ព័ត៌មានក្នុងខេត្ត

ពោធិ៍សាត់៖ ឯកឧត្ដម ខូយ រីដា អភិបាលខេត្តពោធិ៍សាត់ បានអញ្ជើញចុះពិនិត្យស្ថានភាពទឹកស្ទឹងពោធិ៍សាត់ នៃប្រឡាយក្បាលហុង ក្នុងភូមិសាស្ត្រឃុំវាល ឃុំកោះជុំ ឃុំស្វាយលួង ស្រុកកណ្តៀង និងសង្កាត់ផ្ទះព្រៃ ក្រុងពោធិ៍សាត់ ដែលប្រជាពលរដ្ឋកំពុងជួបប្រទះការខ្វះខាតទឹកស្រោចស្រពដំណាំស្រូវ នារសៀលថ្ងៃទី២០ ខែកក្កដា ឆ្នាំ២០២៦។ ដើម្បីដោះស្រាយការលំបាកចំពោះមុខនេះ ឯកឧត្តមអភិបាលខេត្ត បានបញ្ជាឱ្យមន្ទីរធនធានទឹក និងឧតុនិយមខេត្ត ដាក់ម៉ាស៊ីនបូមទឹកចំនួន ៣គ្រឿង ដើម្បីអន្តរាគមន៍បូមទឹកជួយសង្គ្រោះស្រូវរបស់ប្រជាពលរដ្ឋភ្លាមៗ ដោយមានការចូលរួមសហការពីអាជ្ញាធរស្រុក ឃុំ និងប្រជាពលរដ្ឋនៅក្នុងមូលដ្ឋានផងដែរ៕

កិច្ចប្រជុំបូកសរុបការងារនេះ ត្រូវត្រៀមបង្ការជួយអន្តរាគមន៍និងឆ្លើយតបឲ្យបានទាន់ពេលវេលាដល់ជនងាយរងគ្រោះដោយគ្រោះធម្មជាតិតែងកើតមានជាបន្តបន្ទាប់ និងត្រូវយកចិត្តទុកដាក់ចុះអប់រំ ផ្សព្វផ្សាយដល់ប្រជាពលរដ្ឋបង្កើនការយល់ដឹងអំពីជំងឺឆ្លងនិងជំងឺមិនឆ្លង ព្រមទាំងករណីគ្រោះថ្នាក់ចរាចរណ៍ លើកកម្ពស់សមត្ថភាពមន្ត្រី និងយុវជនស្ម័គ្រចិត្តនៅតាមគ្រឹះស្ថានសិក្សា និង សហគមន៍ ដើម្បីក្លាយជាប្រតិបត្តិករមិនអាចខ្វះបានក្នុងការបំពេញការងារមនុស្សធម៌។

ពោធិ៍សាត់៖ លោកជំទាវ អាំង សុជាតា ខូយរីដា ប្រធានកិត្តិយសសាខាសមាគមនារីខេត្ត និងលោកជំទាវ ឈឹម ស៊ីណា ប្រធានគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តពោធិ៍សាត់ ព្រមទាំងថ្នាក់ដឹកនាំ និងសមាជិកា បាននាំយកទៀនចំណាំព្រះវស្សា និងទេយ្យទានជាច្រើនមុខ ទៅវេរប្រគេនព្រះសង្ឃដែលគង់ចាំព្រះវស្សានៅវត្តសុវណ្ណស្លាកែត ស្ថិតក្នុងស្រុកក្រគរ ខេត្តពោធិ៍សាត់ នាថ្ងៃទី២០ ខែកក្កដា ឆ្នាំ២០២៦។ ក្នុងឱកាសដ៏មានសទ្ធាជ្រះថ្លានេះ លោកជំទាវ អាំង សុជាតា ខូយរីដា បានមានប្រសាសន៍បញ្ជាក់ថា ការប្រគេនទៀនវស្សា និងទេយ្យទាននេះ ធ្វើឡើងដើម្បីគោរពតាមទំនៀមទម្លាប់ប្រពៃណីព្រះពុទ្ធសាសនា ព្រមទាំងដើម្បីឧទ្ទិសកុសលផលបុណ្យដ៏ថ្លៃថ្លា ជូនដល់ដួងវិញ្ញាណក្ខន្ធវីរកងទ័ព ដែលបានពលីជីវិតក្នុងការការពារបូរណភាពទឹកដីកម្ពុជាផងដែរ៕

នៅក្នុងឱកាសនោះ លោកជំទាវ អាំង សុជាតា ខូយរីដា បានមានប្រសាសន៍ថា ការនាំយកទេយ្យទានមកប្រគេនព្រះសង្ឃនាពេលនេះ គឺដើម្បីចូលរួមទ្រទ្រង់ព្រះពុទ្ធសាសនា និងសម្រាលការលំបាករបស់ព្រះសង្ឃក្នុងរដូវវស្សា ជាពិសេសគឺដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធវីរកងទ័ព ដែលបានពលីជីវិតដើម្បីការពារបូរណភាពទឹកដី ព្រមទាំងបន់ស្រន់សុំសេចក្តីសុខ និងកម្លាំងកាយចិត្តមាំមួនជូនដល់កងទ័ពដែលកំពុងឈរជើងនៅតាមព្រំដែនផងដែរ។

ពោធិ៍សាត់៖ លោកជំទាវ មាន សំអាន ប្រធានគណៈកម្មការទី៨ នៃព្រឹទ្ធសភា បានដឹកនាំគណៈប្រតិភូចុះជួបពិភាក្សាការងារជាមួយរដ្ឋបាលខេត្តពោធិ៍សាត់ ដែលដឹកនាំដោយ ឯកឧត្តម ខូយ រីដា អភិបាលខេត្ត ព្រមទាំងថ្នាក់ដឹកនាំមន្ទីរ-អង្គភាពពាក់ព័ន្ធ នាព្រឹកថ្ងៃចន្ទ ទី២០ ខែកក្កដា ឆ្នាំ២០២៦ នេះ។ កិច្ចប្រជុំដែលធ្វើឡើងនៅសាលប្រជុំទេពឧកញ៉ា ឃ្លាំង មឿង នៃសាលាខេត្តពោធិ៍សាត់នេះ មានគោលបំណងសំខាន់ដើម្បីស្វែងយល់ពីវឌ្ឍនភាព បញ្ហាប្រឈម វិធានការដោះស្រាយ និងចក្ខុវិស័យទៅថ្ងៃអនាគតលើវិស័យសំខាន់ៗ ដែលស្ថិតក្រោមសមត្ថកិច្ចរបស់គណៈកម្មការទី៨ រួមមាន៖ វិស័យសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៅក្នុងភូមិសាស្ត្រខេត្តពោធិ៍សាត់៕

ខេត្តពោធិ៍សាត់៖ ក្រឡែកមកមើលទិដ្ឋភាពដ៏ត្រកាល និងគួរឱ្យគយគន់ នៃស្ពានអាកាសឆ្លងកាត់ស្ទឹងពោធិ៍សាត់ និងផ្លូវវាងក្រុងពោធិ៍សាត់ ដែលកំពុងតែបង្ហាញរូបរាងយ៉ាងស្រស់បំព្រង។ សមិទ្ធផលហេដ្ឋារចនាសម្ព័ន្ធថ្មីដ៏ធំធេងនេះ មិនត្រឹមតែជួយសម្រួលដល់ការធ្វើដំណើរ បន្ធូរបន្ថយការកកស្ទះចរាចរណ៍ និងជំរុញសេដ្ឋកិច្ចនៅក្នុងខេត្តប៉ុណ្ណោះទេ ប៉ុន្តែថែមទាំងបានលើកកម្ពស់សោភ័ណភាពក្រុងពោធិ៍សាត់ ឱ្យកាន់តែមានភាពទាក់ទាញ និងរស់រវើក គួរជាទីមោទនៈសម្រាប់ប្រជាពលរដ្ឋក្នុងមូលដ្ឋាន ក៏ដូចជាអ្នកដំណើរឆ្លងកាត់ផងដែរ៕

ខេត្តពោធិ៍សាត់៖ លោក លាង ទិតដ្ឋាន ប្រធានមន្ទីរព័ត៌មានខេត្តពោធិ៍សាត់ បានដឹកនាំកិច្ចប្រជុំស្តីពីការរៀបចំផែនការ និងបែងចែកភារកិច្ចមន្ត្រីចុះតាមមូលដ្ឋាន ដើម្បីស្រង់ស្ថិតិប្រជាពលរដ្ឋដែលត្រូវធ្វើ និងបន្តសុពលភាពអត្តសញ្ញាណប័ណ្ណសញ្ជាតិខ្មែរ នៅភូមិជំរុំសៀម សង្កាត់លលកស ក្រុងពោធិ៍សាត់ នាព្រឹកថ្ងៃទី២០ ខែកក្កដា ឆ្នាំ២០២៦។ ក្នុងឱកាសនោះ លោកប្រធានមន្ទីរបានណែនាំដល់មន្ត្រីទាំងអស់ ត្រូវអនុវត្តការងារប្រកបដោយការទទួលខុសត្រូវខ្ពស់ និងត្រូវសហការល្អជាមួយអាជ្ញាធរមូលដ្ឋាន។ បន្ថែមលើនេះ ត្រូវខិតខំផ្សព្វផ្សាយឱ្យប្រជាពលរដ្ឋបានយល់ដឹងពីសារៈសំខាន់នៃការធ្វើអត្តសញ្ញាណប័ណ្ណ ដើម្បីធានាបាននូវភាពត្រឹមត្រូវនៃទិន្នន័យ ងាយស្រួលដល់ពលរដ្ឋយកទៅប្រើប្រាស់ក្នុងសង្គម ក៏ដូចជាប្រើប្រាស់សម្រាប់ការបោះឆ្នោតនាពេលខាងមុខប្រកបដោយប្រសិទ្ធភាពខ្ពស់៕

ខេត្តពោធិ៍សាត់៖ នៅក្នុងចុងសប្តាហ៍នេះ ក្រុមការងារគណបក្សប្រជាជនកម្ពុជាចុះជួយឃុំស្យា បានសហការ និងសម្របសម្រួលកម្មវិធីគ្រូពេទ្យស្ម័គ្រចិត្តរបស់ ឯកឧត្តម កែវ រតនៈ ដើម្បីចុះពិនិត្យ និងព្យាបាលជំងឺជូនបងប្អូនប្រជាពលរដ្ឋនៅក្នុងមូលដ្ឋានដោយឥតគិតថ្លៃ។ នៅក្នុងសកម្មភាពមនុស្សធម៌នេះ ក្រុមគ្រូពេទ្យបានធ្វើការពិនិត្យ និងផ្តល់សេវាព្យាបាលជូនប្រជាពលរដ្ឋក្នុងឃុំស្យា សរុបចំនួន ២១៧ នាក់ (ក្នុងនោះមានស្ត្រីចំនួន ១២៧ នាក់)។ ការចុះជួយផ្ទាល់នេះ បានបង្ហាញពីការយកចិត្តទុកដាក់ខ្ពស់លើសុខុមាលភាព និងជួយសម្រាលបន្ទុកជីវភាពរបស់ប្រជាពលរដ្ឋនៅតាមសហគមន៍បានមួយកម្រិតធំ៕

បិទការប្រកួតកីឡាបាល់ទាត់ដណ្ដើមពានរង្វាន់យុវជន អាយុក្រោម១៨ឆ្នាំ ប្រចាំឆ្នាំ២០២៦ ដើម្បីលើកកម្ពស់សុខភាព បង្កើតមិត្តភាព សាមគ្គីភាព និងជួយឱ្យយុវជនជៀសឆ្ងាយពីគ្រឿងញៀន ព្រមទាំងបានអញ្ជើញប្រគល់ពាន និងមេដាយជូនដល់ក្រុមជ័យលាភីផងដែរ។

ពោធិ៍សាត់៖ នាពេលចុងសប្តាហ៍នេះ នៅទីស្នាក់ការគណបក្សឃុំអន្លង់ត្នោត លោក ង៉ែត សុខន ប្រធានក្រុមការងារចុះជួយឃុំអន្លង់ត្នោត និងឃុំវាល បានអញ្ជើញជួបសំណេះសំណាល ព្រមទាំងចែករំលែកគន្លឹះសំខាន់ៗជូនដល់សិស្សានុសិស្សថ្នាក់ទី១២ ក្នុងឃុំអន្លង់ត្នោត ដើម្បីត្រៀមលក្ខណៈប្រឡងសញ្ញាប័ត្រមធ្យមសិក្សាទុតិយភូមិ (Bac II) ខាងមុខនេះ ឱ្យទទួលបានលទ្ធផលជោគជ័យ និងនិទ្ទេសល្អៗ។ បន្ទាប់មក លោកប្រធានក្រុមការងារ ក៏បានបន្តដំណើរចុះជួបសំណេះសំណាល និងសួរសុខទុក្ខដោយផ្ទាល់ជាមួយបងប្អូនអាជីវករ ដែលកំពុងលក់ដូរនៅក្នុងផ្សារសាមគ្គីក្រគរ ស្ថិតក្នុងឃុំអន្លង់ត្នោត ស្រុកក្រគរ ផងដែរ៕

ពោធិ៍សាត់៖ ស្របតាមការណែនាំរបស់ ឯកឧត្តម កែវ រតនៈ, ឯកឧត្តមបណ្ឌិត ប្រាំង ជលសា ប្រធានក្រុមការងារចុះជួយស្រុកក្រគរ និងស្រុកកណ្តៀង បានឧបត្ថម្ភ និងនាំយកកូនឈើហូបផ្លែចំនួន ២,៧៨៧ដើម ចែកជូនប្រជាពលរដ្ឋក្នុងឃុំកញ្ជរ យកទៅដាំដុះតាមខ្នងផ្ទះ។ សូមបញ្ជាក់ថា នេះជាលើកទី៣ហើយ ដែលក្រុមការងារបានចុះចែកកូនឈើជូនពលរដ្ឋ ដោយសរុបទាំង៣លើក មានចំនួនជិត ៨,០០០ដើម ក្នុងគោលបំណងរួមចំណែកបង្កើតគម្របបៃតង សម្រស់បរិស្ថាន និងជួយជម្រុញសេដ្ឋកិច្ចគ្រួសាររបស់ប្រជាពលរដ្ឋក្នុងមូលដ្ឋាន៕

ពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញចុះពិនិត្យស្ថានភាពទំនប់បង្ហៀរទឹកឈើតោក ស្ថិតក្នុងឃុំសន្ទ្រែ ស្រុកភ្នំក្រវាញ ដើម្បីវាយតម្លៃពីស្ថានភាពទឹក និងត្រៀមលក្ខណៈអន្តរាគមន៍គ្រោះធម្មជាតិផ្សេងៗ។ ការចុះពិនិត្យនេះ ក៏ធ្វើឡើងក្នុងគោលបំណងធានាដល់ការផ្គត់ផ្គង់ទឹកស្អាតសម្រាប់ការរស់នៅ និងការបង្កបង្កើនផលកសិកម្មរបស់ប្រជាពលរដ្ឋនៅក្នុងតំបន់នោះឱ្យបានគ្រប់គ្រាន់ផងដែរ៕