ព័ត៌មានក្នុងខេត្ត

ពោធិ៍សាត់៖ កិច្ចប្រជុំបង្ហាញគម្រោង «លើកកម្ពស់សិទ្ធអំណាចសហគមន៍ ដើម្បីគាំទ្រដល់ការអភិរក្សជីវចម្រុះ ក្នុងសហគមន៍នេសាទចិនតាយ និងសហគមន៍នេសាទត្រាំពែរនៃប្រទេសកម្ពុជា» កាលពីថ្ងៃសុក្រ ទី១៤ ខែសីហា ឆ្នាំ២០២៦ នៅសាលប្រជុំសាលាស្រុកបាកាន ខេត្តពោធិ៍សាត់។ កិច្ចប្រជុំនេះបានប្រព្រឹត្តទៅក្រោមវត្តមានចូលរួមពី លោក សេង សុងលី នាយរងខណ្ឌរដ្ឋបាលជលផលពោធិ៍សាត់ ព្រមទាំង លោកអភិបាលរងស្រុកបាកាន, លោកនាយកទីចាត់ការផែនការវិនិយោគ, តំណាងមន្ទីរបរិស្ថាន, អង្គការអភិវឌ្ឍន៍នារីខ្មែរ, ក្រុមប្រឹក្សាឃុំមេទឹក, ក្រុមប្រឹក្សាឃុំស្នាមព្រះ និងតំណាងសហគមន៍នេសាទទាំងពីរ សរុបចំនួន ២០នាក់ (ស្រី ៥នាក់)៕

លោក ណារ៉ា ចំរើន អភិបាលនៃគណៈអភិបាលស្រុកកណ្ដៀង បានដឹកនាំលោក លោកស្រី អភិបាលរងស្រុក ព្រមទាំងកម្លាំងសមត្ថកិច្ច និងមន្ត្រីជំនាញពាក់ព័ន្ធ ចុះរៀបចំសណ្ដាប់ធ្នាប់សាធារណៈ និងអនាម័យបរិស្ថានតាមដងផ្លូវ ចាប់ពីចំណុចអធិការដ្ឋាននគរបាលស្រុកកណ្ដៀង រហូតដល់ផ្សារកំពង់រកា និងបន្តចាប់ពីអធិការដ្ឋាននគរបាលស្រុក រហូតដល់វត្តកំពង់ក្រសាំង ស្ថិតក្នុងឃុំកណ្ដៀង ខេត្តពោធិ៍សាត់។

ពោធិ៍សាត់៖ សិស្សានុសិស្សថ្នាក់ទី១២ ទូទាំងស្រុកភ្នំក្រវាញ ខេត្តពោធិ៍សាត់ បានធ្វើដំណើរទស្សនកិច្ចសិក្សាទៅកាន់តំបន់រមណីយដ្ឋានវប្បធម៌ប្រវត្តិសាស្ត្រអង្គរ ក្នុងខេត្តសៀមរាប ក្រោមការឧបត្ថម្ភគាំទ្រយ៉ាងខ្ពង់ខ្ពស់ពី ឯកឧត្តម កែវ រតនៈ និងក្រុមការងាររាជរដ្ឋាភិបាលចុះមូលដ្ឋានស្រុកភ្នំក្រវាញ នៅថ្ងៃទី១៤ ខែសីហា ឆ្នាំ២០២៦។ ដំណើរទស្សនកិច្ចសិក្សានេះ រៀបចំឡើងក្នុងគោលបំណងផ្តល់ឱកាសយ៉ាងប្រពៃដល់ប្អូនៗ ក្មួយៗ សិស្សានុសិស្ស ក្នុងការក្រេបជញ្ជក់ចំណេះដឹងបន្ថែមតាមរយៈបទពិសោធជាក់ស្តែង ដោយបានទស្សនា និងសិក្សាឈ្វេងយល់ដោយផ្ទាល់អំពីតំបន់រមណីយដ្ឋានវប្បធម៌ប្រវត្តិសាស្ត្រដ៏ល្បីល្បាញ ដែលជាកេរមរតកវប្បធម៌ជាតិខ្មែរដ៏មហាសាលនៅក្នុងទឹកដីអង្គរ៕

ពោធិ៍សាត់៖ លោក ចាន់ វិចិត្រ អភិបាល នៃគណៈអភិបាលស្រុកតាលោសែនជ័យ បានដឹកនាំក្រុមការងារចម្រុះចុះបេសកកម្មយ៉ាងសកម្ម ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ស្ថិតនៅក្នុងភូមិសាស្ត្រឃុំតាលោ ស្រុកតាលោសែនជ័យ ខេត្តពោធិ៍សាត់។ ប្រតិបត្តិការនេះធ្វើឡើងក្នុងគោលបំណងពង្រឹងការគ្រប់គ្រង និងការពារធនធានធម្មជាតិ នៅក្នុងមូលដ្ឋានឱ្យមានប្រសិទ្ធភាពខ្ពស់ ព្រមទាំងទប់ស្កាត់រាល់សកម្មភាពល្មើសច្បាប់នានា ដើម្បីថែរក្សាទ្រព្យសម្បត្តិធម្មជាតិ និងបរិស្ថានសម្រាប់ជាប្រយោជន៍សាធារណៈ៕

ពោធិ៍សាត់៖ រដ្ឋបាលស្រុកវាលវែង ក្រោមការដឹកនាំដោយ លោក ប្រាក់ អំចំណាន អភិបាលរង នៃគណៈអភិបាលស្រុកវាលវែង បានដឹកនាំក្រុមការងារចុះអនុវត្តសកម្មភាពដាំកូនដើមក្ងោកបន្ថែម នៅតាមបណ្តោយផ្លូវជាតិលេខ៥៥ ត្រង់ចំណុចលោកយាយម៉ៅ ស្ថិតក្នុងស្រុកវាលវែង ខេត្តពោធិ៍សាត់ កាលពីថ្ងៃទី១៣ ខែសីហា ឆ្នាំ២០២៦។ ក្នុងឱកាសនោះដែរក៏ដូចគ្នា ក្រុមការងារក៏បានអញ្ជើញចុះពិនិត្យមើលស្ថានភាពលូតលាស់នៃកូនដើមក្ងោក ដែលបានដាំរួចនាពេលកន្លងមក នៅតាមបណ្តោយផ្លូវតំបន់ភ្នំ១៥០០ ផងដែរ។ សកម្មភាពនេះធ្វើឡើងក្នុងគោលបំណងលើកកម្ពស់សោភ័ណភាព បង្កើនបៃតងភាព និងទាក់ទាញភ្ញៀវទេសចរដែលធ្វើដំណើរឆ្លងកាត់តំបន់ទេសចរណ៍ដ៏សំខាន់មួយនេះ៕

ក្រុមការងារពិសេសសម្រាប់លុបបំបាត់ជំងឺគ្រុនចាញ់ បានបើកកិច្ចប្រជុំប្រចាំត្រីមាសទី២ ឆ្នាំ២០២៦ ក្រោមអធិបតីភាព លោក ផាយ ឡេង អភិបាលនៃគណៈអភិបាលក្រុង ដើម្បីពិនិត្យវឌ្ឍនភាពការងារ ទិសដៅបន្ត និងជំរុញប្រសិទ្ធភាពនៃការលុបបំបាត់ជំងឺគ្រុនចាញ់នៅក្នុងមូលដ្ឋាន។

ពោធិ៍សាត់៖ លោក ចាន់ វិចិត្រ អភិបាលនៃគណៈអភិបាលស្រុកតាលោសែនជ័យ កាលពីថ្ងៃទី១៣ ខែសីហា ឆ្នាំ២០២៦ បានឱ្យដឹងថា បងប្អូនប្រជាកសិករនៅក្នុងភូមិកោះស្វាយ ឃុំផ្ទះរុង ស្រុកតាលោសែនជ័យ ខេត្តពោធិ៍សាត់ កំពុងសម្តែងនូវក្តីសប្បាយរីករាយយ៉ាងខ្លាំង បន្ទាប់ពីទទួលបានទឹកស្រោចស្រពគ្រប់គ្រាន់ ធ្វើឱ្យទិន្នផលស្រូវទទួលបានផលខ្ពស់ និងលក់បានតម្លៃសមរម្យនៅលើទីផ្សារ។ លោកអភិបាលស្រុកបានគូសបញ្ជាក់អំពីតម្លៃទីផ្សារស្រូវនាពេលបច្ចុប្បន្ន ៖ ស្រូវប្រភេទ «សែនក្រអូប» លក់បានតម្លៃ ១.០៨០ រៀល/គីឡូក្រាម និងស្រូវប្រភេទ «អូមអឹម (OM)» លក់បានតម្លៃ ៩២០ រៀល/គីឡូក្រាម។ តម្លៃ និងទិន្នផលទទួលបាននាពេលនេះ គឺជាតម្លៃមួយដែលបងប្អូនប្រជាពលរដ្ឋអាចទទួលយកបាន និងបង្កើនស្នាមញញឹម ព្រមទាំងជីវភាពធូរធារមួយកម្រិតទៀតជូនគ្រួសារកសិករនៅក្នុងមូលដ្ឋាន៕

ពោធិ៍សាត់៖ លោក ឆាយ គឹមម៉ុង ប្រធានគណៈកម្មាធិការគណបក្សប្រជាជនកម្ពុជាស្រុកបាកាន បានអញ្ជើញចុះជួបសំណេះសំណាល និងសួរសុខទុក្ខបងប្អូនប្រជាពលរដ្ឋជាសមាជិកថ្មី ដែលបានស្ម័គ្រចិត្តចូលរួមរស់ជីវភាពនយោបាយជាមួយគណបក្សប្រជាជនកម្ពុជា ស្ថិតនៅក្នុងមូលដ្ឋានឃុំបឹងខ្នារ ស្រុកបាកាន ខេត្តពោធិ៍សាត់ កាលពីថ្ងៃទី១៣ ខែសីហា ឆ្នាំ២០២៦។ ក្នុងឱកាសនោះ លោកប្រធានគណៈកម្មាធិការគណបក្សស្រុក បានសម្តែងនូវការស្វាគមន៍យ៉ាងកក់ក្តៅ និងថ្លែងអំណរគុណចំពោះសមាជិកថ្មីទាំងអស់ ដែលបានផ្តល់ទំនុកចិត្ត និងជឿជាក់លើការដឹកនាំរបស់គណបក្សប្រជាជនកម្ពុជា ក្នុងការថែរក្សាសន្តិភាព និងការអភិវឌ្ឍប្រទេសជាតិ៕

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យស្ថានភាពស្រូវស្រែ របស់ប្រជាពលរដ្ឋដោយផ្ទាល់ ស្ថិតនៅក្នុងភូមិអូរព្រាល ឃុំមេទឹក ស្រុកបាកាន ខេត្តពោធិ៍សាត់ ដែលកំពុងរងផលប៉ះពាល់ពីគ្រោះរាំងស្ងួត និងខ្វះខាតទឹកស្រោចស្រពធ្ងន់ធ្ងរជាងតំបន់ដទៃទៀត នៅព្រឹកថ្ងៃទី១៤ ខែសីហា ឆ្នាំ២០២៦។ ក្នុងឱកាសអញ្ជើញពិនិត្យស្ថានភាពជាក់ស្តែង ឯកឧត្តមអភិបាលខេត្ត បានចេញបទបញ្ជាជាបន្ទាន់ទៅកាន់មន្ទីរធនធានទឹក និងឧតុនិយមខេត្ត ឱ្យចាត់វិធានការបើកទ្វារទឹកទំនប់ទី៣ ដើម្បីរំដោះ និងបញ្ជូនទឹកមកកាន់តំបន់ដែលកំពុងរងគ្រោះនេះឱ្យបានឆាប់រហ័ស និងទាន់ពេលវេលា សំដៅសង្គ្រោះស្រូវស្រែរបស់ប្រជាពលរដ្ឋឱ្យរួចផុតពីការខូចខាត៕

ពោធិ៍សាត់៖ លោកស្រី ជ័យ ចន្នី អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ រួមជាមួយក្រុមការងារគម្រោង CASDP (ដឹកនាំដោយ លោក អ៊ុក សុធា ប្រធានការិយាល័យផែនការ-គណនេយ្យ) បានអញ្ជើញចូលរួមក្នុងពិធីបើកកញ្ចប់ដេញថ្លៃផ្គត់ផ្គង់ និងដំឡើងប្រព័ន្ធស្រោចស្រព ជូនដល់សហគមន៍កសិកម្មទំនើបម្ទេសដំណាក់ទ្រយឹង ស្ថិតក្នុងភូមិប៊ុនរ៉ានី សែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នៅព្រឹកថ្ងៃទី១៣ ខែសីហា ឆ្នាំ២០២៦។ សម្ភារ និងសេវាកម្មក្នុងកញ្ចប់ដេញថ្លៃរួមមាន៖ ទុយោមេ សម្រាប់ឆ្លើយតបលើផ្ទៃដី ២៥ ហិកតា, ប្រព័ន្ធស្រោចស្រព ចំនួន ២៥ ឈុត, សេវាដំឡើង និងឧបករណ៍ប្រព័ន្ធស្រោចស្រព (ទុយោដំណក់ទឹក និងវ៉ានបិទ-បើកទឹក) ចំនួន ២០ ឈុត។ ក្នុងដំណើរការដេញថ្លៃនេះ មានក្រុមហ៊ុនចំនួន ៤ បានដាក់សំណើប្រកួតប្រជែង ដោយមានការចូលរួមយ៉ាងសកម្មពីសំណាក់តំណាងក្រុមហ៊ុន និងសមាជិកគណៈកម្មការលទ្ធកម្មសហគមន៍សរុបចំនួន ១២ នាក់ (ស្រី ៤ នាក់) ប្រកបដោយភាពតម្លាភាព និងទទួលបានលទ្ធផលជាវិជ្ជមាន៕

សកម្មភាពសំខាន់ៗក្នុងវគ្គបណ្តុះបណ្តាល៖ ផ្តោតលើផលប្រយោជន៍នៃការប្រើប្រាស់ជីកំប៉ុស្តិ៍គោក និងថ្នាំកសិកម្មធម្មជាតិ ស្របតាមស្តង់ដារអនុវត្តកសិកម្មល្អ (GAP) ដើម្បីលើកកម្ពស់គុណភាពបន្លែ សុវត្ថិភាព និងពង្រីកទីផ្សារ, ពន្យល់ណែនាំអំពីធាតុផ្សំ និងវិធីសាស្ត្រផលិតជីកំប៉ុស្តិ៍ និងថ្នាំពុលធម្មជាតិប្រកបដោយសុវត្ថិភាព និងប្រសិទ្ធភាព។ ជាលទ្ធផលសិក្ខាកាមទាំងអស់ទទួលបានចំណេះដឹង និងជំនាញច្បាស់លាស់លើការផលិត និងប្រើប្រាស់ជីកំប៉ុស្តិ៍ និងថ្នាំកសិកម្មធម្មជាតិតាមស្តង់ដារបច្ចេកទេស។ សិក្ខាកាមមានសមត្ថភាពអាចចែករំលែក និងបង្ហាត់បង្ហាញបន្តដល់សមាជិកដទៃទៀត ដែលជួយកាត់បន្ថយការប្រើប្រាស់ជីគីមី និងថ្នាំកសិកម្ម កាត់បន្ថយចំណាយលើថ្លៃដើមផលិត និងបង្កើនប្រាក់ចំណេញផ្នែកសេដ្ឋកិច្ចគ្រួសារ៕

ពោធិ៍សាត់៖ លោក ហ៊ន់ សុវណ្ណ អនុប្រធានមន្ទីរកសិកម្ម រុក្ខាប្រមាញ់ និងនេសាទ និងលោក មាស សេត ប្រធានការិយាល័យក្សេត្រសាស្ត្រ បានអញ្ជើញចុះជួបជុំ និងផ្សព្វផ្សាយដល់កសិករក្នុងសហគមន៍កសិកម្មផ្ទះរុងរុងរឿង ស្ថិតក្នុងឃុំផ្ទះរុង ស្រុកតាលោសែនជ័យ ខេត្តពោធិ៍សាត់ នៅថ្ងៃទី១៣ ខែសីហា ឆ្នាំ២០២៦ ។ ក្នុងជំនួបនោះ ក្រុមការងារបានធ្វើការផ្សព្វផ្សាយយ៉ាងលម្អិតអំពី «នីតិវិធីនៃការរៀបចំសំណើថវិកាសម្រាប់សហគមន៍ ពេលចាប់ផ្តើមសរសេរគម្រោង» ដែលជាកញ្ចប់ថវិកាជំនួយឥតសំណងរបស់អង្គការ FAO អនុវត្តដោយអគ្គនាយកដ្ឋានក្សេត្រសាស្ត្រ (ក្រសួងកសិកម្ម) សហការជាមួយអគ្គនាយកដ្ឋានមូលដ្ឋាន (ក្រសួងបរិស្ថាន)។ ទន្ទឹមនឹងនេះ ក្រុមការងារក៏បានពិភាក្សា និងពិគ្រោះយោបល់លើការងារសំខាន់ៗមួយចំនួនទៀត រួមមាន៖ ការជ្រើសរើសទីតាំងសាលារៀនចំការបង្ហាញ និងការចុះឈ្មោះសមាជិកសហគមន៍ដែលស្ម័គ្រចិត្តចូលរួមវគ្គសិក្សាស្ដីពីផលិតកម្មបន្លែ។ សូមបញ្ជាក់ផងដែរថា សកម្មភាពខាងលើនេះមានប្រជាកសិករចូលរួមសរុបចំនួន ៣០ នាក់ (ស្រី ២១ នាក់) ដោយបរិយាកាសកក់ក្តៅ និងទទួលបានលទ្ធផលយ៉ាងល្អប្រសើរ៕