោធិ៍សាត់ បានអញ្ជើញចូលរួមក្នុង សិក្ខាសាលាថ្នាក់ជាតិស្តីពីការអនុវត្តកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ ឆ្នាំ២០២៦ ដែលបានប្រព្រឹត្តទៅនៅសណ្ឋាគារសុខាល័យអង្គរ ក្រុងសៀមរាប ចាប់ពីថ្ងៃទី៨-៩ ខែកក្កដា ឆ្នាំ២០២៦។ សិក្ខាសាលាថ្នាក់ជាតិនេះ មានសមាសភាពចូលរួមសរុបចំនួន ១២៩នាក់ ស្រី ៤២នាក់ ដែលជាតំណាងមកពីក្រសួងអប់រំ យុវជន និងកីឡា, តំណាងរដ្ឋបាលខេត្ត, តំណាងមន្ទីរកសិកម្ម និងមន្ទីរអប់រំ, តំណាងរដ្ឋបាលស្រុក និងការិយាល័យអប់រំស្រុក, តំណាងអាជ្ញាធរឃុំ, តំណាងសាលារៀន ព្រមទាំងតំណាងអង្គការស្បៀងអាហារពិភពលោក (WFP) មកពីខេត្តគោលដៅចំនួន ១០ រួមមាន៖ ពោធិ៍សាត់, កំពង់ឆ្នាំង, បន្ទាយមានជ័យ, បាត់ដំបង, សៀមរាប, ឧត្តរមានជ័យ, ព្រះវិហារ, កំពង់ធំ, កំពង់ចាម និងស្ទឹងត្រែង។ នៅក្នុងពិធីបើកកម្មវិធីនេះដែរ លោក អ៊ុំ និសិត្យ តំណាងកម្មវិធីស្បៀងអាហារពិភពលោក ក៏បានឡើងមានមតិចំណាប់អារម្មណ៍ ដោយបានសង្កត់ធ្ងន់លើសារៈសំខាន់នៃកម្មវិធី ក្នុងការជួយលើកកម្ពស់អាហារូបត្ថម្ភរបស់កុមារនៅតាមសាលារៀន ព្រមទាំងជួយគាំទ្រដល់ទីផ្សារកសិផលរបស់បងប្អូនកសិករនៅក្នុងសហគមន៍មូលដ្ឋានផ្ទាល់ផងដែរ៕

ពោធិ៍សាត់៖ ថ្ងៃពុធ ៩រោច ខែបឋមាសាឍ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី០៨ ខែកក្កដា ឆ្នាំ២០២៦ ក្រុមការងារការិយាល័យគ្រឿងយន្តកសិកម្ម បានសហការជាមួយមន្ត្រីកសិកម្មក្រុងពោធិ៍សាត់ និងមន្ត្រីកសិកម្មឃុំ-សង្កាត់ ចុះអនុវត្តការងារស្រង់ស្ថិតិគ្រឿងយន្តកសិកម្ម និងដ្រូន (Drone) កសិកម្ម នៅតាមបណ្តាមូលដ្ឋាន។ សកម្មភាពចុះប្រមូលទិន្នន័យនេះ ត្រូវបានធ្វើឡើងនៅតាមសង្កាត់គោលដៅចំនួន ៣ ក្នុងក្រុងពោធិ៍សាត់ រួមមាន៖ សង្កាត់លលកស, សង្កាត់រលាប និងសង្កាត់ចំរើនផល។ ការចុះស្រង់ស្ថិតិនេះ ធ្វើឡើងក្នុងគោលបំណងគ្រប់គ្រងទិន្នន័យនៃការប្រើប្រាស់បច្ចេកវិទ្យា និងគ្រឿងយន្តកសិកម្មឱ្យបានច្បាស់លាស់ ដើម្បីងាយស្រួលក្នុងការវាយតម្លៃ គ្រោងផែនការអភិវឌ្ឍន៍ និងជំរុញការធ្វើទំនើបកម្មវិស័យកសិកម្មនៅក្នុងមូលដ្ឋានឱ្យកាន់តែមានប្រសិទ្ធភាពខ្ពស់៕

ពោធិ៍សាត់៖ ក្រុមការងារគម្រោងពិពិធកម្មកសិកម្មកម្ពុជា (CASDP) នៃមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ បានចុះអនុវត្តការងារប្រមូលទិន្នន័យនៅមូលដ្ឋានផ្ទាល់ ថ្ងៃពុធ ថ្ងៃទី៨ ខែកក្កដា ឆ្នាំ២០២៦។ សកម្មភាពនេះបានធ្វើឡើងនៅសហគមន៍កសិកម្មទំនើបម្ទេសដំណាក់ទ្រយឹង ស្ថិតក្នុងភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ ក្នុងគោលបំណងប្រមូលទិន្នន័យសម្រាប់យកទៅផ្ទៀងផ្ទាត់សូចនាករគោលដៅអភិវឌ្ឍន៍របស់គម្រោង។ នៅក្នុងការចុះបំពេញការងារនេះ ក្រុមការងារបានរៀបចំការសម្ភាសន៍ផ្ទាល់ជាមួយបងប្អូនកសិករជាសមាជិកសហគមន៍ ដោយមានអ្នកចូលរួមផ្តល់បទសម្ភាសន៍ និងព័ត៌មានសរុបចំនួន ២៤នាក់ (ក្នុងនោះមានស្រ្តីចំនួន ១១នាក់) ប្រកបដោយបរិយាកាសរីករាយ និងស្និទ្ធស្នាល៕

ពោធិ៍សាត់៖ ក្រុមការងារអនុគណៈកម្មការទី២ ទទួលបន្ទុកឃុំក្រពើពីរ បានចុះអនុវត្តការងារប្រមូលទិន្នន័យ និងកំណត់អត្តសញ្ញាណដីធ្លី តាមការអះអាងរបស់ប្រជាពលរដ្ឋ នៅក្នុងភូមិឧបសម្ព័ន្ធអូរតាទិន ឃុំក្រពើពីរ ស្រុកវាលវែង ខេត្តពោធិ៍សាត់ ថ្ងៃពុធ ទី៨ ខែកក្កដា ឆ្នាំ២០២៦។ សកម្មភាពចុះវាស់វែង និងប្រមូលទិន្នន័យនេះ ធ្វើឡើងដើម្បីអនុវត្តតាមខ្លឹមសារលិខិតលេខ ២២៦ សជណ ឧ.រ ចុះថ្ងៃទី១១ ខែកុម្ភៈ ឆ្នាំ២០២៥ របស់ទីស្ដីការគណៈរដ្ឋមន្ត្រី។ ជាលទ្ធផលនៅក្នុងការចុះអនុវត្តការងារនោះ ក្រុមការងារប្រមូលបាននូវសាលាកបត្រព័ត៌មានពីបងប្អូនប្រជាពលរដ្ឋបានចំនួន ១១ច្បាប់ ដើម្បីយកទៅបំពេញនីតិវិធីបន្ត៕

ពោធិ៍សាត់៖ លោក ពាក្យ មនោ នាយរងខណ្ឌរដ្ឋបាលព្រៃឈើពោធិ៍សាត់ និងលោក ស៊ុំ ពក នាយសង្កាត់រដ្ឋបាលព្រៃឈើបឹងកន្ទួត បានអញ្ជើញសម្របសម្រួលកិច្ចប្រជុំស្តីពី ការស្នើសុំជីកប្រឡាយព័ទ្ធជុំវិញព្រំប្រទល់ព្រៃសហគមន៍ចំនួន ៣ នៅក្នុងឃុំកំពង់ពោធិ៍ ស្រុកក្រគរ ខេត្តពោធិ៍សាត់ នាថ្ងៃទី៨ ខែកក្កដា ឆ្នាំ២០២៦ ។ សហគមន៍ព្រៃឈើទាំង ៣ នោះរួមមាន៖ សហគមន៍ព្រៃឈើភូមិរលួសកណ្តាល, សហគមន៍ព្រៃឈើភូមិរលួសខាងកើត និង សហគមន៍ព្រៃឈើភូមិស្នារាជ។ គម្រោងជីកប្រឡាយនេះមានទំហំទទឹង ៦ម៉ែត្រ និងបណ្តោយ ៤០០ម៉ែត្រ ក្នុងគោលបំណងការពារដីព្រៃសហគមន៍ពីការទន្ទ្រាន ព្រមទាំងដើម្បីគ្រប់គ្រង និងរក្សាប្រភពទឹកទុកសម្រាប់ប្រើប្រាស់ក្នុងសហគមន៍ ទាំងការស្រោចស្រព និងការបង្ការក្នុងគ្រាមានគ្រោះរាំងស្ងួត។ កិច្ចប្រជុំនេះមានសមាសភាពចូលរួមចំនួន ១១នាក់ ដែលជាតំណាងមកពីគណៈកម្មការគ្រប់គ្រងសហគមន៍ព្រៃឈើទាំង ៣ភូមិ និងលោកមេភូមិផងដែរ៕

ពោធិ៍សាត់៖ ក្រុមការងារជំនាញ បានចុះមកផ្តល់សេវាថត និងធ្វើអត្តសញ្ញាណប័ណ្ណសញ្ជាតិខ្មែរ ជូនដល់បងប្អូនប្រជាពលរដ្ឋដោយផ្ទាល់ ដល់ក្នុងភូមិត្រាង សង្កាត់ស្វាយអាត់ ក្រុងពោធិ៍សាត់ នាព្រឹកថ្ងៃទី៩ ខែកក្កដា ឆ្នាំ២០២៦។ ការចុះអនុវត្តការងារដល់មូលដ្ឋាននេះ គឺដើម្បីបង្កលក្ខណៈងាយស្រួល ជួយសម្រាលថវិកា និងចំណេញពេលវេលាធ្វើដំណើររបស់បងប្អូនប្រជាពលរដ្ឋ ជាពិសេសគឺអ្នកវ័យចំណាស់ និងអ្នកដែលពុំមានលទ្ធភាពធ្វើដំណើរទៅកាន់ទីរួមក្រុង ឱ្យទទួលបានអត្តសញ្ញាណប័ណ្ណសម្រាប់ប្រើប្រាស់ជាផ្លូវការគ្រប់ៗគ្នា សហការដោយអាជ្ញាធរមូលដ្ឋាន៕

ភ្នំពេញ៖ លោក លឹម វុទ្ធី ប្រធានមន្ទីរអប់រំ យុវជន និងកីឡាខេត្ត បានអញ្ជើញចូលរួមកិច្ចប្រជុំស្ដីពី ការពិនិត្យវឌ្ឍនភាពការប្រើប្រាស់គ្រូបង្រៀនជាប់កិច្ចសន្យា និងការអនុវត្តការផ្ទេរមុខងារវិស័យអប់រំទៅរដ្ឋបាលថ្នាក់ក្រោមជាតិ នាព្រឹកថ្ងៃទី៨ ខែកក្កដា ឆ្នាំ២០២៦ ។ កិច្ចប្រជុំនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា តំណាងក្រសួងមុខងារសាធារណៈ តំណាងក្រសួងសេដ្ឋកិច្ច និងហិរញ្ញវត្ថុ តំណាងគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ប្រធានមន្ទីរអប់រំ យុវជន និងកីឡារាជធានី-ខេត្ត ព្រមទាំងភាគីពាក់ព័ន្ធជាច្រើនរូបទៀត។ កិច្ចប្រជុំនេះរៀបចំឡើងក្នុងគោលបំណងត្រួតពិនិត្យ និងវាយតម្លៃលើលទ្ធផលការងារកន្លងមក ដើម្បីពង្រឹងប្រសិទ្ធភាពនៃការគ្រប់គ្រងបុគ្គលិកអប់រំ និងការផ្ទេរមុខងារទៅឱ្យរដ្ឋបាលថ្នាក់ក្រោមជាតិ ឱ្យកាន់តែមានភាពរលូន និងឆ្លើយតបទៅនឹងតម្រូវការជាក់ស្តែងនៅតាមមូលដ្ឋាន៕

កិច្ចប្រជុំនេះរៀបចំឡើងក្នុងគោលបំណងដើម្បីតាមដាន វាយតម្លៃ ពិនិត្យនីតិវិធីនៃការគ្រប់គ្រងអង្គភាព និងពង្រឹងប្រសិទ្ធភាពការងាររដ្ឋបាល ក៏ដូចជាការគ្រប់គ្រងផ្ទៃក្នុងរបស់មន្ទីរឱ្យកាន់តែមានភាពរលូន ស្របតាមទិសដៅកែទម្រង់រដ្ឋបាលសាធារណៈរបស់រាជរដ្ឋាភិបាល។

ពោធិ៍សាត់៖ លោកឧត្តមអគ្គានុរក្សថ្នាក់លេខ២ ប្រាជ្ញ សុភី ប្រធានមណ្ឌលអប់រំកែប្រែទី៤ បានទទួលស្វាគមន៍ លោក ង៉ែត តាត នាយកវិទ្យាស្ថានពហុបច្ចេកទេសខេត្តពោធិ៍សាត់ ព្រមទាំងសហការីចំនួន ០៥ រូប ក្នុងឱកាសចុះមកបើកវគ្គបណ្តុះបណ្តាលវិជ្ជាជីវៈ និងបច្ចេកទេស ជូនដល់ទណ្ឌិត (ដែលជាក្រុមក្មេងទំនើង) នៅក្នុងមណ្ឌលផ្ទាល់ កាលពីថ្ងៃទី៧ ខែកក្កដា ឆ្នាំ២០២៦។ វគ្គបណ្តុះបណ្តាលនេះផ្តោតលើ ៩ ជំនាញសំខាន់ៗ រួមមាន៖ សេវាកម្មបរិក្ខារត្រជាក់ក្នុងគេហដ្ឋាន, ថែទាំ និងដំឡើងកាមេរ៉ាសុវត្ថិភាព, ដំឡើងបណ្តាញអគ្គិសនី, ការងារកំបោរ, ការធ្វើនំ, សេវាកម្មម្ហូបអាហារ និងភេសជ្ជៈ (ឆុងកាហ្វេ), ការដំឡើងបំពង់ទឹក, ផ្សារអគ្គិសនី (ផ្សារដែក) និង សិប្បកម្មកែច្នៃចំណីសត្វ។ កម្មវិធីនេះត្រូវបានរៀបចំឡើងក្នុងគោលបំណងផ្តល់ចំណេះដឹង និងជំនាញពិតប្រាកដ សម្រាប់ឱ្យពួកគេអាចយកទៅប្រកបរបរចិញ្ចឹមជីវិត សមាហរណកម្មចូលក្នុងសង្គមវិញដោយសន្តិវិធី និងក្លាយជាពលរដ្ឋល្អក្រោយពេលទទួលបានសេរីភាពឡើងវិញ៕

ពោធិ៍សាត់៖ គិតត្រឹមថ្ងៃទី៨ ខែកក្កដា ឆ្នាំ២០២៦ នេះ បងប្អូនប្រជាពលរដ្ឋនៅក្នុងសង្កាត់លលកស ដែលរស់នៅតាមបណ្តោយផ្លូវលេខ៧០១ នាត្រើយខាងកើតច្រាំងស្ទឹងក្រុងពោធិ៍សាត់ បាននិងកំពុងបន្តសហការចូលរួមអនុវត្តតាមសេចក្តីជូនដំណឹងរបស់រដ្ឋបាលក្រុងពោធិ៍សាត់ជាបណ្តើរៗហើយ។ ការស្ម័គ្រចិត្តចូលរួមរៀបចំសណ្តាប់ធ្នាប់ និងរុះរើសំណង់មិនរៀបរយនេះ នឹងជួយឱ្យដងផ្លូវមួយខ្សែនេះទទួលបាននូវសោភ័ណភាពថ្មី របៀបរៀបរយល្អ និងមានបរិស្ថានស្អាតក្នុងពេលឆាប់ៗខាងមុខនេះជាក់ជាមិនខាន៕

ពោធិ៍សាត់៖ លោក អ៊ន សុផល្លា អភិបាល នៃគណៈអភិបាលស្រុកក្រគរ បានដឹកនាំក្រុមការងាររដ្ឋបាលស្រុក ចុះត្រួតពិនិត្យមើលទីតាំងលក់ដូរ និងសំណង់មិនរៀបរយមួយចំនួន នៅផ្សារបំណក់ នារសៀលថ្ងៃទី៨ ខែកក្កដា ឆ្នាំ២០២៦។ ការចុះពិនិត្យនេះ ធ្វើឡើងនៅត្រង់ចំណុចគល់ស្ពានត្រើយខាងលិចផ្សារ ក្នុងគោលបំណងដើម្បីរៀបចំសណ្តាប់ធ្នាប់សាធារណៈ លើកកម្ពស់សោភ័ណភាព និងសម្រួលដល់ការធ្វើដំណើររបស់បងប្អូនប្រជាពលរដ្ឋនៅក្នុងមូលដ្ឋានឱ្យកាន់តែមានភាពងាយស្រួល និងសុវត្ថិភាព៕

ពោធិ៍សាត់៖ លោក អ៊ន សុផល្លា អភិបាល នៃគណៈអភិបាលស្រុកក្រគរ បានដឹកនាំក្រុមការងាររដ្ឋបាលស្រុក ចុះសម្របសម្រួល និងដោះស្រាយបញ្ហាទំនាស់ដីធ្លីជូនបងប្អូនប្រជាពលរដ្ឋដោយផ្ទាល់ នារសៀលថ្ងៃទី៨ ខែកក្កដា ឆ្នាំ២០២៦។ សកម្មភាពការងារនេះ ត្រូវបានធ្វើឡើងនៅសាលាឃុំឈើតុំ ស្រុកក្រគរ ដើម្បីជួយសម្រួល និងស្វែងរកដំណោះស្រាយសមស្រប ស្របតាមគោលនយោបាយគិតគូរពីសុខទុក្ខ និងផលប្រយោជន៍របស់ប្រជាពលរដ្ឋនៅមូលដ្ឋាន៕