ឯកឧត្តម ខូយ រីដា ដឹកនាំមន្ត្រី និងយុវជន ចុះដាំនិងថែទាំដើមឈើលម្អ ដើម្បីលើកកម្ពស់សោភណភាពទេសចរណ៍ខេត្តពោធិ៍សាត់
ពោធិ៍សាត់៖ ក្នុងគោលបំណងលើកកម្ពស់សោភណភាព បរិស្ថាន និងបង្កើតភាពទាក់ទាញដល់វិស័យទេសចរណ៍ធម្មជាតិ នាថ្ងៃទី៥ ខែកក្កដា ឆ្នាំ២០២៦ ឯកឧត្តម ខូយ រីដា អភិបាលខេត្តពោធិ៍សាត់ បានដឹកនាំក្រុមការងារចុះត្រួតពិនិត្យ និងបង្ហាត់បង្រៀនបច្ចេកទេសដាំ ថែទាំ និងតែងដើមឈើលម្អតាមដងផ្លូវនានាក្នុងខេត្តដោយផ្ទាល់។ សកម្មភាពយុទ្ធនាការបៃតងនេះ បានធ្វើឡើងភ្លាមៗ បន្ទាប់ពីឯកឧត្តមអភិបាលខេត្ត បានបញ្ចប់កម្មវិធីបំពាក់កន្សែងជូនយុវជនកាកបាទក្រហមកម្ពុជា ចំនួន ៥០នាក់ នៅវិទ្យាល័យ ហ៊ុន សែន បាក់ចិញ្ចៀន ស្រុកភ្នំក្រវាញ។ យុទ្ធនាការនេះ មានការចូលរួមយ៉ាងផុសផុលពីសំណាក់មន្ត្រីរដ្ឋបាលក្រុងពោធិ៍សាត់, រដ្ឋបាលស្រុកបាកាន, រដ្ឋបាលសង្កាត់ផ្ទះព្រៃ រួមទាំងក្រុមយុវជនសេដ្ឋកិច្ចក្រៅប្រព័ន្ធនៃមជ្ឈមណ្ឌលកម្សាន្តស្លាមាស, ស្កាយបារ និងកោះកាហ្វេ ក្នុងស្មារតីរួមគ្នាស្ដារ និងលើកកម្ពស់គម្របបៃតងទូទាំងខេត្ត៕
