ព័ត៌មានក្នុងខេត្ត

រដ្ឋបាលខេត្តពោធិ៍សាត់បានរៀបចំកិច្ចប្រជុំមួយនៅសាលប្រជុំកោះសំពៅមាស ដឹកនាំប្រជុំដោយលោក សួង សារាវុធ នាយករដ្ឋបាលសាលាខេត្ត ដើម្បីត្រៀមរៀបចំបទបង្ហាញស្តីពីវឌ្ឍនភាព សមិទ្ធផល បញ្ហាប្រឈម ដំណោះស្រាយ និងទិសដៅការងារបន្តប្រចាំឆមាសទី១ ឆ្នាំ២០២៦ នៅរសៀលថ្ងៃទី៧ ខែកក្កដា ឆ្នាំ២០២៦ ។

ក្រសួងផែនការបានបើកវគ្គបណ្តុះបណ្តាលរយៈពេល ៣ ថ្ងៃ ស្តីពី គោលនយោបាយជាតិប្រជាជន និងប្រជាសាស្ត្រ ក្រោមប្រធានបទ «ពង្រឹងការវិនិយោគលើយុវជន និងភាពធន់ប្រជាសាស្ត្រ» នៅថ្ងៃទី៧ ខែកក្កដា ឆ្នាំ២០២៦ ក្នុងខេត្តពោធិ៍សាត់។ វគ្គនេះមានមន្ត្រីមន្ទីរផែនការរាជធានី-ខេត្តចំនួន ៥០ នាក់ មកពី ៩ រាជធានី-ខេត្តចូលរួម។

ពោធិ៍សាត់៖ សមិទ្ធផលនិងការអភិវឌ្ឍយ៉ាងស្រស់ស្អាតរបស់ខេត្តពោធិ៍សាត់នាពេលបច្ចុប្បន្ន គឺកើតចេញពីការដឹកនាំ និងការខិតខំប្រឹងប្រែងរួមគ្នារបស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តពោធិ៍សាត់, ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងឯកឧត្តម ខូយ រីដា អភិបាលខេត្តពោធិ៍សាត់។ កម្លាំងចលករដ៏ពិតប្រាកដដែលធ្វើឱ្យខេត្តកាន់តែស្រស់បំព្រង គឺការចូលរួមយ៉ាងសកម្មពីមន្ត្រីរាជការគ្រប់លំដាប់ថ្នាក់ និងបងប្អូនប្រជាពលរដ្ឋទាំងអស់ ក្នុងការរួមគ្នាសម្អាតបរិស្ថាន ផ្លាស់ប្តូរឥរិយាបថរស់នៅស្អាត និងទុកដាក់សំរាមក្នុងធុងត្រឹមត្រូវ៕

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញជាអធិបតីដ៏ខ្ពង់ខ្ពស់ ក្នុងពិធីប្រកាសចូលកាន់មុខតំណែង អភិបាលរងស្រុកភ្នំក្រវាញ ចំនួន ០២រូប នារសៀលថ្ងៃទី៦ ខែកក្កដា ឆ្នាំ២០២៦ នេះ។ ពិធីនេះត្រូវបានរៀបចំឡើងនៅបរិវេណសាលាស្រុកភ្នំក្រវាញ ដោយមានការចូលរួមពីលោកអភិបាលរងខេត្ត ថ្នាក់ដឹកនាំមន្ទីរ-អង្គភាពជុំវិញខេត្ត គណៈអភិបាលស្រុក កងកម្លាំងប្រដាប់អាវុធទាំងបីប្រភេទ ព្រមទាំងមន្ត្រីរាជការយ៉ាងច្រើនកុះករ៕

ពិធីអប់រំផ្សព្វផ្សាយ “ច្បាប់ស្តីពីចរាចរណ៍ផ្លូវគោក សុវត្ថិភាពក្នុងការធ្វើដំណើររបស់កម្មករនិយោជិត និងសុវត្ថិភាពក្នុងការដឹកជញ្ជូន ជូនដល់អ្នកបើកបរយានយន្តដឹកជញ្ជូនកម្មករនិយោជិត និងកម្មករនិយោជិត” នៅរោងចក្រ TAIEASY INTERNATIONAL CO., LTD. ដែលមានអ្នកចូលរួមប្រមាណជាង ៣៥០នាក់។

ភ្នំពេញ៖ លោក ងួន ប៉ោសេង អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញចូលរួមក្នុងសិក្ខាសាលាផ្សព្វផ្សាយសៀវភៅណែនាំស្តីពី «ការកសាងផែនការសកម្មភាពថ្នាក់ក្រោមជាតិសម្រាប់ការគាំពារ និងអភិវឌ្ឍកុមារតូច» នៅសណ្ឋាគារ ហ៉ីម៉ាវ៉ារី រាជធានីភ្នំពេញ នាព្រឹកថ្ងៃទី៦ ខែកក្កដា ឆ្នាំ២០២៦។ សិក្ខាសាលានេះប្រព្រឹត្តទៅក្រោមអធិបតីភាព លោកជំទាវបណ្ឌិត គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា និងលោកបណ្ឌិត អានៀរបាន ឆាតឺរជី (Anirban Chatterjee) នាយករងអង្គការយូនីសេហ្វ (UNICEF) ប្រចាំកម្ពុជា ដោយមានការចូលរួមពីថ្នាក់ដឹកនាំមន្ទីរអប់រំ យុវជន និងកីឡា ខេត្តពោធិ៍សាត់ ព្រមទាំងមន្ត្រីពាក់ព័ន្ធជាច្រើនរូប។ កម្មវិធីនេះរៀបចំឡើងក្នុងគោលបំណងពង្រឹងសមត្ថភាពដល់រដ្ឋបាលថ្នាក់ក្រោមជាតិ ក្នុងការរៀបចំផែនការសកម្មភាពឱ្យកាន់តែមានប្រសិទ្ធភាព សំដៅលើកកម្ពស់ការគាំពារ ការអប់រំ និងការអភិវឌ្ឍគ្រប់ជ្រុងជ្រោយដល់កុមារតូចៗនៅតាមមូលដ្ឋាន៕

ពោធិ៍សាត់៖ ក្នុងគោលបំណងលើកកម្ពស់សោភណភាព បរិស្ថាន និងបង្កើតភាពទាក់ទាញដល់វិស័យទេសចរណ៍ធម្មជាតិ នាថ្ងៃទី៥ ខែកក្កដា ឆ្នាំ២០២៦ ឯកឧត្តម ខូយ រីដា អភិបាលខេត្តពោធិ៍សាត់ បានដឹកនាំក្រុមការងារចុះត្រួតពិនិត្យ និងបង្ហាត់បង្រៀនបច្ចេកទេសដាំ ថែទាំ និងតែងដើមឈើលម្អតាមដងផ្លូវនានាក្នុងខេត្តដោយផ្ទាល់។ សកម្មភាពយុទ្ធនាការបៃតងនេះ បានធ្វើឡើងភ្លាមៗ បន្ទាប់ពីឯកឧត្តមអភិបាលខេត្ត បានបញ្ចប់កម្មវិធីបំពាក់កន្សែងជូនយុវជនកាកបាទក្រហមកម្ពុជា ចំនួន ៥០នាក់ នៅវិទ្យាល័យ ហ៊ុន សែន បាក់ចិញ្ចៀន ស្រុកភ្នំក្រវាញ។ យុទ្ធនាការនេះ មានការចូលរួមយ៉ាងផុសផុលពីសំណាក់មន្ត្រីរដ្ឋបាលក្រុងពោធិ៍សាត់, រដ្ឋបាលស្រុកបាកាន, រដ្ឋបាលសង្កាត់ផ្ទះព្រៃ រួមទាំងក្រុមយុវជនសេដ្ឋកិច្ចក្រៅប្រព័ន្ធនៃមជ្ឈមណ្ឌលកម្សាន្តស្លាមាស, ស្កាយបារ និងកោះកាហ្វេ ក្នុងស្មារតីរួមគ្នាស្ដារ និងលើកកម្ពស់គម្របបៃតងទូទាំងខេត្ត៕

យោងតាមអនុក្រឹត្យ របស់រាជរដ្ឋាភិបាលកម្ពុជា លេខ៥៦៤ អនក្រ.តត ចុះថ្ងៃទី៣០ ខែមិថុនា ឆ្នាំ២០២៦ បានសម្រេចតែងតាំងលោក អ៊ន សុផល្លា ឋានន្តរសក្តិវរមន្ត្រី ថ្នាក់លេខ២ ឱ្យកាន់មុខតំណែង ជាអភិបាលនៃគណៈអភិបាលស្រុកក្រគរ ខេត្តពោធិ៍សាត់។ និងប្រកាសរបស់ក្រសួងមហាផ្ទៃ លេខ៦៦៧៤.ប្រក ចុះថ្ងៃទី០៨ ខែមិថុនា ឆ្នាំ២០២៦ បានសម្រេចផ្ទេរភារកិច្ច លោក ក្រូច សុខុន ឋានន្តរសក្តិនាយក្រមការ ថ្នាក់លេខ២ ពីអភិបាលរងនៃគណៈអភិបាលក្រុងពោធិ៍សាត់ ឱ្យកាន់មុខតំណែងជាអភិបាលរងនៃគណៈអភិបាលស្រុកក្រគរ។

ឯកឧត្តម ខូយ រីដា អភិបាលនៃគណៈអភិបាលខេត្ត និងប្រធានគណៈកម្មាធិការ សាខាកាកបាទក្រហមកម្ពុជាខេត្តពោធិ៍សាត់ បានអញ្ជើញដាំដើមឈើធ្នុងចំនួន២០០ដើម សំដៅរួមចំណែកលើកកម្ពស់សោភ័ណភាពបរិស្ថាន នាព្រឹកថ្ងៃអាទិត្យ ទី៥ ខែកក្កដា ឆ្នាំ២០២៦នៅវិទ្យាល័យហ៊ុនសែនបាក់ចិញ្ជៀន ស្រុកភ្នំក្រវាញ ដោយបានការចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ និងសិស្សានុសិស្សអនុនិងវិទ្យាល័យប្រមាណជាង១ពាន់នាក់។

ឯកឧត្តម ខូយ រីដា អភិបាលនៃគណៈអភិបាលខេត្ត និងប្រធានគណៈកម្មាធិការ សាខាកាកបាទក្រហមកម្ពុជាខេត្តពោធិ៍សាត់ បានអញ្ជើញដាំដើមឈើធ្នុងចំនួន២០០ដើម សំដៅរួមចំណែកលើកកម្ពស់សោភ័ណភាពបរិស្ថាន និងបំពាក់កន្សែងជូនយុវជនកាកបាទក្រហមកម្ពុជាចំនួន៥០នាក់ នាព្រឹកថ្ងៃអាទិត្យ ទី៥ ខែកក្កដា ឆ្នាំ២០២៦នៅវិទ្យាល័យហ៊ុនសែនបាក់ចិញ្ជៀន ស្រុកភ្នំក្រវាញ ដោយបានការចូលរួមពី លោក ហៀម ឃួន អភិបាលរងនៃគណៈអភិបាលខេត្ត និងជាអនុប្រធានអចិន្ត្រៃយ៍គណៈកម្មាធិការ សាខាកាកបាទក្រហមកម្ពុជាខេត្ត ព្រមទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ និងសិស្សានុសិស្សអនុនិងវិទ្យាល័យប្រមាណជាង១ពាន់នាក់។

ពោធិ៍សាត់៖ នាព្រឹកថ្ងៃទី០៣ ខែកក្កដា ឆ្នាំ២០២៦ នៅសាលប្រជុំកោះសំពៅមាស (ជាន់ទី១) នៃសាលាខេត្តពោធិ៍សាត់ បានបើកកិច្ចប្រជុំពិភាក្សាលើការត្រៀមរៀបចំរូបភាពសមិទ្ធផលសំខាន់ៗ របស់ខេត្ត ដើម្បីយកទៅដាក់តាំងបង្ហាញនៅស្តូបអនុស្សាវរីយ៍នយោបាយឈ្នះ-ឈ្នះ ប៉ៃលិន។ កិច្ចប្រជុំនេះ ដឹកនាំដោយ លោក អ៊ុយ សុធាវី អភិបាលរងនៃគណៈអភិបាលខេត្តពោធិ៍សាត់ ដោយមានការអញ្ជើញចូលរួមពី លោកនាយករងរដ្ឋបាលសាលាខេត្ត ព្រមទាំងលោក-លោកស្រីដែលជាប្រធានមន្ទីរ និងអង្គភាពពាក់ព័ន្ធជុំវិញខេត្ត។ កិច្ចប្រជុំនេះរៀបចំឡើងដើម្បីប្រមូល និងជ្រើសរើសរូបភាពបង្ហាញពីការអភិវឌ្ឍ លទ្ធផលការងារ និងសមិទ្ធផលធំៗដែលខេត្តពោធិ៍សាត់សម្រេចបាន ក្រោមម្លប់នៃសុខសន្តិភាព យកទៅរៀបចំតាំងពិព័រណ៍នៅស្តូបឈ្នះ-ឈ្នះ ភូមិភាគបិទការឆ្កៀលយុទ្ធសាស្ត្រ (ប៉ៃលិន) ឱ្យមានសោភ័ណភាព និងខ្លឹមសារពេញលេញ សម្រាប់ទុកជាប្រវត្តិសាស្ត្រ និងឱ្យមហាជនបានជ្រាបកាន់តែច្បាស់៕

ឯកឧត្តម សំរ៉ងឌី ណាម៉ូ អនុរដ្ឋលេខាធិការ នៃក្រសួងសាធារណការ និងដឹកជញ្ជូន លោក លឹម សុខតូ អភិបាលរងខេត្ត បានបើកកិច្ចប្រជុំរៀបចំវេទិកាពិភាក្សាលើការអនុវត្តការងារដោះស្រាយផលប៉ះពាល់ ដោយសារគម្រោងការពន្លឿនការផ្គត់ផ្គង់ទឹកស្អាត និងអនាម័យ ស្ថិតនៅភូមិសាស្រ្តខេត្តពោធិ៍សាត់។ដោយមានការអញ្ជើញចូលរួមពី អគ្គនាយកនៃអគ្គនាយកដ្ឋានទឹកស្អាត នៃក្រសួងឧស្សាហកម្ម លោក​​ ចាន់ ធន់ អគ្គនាយករងនៃអគ្គនាយកដ្ឋានដោះស្រាយផលប៉ះពាល់​ដោយសារគម្រោងអភិវឌ្ឍន៍នៃក្រសួងសេដ្ឋកិច្ច និងហិរញ្ញវត្ថុ លោក នាយក នាយករងរដ្ឋបាលសាលាខេត្ត និងមន្ទីរអង្គភាពពាក់ព័ន្ធ ស្ថិតនៅសាលប្រជុំ ថ្មកែវ ជាន់ទី២ រដ្ឋបាលសាលាខេត្ត នៅព្រឹកថ្ងៃទី ០៣ ខែកក្កដា ឆ្នាំ២០២៦៕