ព័ត៌មានក្នុងខេត្ត

ពោធិ៍សាត់៖ លោក ក្រូច សុខុន អភិបាលរងស្រុក តំណាង លោកអភិបាលនៃគណៈអភិបាលស្រុកក្រគរ បានអញ្ជើញដឹកនាំកិច្ចប្រជុំស្តីពីការងារសន្តិសុខ សណ្តាប់ធ្នាប់សាធារណៈ របៀបរៀបរយ និងអនាម័យបរិស្ថាន ព្រមទាំងសម្របសម្រួលតាមការស្នើសុំអន្តរាគមន៍ពីក្រុមហ៊ុនតំបន់សេដ្ឋកិច្ចពិសេសពោធិ៍សាត់ ស្ថិតនៅសាលាឃុំស្នាអន្សា ស្រុកក្រគរ ខេត្តពោធិ៍សាត់ នារសៀលថ្ងៃទី២៣ ខែកក្កដា ឆ្នាំ២០២៦។ កិច្ចប្រជុំនេះ រៀបចំឡើងក្នុងគោលបំណងពង្រឹងកិច្ចសហការ រក្សាសន្តិសុខ សុវត្ថិភាព និងលើកកម្ពស់បរិស្ថានជុំវិញតំបន់សេដ្ឋកិច្ចពិសេស ព្រមទាំងឆ្លើយតបចំពោះសំណើអន្តរាគមន៍ផ្សេងៗ ដើម្បីសម្រួលដល់កិច្ចប្រតិបត្តិការ និងការវិនិយោគនៅក្នុងមូលដ្ឋានឃុំស្នាអន្សា ឱ្យកាន់តែមានរបៀបរៀបរយ និងប្រសិទ្ធភាពខ្ពស់៕

ពោធិ៍សាត់៖ លោក វង់ រ៉ាវី អភិបាលស្រុកស្តីទី និងលោក ឱន សទ្ធា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តពោធិ៍សាត់ បានអញ្ជើញចូលរួមសម្រុះសម្រួល និងដោះស្រាយករណីទំនាស់ព្រំដី រវាងឈ្មោះ សួស សុវណ្ណរិទ្ធ និងប្រជាពលរដ្ឋចំនួន ២៣គ្រួសារ ស្ថិតនៅក្នុងឃុំសំរោង ស្រុកភ្នំក្រវាញ ខេត្តពោធិ៍សាត់ នាព្រឹកថ្ងៃទី២៣ ខែកក្កដា ឆ្នាំ២០២៦។ ការចុះសម្រុះសម្រួលនេះ ធ្វើឡើងក្នុងគោលបំណងស្វែងរកដំណោះស្រាយដោយសន្តិវិធី និងផ្តល់ភាពយុត្តិធម៌ជូនភាគីទាំងសងខាង ស្របតាមនីតិវិធីច្បាប់ ដើម្បីបញ្ចប់ទំនាស់ព្រំដី និងរក្សាបាននូវសុខដុមរមនាក្នុងសហគមន៍មូលដ្ឋាន៕

ពោធិ៍សាត់៖ សាលប្រជុំសាលាស្រុកវាលវែង រដ្ឋបាលស្រុកបានរៀបចំ និងសម្របសម្រួលកិច្ចប្រជុំសិក្ខាសាលាចែករំលែកបទពិសោធន៍ ស្តីពី «ការចូលរួមរបស់អាជ្ញាធរមូលដ្ឋាន ក្នុងការកសាងអង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល» តាមប្រព័ន្ធអនឡាញ (Zoom Meeting) នាព្រឹកថ្ងៃទី២៣ ខែកក្កដា ឆ្នាំ២០២៦។ លោក វ៉ាន បុធឿន នាយករងរដ្ឋបាលសាលាស្រុក តំណាង លោក ធាង ឡេង អភិបាល នៃគណៈអភិបាលស្រុកវាលវែង បានចូលរួម កិច្ចប្រជុំរួមមាន លោកប្រធានការិយាល័យចំណុះរដ្ឋបាលស្រុក, កងកម្លាំងអធិការដ្ឋាននគរបាលស្រុក និងប៉ុស្តិ៍នគរបាលរដ្ឋបាល, អាជ្ញាធរឃុំ, ប្រធានមណ្ឌលសុខភាពទាំង ៥ ក្នុងស្រុក ព្រមទាំង លោកគ្រូ អ្នកគ្រូ ក្នុងមូលដ្ឋានស្រុកវាលវែងទាំងមូល។ អង្គសិក្ខាសាលានេះ ធ្វើឡើងក្នុងគោលបំណងផ្លាស់ប្តូរបទពិសោធន៍ និងពង្រឹងកិច្ចសហការរវាងអាជ្ញាធរមូលដ្ឋាន ជាមួយវិស័យអប់រំ និងសុខាភិបាល ដើម្បីបង្កើនប្រសិទ្ធភាពនៃការផ្តល់សេវាសាធារណៈជូនប្រជាពលរដ្ឋឱ្យកាន់តែប្រសើរឡើង និងឈានទៅរកការកសាងអង្គភាពគំរូនានាក្នុងស្រុក៕

ក្នុងការចុះមកសិក្សាស្វែងយល់អំពីការអនុវត្តប្រតិបត្តិការរបបសន្ដិសុខសង្គមរបស់សាខា ប.ស.ស.ខេត្ត ទៅលើការផ្ដល់សេវាជូនសមាជិក ប.ស.ស.នាពេលកន្លងមក។

កិច្ចប្រជុំនេះរៀបចំឡើងដើម្បីពិនិត្យ វាយតម្លៃ និងពង្រឹងការងារសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ព្រមទាំងទិសដៅការងារបន្ត ក្នុងគោលបំណងបម្រើ និងការពារសុខសុវត្ថិភាពជូនប្រជាពលរដ្ឋក្នុងមូលដ្ឋានស្រុកក្រគរទាំងមូលឱ្យកាន់តែមានប្រសិទ្ធភាពខ្ពស់។

(ពោធិ៍សាត់)៖ លោកស្រី កែវ កេសី អគ្គនាយករង នៃក្រសួងអធិការកិច្ច បានដឹកនាំក្រុមការងារ ចុះរៀបចំសកម្មភាព ស្ទង់មតិ និងចែកសៀវភៅច្បាប់ចរាចរណ៍ផ្លូវគោក ជូនដល់យុវជន សិស្សានុសិស្ស និងប្រជាពលរដ្ឋនៅក្នុងស្រុកកណ្តៀង ខេត្តពោធិ៍សាត់ នាថ្ងៃទី២២ ខែកក្កដា ឆ្នាំ២០២៦។ ពិធីនេះបានប្រព្រឹត្តទៅដោយមានការអញ្ជើញចូលរួមពីសំណាក់ លោកអភិបាលរងស្រុក អាជ្ញាធរឃុំ លោកគ្រូ-អ្នកគ្រូ សិស្សានុសិស្ស និងកងកម្លាំងប្រដាប់អាវុធ សរុបចំនួន ២០៧នាក់ ស្រី ៦៣នាក់។ ក្នុងឱកាសនោះ ក្រុមការងារបានចែកជូននូវសៀវភៅច្បាប់ចរាចរណ៍ផ្លូវគោក និងកម្រងសំណួរស្ទង់មតិ ដើម្បីផ្លាស់ប្តូរ និងប្រមូលនូវមតិយោបល់ ក្នុងគោលបំណងលើកកម្ពស់ការយល់ដឹង និងពង្រឹងការគោរពច្បាប់ចរាចរណ៍ឱ្យកាន់តែមានប្រសិទ្ធភាពបន្ថែមទៀត៕

(ពោធិ៍សាត់)៖ លោក ភោគ សារិទ្ធ អភិបាលរងនៃគណៈអភិបាលក្រុងពោធិ៍សាត់ សហការជាមួយមន្ត្រីកសិកម្មក្រុង និងមន្ត្រីកសិកម្មសង្កាត់ បានអញ្ជើញចុះពិនិត្យផ្ទាល់លើស្ថានភាពផលប៉ះពាល់ដែលបង្កឡើងដោយសារ «ភាពរាំងស្ងួត» ព្រមទាំងពិនិត្យប្រភព និងប្រឡាយទឹកនៅក្នុងមូលដ្ឋាន នាថ្ងៃទី២២ ខែកក្កដា ឆ្នាំ២០២៦។ ការចុះពិនិត្យដោយផ្ទាល់នាពេលនេះ គឺដើម្បីវាយតម្លៃទំហំខូចខាត និងស្វែងរកដំណោះស្រាយជាបន្ទាន់ ក្នុងការអន្តរាគមន៍នាំទឹកស្រោចស្រព និងសង្គ្រោះស្រូវរបស់ប្រជាកសិករដែលកំពុងប្រឈមនឹងការខ្វះខាតទឹក ឱ្យបានទាន់ពេលវេលា៕

ពោធិ៍សាត់៖ លោក អ៊ន សុផល្លា អភិបាល នៃគណៈអភិបាលស្រុកក្រគរ បានអញ្ជើញចុះពិនិត្យសកម្មភាពចាក់ដីបំពេញ និងស្តារផ្លូវទ្វារទឹកដែលត្រូវទឹកជំនន់ហូច្រោះ ខូចខាត ស្ថិតនៅភូមិកណ្តាល ឃុំក្បាលត្រាច ស្រុកក្រគរ ខេត្តពោធិ៍សាត់ នារសៀលថ្ងៃទី២០ ខែកក្កដា ឆ្នាំ២០២៦។ ការដ្ឋានរៀបចំ និងកែលម្អសោភណភាពផ្លូវ និងស្ទឹងនេះ អនុវត្តដោយក្រុមហ៊ុន ប៉ាលីហួរ ដើម្បីជួយសម្រួលដល់ការធ្វើដំណើរចេញ-ចូល និងដឹកជញ្ជូនកសិផលរបស់ប្រជាពលរដ្ឋក្នុងមូលដ្ឋានឱ្យបានងាយស្រួល សុវត្ថិភាព និងទាន់ពេលវេលា៕

ពោធិ៍សាត់៖ លោក ចាន់ វិចិត្រ អភិបាលនៃគណៈអភិបាលស្រុកតាលោសែនជ័យ បានដឹកនាំក្រុមការងាររដ្ឋបាលស្រុក ដោយសហការយ៉ាងជិតស្និទ្ធជាមួយអាជ្ញាធរឃុំ និងភូមិ ចុះសម្របសម្រួល និងពិនិត្យលទ្ធភាពជាក់ស្តែងក្នុងការបែងចែកទឹក ដើម្បីជួយសង្គ្រោះដំណាំស្រូវរបស់ប្រជាពលរដ្ឋ ដែលកំពុងជួបប្រទះបញ្ហាខ្វះខាតទឹកដោយសារគ្រោះរាំងស្ងួត ស្ថិតនៅភូមិព្រៃវាំង ឃុំតាលោ ស្រុកតាលោសែនជ័យ នាថ្ងៃទី២០ ខែកក្កដា ឆ្នាំ២០២៦។ សកម្មភាពចុះអន្តរាគមន៍ភ្លាមៗនេះ គឺដើម្បីស្វែងរកប្រភពទឹក និងរៀបចំយន្តការបែងចែកទឹកស្រោចស្រពឱ្យបានទាន់ពេលវេលា សំដៅកាត់បន្ថយការខូចខាតផលដំណាំស្រូវ និងជួយសម្រាលការលំបាករបស់បងប្អូនប្រជាកសិករក្នុងមូលដ្ឋាន៕

ពោធិ៍សាត់៖ លោក ធាម សុផាត អភិបាល នៃគណៈអភិបាលស្រុកភ្នំក្រវាញ បានអញ្ជើញដឹកនាំមន្ត្រីរាជការ និងអាជ្ញាធរពាក់ព័ន្ធ ចុះសំណេះសំណាលសួរសុខទុក្ខបងប្អូនអាជីវករ ព្រមទាំងពិនិត្យមើលស្ថានភាពអនាម័យ និងសណ្តាប់ធ្នាប់ទូទៅនៅផ្សារក្រវាញ ស្ថិតក្នុងឃុំលាច នាថ្ងៃទី២០ ខែកក្កដា ឆ្នាំ២០២៦។ ការចុះពិនិត្យផ្ទាល់នាឱកាសនោះ គឺដើម្បីពិនិត្យមើលការរៀបចំសណ្តាប់ធ្នាប់ការលក់ដូរ បញ្ហាអនាម័យបរិស្ថាន និងកាត់បន្ថយការកកស្ទះ ដើមី្បលើកកម្ពស់សោភណភាពផ្សារ និងសម្រួលដល់ការធ្វើដំណើរចេញ-ចូលទិញទំនិញរបស់ប្រជាពលរដ្ឋឱ្យកាន់តែមានរបៀបរៀបរយ និងសុវត្ថិភាព៕

នៅក្នុងកិច្ចប្រជុំ អង្គប្រជុំបានផ្តោតលើការងារអាទិភាពសំខាន់ៗចំនួន៥ រួមមាន៖ បន្តពង្រឹងការរក្សាសន្តិសុខ សណ្តាប់ធ្នាប់សាធារណៈ និងទប់ស្កាត់បញ្ហាក្មេងទំនើងនៅតាមសាលារៀនឱ្យបានម៉ឺងម៉ាត់, សហការរវាងអាជ្ញាធរ និងភាគីពាក់ព័ន្ធ ដើម្បីសម្អាតអនាម័យ បរិស្ថាន ព្រមទាំងដាំដើមឈើឡើងវិញ និងមើលថែទាំ ស្រោចទឹកឱ្យលូតលាស់បានល្អ, ពង្រឹងការក្តាប់មុខសញ្ញា និងទីតាំងប្រឈម ដើម្បីបង្ក្រាប និងទប់ស្កាត់ល្បែងស៊ីសងគ្រប់ប្រភេទមិនឱ្យកើតមានឡើងវិញ, ជំរុញការនាំទឹក និងបែងចែកទឹកស្រោចស្រពជូនប្រជាពលរដ្ឋឱ្យបានអស់លទ្ធភាព និងសន្សំសំចៃខ្ពស់បំផុត ក្នុងកំឡុងពេលកូនរដូវប្រាំងកំពុងអូសបន្លាយ, ខិតខំពង្រឹងការផ្តល់សេវាជូនប្រជាពលរដ្ឋឱ្យកាន់តែល្អប្រសើរ រួមមានសេវាអត្រានុកូលដ្ឋាន ការបញ្ជាក់នីត្យានុកូលភាព ការចុះបញ្ជីដីធ្លី និងការធ្វើអត្តសញ្ញាណប័ណ្ណ។

ពោធិ៍សាត់៖ លោក ពាក្យ មនោ បានចូលរួមកិច្ចប្រជុំពិភាក្សាស្តីពី ការផ្ទៀងផ្ទាត់ព្រំប្រទល់ព្រៃសហគមន៍ភូមិតាកែវក្រោម ស្ថិតក្នុងឃុំបឹងកន្ទួត ស្រុកក្រគរ ក្រោមអធិបតីភាពលោក ឪន សទ្ធា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តពោធិ៍សាត់ នាថ្ងៃទី២០ ខែកក្កដា ឆ្នាំ២០២៦។ កិច្ចប្រជុំនេះ មានសមាសភាពចូលរួមសរុបចំនួន ៦នាក់ ដែលជាតំណាងមកពីមន្ទីររៀបចំដែនដីខេត្ត, ការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកក្រគរ, អាជ្ញាធរឃុំបឹងកន្ទួត, អាជ្ញាធរភូមិតាកែវ និងខណ្ឌរដ្ឋបាលព្រៃឈើពោធិ៍សាត់។ ជាលទ្ធផលផ្លែផ្កានៃកិច្ចប្រជុំ អង្គប្រជុំបានឯកភាពសម្រេច ដាក់បញ្ចូលក្បាលដីលេខ៤៧៧ ផ្នែកជ្រុងខាងត្បូង ចូលទៅក្នុងដែនព្រៃសហគមន៍ភូមិតាកែវក្រោម ដើម្បីគ្រប់គ្រង និងអភិរក្សបន្ត៕