ព័ត៌មានក្នុងខេត្ត

សៀមរាប៖ លោក លាង ទិតដ្ឋាន ប្រធានមន្ទីរព័ត៌មានខេត្តពោធិ៍សាត់ បានអញ្ជើញចូលរួមកិច្ចប្រជុំផ្សព្វផ្សាយ «ច្បាប់ស្តីពីវិសោធនកម្មច្បាប់ស្តីពីផ្លូវថ្នល់ និងលិខិតបទដ្ឋានគតិយុត្តពាក់ព័ន្ធនឹងការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់» ក្រោមអធិបតីភាពដ៏ខ្ពង់ខ្ពស់របស់ ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍។ កិច្ចប្រជុំនេះបានប្រព្រឹត្តទៅនៅសាលប្រជុំរដ្ឋបាលខេត្តសៀមរាប នៅថ្ងៃអង្គារ ទី២៥ ខែសីហា ឆ្នាំ២០១៦ ក្នុងគោលបំណងពង្រឹងការយល់ដឹងអំពីច្បាប់ និងបង្កើនប្រសិទ្ធភាពនៃការអនុវត្តវិធានការទប់ស្កាត់ការដឹកជញ្ជូនលើសទម្ងន់ ដើម្បីថែរក្សាហេដ្ឋារចនាសម្ព័ន្ធផ្លូវថ្នល់ឱ្យបានគង់វង្ស៕

ពោធិ៍សាត់៖ ក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា បានរៀបចំសិក្ខាសាលាផ្សព្វផ្សាយស្តីពី «សមិទ្ធផលធម្មនុញ្ញសម្រេចបាន ក្នុងរយៈពេល៣០ឆ្នាំ» នៅសាលប្រជុំទេពឧកញ៉ា ឃ្លាំង មឿង សាលាខេត្តពោធិ៍សាត់ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហ៊ី សោភា ប្រធានក្រុមប្រឹក្សាធម្មនុញ្ញ នាព្រឹកថ្ងៃទី២៥ ខែសីហា ឆ្នាំ២០២៦។ កម្មវិធីនេះបានប្រារព្ធឡើងស្របតាមស្មារតីលិខិតលេខ ៣៧០សជណ/អ.រ.ប របស់ក្រសួងមហាផ្ទៃ ដោយមានការចូលរួមពី ឯកឧត្តម ម៉ក់ រ៉ា ប្រធានក្រុមប្រឹក្សាខេត្ត, ឯកឧត្តម ខូយ រីដា អភិបាលខេត្តពោធិ៍សាត់, ថ្នាក់ដឹកនាំតុលាការខេត្ត ព្រមទាំងប្រតិភូថ្នាក់ជាតិ មន្ត្រីរាជការ កងកម្លាំងប្រដាប់អាវុធ និងសក្ខាកាមសរុបប្រមាណ ៣៥០នាក់៕

ពោធិ៍សាត់៖ លោក ហេង សុភាណា អភិបាលរង នៃគណៈអភិបាលខេត្តពោធិ៍សាត់ បានអញ្ជើញចុះសួរសុខទុក្ខ បងស្រីមេភូមិខ្មារ (ស្ថិតក្នុងសង្កាត់លលកស ក្រុងពោធិ៍សាត់) ដែលកំពុងសម្រាកព្យាបាលជំងឺ នៅមន្ទីរពេទ្យបង្អែកខេត្តពោធិ៍សាត់ នារសៀលថ្ងៃទី២៤ ខែសីហា ឆ្នាំ២០២៦។ ក្នុងឱកាសនោះ លោកអភិបាលរងខេត្ត បានសម្តែងនូវការយកចិត្តទុកដាក់ និងការសាកសួរសុខទុក្ខដោយក្តីនឹករលឹក ព្រមទាំងបានថ្លែងអំណរគុណយ៉ាងជ្រាលជ្រៅចំពោះក្រុមគ្រូពេទ្យ និងបុគ្គលិកសុខាភិបាលទាំងអស់ ដែលបានខិតខំយកចិត្តទុកដាក់មើលថែ និងព្យាបាលជំងឺជូនបងប្អូនប្រជាពលរដ្ឋយ៉ាងយកចិត្តទុកដាក់ និងប្រកបដោយស្មារតីទទួលខុសត្រូវខ្ពស់៕

នាព្រឹកថ្ងៃទី២៤ ខែសីហា ឆ្នាំ២០២៦នេះ រដ្ឋបាលខេត្តពោធិ៍សាត់ បានរៀបចំពិធីបញ្ចុះបឋមសិលាបើកការដ្ឋានសាងសង់ «អគារសម្រាកព្យាបាលជំងឺទូទៅ» ថ្មីមួយខ្នង នៅក្នុងមន្ទីរពេទ្យបង្អែកកណ្តៀង ស្ថិតក្នុងស្រុកកណ្តៀង ខេត្តពោធិ៍សាត់។ ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ម៉ក់ រ៉ា ប្រធានក្រុមប្រឹក្សាខេត្ត និង ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ ព្រមទាំងមានការចូលរួមពីសំណាក់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ មន្ត្រីសុខាភិបាល និងប្រជាពលរដ្ឋយ៉ាងកុះករ។

ឯកឧត្ដម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញជាអធិបតីក្នុងកិច្ចប្រជុំគណៈកម្មការអន្តរក្រសួង ដើម្បីពិនិត្យ សិក្សា និងវាយតម្លៃលើការចាត់ចែងទ្រព្យសម្បត្តិរដ្ឋ ដែលត្រូវយកមកប្រើប្រាស់សម្រាប់គម្រោងអភិវឌ្ឍន៍ច្រាំងស្ទឹង ក្នុងទីប្រជុំជនខេត្តពោធិ៍សាត់ នាថ្ងៃសុក្រ ទី២១ ខែសីហា ឆ្នាំ២០២៦។

ពោធិ៍សាត់៖ លោក ងួន ប៉ោសេង អភិបាលរងខេត្តពោធិ៍សាត់ តំណាង ឯកឧត្តម ខូយ រីដា អភិបាលខេត្ត រួមជាមួយ លោក គី ចាន់សុផល ប្រធានលេខាធិការដ្ឋានរៀបចំការបោះឆ្នោតខេត្ត (ល.ខ.ប) នាព្រឹកថ្ងៃទី២១ ខែសីហា ឆ្នាំ២០២៦ បានដឹកនាំកិច្ចប្រជុំផ្សព្វផ្សាយ និងណែនាំពីការអនុវត្តការងារផ្តល់លិខិតអញ្ជើញអ្នកមានឈ្មោះក្នុងបញ្ជីបោះឆ្នោតផ្លូវការឆ្នាំ២០២៥ ដើម្បីបម្រើឱ្យការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៦។ កិច្ចប្រជុំនេះបានរៀបចំឡើងនៅសាលាប្រជុំ ល.ខ.ប ខេត្តពោធិ៍សាត់ ដោយមានការចូលរួមពីអភិបាលរងក្រុង-ស្រុក តំណាងគណបក្សនយោបាយ និងមន្ត្រីពាក់ព័ន្ធ ដើម្បីធានាឱ្យដំណើរការចែកលិខិតអញ្ជើញ និងការចុះឈ្មោះបោះឆ្នោតប្រព្រឹត្តទៅដោយរលូន និងមានប្រសិទ្ធភាពខ្ពស់៕

ពិធីចុះហត្ថលេខាជាផ្លូវការ លើកិច្ចព្រមព្រៀងជួលដីសម្រាប់ការវិនិយោគ រវាងរដ្ឋបាលខេត្ត និងក្រុមហ៊ុន KPS Energy (Cambodia) Co., Ltd។ ព្រឹត្តិការណ៍នេះ ត្រូវបានចាត់ទុកជា «ស្ពាន» ដ៏សំខាន់ក្នុងការតភ្ជាប់សក្តានុពលខេត្ត ទៅនឹងខ្សែសង្វាក់ផលិតកម្មឧស្សាហកម្ម និងថាមពលប្រកបដោយចីរភាព។

ពោធិ៍សាត់៖ ឯកឧត្តម តែ ប៊ុណ្ណារិទ្ធ រដ្ឋលេខាធិការក្រសួងផែនការ បានអញ្ជើញដឹកនាំ និងដឹកនាំកិច្ចប្រជុំពិភាក្សាលើ «សេចក្តីព្រាងអនុក្រឹត្យស្តីពីការកំណត់មុខតំណែង និងការពិពណ៌នាមុខតំណែងវិជ្ជាជីវៈ ផែនការ និងស្ថិតិ» តាមរយៈប្រព័ន្ធវីដេអូអនឡាញ (Online Connection) នៅថ្ងៃទី២០ ខែសីហា ឆ្នាំ២០២៦ ។ កិច្ចប្រជុំនេះ រៀបចំឡើងក្នុងគោលបំណងកែសម្រួល កំណត់អត្តសញ្ញាណ និងរៀបចំការពិពណ៌នាមុខតំណែងវិជ្ជាជីវៈផ្នែកផែនការ និងស្ថិតិឱ្យមានភាពច្បាស់លាស់ សំដៅពង្រឹងប្រសិទ្ធភាពការងារ និងកសាងសមត្ថភាពមន្ត្រីរាជការក្នុងវិស័យនេះឱ្យកាន់តែមានចរិតលក្ខណៈវិជ្ជាជីវៈខ្ពស់ ឆ្លើយតបទៅនឹងការកែទម្រង់រដ្ឋបាលសាធារណៈ៕

(ពោធិ៍សាត់)៖ លោក ងួន ប៉ោសេង អភិបាលរងខេត្ត (តំណាង ឯកឧត្តម ខូយ រីដា អភិបាលខេត្តពោធិ៍សាត់) បានអញ្ជើញជាអធិបតីក្នុងពិធីជួបសំណេះសំណាល និងទទួលអំណោយពីអាជីវករ ព្រមទាំងសប្បុរសជននានាក្នុងខេត្ត នៅសាលប្រជុំសាលាខេត្តពោធិ៍សាត់ នាព្រឹកថ្ងៃទី២០ ខែសីហា ឆ្នាំ២០២៦ ។ អំណោយដែលទទួលបាននាពេលនេះ រដ្ឋបាលខេត្តនឹងនាំយកទៅឧបត្ថម្ភជូនដល់កងទ័ពជួរមុខ ដែលកំពុងឈរជើងការពារទឹកដីក្នុងភូមិសាស្ត្រខេត្តពោធិ៍សាត់។ ពិធីនេះក៏មានការអញ្ជើញចូលរួមពី លោកនាយករដ្ឋបាលសាលាខេត្ត ប្រធាន-អនុប្រធានមន្ទីរ មន្ត្រីរាជការ ព្រមទាំងតំណាងអាជីវករ និងសប្បុរសជនយ៉ាងច្រើនកុះករផងដែរ៕

ពោធិ៍សាត់៖ វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្រ្តី បានសហការជាមួយរដ្ឋបាលខេត្តពោធិ៍សាត់ រៀបចំវេទិកាសន្ទនាក្រោមប្រធានបទ «ការពង្រឹងសមត្ថភាពអង្គការសង្គមស៊ីវិលក្នុងយុគសម័យឌីជីថល» ដែលរៀបចំឡើងកាលពីពេលថ្មីៗនេះ នៅសាលាខេត្តពោធិ៍សាត់។ ពិធីនេះបានប្រព្រឹត្តទៅក្រោមអធិបតីភាព ឯកឧត្តម ប៉ៃ សំបូរ អគ្គលេខាធិការនៃអគ្គលេខាធិការដ្ឋាន វ.ស.ស. តំណាងដ៏ខ្ពង់ខ្ពស់ ឯកឧត្តម កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានក្រុមប្រឹក្សាភិបាល វ.ស.ស. ព្រមទាំង លោក សំ ណារិទ្ធិ អភិបាលរងនៃគណៈអភិបាលខេត្តពោធិ៍សាត់ ដើម្បីលើកកម្ពស់សមត្ថភាព និងការប្រើប្រាស់បច្ចេកវិទ្យាឌីជីថលក្នុងជួរអង្គការសង្គមស៊ីវិលឱ្យកាន់តែមានប្រសិទ្ធភាព៕

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យផ្ទាល់លើសកម្មភាពអភិវឌ្ឍន៍នានាក្នុងស្រុកភ្នំក្រវាញ ព្រមទាំងបានណែនាំ និងដាក់ចេញនូវទិសដៅការងារសំខាន់ៗមួយចំនួន ដើម្បីលើកកម្ពស់មុខមាត់ និងគុណភាពរស់នៅរបស់ប្រជាពលរដ្ឋក្នុងមូលដ្ឋាន។ ទិសដៅការងារអាទិភាពដែលបានដាក់ចេញ៖ រៀបចំសណ្តាប់ធ្នាប់សាធារណៈ រៀបចំហេដ្ឋារចនាសម្ព័ន្ធ និងកែលម្អរដ្ឋបាលស្រុកឱ្យមានភាពទាក់ទាញ និងមានរបៀបរៀបរយ, បង្កើនការសម្រួល និងត្រួតពិនិត្យការធ្វើដំណើរ ដើម្បីកាត់បន្ថយគ្រោះថ្នាក់ និងធានាសុវត្ថិភាពជូនប្រជាពលរដ្ឋ, ជំរុញការដាំដើមឈើ អនាម័យបរិស្ថាន និងការគ្រប់គ្រងសំរាម ដើម្បីប្រែក្លាយស្រុកភ្នំក្រវាញឱ្យទៅជាតំបន់បៃតង ស្រស់បំព្រង និងមានខ្យល់អាកាសបរិសុទ្ធ៕

ពោធិ៍សាត់៖ រដ្ឋបាលខេត្តពោធិ៍សាត់ បានរៀបចំកិច្ចប្រជុំដ៏សំខាន់មួយ ស្តីពី «ការអនុវត្តសាកល្បងគោលនយោបាយស្តីពីសុវត្ថិភាពចរាចរណ៍ផ្លូវគោកកម្រិតរោងចក្រ» នៅសាលប្រជុំកោះសំពៅមាស សាលាខេត្តពោធិ៍សាត់ នារសៀលថ្ងៃទី១៩ ខែសីហា ឆ្នាំ២០២៦ ។ កិច្ចប្រជុំនេះ បានធ្វើឡើងក្រោមអធិបតីភាព លោក លឹម សុខតូ អភិបាលរងខេត្ត តំណាងឯកឧត្តម ខូយ រីដា អភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត។ អង្គប្រជុំក៏មានការចូលរួមពីលោក ស៊ឹម សង្វាពិសិដ្ឋ ប្រធានមន្ទីរសាធារណការ និងដឹកជញ្ជូនខេត្ត តំណាងមន្ទីរ-អង្គភាពពាក់ព័ន្ធ អភិបាលរងក្រុង-ស្រុកទាំង៧ ព្រមទាំងតំណាងម្ចាស់ជំនួយ និងអង្គការដៃគូអភិវឌ្ឍន៍នានាផងដែរ។ កិច្ចប្រជុំនេះ រៀបចំឡើងក្នុងគោលបំណងសំខាន់ៗដូចខាងក្រោម៖ ពង្រឹងសុវត្ថិភាពក្នុងការធ្វើដំណើររបស់កម្មករនិយោជិតពេលធ្វើដំណើរទៅមកបំពេញការងារ, រៀបចំ និងអនុវត្តសាកល្បងនូវវិធានការសុវត្ថិភាពចរាចរណ៍ជាក់ស្តែងនៅតាមរោងចក្រ សហគ្រាស ដើម្បីកាត់បន្ថយគ្រោះថ្នាក់ចរាចរណ៍ឱ្យនៅកម្រិតទាបបំផុត, បង្កើនកិច្ចសហការជិតស្និទ្ធរវាងអាជ្ញាធរដែនដី មន្ទីរជំនាញ ម្ចាស់រោងចក្រ និងអង្គការដៃគូអភិវឌ្ឍន៍ ក្នុងការចូលរួមដោះស្រាយបញ្ហាចរាចរណ៍របស់កម្មករ៕