ព័ត៌មានក្នុងខេត្ត
ទាំងអស់សេចក្តីជូនដំណឹងសេចក្តីប្រកាសព័ត៌មានសកម្មភាពថ្នាក់ដឹកនាំសកម្មភាពអាជ្ញាធរនយោបាយកសិកម្មទេសចរណ៍ពាណិជ្ជកម្មបទយកការណ៍សិល្បៈនិងវប្បធម៌សន្តិសុខសង្គមអប់រំ និងកីឡាសុខាភិបាលបរិស្ថានការអភិវឌ្ឍគ្រោះធម្មជាតិធនធានទឹក និងឧតុនិយម

សកម្មភាពអាជ្ញាធរ
អភិបាលស្រុកក្រគរ ដឹកនាំកិច្ចប្រជុំរៀបចំផែនការចែកស្បៀងរាជរដ្ឋាភិបាល ជូនប្រជាពលរដ្ឋរងគ្រោះដោយជំនន់ទឹកភ្លៀងចំនួន ២,៥០៦គ្រួសារ
លោក អ៊ន សុផល្លា អភិបាលស្រុកក្រគរ បានដឹកនាំកិច្ចប្រជុំពិសេសលើផែនការចែកស្បៀងរបស់រាជរដ្ឋាភិបាល ជូនប្រជាពលរដ្ឋរងគ្រោះដោយជំនន់ទឹកភ្លៀងចំនួន ២,៥០៦គ្រួសារ។
កម្មវិធីចែកអំណោយនេះ នឹងប្រព្រឹត្តទៅនៅថ្ងៃទី៣១ ខែតុលា ឆ្នាំ២០២៦ ខាងមុខនេះ ទីតាំងនៅ មីនេបៀ (ខេមបូឌា) ក្នុងតំបន់សេដ្ឋកិច្ចពិសេសស្រុកក្រគរ ខេត្តពោធិ៍សាត់។


សកម្មភាពអាជ្ញាធរ
អភិបាលស្រុកបាកាន ដឹកនាំកិច្ចប្រជុំប្រចាំខែតុលា របស់ការិយាល័យអប់រំ យុវជន និងកីឡាស្រុក
ពោធិ៍សាត់៖ លោក ឆាយ គឹមម៉ុង អភិបាលនៃគណៈអភិបាលស្រុកបាកាន បានអញ្ជើញជាអធិបតីភាពដឹកនាំកិច្ចប្រជុំប្រចាំខែតុលា ឆ្នាំ២០២៦ របស់ការិយាល័យអប់រំ យុវជន និងកីឡាស្រុកបាកាន ដែលបានប្រព្រឹត្តទៅនៅសាលប្រជុំសាលាស្រុកបាកាន នារសៀលថ្ងៃទី២៨ ខែតុលា ឆ្នាំ២០២៦។
កិច្ចប្រជុំនេះត្រូវបានរៀបចំឡើងក្នុងគោលបំណង ពិនិត្យ និងវាយតម្លៃ លើលទ្ធផលការងារដែលការិយាល័យអប់រំ យុវជន និងកីឡាស្រុក អនុវត្តបានក្នុងកំឡុងខែតុលាកន្លងមក, ដោះស្រាយបញ្ហាប្រឈម ស្ដាប់របាយការណ៍ និងពិភាក្សាលើបញ្ហាកង្វល់ផ្សេងៗតាមគ្រឹះស្ថានសិក្សា ក្នុងគោលដៅស្វែងរកដំណោះស្រាយរួមគ្នាឱ្យបានទាន់ពេលវេលា, ដាក់ចេញទិសដៅបន្ត ណែនាំនូវផែនការសកម្មភាពថ្មីៗ ដើម្បីពង្រឹងគុណភាពអប់រំ កិច្ចការយុវជន និងការងារកីឡាក្នុងមូលដ្ឋានស្រុកបាកាន ឱ្យកាន់តែមានប្រសិទ្ធភាព និងរីកចម្រើនបន្ថែមទៀត។
ក្នុងឱកាសនោះដែរ លោកអភិបាលស្រុកក៏បានថ្លែងអំណរគុណ និងកោតសរសើរដល់ថ្នាក់ដឹកនាំ មន្ត្រីរាជការ និងលោកគ្រូ អ្នកគ្រូទាំងអស់ នៃកម្លាំងអប់រំក្នុងស្រុកបាកាន ដែលបានខិតខំប្រឹងប្រែងបំពេញភារកិច្ចយ៉ាងសកម្ម ដើម្បីចូលរួមចំណែកអភិវឌ្ឍធនធានមនុស្សក្នុងស្រុកឱ្យកាន់តែប្រសើរឡើង៕ សាយយ័ន្ដ វុន្នីយ៉ា


សកម្មភាពអាជ្ញាធរ
រដ្ឋបាលស្រុកបាកាន បើកកិច្ចប្រជុំគណៈបញ្ជាការឯកភាព ជំរុញការអនុវត្តគោលនយោបាយភូមិ ឃុំមានសុវត្ថិភាព
លោក ឆាយ គឹមម៉ុង អភិបាលស្រុកបាកាន បានដឹកនាំកិច្ចប្រជុំគណៈបញ្ជាការឯកភាពរដ្ឋបាលស្រុក នៅសាលប្រជុំសាលាស្រុកបាកាន ដោយមានការចូលរួមពីអាជ្ញាធរមូលដ្ឋាន និងកងកម្លាំងប្រដាប់អាវុធ។
កិច្ចប្រជុំនេះបានផ្តោតលើការប្រគល់ភារកិច្ចសំខាន់ៗដូចជា ការពង្រឹងសន្តិសុខ សណ្ដាប់ធ្នាប់សាធារណៈ តាមរយៈគោលនយោបាយ ភូមិ ឃុំ សង្កាត់ មានសុវត្ថិភាព ការបង្កើនប្រសិទ្ធភាពនៃការផ្តល់សេវាសាធារណៈជូនប្រជាពលរដ្ឋ និងការដោះស្រាយបញ្ហប្រឈមនានានៅតាមមូលដ្ឋានឲ្យបានទាន់ពេលវេលា។


សកម្មភាពអាជ្ញាធរ
អភិបាលរងក្រុងពោធិ៍សាត់ ដឹកនាំសម្របសម្រួលលើករណីស្នើសុំបើកផ្លូវគ្រោងលេខ ២១១ ស្ថិតនៅសង្កាត់ផ្ទះព្រៃ ខេត្តពោធិ៍សាត់
លោកស្រី សេង ហួយ អភិបាលរងក្រុងពោធិ៍សាត់ បានដឹកនាំសម្របសម្រួលលើករណីស្នើសុំបើកផ្លូវគ្រោងលេខ ២១១ ស្ថិតនៅភូមិចំការចេក សង្កាត់ផ្ទះព្រៃ ខេត្តពោធិ៍សាត់ ដើម្បីស្វែងរកដំណោះស្រាយ និងសម្រួលដល់ការធ្វើដំណើររបស់ប្រជាពលរដ្ឋ។


សកម្មភាពអាជ្ញាធរ
លោក អ៊ន សុផល្លា ដឹកនាំកិច្ចប្រជុំគណៈបញ្ជាការឯកភាពរដ្ឋបាលស្រុកក្រគរ ប្រចាំខែតុលា ឆ្នាំ២០២៦
ពោធិ៍សាត់៖ លោក អ៊ន សុផល្លា អភិបាលនៃគណៈអភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុកក្រគរ បានដឹកនាំកិច្ចប្រជុំគណៈបញ្ជាការឯកភាពរដ្ឋបាលស្រុកប្រចាំខែតុលា ឆ្នាំ២០២៦ នៅសាលប្រជុំរដ្ឋបាលស្រុក ។
កិច្ចប្រជុំដ៏មានសារៈសំខាន់នេះ ក៏មានការអញ្ជើញចូលរួមពីសំណាក់ លោក លោកស្រី អភិបាលរងស្រុក, កងកម្លាំងប្រដាប់អាវុធទាំងបី, ប្រធានការិយាល័យសុខាភិបាលស្រុកប្រតិបត្តិក្រគរ, ប្រធានការិយាល័យប្រជាពលរដ្ឋ, លោក លោកស្រី ប្រធានការិយាល័យទាំង១៣, លោក លោកស្រី មេឃុំទាំង១១ឃុំ, ប្រធានប៉ុស្តិ៍រដ្ឋបាលទាំង១១ឃុំ ព្រមទាំងតំណាងអង្គភាពចំណុះរដ្ឋបាលស្រុកជាច្រើនរូប កាលពីរសៀលថ្ងៃទី២៦ ខែតុលា ឆ្នាំ២០២៦ ។
កិច្ចប្រជុំប្រចាំខែនេះ រៀបចំឡើងក្នុងគោលបំណង ពិនិត្យនិងវាយតម្លៃលើកិច្ចការងារថែរក្សាសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ការអនុវត្តគោលនយោបាយ ភូមិ ឃុំ សង្កាត់មានសុវត្ថិភាព ក៏ដូចជាការពិភាក្សាលើវឌ្ឍនភាពការងារអភិវឌ្ឍន៍មូលដ្ឋាន និងការដោះស្រាយបញ្ហាប្រឈមនានា ដើម្បីធានាឱ្យការដឹកនាំ និងការផ្តល់សេវាជូនប្រជាពលរដ្ឋក្នុងស្រុកក្រគរ ប្រព្រឹត្តទៅដោយរលូន និងមានប្រសិទ្ធភាពខ្ពស់៕ សាយយ័ន្ដ វុន្នីយ៉ា


សកម្មភាពអាជ្ញាធរ
អភិបាលក្រុងពោធិ៍សាត់ ចុះត្រួតពិនិត្យ និងដោះស្រាយបន្ទាន់នូវទីតាំងជ្រាបទឹកនៅខ្នងទំនប់ក្រុមហ៊ុន សេវ ឌឹ ឡាហ្វ៍ ក្រោយមានការព្រួយបារម្ភពីប្រជាពលរដ្ឋ
លោក ផាយ ឡេង អភិបាលក្រុងពោធិ៍សាត់ បានដឹកនាំមន្ត្រីពាក់ព័ន្ធចុះត្រួតពិនិត្យទីតាំងជ្រាបទឹកនៅខ្នងទំនប់ចម្ការក្រុមហ៊ុន សេវ ឌឹ ឡាហ្វ៍ ក្រោយមានការព្រួយបារម្ភពីប្រជាពលរដ្ឋ។
តំណាងក្រុមហ៊ុនបានបញ្ជាក់ថា ទឹកនោះត្រូវបានចម្រោះ និងបន្សុទ្ធរួច មិនប៉ះពាល់ដល់បរិស្ថានទេ ហើយក្រុមហ៊ុនក៏បានយកគ្រឿងចក្រ និងកម្លាំងមកដាក់ដីលុបចង្អូរជ្រាបទឹកនោះរួចរាល់ក្នុងថ្ងៃដដែល ដើម្បីឆ្លើយតបនឹងកង្វល់របស់ប្រជាពលរដ្ឋផងដែរ។


សកម្មភាពអាជ្ញាធរ
លោកជំទាវ ឱ វណ្ណឌីន អញ្ជើញចុះពិនិត្យការផ្តល់សេវាសុខាភិបាល និងជំរុញការអនុវត្តការថែទាំសុខភាពបឋម នៅមណ្ឌលសុខភាពបឹងបត់កណ្ដោល ខេត្តពោធិ៍សាត់
លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល បានអញ្ជើញដឹកនាំក្រុមការងារចុះពិនិត្យការផ្តល់សេវាសុខាភិបាល និងជំរុញការអនុវត្តការថែទាំសុខភាពបឋម នៅមណ្ឌលសុខភាពបឹងបត់កណ្ដោល ខេត្តពោធិ៍សាត់ ដោយមានការចូលរួមពី លោកជំទាវ ប៉ុក ឌីណា អភិបាលរងខេត្ត និងអាជ្ញាធរពាក់ព័ន្ធ ដើម្បីពង្រឹងគុណភាពសេវាសុខភាពជូនប្រជាពលរដ្ឋនៅមូលដ្ឋាន។


សកម្មភាពអាជ្ញាធរ
អាជ្ញាធរស្រុកភ្នំក្រវាញ ចុះដឹកនាំកម្លាំងជួសជុលផ្លូវលំ សំបុកមាន់ ជូនប្រជាពលរដ្ឋនៅឃុំសំរោង
ពោធិ៍សាត់៖ លោក ធាម សុផាត អភិបាលនៃគណៈអភិបាលស្រុកភ្នំក្រវាញ បានអញ្ជើញចុះដឹកនាំផ្ទាល់នូវមន្ត្រីរាជការ ក៏ដូចជាអាជ្ញាធរឃុំ ដើម្បីចុះជួសជុលកំណាត់ផ្លូវលំដែលមានស្ថានភាពខូចខាត ផ្លូវសំបុកមាន់ ក្នុងគោលបំណងសម្រួលដល់ការធ្វើដំណើរកាន់តែមានភាពងាយស្រួល និងធានាបាននូវសុវត្ថិភាពជូនដល់ប្រជាពលរដ្ឋ កាលពីថ្ងៃទី២៥ ខែតុលា ឆ្នាំ២០២៦។
ការចុះអន្តរាគមន៍ជួសជុលផ្លូវនេះ ត្រូវបានធ្វើឡើងនៅក្នុងភូមិសាស្ត្រ ឃុំសំរោង ស្រុកភ្នំក្រវាញ ខេត្តពោធិ៍សាត់ ខណៈដែលស្ថានភាពផ្លូវកន្លងមកមានការលំបាកខ្លះៗក្នុងការធ្វើដំណើររបស់ប្រជាពលរដ្ឋ និងការដឹកជញ្ជូនកសិផលផ្សេងៗ។
សកម្មភាពចុះអន្តរាគមន៍ដោះស្រាយបញ្ហាខ្វះខាត និងសំណូមពរទាន់ពេលវេលានេះ គឺជាការយកចិត្តទុកដាក់ខ្ពស់ពីសំណាក់អាជ្ញាធរមូលដ្ឋាន ក្នុងការបម្រើផលប្រយោជន៍ និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋក្នុងមូលដ្ឋាន ដើម្បីលើកកម្ពស់ការតភ្ជាប់ទំនាក់ទំនង និងជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។ សាយយ័ន្ដ វុន្នីយ៉ា


សកម្មភាពអាជ្ញាធរ
ក្រុមការងារគណបក្សសង្កាត់ផ្ទះព្រៃ ចុះសួរសុខទុក្ខ និងនាំយកថវិកាឧបត្ថម្ភជូនសមាជិកបក្សដែលកំពុងសម្រាកព្យាបាលជំងឺ
ពោធិ៍សាត់៖ តំណាងលោក ពៅ ពិសិដ្ឋ ប្រធានក្រុមការងារគណបក្សចុះមូលដ្ឋានសង្កាត់ផ្ទះព្រៃ ដឹកនាំដោយលោក ភួង សារិទ្ធ ប្រធានគណបក្សសង្កាត់ និងលោក ប៉ិច ស៊ីផាន់ ចៅសង្កាត់ផ្ទះព្រៃ និងជាអនុប្រធានគណបក្សសង្កាត់ រួមជាមួយសមាជិក សមាជិកាគណបក្សសង្កាត់ និងភូមិ បានអញ្ជើញចុះសួរសុខទុក្ខ និងនាំយកអំណោយថវិកាទៅឧបត្ថម្ភជូនសមាជិកបក្សដែលកំពុងមានជំងឺ នាថ្ងៃទី២៥ ខែតុលា ឆ្នាំ២០២៦។
ក្នុងបេសកកម្មនេះ ក្រុមការងារបានធ្វើដំណើរទៅសួរសុខទុក្ខលោកស្រី សួង ស៊ីដេត សមាជិកាបក្ស និងត្រូវជាភរិយារបស់លោក ស៊ុន ស៊ីផល ប្រធានសាខាបក្សភូមិក្បាលហុង ដែលកំពុងសម្រាកព្យាបាលជំងឺនៅខេត្តកំពង់ស្ពឺ។ បន្ទាប់មក ក្រុមការងារបានបន្តដំណើរទៅសួរសុខទុក្ខលោក នេត បាន សមាជិកភូមិគក ដែលកំពុងសម្រាកព្យាបាលជំងឺនៅមន្ទីរពេទ្យព្រះកុសុមៈ រាជធានីភ្នំពេញ។
នៅក្នុងឱកាសនោះដែរ ក្រុមការងារក៏បាននាំយកថវិកាឧបត្ថម្ភរបស់ក្រុមការងារគណបក្សចុះមូលដ្ឋានសង្កាត់ផ្ទះព្រៃ ប្រគល់ជូនសមាជិកទាំងពីររូប ដើម្បីរួមចំណែកសម្រាលបន្ទុកចំណាយក្នុងការសម្រាកព្យាបាលជំងឺ ព្រមទាំងបានពាំនាំនូវការផ្តាំផ្ញើសួរសុខទុក្ខ និងជូនពរឲ្យឆាប់ជាសះស្បើយពីជំងឺ ដើម្បីត្រឡប់មកជួបជុំគ្រួសារវិញក្នុងពេលឆាប់ៗខាងមុខនេះ៕ សាយយ័ន្ដ វុន្នីយ៉ា


សកម្មភាពអាជ្ញាធរ
មន្ទីរអភិវឌ្ឍន៍ជនបទខេត្តពោធិ៍សាត់ រៀបចំកិច្ចសម្ភាសន៍ជាមួយអ្នកសារព័ត៌មាន២២ស្ថាប័ន ផ្សព្វផ្សាយពីសក្តានុពលទេសចរណ៍ និងស្ពានបេតុងថ្មីនៅស្រុកភ្នំក្រវាញ
លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ និងសហការី បានផ្តល់កិច្ចសម្ភាសន៍ដល់អ្នកសារព័ត៌មាន ២២ស្ថាប័ន ជុំវិញសក្តានុពលទេសចរណ៍ និងការអភិវឌ្ឍក្នុងខេត្ត។
ក្នុងនោះ លោកប្រធានបានលើកឡើងពី ស្ពានបេតុងថ្មីប្រវែង ១៤៤ម៉ែត្រ ទទឹង ១០ម៉ែត្រ នៅស្រុកភ្នំក្រវាញ ដែលជាអំណោយរបស់ សម្តេចបវរធិបតី ហ៊ុន ម៉ាណែត ជំនួសស្ពានដែកចាស់។ ស្ពាននេះគឺជាសរសៃឈាមសេដ្ឋកិច្ចដ៏សំខាន់ ជួយសម្រួលការធ្វើដំណើរ ដឹកជញ្ជូន និងតភ្ជាប់ទេសចរណ៍ទៅកាន់តំបន់ភ្នំ១៥០០ ព្រមទាំងខេត្តជាប់ពាក់ព័ន្ធយ៉ាងងាយស្រួល។


សកម្មភាពអាជ្ញាធរ
លោកអភិបាលស្រុកក្រគរ ចុះពិនិត្យអនាម័យបរិស្ថាន និងបង្ហាត់បង្រៀនការតាក់តែងដើមត្របែកព្រៃតាមទ្រូងផ្លូវជាតិលេខ៥ ដល់អាជ្ញាធរឃុំអន្សាចំបក់
លោកអភិបាលស្រុកក្រគរ ខេត្តពោធិ៍សាត់ ព្រមទាំងក្រុមការងារ បានចុះពិនិត្យអនាម័យបរិស្ថាន និងបង្ហាត់បង្រៀនបច្ចេកទេសតាក់តែងដើមត្របែកព្រៃតាមទ្រូងផ្លូវជាតិលេខ៥ ដល់អាជ្ញាធរឃុំអន្សាចំបក់ ស្រុកក្រគរ ខេត្តពោធិ៍សាត់ សំដៅលើកកម្ពស់សោភ័ណភាព និងសណ្តាប់ធ្នាប់ក្នុងមូលដ្ឋានឱ្យកាន់តែស្រស់ស្អាត។


សកម្មភាពអាជ្ញាធរ
លោកអភិបាលស្រុកក្រគរ ខេត្តពោធិ៍សាត់ ចុះពិនិត្យការហ្វឹកហាត់របស់ក្រុមកីឡាករទូក (ង) និងផ្ដល់ដំបូន្មានលើកទឹកចិត្តដើម្បីត្រៀមប្រកួតថ្នាក់ខេត្ត
ពោធិ៍សាត់៖ លោក អ៊ន សុផល្លា អភិបាលនៃគណៈអភិបាលស្រុកក្រគរ ខេត្តពោធិ៍សាត់ បានអញ្ជើញចុះផ្ទាល់ដើម្បីពិនិត្យមើលការងារហ្វឹកហាត់របស់ក្រុមកីឡាករទូក (ង) ស្រុកក្រគរ ក្នុងគោលបំណងជំរុញ លើកទឹកចិត្ត និងផ្ដល់បទពិសោធន៍ល្អៗដល់កីឡាករទាំងអស់ នាព្រឹកថ្ងៃទី២៥ ខែតុលា ឆ្នាំ២០២៦។
ក្នុងឱកាសនោះ លោកអភិបាលស្រុកក្រគរ ខេត្តពោធិ៍សាត់ បានផ្ដាំផ្ញើដល់ក្រុមកីឡាករឱ្យខិតខំប្រឹងប្រែងហ្វឹកហាត់ត់ថែរក្សាសុខភាព សាមគ្គីភាពផ្ទៃក្នុងល្អ និងគោរពវិន័យ ដើម្បីត្រៀមខ្លួនចូលរួមប្រកួតប្រជែងថ្នាក់ខេត្ត នាំយកជ័យជម្នះ និងកិត្តិយសជូនដល់ស្រុកក្រគរខេត្តពោធិ៍សាត់ របស់យើង៕ ឈឹម ម៉ារីយ៉ាន


សកម្មភាពអាជ្ញាធរ
សាខាកាកបាទក្រហមកម្ពុជា ខេត្តពោធិ៍សាត់ បើកវគ្គបណ្តុះបណ្តាលមូលដ្ឋានជូនដល់អ្នកស្ម័គ្រចិត្ត ដើម្បីពង្រឹងសមត្ថភាពការងារមនុស្សធម៌
ក្រោមការដឹកនាំរបស់ ឯកឧត្តម ខូយ រីដា ប្រធានគណៈកម្មាធិការសាខា ក្រុមប្រតិបត្តិសាខាកាកបាទក្រហមកម្ពុជាខេត្តពោធិ៍សាត់ ដឹកនាំដោយលោក ទេព រ៉ុម នាយករងសាខា បានបើកវគ្គបណ្តុះបណ្តាលមូលដ្ឋានជូនដល់អ្នកស្ម័គ្រចិត្ត កក្រក សរុបចំនួន ៣២នាក់ (ស្រី ១៤នាក់) មកពីសង្កាត់ស្វាយអាត់ និងសង្កាត់ព្រៃញី ខេត្តពោធិ៍សាត់។

