ព័ត៌មានក្នុងខេត្ត

ពោធិ៍សាត់៖ លោក អេង រស្មី ប្រធានមន្ទីរបរិស្ថានខេត្តពោធិ៍សាត់ បានបង្ហាញរូបភាពអន្ទាក់សត្វជាច្រើន ត្រូវបានរៀបចំ និងលួចដាក់ដោយជនល្មើសនៅក្នុងបណ្តាព្រៃអភិរក្ស ដើម្បីទាក់ចាប់សត្វព្រៃដោយខុសច្បាប់។ ចំពោះសកម្មភាពល្មើសច្បាប់នេះ ក្រុមការងារជំនាញបានបញ្ជាក់ជំហរយ៉ាងម៉ឺងម៉ាត់ថា «ថ្ងៃនេះចុះដោះអន្ទាក់ ថ្ងៃក្រោយនឹងចុះចាប់អ្នកដាក់អន្ទាក់ម្ដង»។ ជាមួយគ្នានេះ សមត្ថកិច្ច និងក្រុមការងារអភិរក្ស ក៏បានផ្ញើសារជម្រាបជូន និងព្រមានជាចុងក្រោយដល់ជនល្មើសទាំងឡាយណា ដែលមិនព្រមកែប្រែខ្លួនមកប្រកបមុខរបរត្រឹមត្រូវ និងដកឃ្លាចេញពីបទល្មើសព្រៃឈើ-សត្វព្រៃថា ការខាតបង់ និងទោសទណ្ឌចំពោះមុខច្បាប់ គឺជារូបអ្នកផ្ទាល់តែម្តង៕

ពោធិ៍សាត់៖ សមត្ថកិច្ចស្រុកភ្នំក្រវ៉ាញ ខេត្តពោធិ៍សាត់ បានចេញសារប្រកាសស្វែងរកម្ចាស់រថយន្តមួយគ្រឿង ដែលត្រូវបានបន្សល់ទុកចោល បន្ទាប់ពីក្រុមកំពុងប្រព្រឹត្តបទល្មើសព្រៃឈើ (ក្រុមសត្វខ្មូត) បានរត់គេចខ្លួនបាត់។ អាជ្ញាធរបានអំពាវនាវឱ្យម្ចាស់រថយន្តដែលមានស្លាកលេខខាងលើ ចូលខ្លួនមកទទួលយករថយន្ត និងដោះស្រាយតាមផ្លូវច្បាប់រៀងរាល់ម៉ោងធ្វើការ។ ជាមួយគ្នានេះ សមត្ថកិច្ចក៏បានរំលឹក និងដាស់តឿនដល់ជនល្មើស ឱ្យលះបង់មុខរបរកាប់បំផ្លាញព្រៃឈើខុសច្បាប់ទាំងនេះ ហើយផ្ដើមចាប់យកមុខរបរត្រឹមត្រូវ និងស្របច្បាប់វិញ ដើម្បីជៀសវាងការខាតបង់ទ្រព្យសម្បត្តិ និងប្រឈមមុខនឹងទោសទណ្ឌតាមច្បាប់ជាធរមាន៕

កេសរកូលស្បែកជើងទេវតា ជារុក្ខជាតិកេសរកូលដីព្រៃដ៏កម្រ មានផ្កាស្អាតប្លែក រីកនៅចន្លោះខែមីនាដល់ខែឧសភា នៅកម្ពុជាភាគច្រើនដុះតាមតំបន់ភ្នំមានសំណើមខ្ពស់ ដូចជានៅខេត្តកោះកុង ពោធិ៍សាត់ បាត់ដំបង និងមណ្ឌលគិរី ផ្កានេះមានតម្លៃខ្ពស់ និងត្រូវបានគេស្គាល់ផងដែរថា «ផ្កាថាវរី» ដែលជាទីនិយមនិងមានតម្លៃថ្លៃក្នុងទីផ្សារក្រៅប្រទេស។

រដ្ឋបាលខេត្តពោធិ៍សាត់ និងប្រជាពលរដ្ឋក្នុងខេត្តទាំងមូល សូមសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅបំផុត ចំពោះ លោក ច័ន្ទថេត ថានរៈ ប្រធានមន្ទីរបរិស្ថានខេត្តកំពង់ស្ពឺ ដែលបានផ្តល់កូនឈើសាគូរ៉ាចំនួន ១.០០០ ដើម ជូនដល់ខេត្តពោធិ៍សាត់ ដើម្បីចូលរួមក្នុងយុទ្ធនាការ «ពន្លកបៃតង»។ កាយវិការ និងទឹកចិត្តប្រកបដោយសប្បុរសនេះ គឺជាការចូលរួមចំណែកយ៉ាងសំខាន់ក្នុងការអនុវត្តតាម «ក្របខណ្ឌយុទ្ធសាស្ត្រចក្រាវិស័យបរិស្ថាន» របស់ក្រសួងបរិស្ថាន ក្នុងការដាំដុះ និងពង្រីកប្រភេទឈើលម្អ ជាពិសេសគឺការបង្កើនគម្របព្រៃឈើបៃតង ព្រមទាំងលើកកម្ពស់សោភ័ណភាពក្នុងមូលដ្ឋានខេត្តពោធិ៍សាត់ ឱ្យកាន់តែមានភាពស្រស់បំព្រង៕

ក្រុមការងារស្រុកក្រគរ ក្រោមការដឹកនាំតំណាងលោក អ៊ន សុផល្លា បានចុះពិនិត្យការងារអនាម័យ បរិស្ថាន និងសណ្តាប់ធ្នាប់សាធារណៈ ដើម្បីលើកកម្ពស់សោភ័ណភាព និងរបៀបរៀបរយក្នុងមូលដ្ឋាន។

ដែនជម្រកសត្វព្រៃភ្នំសំកុស និងស្ថាប័នពាក់ព័ន្ធ បានរៀបចំកិច្ចប្រជុំពិគ្រោះយោបល់ និងបោះឆ្នោតជ្រើសរើសសមាជិកគណៈកម្មការសហគមន៍ទឹកធ្លាក់ថ្មចាំងឡើងវិញ ដោយមានអ្នកចូលរួមសរុប ៣៧នាក់ (ស្រី ១៧នាក់)។

ការិយាល័យគាំពារបរិស្ថាន បានចុះត្រួតពិនិត្យ និងវាយតម្លៃផលប៉ះពាល់បរិស្ថានសម្រាប់គម្រោងអាជីវកម្មខ្សាច់បកចំនួន ០១ទីតាំង ស្ថិតក្នុងឃុំត្រពាំងជង ស្រុកបាកាន ខេត្តពោធិ៍សាត់។

ជាលទ្ធផល វគ្គបណ្តុះបណ្តាលនេះបានជួយឱ្យអ្នកចូលរួមយល់ដឹងកាន់តែច្បាស់អំពីការឆ្លើយតបនឹងការប្រែប្រួលអាកាសធាតុ ការការពារបរិស្ថាន និងសង្គម នីតិវិធីដោះស្រាយបណ្តឹងក្នុងសហគមន៍ ព្រមទាំងការលើកកម្ពស់សមភាពយេនឌ័រក្នុងការសម្រេចចិត្ត និងទទួលបានផលប្រយោជន៍រួម។

ស្រុកក្រគរ៖ មន្ត្រីរដ្ឋបាលស្រុកក្រគរ បានរួមគ្នាដាំកូនឈើ និងចុះសម្អាតបរិស្ថាន ដើម្បលើកកម្ពស់សោភ័ណភាពតាមបណ្តោយផ្លូវជាតិលេខ៥ នាថ្ងៃសៅរ៍ ទី១១ ខែកក្កដា ឆ្នាំ២០២៦ នេះ។ សកម្មភាពនេះ បានធ្វើឡើងចាប់ពីចំណុចក្លោងទ្វារវត្តសម្តេចយស រហូតដល់ពហុកីឡដ្ឋានថ្មី ស្ថិតក្នុងភូមិសាស្ត្រឃុំតាមបណ្តោយផ្លូវជាតិលេខ៥។ ក្រៅពីការប្រមូល និងវេចខ្ចប់សំរាមឱ្យមានរបៀបរៀបរយ ក្រុមការងារក៏បានដាំកូនឈើបន្ថែមនៅតាមបណ្តោយផ្លូវជាតិ ដើម្បីបង្កើនគម្របបៃតង ផ្តល់ម្លប់ និងកាត់បន្ថយកម្តៅ បង្កើតបានជាបរិស្ថានរស់នៅប្រកបដោយភាពស្រស់បំព្រងសម្រាប់ប្រជាពលរដ្ឋក្នុងមូលដ្ឋាន ក៏ដូចជាអ្នកធ្វើដំណើរផងដែរ៕

ខេត្តពោធិ៍សាត់៖ ក្រុមការងារការិយាល័យគាំពារបរិស្ថាន នៃមន្ទីរបរិស្ថានខេត្តពោធិ៍សាត់ បានចុះអនុវត្តការងារជំនាញតាមដានគុណភាពទឹកសាធារណៈ នៅតាមទីតាំងគោលដៅចំនួន ០៣កន្លែង ស្ថិតក្នុងភូមិសាស្ត្រក្រុងពោធិ៍សាត់ និងស្រុកកណ្ដៀង នាថ្ងៃទី៩ ខែកក្កដា ឆ្នាំ២០២៦។ សកម្មភាពចុះជម្រុញការងារបច្ចេកទេសនេះ រួមមាន៖ តាមដានស្ថានភាពទឹកស្ទឹងពោធិ៍សាត់ និងទឹកដែលបានចេញពីអាងប្រព្រឹត្តកម្មសម្អាតរួច និងបន្តនីតិវិធីពិសោធន៍៖ ក្រុមការងារបានប្រមូលយកសំណាកទឹកពីទីតាំងទាំងនោះ ដើម្បីបញ្ជូនទៅកាន់មន្ទីរពិសោធន៍នៃក្រសួងបរិស្ថាន ធ្វើការវិភាគរកកម្រិតស្តង់ដារបច្ចេកទេស។ ការចុះពិនិត្យ និងយកសំណាកទឹកជាប្រចាំនេះ ធ្វើឡើងក្នុងគោលបំណងគ្រប់គ្រងការបំពុល ធានាសុវត្ថិភាពប្រភពទឹកប្រើប្រាស់របស់ប្រជាពលរដ្ឋ និងលើកកម្ពស់គាំពារបរិស្ថានក្នុងមូលដ្ឋានឱ្យកាន់តែប្រសើរឡើង៕

[ពោធិ៍សាត់]៖ នាថ្ងៃទី៨ ខែកក្កដា ឆ្នាំ២០២៦ ការិយាល័យតំបន់ប្រើប្រាស់ច្រើនយ៉ាងបឹងទន្លេសាប បានសហការជាមួយអង្គការសមាគមអភិរក្សសត្វព្រៃ (WCS) ប្រចាំខេត្តពោធិ៍សាត់ ព្រមទាំងអាជ្ញាធរ និងសមត្ថកិច្ចពាក់ព័ន្ធ បានរួមគ្នាបង្កើតយុទ្ធនាការចុះផ្សព្វផ្សាយអប់រំច្បាប់ការពារសត្វព្រៃ។ សកម្មភាពនេះមានការអញ្ជើញចូលរួមពី៖ រដ្ឋបាលស្រុកបាកាន អធិការដ្ឋាននគរបាលស្រុកបាកាន រដ្ឋបាលឃុំបឹងបត់កណ្ដោល និងសហគមន៍នេសាទឫស្សីតាម៉ាន់ ដោយបានចុះផ្ទាល់ទៅកាន់បរិវេណផ្សារត្រាំសេះ ស្ថិតក្នុងឃុំបឹងបត់កណ្តោល ស្រុកបាកាន ខេត្តពោធិ៍សាត់។ គោលបំណងចម្បងនៃយុទ្ធនាការនេះ គឺដើម្បីបញ្ជ្រាបការយល់ដឹង និងអំពាវនាវដល់អាជីវករ ក៏ដូចជាប្រជាពលរដ្ឋទាំងអស់ ឱ្យចូលរួមបញ្ឈប់ការបរបាញ់ ការជួញដូរ និងការបរិភោគសត្វព្រៃខុសច្បាប់គ្រប់ទម្រង់ ដើម្បីរួមគ្នាការពារ និងអភិរក្សធនធានធម្មជាតិ ក៏ដូចជាជីវៈចម្រុះដ៏មានតម្លៃឱ្យបានគង់វង្ស៕

នៅក្នុងបណ្តាខែខាងមុខនេះ ប្រទេសកម្ពុជាក៏ដូចជាប្រទេសជាច្រើនទៀតនៅជុំវិញពិភពលោក អាចនឹងជួបប្រទះនូវឥទ្ធិពលនៃបាតុភូតអែលនីញ៉ូ (El Niño) ដែលនាំមកនូវសីតុណ្ហភាពកាន់តែក្ដៅខ្លាំង អាកាសធាតុស្ងួតហួតហែងអូសបន្លាយពេលយូរ ការកើនឡើងសម្ពាធលើប្រភពធនធានទឹក និងហានិភ័យកាន់តែខ្ពស់នៃភ្លើងឆេះព្រៃ។ ទោះបីជាយើងមិនអាចរារាំងបាតុភូតអាកាសធាតុធម្មជាតិនេះមិនឱ្យកើតឡើងបានក៏ដោយ ប៉ុន្តែយើងអាចរួមគ្នាត្រៀមលក្ខណៈដើម្បីទប់ទល់នឹងវាបាន។ ខែលការពារដ៏រឹងមាំបំផុតដែលយើងអាចកសាងបាន មិនមែនធ្វើឡើងពីបេតុង ឬដែកថែបនោះឡើយ។ ប៉ុន្តែវាត្រូវបានបង្កើតឡើងពី «ដើមឈើ»។