ព័ត៌មានក្នុងខេត្ត

ពោធិ៍សាត់៖ ឯកឧត្តម លៀង ពេជ្រ បានចាត់តាំងក្រុមការងារ រួមសហការជាមួយអាជ្ញាធរក្រុង សង្កាត់ស្វាយអាត់ និងភូមិ ចុះពិនិត្យ និងសម្របសម្រួលដោះស្រាយបញ្ហាប្រឈមជាក់ស្តែង ដែលកំពុងបង្កការលំបាកដល់ការធ្វើដំណើររបស់ប្រជាពលរដ្ឋក្នុងមូលដ្ឋាន នៅថ្ងៃទី២៤ ខែកក្កដា ឆ្នាំ២០២៦។ តាមរយៈការចុះអន្តរាគមន៍ និងសម្របសម្រួលភ្លាមៗពីសំណាក់ក្រុមការងារ និងអាជ្ញាធរមូលដ្ឋាន បញ្ហាប្រឈមក្នុងការធ្វើដំណើររបស់ប្រជាពលរដ្ឋ ត្រូវបានដោះស្រាយបានជាស្ថាពរនៅថ្ងៃដដែលនោះ ដោយបានសម្រួលឱ្យការធ្វើដំណើរឡើងវិញប្រកបដោយភាពងាយស្រួល និងសុវត្ថិភាព។ ក្នុងឱកាសនោះដែរ ក្រុមការងារក៏បានសម្តែងនូវការថ្លែងអំណរគុណយ៉ាងជ្រាលជ្រៅចំពោះបងប្អូនប្រជាពលរដ្ឋទាំងអស់ ដែលបានផ្តល់កិច្ចសហការយ៉ាងល្អប្រសើរជាមួយអាជ្ញាធរ ដើម្បីឱ្យដំណើរការដោះស្រាយបញ្ហានេះទទួលបានលទ្ធផលជោគជ័យ និងទាន់ពេលវេលា៕

ពោធិ៍សាត់៖ លោកស្រី មិត្ត សុភាព អភិបាលរង តំណាងលោកអភិបាលស្រុកក្រគរ បានដឹកនាំកម្លាំងចម្រះ ចុះពិនិត្យ និងរៀបចំសណ្តាប់ធ្នាប់ សោភណភាព អនាម័យ និងបរិស្ថាន នៅបរិវេណផ្សារសាមគ្គីក្រគរ និងការិយាល័យអប់រំ យុវជន និងកីឡាស្រុក នៅថ្ងៃទី២៤ ខែកក្កដា ឆ្នាំ២០២៦។ សកម្មភាពនេះ ធ្វើឡើងក្នុងគោលបំណងលើកកម្ពស់សោភណភាពទីប្រជុំជន សម្រួលដល់ការធ្វើដំណើរ និងការលក់ដូររបស់អាជីវករ ព្រមទាំងកាត់បន្ថយការចោលសំរាមគ្មានសណ្តាប់ធ្នាប់ ដើម្បីធានាបាននូវបរិស្ថានស្អាត និងសុខមាលភាពជូនប្រជាពលរដ្ឋក្នុងមូលដ្ឋាន។ ក្នុងឱកាសនោះដែរ ក្រុមការងារក៏បានធ្វើការអប់រំណែនាំ និងអំពាវនាវដល់អាជីវករ និងប្រជាពលរដ្ឋ ឱ្យចូលរួមវេចខ្ចប់ និងទុកដាក់សំរាមឱ្យបានត្រឹមត្រូវ ព្រមទាំងមិនត្រូវលក់ដូររំលោភលើចិញ្ចើមផ្លូវ ឬទ្រូងផ្លូវសាធារណៈឡើយ៕

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំមន្ត្រីជំនាញ និងអាជ្ញាធរពាក់ព័ន្ធ ចុះពិនិត្យផ្ទាល់ និងបញ្ជាការងារអន្តរាគមន៍បូមទឹកសង្គ្រោះស្រូវស្រែរបស់ប្រជាពលរដ្ឋ ដែលកំពុងជួបប្រទះបញ្ហាប្រឈមខ្វះខាតទឹកស្រោចស្រព ស្ថិតក្នុងឃុំមេទឹក និងឃុំមួយចំនួនទៀត ក្នុងស្រុកបាកាន ខេត្តពោធិ៍សាត់ នៅថ្ងៃទី២៤ ខែកក្កដា ឆ្នាំ២០២៦។ ក្នុងឱកាសចុះពិនិត្យនោះ ឯកឧត្តមអភិបាលខេត្ត បានណែនាំឱ្យអាជ្ញាធរមូលដ្ឋាន សហការជាមួយមន្ទីរធនធានទឹក និងឧតុនិយមខេត្ត ញាប់ដៃញាប់ជើងប្រើប្រាស់គ្រប់មធ្យោបាយ និងគ្រឿងចក្រ ដើម្បីបូម និងបង្វែរប្រភពទឹកសង្គ្រោះស្រូវស្រែប្រជាពលរដ្ឋឱ្យបានទាន់ពេលវេលា ជៀសវាងការខូចខាតផលដំណាំ។ ជាមួយគ្នានេះដែរ ឯកឧត្តមបានអំពាវនាវ និងប្រគល់ភារកិច្ចជូនអាជ្ញាធរភូមិ-ឃុំ ឱ្យបន្តតាមដានស្ថានភាពទឹកជាប្រចាំ និងជួយសម្របសម្រួលការបែងចែកទឹកប្រើប្រាស់ឱ្យបានស្មើភាពគ្នា ដើម្បីធានាថាស្រែដែលកំពុងប្រឈមខ្វះទឹកទាំងអស់ ទទួលបានទឹកស្រោចស្រពគ្រប់គ្រាន់៕

ក្នុងឱកាសនោះដែរ ក្រុមការងារជំនាញផលិតកម្មសត្វ និងបសុព្យាបាល បានចុះពិនិត្យទីតាំងចិញ្ចឹមមាន់មេបារបស់កសិករចំនួន ៣គ្រួសារ ដែលកំពុងជួបបញ្ហាមាន់ងាប់។ តាមការសន្និដ្ឋានរបស់មន្ត្រីជំនាញ ករណីនេះបណ្តាលមកពីមេរោគផ្លូវដង្ហើម ដែលបង្កឡើងដោយសារការប្រើប្រាស់អង្កាមទ្រុងគ្មានគុណភាព និងការដឹកជញ្ជូនមាន់មេបាចង្អៀតណែនពេក ធ្វើឱ្យមាន់ចុះខ្សោយ។

ខេត្តពោធិ៍សាត់៖ ក្រុមការងារក្រសួងកសិកម្ម រុក្ខាប្រមាញ់ និងនេសាទ ដឹកនាំដោយ ឯកឧត្តម ប៉ែន ផល្លីកា អនុរដ្ឋលេខាធិការ តំណាង ឯកឧត្ដម ឌិត ទីណា រដ្ឋមន្ត្រីក្រសួងកសិកម្ម បានចុះត្រួតពិនិត្យ និងបង្ក្រាបបទល្មើសនេសាទក្នុងភូមិសាស្ត្រពីឃុំកំពង់លួង ដល់ភូមិកំពង់ថ្គោល ឃុំអន្សារចំបក់ ស្រុកក្រគរ ខេត្ដពោធិ៍សាត់ នៅថ្ងៃទី២៤ ខែកក្កដា ឆ្នាំ២០២៦។ ប្រតិបត្តិការនេះ មានការចូលរួមពីអគ្គនាយកដ្ឋានជលផល ខណ្ឌរដ្ឋបាលជលផលពោធិ៍សាត់ និងកំពង់ធំ គណៈបញ្ជាការឯកភាពរដ្ឋបាលស្រុកក្រគរ កងរាជអាវុធហត្ថ និងកងកម្លាំងប្រតិបត្តិការសឹករងពោធិ៍សាត់។ តាមការសង្កេតឃើញថា ប្រជាបរិស័ទ និងប្រជានេសាទប្រមាណ ៩០% បានចូលរួមគោរពច្បាប់បានយ៉ាងល្អ តែបើទោះបីជាយ៉ាងណា អាជ្ញាធរនៅតែបន្តរកឃើញបទល្មើសមួយចំនួន ដូចជាការលួចដាក់របាំងសាច់អួនក្រឡាល្អិត និងដាក់របាំងលើសប្រវែងកំណត់។ ជាក់ស្តែង នៅចំណុចជ្រោយស្តី កម្លាំងសមត្ថកិច្ចបង្ក្រាបបាន ១ករណី ដោយរឹបអូស និងបំផ្លាញចោលនូវ៖ របាំងសាច់អួនក្រឡាល្អិត ៤ ខ្សែ (ប្រវែង ២៧០ ម៉ែត្រ), លូកងសាច់អួន ៤ មាត់, បង្គោល ៥២ ដើម និងផលត្រី ចាក់លែងចូលបឹងធម្មជាតិវិញចំនួន ២៥ គីឡូក្រាម៕

ក្រសួងមហាផ្ទៃបានរៀបចំសិក្ខាសាលាចែករំលែកបទពិសោធន៍លើ «ការកសាងអង្គភាពផ្តល់សេវាសាធារណៈគំរូ ក្នុងវិស័យអប់រំ និងសុខាភិបាល» ក្រោមអធិបតីភាព ឯកឧត្តម ហ៊ុន ម៉ានី និង ឯកឧត្តមអភិសន្តិបណ្ឌិត ស សុខា ដោយមានអ្នកចូលរួមជាង ៦០០នាក់។

ក្រសួងមហាផ្ទៃបានរៀបចំសិក្ខាសាលាចែករំលែកបទពិសោធន៍លើ «ការកសាងអង្គភាពផ្តល់សេវាសាធារណៈគំរូ ក្នុងវិស័យអប់រំ និងសុខាភិបាល» ក្រោមអធិបតីភាព ឯកឧត្តម ហ៊ុន ម៉ានី និង ឯកឧត្តមអភិសន្តិបណ្ឌិត ស សុខា ដោយមានអ្នកចូលរួមជាង ៦០០នាក់។

ពោធិ៍សាត់៖ លោក ចាន់ វិចិត្រ អភិបាលនៃគណៈអភិបាលស្រុកតាលោសែនជ័យ បានបន្តដឹកនាំក្រុមការងារចុះពិនិត្យស្ថានភាពដំណាំស្រូវរបស់ប្រជាពលរដ្ឋជាក់ស្តែង ដែលកំពុងប្រឈមនឹងការខ្វះខាតទឹកដោយសារ គ្រោះរាំងស្ងួត។ នៅក្នុងឱកាសនោះ លោកអភិបាលស្រុក បានចាត់វិធានការអន្តរាគន៍ជាបន្ទាន់ ដោយបញ្ជាការងារបូម និងបង្វែរប្រភពទឹកបន្ថែមចូលទៅក្នុងស្រែរបស់ប្រជាពលរដ្ឋ ដើម្បីសង្គ្រោះដំណាំស្រូវឱ្យទាន់ពេលវេលា និងកាត់បន្ថយការខូចខាតឱ្យបានច្រើនបំផុត។ ប្រតិបត្តិការចុះសង្គ្រោះស្រូវនេះ បាន និងកំពុងបន្តធ្វើសកម្មភាពយ៉ាងសកម្មនៅក្នុងបណ្តាភូមិមួយចំនួន រួមមាន៖ ភូមិគោករំល, ភូមិព្រៃវាំង, ភូមិបួរច្រេស, ភូមិទួលថ្ម, ភូមិកោះវត្ត, ភូមិសិរីគន្ធា និងភូមិតាលោ។ លោកអភិបាលស្រុក ក៏បានបញ្ជាក់ថានឹងបន្តតាមដានស្ថានភាពធាតុអាកាស និងការផ្គត់ផ្គង់ទឹកជាប្រចាំ ដើម្បីធានាថាស្រែប្រជាពលរដ្ឋទទួលបានទឹកគ្រប់គ្រាន់៕

ឯកឧត្តម បណ្ឌិត ប្រាំង ជលសា បានជួបសំណេះសំណាលជាមួយអ្នកចូលរួមប្រមាណ ៣៥០នាក់ នៅវត្តកោះរំដួល ស្រុកក្រគរ ខេត្តពោធិ៍សាត់ ដើម្បីត្រៀមការងារសម្រាប់ការបោះឆ្នោតក្រុមប្រឹក្សាឃុំ-សង្កាត់ ឆ្នាំ២០២៧។

ពិធីប្រគល់ឧបករណ៍វេជ្ជសាស្ត្រ និងរាវរកសារធាតុវិទ្យុសកម្ម ជូនមន្ទីរសុខាភិបាលខេត្តពោធិ៍សាត់ ដែលជាកិច្ចសហប្រតិបត្តិការរវាង ក្រសួងរ៉ែ និងថាមពល ជាមួយ ទីភ្នាក់ងារ IAEA ដើម្បីពង្រឹងសុវត្ថិភាពវិទ្យុសកម្ម និងសមត្ថភាពព្យាបាលជំងឺជូនប្រជាពលរដ្ឋ។

ឯកឧត្តម ឈុន សុង ប្រធានគណៈចាត់តាំងនៃគណៈកម្មាធិការគណបក្សខេត្ត បានអញ្ជើញជាអធិបតីក្នុង កិច្ចប្រជុំបូកសរុបការងារចាត់តាំងកសាងបក្ស ប្រចាំឆមាសទី១ ឆ្នាំ២០២៦ និងលើកទិសដៅបន្ត ដោយមានការចូលរួមពី ឯកឧត្តម ញឹក សារ៉េត អនុប្រធានគណៈចាត់តាំង ព្រមទាំងមន្ត្រីជំនួយការខេត្ត និងថ្នាក់ដឹកនាំគណៈចាត់តាំង ព្រមទាំងមន្ត្រីព័ត៌មានវិទ្យាគណបក្សក្រុង-ស្រុកទាំង៧។

កិច្ចប្រជុំនេះធ្វើឡើងក្នុងគោលបំណងពិនិត្យ វាយតម្លៃលើលទ្ធផលការងារដែលសម្រេចបានប្រចាំខែ ពិភាក្សាលើបញ្ហាប្រឈម ព្រមទាំងដាក់ចេញនូវទិសដៅការងារបន្ត ដើម្បីពង្រឹងប្រសិទ្ធភាពការងារដឹកនាំ និងការផ្តល់សេវាសាធារណៈជូនប្រជាពលរដ្ឋក្នុងស្រុកឱ្យកាន់តែល្អប្រសើរ។