ព័ត៌មានក្នុងខេត្ត

ពោធិ៍សាត់៖ សង្កាត់រដ្ឋបាលព្រៃឈើព្រងិល បានសហការជាមួយអាជ្ញាធរមូលដ្ឋាន ចុះអនុវត្តសកម្មភាពបោះបង្គោលព្រំប្រទល់ព្រៃសហគមន៍ភូមិព្រងិល បានចំនួន ៨បង្គោល ប្រកបដោយលទ្ធផលល្អប្រសើរ នាថ្ងៃទី៤ ខែកញ្ញា ឆ្នាំ២០២៦ ។ ប្រតិបត្តិការនេះបានដឹកនាំផ្ទាល់ដោយ លោក សន ចាន់ថន អភិបាលរងនៃគណៈអភិបាលស្រុកភ្នំក្រវាញ ដោយមានការចូលរួមពីសំណាក់មន្ត្រីជំនាញសូរិយោដីស្រុក តំណាងក្រុមប្រឹក្សាឃុំព្រងិល មេភូមិព្រងិល មេភូមិអូររំ ព្រមទាំងគណៈកម្មការសហគមន៍ព្រៃឈើភូមិព្រងិល។ សកម្មភាពបោះបង្គោលព្រំប្រទល់នាពេលនេះ ក្នុងគោលបំណងកំណត់ដែនជម្រក និងទំហំព្រៃសហគមន៍ឱ្យបានច្បាស់លាស់ សំដៅបង្កើនប្រសិទ្ធភាពក្នុងការថែរក្សា ការពារ និងទប់ស្កាត់ការរំលោភបំពានដីព្រៃឈើ ខណៈដែលកិច្ចសហការរវាងអាជ្ញាធរដែនដី មន្ត្រីជំនាញ និងសហគមន៍មូលដ្ឋាន បន្តដើរតួនាទីយ៉ាងសំខាន់ក្នុងការគ្រប់គ្រងធនធានធម្មជាតិប្រកបដោយចីរភាព៕

កិច្ចប្រជុំនេះមានការចូលរួមយ៉ាងកុះករពី ក្រុមការងារមន្ទីរកសិកម្មខេត្ត កងកម្លាំងប៉ុស្តិ៍នគរបាលរដ្ឋបាលឃុំអន្លង់រាប អាជ្ញាធរភូមិ ព្រមទាំងថ្នាក់ដឹកនាំ និងសមាជិក-សមាជិកានៃសហគមន៍កសិកម្មទំនើប សរុបចំនួន ៦៨នាក់ (ក្នុងនោះមានស្រ្តីចំនួន ៣៨នាក់) ដើម្បីរួមគ្នាវាយតម្លៃលទ្ធផលការងារ ក៏ដូចជាទិសដៅយុទ្ធសាស្ត្រក្នុងការលើកកម្ពស់ផលិតកម្មកសិកម្មសុវត្ថិភាពក្នុងមូលដ្ឋាន។

ពោធិ៍សាត់៖ លោក ហ៊ន់ សុវណ្ណ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ បានអញ្ជើញចូលរួមកិច្ចប្រជុំពិភាក្សាលើ «ការរៀបចំផែនការសកម្មភាព និងផែនការយុទ្ធសាស្ត្រអភិវឌ្ឍន៍សម្រាប់ឆ្នាំ២០២៧» របស់អង្គការអភិវឌ្ឍន៍សំឡេងសហគមន៍ (BCV) នៅថ្ងៃសុក្រ ទី៤ ខែកញ្ញា ឆ្នាំ២០២៦ ។ កិច្ចប្រជុំនេះបានប្រព្រឹត្តទៅនៅសាលប្រជុំនៃមន្ទីរធនធានទឹក និងឧតុនិយមខេត្តពោធិ៍សាត់ ដោយមានសមាសភាពចូលរួមយ៉ាងច្រើនកុះករពីតំណាងស្ថាប័នពាក់ព័ន្ធ រួមមាន៖ មន្ត្រីជំនាញនៃមន្ទីរធនធានទឹក មន្ទីរកសិកម្ម ខណ្ឌរដ្ឋបាលព្រៃឈើ ព្រមទាំងអាជ្ញាធរមូលដ្ឋានដូចជា ក្រុមប្រឹក្សាឃុំ មេភូមិ និងអនុភូមិ។ បន្ថែមពីនេះ កម្មវិធីក៏មានការចូលរួមយ៉ាងសកម្មពីសំណាក់តំណាងសហគមន៍កសិករប្រើប្រាស់ទឹក សហគមន៍ព្រៃឈើ សហគមន៍កសិកម្ម និងក្រុមយុវជនក្នុងតំបន់ ដើម្បីរួមគ្នាចែករំលែកមតិយោបល់ បញ្ហាប្រឈម និងធាតុចូលសំខាន់ៗ ក្នុងការរៀបចំផែនការយុទ្ធសាស្ត្រឱ្យឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋក្នុងសហគមន៍សម្រាប់ឆ្នាំ២០២៧ ខាងមុខប្រកបដោយប្រសិទ្ធភាព និងចីរភាព៕

លោក សំ ណារិទ្ធិ អភិបាលរងខេត្ត និងជាអនុប្រធានប្រចាំការ ស.ស.យ.ក ខេត្តពោធិ៍សាត់ បានដឹកនាំក្រុមគ្រួសារសហភាពសហព័ន្ធយុវជនកម្ពុជា (ស.ស.យ.ក) ខេត្ត ចូលទស្សនាពិព័រណ៍រូបភាពមិនអចិន្ត្រៃយ៍ ដែលបានរៀបចំឡើងនៅសារមន្ទីរខេត្តពោធិ៍សាត់ នាថ្ងៃទី០៤ ខែ កញ្ញា ឆ្នាំ២០២៦ ។

ពោធិ៍សាត់៖ ឯកឧត្តមបណ្ឌិត ទី ថានី អ្នកតំណាងរាស្ត្រមណ្ឌលខេត្តពោធិ៍សាត់ និងជាប្រធានក្រុមការងារមន្ត្រីរាជការ គ្រូបង្រៀន និងយុវជន បានអញ្ជើញជាអធិបតីក្នុងពិធីជួបសំណេះសំណាលជាមួយអាណាព្យាបាល និងសិស្សានុសិស្ស ដែលទើបទទួលបានលទ្ធផលជោគជ័យក្នុងការប្រឡងបញ្ចប់មធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៥-២០២៦ នៅវិទ្យាល័យបាកាន នារសៀលថ្ងៃទី៤ ខែកញ្ញា ឆ្នាំ២០២៦ ។ នៅក្នុងឱកាសដ៏រីករាយនោះ ឯកឧត្តមបណ្ឌិត បានសម្តែងនូវការអបអរសាទរយ៉ាងកក់ក្តៅ និងកោតសរសើរចំពោះខិតខំប្រឹងប្រែងរបស់ប្អូនៗសិស្សានុសិស្សទាំងអស់ ដែលបានជួយឱ្យទទួលបានជោគជ័យក្នុងការសិក្សា ព្រមទាំងបានថ្លែងអំណរគុណដល់លោកគ្រូ អ្នកគ្រូ និងអាណាព្យាបាល ដែលបានយកចិត្តទុកដាក់គាំទ្រ និងអប់រំបណ្តុះបណ្តាលកន្លងមក។ ជាមួយគ្នានេះ ឯកឧត្តមក៏បានផ្តល់នូវមតិផ្តាំផ្ញើ និងការណែនាំល្អៗដល់ប្អូនៗសិស្សានុសិស្ស ឱ្យបន្តខិតខំរៀនសូត្រនៅកម្រិតឧត្តមសិក្សា និងការបណ្តុះបណ្តាលជំនាញបច្ចេកទេសបន្ថែមទៀត ដើម្បីក្រសោបយកចំណេះដឹងរឹងមាំ សម្រាប់យកទៅអភិវឌ្ឍសមត្ថភាពខ្លួនឯង គ្រួសារ និងចូលរួមចំណែកកសាងប្រទេសជាតិឱ្យកាន់តែរីកចម្រើននាពេលអនាគត៕

ពោធិ៍សាត់៖ លោក ងួន ប៉ោសេង អភិបាលរងនៃគណៈអភិបាលខេត្ត តំណាង ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញដឹកនាំកិច្ចប្រជុំស្តីពី «ការស្នើសុំអនុញ្ញាតប្រើប្រាស់ទីតាំងសាធារណៈ ដើម្បីសាងសង់ស្ថានីយសាកថាមពលយានយន្តអគ្គិសនី (AVATAR EV Charging Station)» នៅសាលាខេត្តពោធិ៍សាត់ នារសៀលថ្ងៃទី៤ ខែកញ្ញា ឆ្នាំ២០២៦នេះ។ កិច្ចប្រជុំនេះ មានការអញ្ជើញចូលរួមពីសំណាក់ លោកអនុប្រធានមន្ទីរពាក់ព័ន្ធ លោកអភិបាលរងក្រុង-ស្រុក ព្រមទាំងមន្ត្រីជំនាញជាច្រើនរូបទៀត។ អង្គប្រជុំបានធ្វើការពិភាក្សា និងសិក្សាលម្អិតអំពីលទ្ធភាព បច្ចេកទេស និងទីតាំងសាធារណៈសមស្រប ដើម្បីរៀបចំដំឡើងស្ថានីយសាកថាមពលយានយន្តអគ្គិសនីនេះ ឱ្យមានសុវត្ថិភាព និងសម្រួលដល់ការប្រើប្រាស់របស់ប្រជាពលរដ្ឋ។ ការរៀបចំឱ្យមានស្ថានីយសាកថាមពលយានយន្តអគ្គិសនី (EV) នេះ គឺជាជំហានដ៏សំខាន់មួយក្នុងការគាំទ្រគោលនយោបាយប្រើប្រាស់ថាមពលបៃតង និងចូលរួមកាត់បន្ថយការភាយឧស្ម័នពុលទៅក្នុងបរិស្ថាន នៅក្នុងខេត្តពោធិ៍សាត់៕

ក្រោមកិច្ចចង្អុលការដឹកនាំផ្ទាល់របស់ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដាក់ផែនការ ឱ្យអាជ្ញាធរខេត្ត និងក្រុមការងារបច្ចេកទេសជំនាញ ក្នុងការអនុវត្តគម្រោងកែលម្អសោភណភាពក្រុង ដោយផ្ដោតលើការជួសជុល និងផ្លាស់ប្តូរការ៉ូឡាថ្មីនៅលើកំណាត់ផ្លូវលេខ១០១ ស្ថិតនៅ មុខកោះសំពៅមាស នៅថ្ងៃទី០៤ ខែកញ្ញា ឆ្នាំ២០២៦។

វគ្គផ្សព្វផ្សាយដែលប្រព្រឹត្តទៅពេញមួយថ្ងៃនេះ មានការអញ្ជើញចូលរួមពីសំណាក់គណៈអចិន្ត្រៃយ៍គណបក្សក្រុង គណៈចាត់តាំងគណបក្សក្រុង ប្រធានសាខាបក្សចំណុះក្រុង មន្ត្រីទទួលបន្ទុកការងារចាត់តាំង ប្រធានគណៈកម្មាធិការគណបក្សសង្កាត់ទាំង៧ ព្រមទាំងមន្ត្រីទទួលបន្ទុកការងារចាត់តាំង និងព័ត៌មានវិទ្យា (IT) ថ្នាក់ក្រុង-សង្កាត់ សរុបប្រមាណ ៦២នាក់ (ស្រី ២២នាក់)។

ពោធិ៍សាត់៖ លោក លឹម វុទ្ធី ប្រធានមន្ទីរអប់រំ យុវជន និងកីឡា ខេត្តពោធិ៍សាត់ បានអញ្ជើញចុះពិនិត្យមើលដំណើរការនៃការធ្វើតេស្តប្រឡងជ្រើសរើសសិស្សានុសិស្សឱ្យចូលរៀនថ្នាក់ទី១០ នៃកម្មវិធី «សាលារៀនជំនាន់ថ្មី» ដោយផ្ទាល់ នៅក្នុងបរិវេណវិទ្យាល័យពោធិ៍សាត់ នាថ្ងៃទី៤ ខែកញ្ញា ឆ្នាំ២០២៦។ នៅក្នុងសកម្មភាពចុះពិនិត្យនេះ ក៏មានការអញ្ជើញចូលរួមសង្កេតការណ៍យ៉ាងស្និទ្ធស្នាលពីសំណាក់ក្រុមការងារអង្គការ ខេប (KAPE) ដែលជាតំណាងកម្មវិធីសាលារៀនជំនាន់ថ្មី ព្រមទាំងមានការចូលរួមពីសំណាក់អាណាព្យាបាលសិស្ស និងតំណាងសហគមន៍ផងដែរ ដើម្បីធានាបាននូវភាពត្រឹមត្រូវ តម្លាភាព និងយុត្តិធម៌ក្នុងការប្រឡង។ ការចុះពិនិត្យ និងតាមដានយ៉ាងយកចិត្តទុកដាក់នេះ បានបង្ហាញពីការប្តេជ្ញាចិត្តយ៉ាងមុតមាំរបស់មន្ទីរអប់រំ យុវជន និងកីឡា ខេត្តពោធិ៍សាត់ ក្នុងការលើកកម្ពស់គុណភាពអប់រំ និងជំរុញការអនុវត្តកម្មវិធីសិក្សាបែបទំនើប ដើម្បីបណ្តុះបណ្តាលធនធានមនុស្សក្នុងខេត្តឱ្យមានសមត្ថភាពខ្ពស់ ឆ្លើយតបទៅនឹងតម្រូវការអភិវឌ្ឍន៍នាពេលបច្ចុប្បន្ន និងអនាគត៕

ពោធិ៍សាត់៖ កិច្ចប្រជុំអាណត្តិប្រចាំខែ ក្រោមអធិបតីភាពដ៏ខ្ពង់ខ្ពស់របស់ លោក ទឹម សារិន ប្រធានគណបក្សស្រុកក្រគរ នាព្រឹកថ្ងៃសុក្រ ទី៤ ខែកញ្ញា ឆ្នាំ២០២៦ គណៈកម្មាធិការគណបក្សស្រុកក្រគរ ខេត្តពោធិ៍សាត់។ កិច្ចប្រជុំនេះមានការអញ្ជើញចូលរួមពីសំណាក់ លោក លោកស្រី ជាសមាជិក សមាជិកាគណៈកម្មាធិការបក្សស្រុក ក្រុមការងារផ្នែកព័ត៌មានវិទ្យា (IT) ព្រមទាំងសមាសភាពពាក់ព័ន្ធជាច្រើនរូបទៀត។ អង្គប្រជុំបានផ្តោតលើការពិនិត្យ សរុបបូកសរុបលទ្ធផលការងារដែលសម្រេចបាននាពេលកន្លងមក និងការដាក់ចេញនូវទិសដៅការងារសំខាន់ៗសម្រាប់អនុវត្តបន្ត។ ជាមួយគ្នានេះ វត្តមានរបស់ផ្នែក IT និងសមាសភាពពាក់ព័ន្ធ ក្នុងកិច្ចប្រជុំនេះ ក៏បានឆ្លុះបញ្ចាំងពីការយកចិត្តទុកដាក់លើការកសាង និងពង្រឹងសមត្ថភាពការងារបច្ចេកវិទ្យាព័ត៌មាន ដើម្បីឆ្លើយតបទៅនឹងការវិវត្តនៃសង្គមឌីជីថល និងបង្កើនប្រសិទ្ធភាពក្នុងការផ្សព្វផ្សាយព័ត៌មានបក្សឱ្យកាន់តែទូលំទូលាយ និងទាន់ហេតុការណ៍៕

មន្ទីរសាធារណការ និងដឹកជញ្ជូនខេត្តពោធិ៍សាត់ បានរៀបចំវគ្គផ្សព្វផ្សាយស្តីពី អនុសញ្ញាស៊ី-ដ (CEDAW) អនុសាសន៍ ១២ចំណុចរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងច្បាប់ពាក់ព័ន្ធមួយចំនួន នាថ្ងៃទី០៤ ខែកញ្ញា ឆ្នាំ២០២៦។

ពោធិ៍សាត់៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ នាព្រឹកថ្ងៃទី៤ ខែកញ្ញា ឆ្នាំ២០២៦ បានអញ្ជើញចុះពិនិត្យមើលកូនឈើ និងដើមផ្កាជាច្រើនប្រភេទ ដែលជាអំណោយផ្ផ្តល់ជូនជាបន្តបន្ទាប់ពីសំណាក់ក្រសួងបរិស្ថាន សម្រាប់យកមកដាំលម្អ និងបង្កើនគម្របបៃតងក្នុងខេត្តនាពេលខាងមុខ។ នៅក្នុងឱកាសនោះដែរ ឯកឧត្តមក៏បានអញ្ជើញពិនិត្យមើលការច្នៃផលិតលូតូចៗសម្រាប់ដាំផ្កា ដើម្បីត្រៀមរៀបចំលម្អតាមទីសាធារណៈ និងដងផ្លូវនានា ឱ្យកាន់តែមានសោភ័ណភាព និងទាក់ទាញ។ ឯកឧត្តម អភិបាលខេត្ត ក៏បានសម្តែងនូវក្តីរំភើប និងរំលឹកពីអនុស្សាវរីយ៍កាលពី ១៦ឆ្នាំមុន ពេលដែលឯកឧត្តមកំពុងបំពេញតួនាទីជានាយករដ្ឋបាលសាលាខេត្តពោធិ៍សាត់ ដោយបានដាំដើមឈើមួយដើមដោយផ្ទាល់ដៃ ទុកជាអនុស្សាវរីយ៍នៅក្នុងបរិវេណសាលាខេត្ត។ មកដល់ពេលនេះ ដើមឈើនោះបានលូតលាស់ធំធាត់ ផ្តល់ម្លប់យ៉ាងត្រជាក់ត្រជុំ និងជាសាក្សីនៃស្មារតីស្រឡាញ់ធម្មជាតិដែលបានបណ្តុះតាំងពីយូរណាស់មកហើយ។ ការចុះពិនិត្យ និងការរៀបចំផែនការដាំដើមឈើបន្ថែមនេះ បានឆ្លុះបញ្ចាំងពីការយកចិត្តទុកដាក់ខ្ពស់របស់រដ្ឋបាលខេត្តពោធិ៍សាត់ ក្នុងការអភិវឌ្ឍក្រុងឱ្យក្លាយជាទីក្រុងបៃតង មានបរិស្ថានស្អាត និងខ្យល់អាកាសបរិសុទ្ធ សម្រាប់ប្រជាពលរដ្ឋ និងភ្ញៀវទេសចរ៕