ពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញដឹកនាំក្រុមការងារបច្ចេកទេសនៃមន្ទីរធនធានទឹក និងឧតុនិយមខេត្ត ព្រមទាំងអាជ្ញាធរមូលដ្ឋាន ចុះពិនិត្យមើលស្ថានភាពទឹកជាក់ស្តែងនៅទំនប់ទឹកដំណាក់អំពិល និងទំនប់ទឹកធារាសាស្ត្រដំណាក់ឈើក្រំ ស្រុកភ្នំក្រវាញ ខេត្តពោធិ៍សាត់ នាព្រឹកថ្ងៃទី២៦ ខែតុលា ឆ្នាំ២០២៦ ។ ការចុះពិនិត្យនេះ ធ្វើឡើងក្នុងគោលបំណងដើម្បីវាយតម្លៃស្ថានភាពទឹក និងធ្វើអន្តរាគមន៍ចាត់ចែងការបិទ និងបើកទឹកតាមបណ្តាស្ថានីយ ព្រមទាំងទំនប់ស្ទាក់ទឹកនានា ស្ថិតក្នុងក្រុង និងស្រុកនៃខេត្តពោធិ៍សាត់។ វិធានការនេះ មិនត្រឹមតែជួយឱ្យការប្រើប្រាស់ទឹកមានប្រសិទ្ធភាពខ្ពស់ប៉ុណ្ណោះទេ ប៉ុន្តែថែមទាំងជាយុទ្ធសាស្ត្រត្រៀមបង្ការហានិភ័យនៃការខ្វះខាតទឹក សម្រាប់បម្រើឱ្យសេចក្តីត្រូវការរបស់ប្រជាពលរដ្ឋ និងការបង្កបង្កើនផលកសិកម្មក្នុងរដូវប្រាំងនាពេលខាងមុខនេះផងដែរ៕

លោក គិត ផល អនុប្រធានក្តាប់រួមមន្ទីរធនធានទឹក និងឧតុនិយមខេត្តពោធិ៍សាត់ បានដឹកនាំមន្ត្រីជំនាញ ចុះពិនិត្យ និងវាយតម្លៃស្ថានភាពជំនន់ទឹកភ្លៀងលើកទី២ នៅក្នុងភូមិសាស្ត្រស្រុកក្រគរ និងស្រុកបាកាន ខេត្តពោធិ៍សាត់ នាថ្ងៃទី១៣ ខែតុលា ឆ្នាំ២០២៦។

ពោធិ៍សាត់៖ លោក គិត ផល អនុប្រធានក្តាប់រួមមន្ទីរធនធានទឹក និងឧតុនិយមខេត្តពោធិ៍សាត់ បានដឹកនាំថ្នាក់ដឹកនាំ មន្ត្រីរាជការ ព្រមទាំងបុគ្គលិកជាប់កិច្ចសន្យានៃមន្ទីរ ចុះជួបសួរសុខទុក្ខ និងនាំយកអំណោយជាស្បៀងអាហារ គ្រឿងឧបភោគ បរិភោគ និងថវិកា ទៅចែកជូនដល់គ្រួសារអតីតយុទ្ធជន ដែលជាសម្ព័ន្ធមេត្រីភាព ស្ថិតនៅភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នៅថ្ងៃទី៥ ខែតុលា ឆ្នាំ២០២៦ ។ សកម្មភាពមនុស្សធម៌ និងការចុះសួរសុខទុក្ខនាពេលនេះ ស្ដែងឱ្យឃើញពីការយកចិត្តទុកដាក់ខ្ពស់ ការចងចាំ និងការដឹងគុណយ៉ាងជ្រាលជ្រៅចំពោះគុណបំណាច់ និងការលះបង់យ៉ាងធំធេងរបស់បងប្អូនអតីតយុទ្ធជនក្នុងការការពារជាតិ មាតុភូមិ នាពេលកន្លងមក។ ជាមួយគ្នានេះ អំណោយដែលបានពាំនាំទៅចែកជូននាពេលនេះ នឹងរួមចំណែកជួយសម្រាលជីវភាពរស់នៅប្រចាំថ្ងៃរបស់គ្រួសារអតីតយុទ្ធជនឱ្យកាន់តែមានភាពល្អប្រសើរឡើង និងពង្រឹងចំណងសម្ព័ន្ធមេត្រីភាពឱ្យកាន់តែជិតស្និទ្ធបន្ថែមទៀត៕

គម្រោងនេះស្ថិតនៅតាមបណ្តោយស្ទឹងពោធិ៍សាត់ ក្នុងឃុំប្រម៉ោយ ស្រុកវាលវែង ខេត្តពោធិ៍សាត់ ដោយទទួលបានការវិនិយោគសរុបប្រមាណជាង ២៣១ លានដុល្លារអាមេរិក ពីក្រុមហ៊ុន SPHP (Cambodia) Co., Ltd.។ តាមរយៈការវិនិយោគដ៏ធំធេងនេះ គម្រោងនឹងចូលរួមចំណែកយ៉ាងសកម្មក្នុងការឆ្លើយតបទៅនឹងតម្រូវការថាមពលអគ្គិសនីដែលកំពុងតែកើនឡើងពីមួយថ្ងៃទៅមួយថ្ងៃ សម្រាប់ការរស់នៅរបស់ប្រជាពលរដ្ឋ សហគ្រាសធុនតូច និងមធ្យម ព្រមទាំងវិស័យឧស្សាហកម្ម។

កាលពីថ្ងៃទី១៦-១៧ ខែកញ្ញា ឆ្នាំ២០២៦ ក្រុមការងារអង្គភាពលទ្ធកម្ម (អល) នៃគណៈកម្មាធិការលទ្ធកម្ម (គល) ក្រសួងធនធានទឹក និងឧតុនិយម បានដឹកនាំក្រុមការងារអន្តរក្រសួង រួមជាមួយតំណាងក្រសួងសេដ្ឋកិច្ច និងហិរញ្ញវត្ថុ បានចុះពិនិត្យ វាយតម្លៃ ប្រគល់-ទទួល និងបញ្ចប់សុពលភាព សម្រាប់ការងារជំពូក២១ លើគម្រោងចំនួន ០៤ ស្ថិតក្នុងភូមិសាស្ត្រខេត្តពោធិ៍សាត់ បាត់ដំបង និងខេត្តសៀមរាប។

កិច្ចប្រជុំនេះមានការ​ចូលរួមពីអង្គភាពគ្រប់គ្រងគម្រោង ទីប្រឹក្សាបច្ចេកទេសធនាគារអភិវឌ្ឍន៍អាស៊ី (ADB) និងគម្រោង តំណាងនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍ (GDR) នៃក្រសួងសេដ្ឋកិច្ច និងហិរញ្ញវត្ថុ គណៈអភិបាលស្រុក អាជ្ញាធរដែនដី ប្រជាពលរដ្ឋ និងស្ថាប័នពាក់ព័ន្ធជាច្រើនរូប។