ព័ត៌មានក្នុងខេត្ត

ពោធិ៍សាត់៖ លោក ហ៊ន់ សុវណ្ណ អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ រួមជាមួយលោក មាស សេត មន្ត្រីបច្ចេកទេស និងលោក តូច សុជាតិ ទីប្រឹក្សាគម្រោង PCRL បានអញ្ជើញចុះជួបប្រជុំផ្សព្វផ្សាយ និងពិភាក្សាការងារជាមួយកសិករក្នុងសហគមន៍កសិកម្មចំការខ្លុយសាមគ្គី ស្ថិតក្នុងឃុំអូរតាប៉ោង ស្រុកបាកាន ខេត្តពោធិ៍សាត់ កាលពីថ្ងៃទី១៤ ខែសីហា ឆ្នាំ២០២៦។ កិច្ចប្រជុំនេះបានផ្តោតលើចំណុចសំខាន់ៗដូចខាងក្រោម៖ ណែនាំអំពីនីតិវិធីនៃការរៀបចំសំណើថវិកាពេលចាប់ផ្តើមសរសេរគម្រោង សំរាប់ទទួលបានថវិកាជំនួយឥតសំណងពីអង្គការ FAO ដែលអនុវត្តរួមគ្នាដោយអគ្គនាយកដ្ឋានកសិកម្ម (ក្រសួងកសិកម្ម) និងអគ្គនាយកដ្ឋានសហគមន៍មូលដ្ឋាន (ក្រសួងបរិស្ថាន), ពិភាក្សាជ្រើសរើសទីតាំងសាលារៀនស្រែបង្ហាញលើដំណាំស្រូវនិរន្តរភាព ព្រមទាំងជ្រើសរើសកសិករស្ម័គ្រចិត្តចូលរួមវគ្គសិក្សាស្តីពី «ផលិតកម្មស្រូវ RSP»។ ជំនួបពិភាក្សានេះបានបញ្ចប់ទៅដោយលទ្ធផលល្អប្រសើរ ដោយមានកសិករចូលរួមសរុបចំនួន ២៣នាក់ (ស្រី ១៨នាក់)៕

ពោធិ៍សាត់៖ ក្រុមការងារសង្កាត់រដ្ឋបាលព្រៃឈើព្រងិល បានសហការជាមួយក្រុមប្រឹក្សាឃុំព្រងិល មេភូមិកំពែង និងគណៈកម្មការសហគមន៍ព្រៃឈើភូមិកំពែង ចុះអនុវត្តសកម្មភាពកាយប្រឡាយរៀបចំព្រំប្រទល់ព្រៃសហគមន៍ភូមិកំពែង ឃុំព្រងិល ស្រុកភ្នំក្រវាញ ខេត្តពោធិ៍សាត់ កាលពីថ្ងៃទី១៤ ខែសីហា ឆ្នាំ២០២៦។ ជាលទ្ធផល ក្រុមការងារសម្រេចកាយប្រឡាយព្រំប្រទល់បានប្រវែងសរុប ៣៥០ម៉ែត្រ (ទទឹងលើ ១ម៉ែត្រ និងជម្រៅ/បាតក្រោម ២ម៉ែត្រ) ដែលក្នុងនោះរួមមាន៖ ៣០០ម៉ែត្រ ទទួលបានការឧបត្ថម្ភគាំទ្រពីអង្គការអភិវឌ្ឍន៍នារីខ្មែរ (អានកូរ) និង៥០ម៉ែត្រ ជាថវិកាបដិភាគរួមចំណែកពីសមាជិកសហគមន៍ព្រៃឈើភូមិកំពែង៕

ពោធិ៍សាត់៖ កិច្ចប្រជុំបង្ហាញគម្រោង «លើកកម្ពស់សិទ្ធអំណាចសហគមន៍ ដើម្បីគាំទ្រដល់ការអភិរក្សជីវចម្រុះ ក្នុងសហគមន៍នេសាទចិនតាយ និងសហគមន៍នេសាទត្រាំពែរនៃប្រទេសកម្ពុជា» កាលពីថ្ងៃសុក្រ ទី១៤ ខែសីហា ឆ្នាំ២០២៦ នៅសាលប្រជុំសាលាស្រុកបាកាន ខេត្តពោធិ៍សាត់។ កិច្ចប្រជុំនេះបានប្រព្រឹត្តទៅក្រោមវត្តមានចូលរួមពី លោក សេង សុងលី នាយរងខណ្ឌរដ្ឋបាលជលផលពោធិ៍សាត់ ព្រមទាំង លោកអភិបាលរងស្រុកបាកាន, លោកនាយកទីចាត់ការផែនការវិនិយោគ, តំណាងមន្ទីរបរិស្ថាន, អង្គការអភិវឌ្ឍន៍នារីខ្មែរ, ក្រុមប្រឹក្សាឃុំមេទឹក, ក្រុមប្រឹក្សាឃុំស្នាមព្រះ និងតំណាងសហគមន៍នេសាទទាំងពីរ សរុបចំនួន ២០នាក់ (ស្រី ៥នាក់)៕

ពោធិ៍សាត់៖ លោកស្រី ជ័យ ចន្នី អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ រួមជាមួយក្រុមការងារគម្រោង CASDP (ដឹកនាំដោយ លោក អ៊ុក សុធា ប្រធានការិយាល័យផែនការ-គណនេយ្យ) បានអញ្ជើញចូលរួមក្នុងពិធីបើកកញ្ចប់ដេញថ្លៃផ្គត់ផ្គង់ និងដំឡើងប្រព័ន្ធស្រោចស្រព ជូនដល់សហគមន៍កសិកម្មទំនើបម្ទេសដំណាក់ទ្រយឹង ស្ថិតក្នុងភូមិប៊ុនរ៉ានី សែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នៅព្រឹកថ្ងៃទី១៣ ខែសីហា ឆ្នាំ២០២៦។ សម្ភារ និងសេវាកម្មក្នុងកញ្ចប់ដេញថ្លៃរួមមាន៖ ទុយោមេ សម្រាប់ឆ្លើយតបលើផ្ទៃដី ២៥ ហិកតា, ប្រព័ន្ធស្រោចស្រព ចំនួន ២៥ ឈុត, សេវាដំឡើង និងឧបករណ៍ប្រព័ន្ធស្រោចស្រព (ទុយោដំណក់ទឹក និងវ៉ានបិទ-បើកទឹក) ចំនួន ២០ ឈុត។ ក្នុងដំណើរការដេញថ្លៃនេះ មានក្រុមហ៊ុនចំនួន ៤ បានដាក់សំណើប្រកួតប្រជែង ដោយមានការចូលរួមយ៉ាងសកម្មពីសំណាក់តំណាងក្រុមហ៊ុន និងសមាជិកគណៈកម្មការលទ្ធកម្មសហគមន៍សរុបចំនួន ១២ នាក់ (ស្រី ៤ នាក់) ប្រកបដោយភាពតម្លាភាព និងទទួលបានលទ្ធផលជាវិជ្ជមាន៕

សកម្មភាពសំខាន់ៗក្នុងវគ្គបណ្តុះបណ្តាល៖ ផ្តោតលើផលប្រយោជន៍នៃការប្រើប្រាស់ជីកំប៉ុស្តិ៍គោក និងថ្នាំកសិកម្មធម្មជាតិ ស្របតាមស្តង់ដារអនុវត្តកសិកម្មល្អ (GAP) ដើម្បីលើកកម្ពស់គុណភាពបន្លែ សុវត្ថិភាព និងពង្រីកទីផ្សារ, ពន្យល់ណែនាំអំពីធាតុផ្សំ និងវិធីសាស្ត្រផលិតជីកំប៉ុស្តិ៍ និងថ្នាំពុលធម្មជាតិប្រកបដោយសុវត្ថិភាព និងប្រសិទ្ធភាព។ ជាលទ្ធផលសិក្ខាកាមទាំងអស់ទទួលបានចំណេះដឹង និងជំនាញច្បាស់លាស់លើការផលិត និងប្រើប្រាស់ជីកំប៉ុស្តិ៍ និងថ្នាំកសិកម្មធម្មជាតិតាមស្តង់ដារបច្ចេកទេស។ សិក្ខាកាមមានសមត្ថភាពអាចចែករំលែក និងបង្ហាត់បង្ហាញបន្តដល់សមាជិកដទៃទៀត ដែលជួយកាត់បន្ថយការប្រើប្រាស់ជីគីមី និងថ្នាំកសិកម្ម កាត់បន្ថយចំណាយលើថ្លៃដើមផលិត និងបង្កើនប្រាក់ចំណេញផ្នែកសេដ្ឋកិច្ចគ្រួសារ៕

ពោធិ៍សាត់៖ លោក ហ៊ន់ សុវណ្ណ អនុប្រធានមន្ទីរកសិកម្ម រុក្ខាប្រមាញ់ និងនេសាទ និងលោក មាស សេត ប្រធានការិយាល័យក្សេត្រសាស្ត្រ បានអញ្ជើញចុះជួបជុំ និងផ្សព្វផ្សាយដល់កសិករក្នុងសហគមន៍កសិកម្មផ្ទះរុងរុងរឿង ស្ថិតក្នុងឃុំផ្ទះរុង ស្រុកតាលោសែនជ័យ ខេត្តពោធិ៍សាត់ នៅថ្ងៃទី១៣ ខែសីហា ឆ្នាំ២០២៦ ។ ក្នុងជំនួបនោះ ក្រុមការងារបានធ្វើការផ្សព្វផ្សាយយ៉ាងលម្អិតអំពី «នីតិវិធីនៃការរៀបចំសំណើថវិកាសម្រាប់សហគមន៍ ពេលចាប់ផ្តើមសរសេរគម្រោង» ដែលជាកញ្ចប់ថវិកាជំនួយឥតសំណងរបស់អង្គការ FAO អនុវត្តដោយអគ្គនាយកដ្ឋានក្សេត្រសាស្ត្រ (ក្រសួងកសិកម្ម) សហការជាមួយអគ្គនាយកដ្ឋានមូលដ្ឋាន (ក្រសួងបរិស្ថាន)។ ទន្ទឹមនឹងនេះ ក្រុមការងារក៏បានពិភាក្សា និងពិគ្រោះយោបល់លើការងារសំខាន់ៗមួយចំនួនទៀត រួមមាន៖ ការជ្រើសរើសទីតាំងសាលារៀនចំការបង្ហាញ និងការចុះឈ្មោះសមាជិកសហគមន៍ដែលស្ម័គ្រចិត្តចូលរួមវគ្គសិក្សាស្ដីពីផលិតកម្មបន្លែ។ សូមបញ្ជាក់ផងដែរថា សកម្មភាពខាងលើនេះមានប្រជាកសិករចូលរួមសរុបចំនួន ៣០ នាក់ (ស្រី ២១ នាក់) ដោយបរិយាកាសកក់ក្តៅ និងទទួលបានលទ្ធផលយ៉ាងល្អប្រសើរ៕

ឃុំព្រងិល៖ នៅថ្ងៃទី១៣ ខែសីហា ឆ្នាំ២០២៦ សង្កាត់រដ្ឋបាលព្រៃឈើព្រងិល បានសហការជាមួយក្រុមប្រឹក្សាឃុំព្រងិល លោកមេភូមិអូរស្រាវ និងគណៈកម្មការសហគមន៍ព្រៃឈើអូរស្រាវ ចុះអនុវត្តការងារកាយប្រឡាយ ដើម្បីរៀបចំធ្វើព្រំប្រទល់ដីព្រៃសហគមន៍អូរស្រាវឱ្យបានច្បាស់លាស់។ ជាលទ្ធផល ក្រុមការងារដែលមានសមាសភាពចូលរួមសរុប ៩ នាក់ (ស្រី ៣ នាក់) បានសម្រេចការកាយប្រឡាយព្រំប្រទល់បានប្រវែងសរុប ៣៥០ ម៉ែត្រ ដោយមានទំហំបច្ចេកទេស បណ្តោយ ៣៥០ម៉ែត្រ ទទឹងលើ ៣ម៉ែត្រ បាតក្រោម ២ម៉ែត្រ និងជម្រៅ ១ម៉ែត្រ។ គួរបញ្ជាក់ផងដែរថា សកម្មភាពកាយប្រឡាយព្រំប្រទល់ព្រៃសហគមន៍នាពេលនេះ ទទួលបានការឧបត្ថម្ភគាំទ្រផ្នែកថវិកាពី អង្គការអភិវឌ្ឍន៍នារីខ្មែរ (អានកូ) ចំនួន ៣០០ ម៉ែត្រ និងជាប្រាក់បដិភាគផ្ទាល់ពីសំណាក់ សមាជិកសហគមន៍ព្រៃឈើភូមិអូរស្រាវ ចំនួន ៥០ ម៉ែត្រ ផងដែរ៕

ពោធិ៍សាត់៖ លោកស្រី ដឹប ម៉ារីណា មន្ត្រីនៃការិយាល័យក្សេត្រសាស្ត្រ នៃមន្ទីរកសិកម្ម រុក្ខាប្រម៉ាញ់ និងនេសាទ បានសហការជាមួយកម្មវិធី ASPIRE-AT បើកវគ្គបណ្តុះបណ្តាលស្តីពី «ការអនុវត្តកសិកម្មល្អ (Good Agricultural Practices - GAP)» ជូនដល់បងប្អូនកសិករនៅក្នុងសហគមន៍កសិកម្មបាក់ចិញ្ចៀនមានជ័យ កាលពីថ្ងៃទី១២ ខែសីហា ឆ្នាំ២០២៦។ វគ្គបណ្តុះបណ្តាលនេះ មានកសិករចូលរួមសរុបចំនួន ២៨ នាក់ (ក្នុងនោះមានស្រ្តីចំនួន ២០ នាក់) ដោយបានផ្តោតសំខាន់លើការបង្រៀនបច្ចេកទេសដាំដុះតាមបទដ្ឋានសុវត្ថិភាព ការថែទាំដំណាំ និងការកាត់បន្ថយការប្រើប្រាស់សារធាតុគីមី ដើម្បីបង្កើនគុណភាពផលដំណាំ កែលម្អជីវភាពគ្រួសារ និងធានាសុវត្ថិភាពដល់អ្នកបរិភោគ៕

ពោធិ៍សាត់៖ លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ បានដឹកនាំក្រុមការងារបច្ចេកទេស ចុះពិនិត្យទីតាំងផ្ទាល់សម្រាប់រៀបចំប្រារព្ធពិធីបុណ្យ «រុក្ខទិវា» ដែលប្រព្រឹត្តទៅនាថ្ងៃទី១២ ខែសីហា ឆ្នាំ២០២៦ ខាងមុខនេះ។ ក្នុងបេសកកម្មនេះ លោកប្រធានមន្ទីរ និងក្រុមការងារ ក៏បានពិនិត្យមើលស្ថានភាពផ្លូវចូលទៅកាន់ទីតាំងប្រារព្ធពិធី ដែលបានរងការខូចខាតមួយចំនួនដោយសារទឹកភ្លៀង ស្ថិតក្នុងភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់ ដើម្បីចាត់វិធានការសម្រួល និងរៀបចំអនាម័យ-បរិស្ថានឱ្យមានភាពរលូន និងស្រស់ស្អាត មុនថ្ងៃប្រារព្ធពិធីផ្លូវការមកដល់៕

ពោធិ៍សាត់៖ ឯកឧត្តម សុទ្ធ គឹមកុលមុន្នី អគ្គលេខាធិការរង គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំប្រតិភូចុះពិនិត្យ និងវាយតម្លៃផ្ទាល់លើដំណាំស្រូវ ដែលកំពុងរងផលប៉ះពាល់ដោយសារគ្រោះរាំងស្ងួត ស្ថិតក្នុងឃុំអូរតាប៉ោង និងឃុំមេទឹក ស្រុកបាកាន ខេត្តពោធិ៍សាត់ នាថ្ងៃទី១០ ខែសីហា ឆ្នាំ២០២៦។ បេសកកម្មនេះមានការចូលរួមពី តំណាងនាយកដ្ឋានអភិវឌ្ឍន៍ដំណាំស្រូវ មន្ទីរកសិកម្ម រុក្ខាប្រមាញ់ និងនេសាទខេត្ត អាជ្ញាធរស្រុក-ឃុំ មន្ត្រីកសិកម្ម និងប្រជាកសិករក្នុងមូលដ្ឋាន ដើម្បីពិនិត្យលទ្ធភាពសង្គ្រោះ និងស្តារឡើងវិញ។ ផ្អែកតាមការចុះពិនិត្យជាក់ស្តែង ដំណាំស្រូវមួយចំនួនកំពុងស្ថិតក្នុងវគ្គបង្កបង្កើនផល មានការលូតលាស់យឺត និងត្រូវការទឹកជាចាំបាច់ ដែលអាចប្រឈមនឹងការថយចុះទិន្នផល ប្រសិនបើគ្មានប្រភពទឹកជួយសង្គ្រោះទាន់ពេលវេលា។ ចំពោះមុខស្ថានភាពនេះ អាជ្ញាធរដែនដី និងមន្ត្រីជំនាញកំពុងខិតខំស្វះស្វែងបូម និងនាំទឹកចេញពីស្ទឹង អូរ និងប្រឡាយមេ ដើម្បីចែករំលែកស្រោចស្រពសង្គ្រោះស្រែប្រជាកសិករជាបន្តបន្ទាប់៕

ពោធិ៍សាត់៖ ក្រុមការងារបច្ចេកទេសកសិកម្មចម្រុះ រួមមានការិយាល័យក្សេត្រសាស្ត្រ ការិយាល័យកសិកម្មធនធានធម្មជាតិ និងបរិស្ថាន ការិយាល័យសេដ្ឋកិច្ចអភិវឌ្ឍន៍សហគមន៍ និងមន្ត្រីកសិកម្មឃុំ-សង្កាត់ បានចុះពិនិត្យ និងវាយតម្លៃផលប៉ះពាល់ដំណាំស្រូវវស្សា នៅសង្កាត់ផ្ទះព្រៃ (ភូមិគក អូរស្តៅ ត្នោតទ្រេត) និងឃុំបឹងបត់កណ្ដោល (ភូមិស្វាយ បត់កណ្ដោល សំរោង អូរ និងបត់ត្រាច)។ តាមការពិនិត្យជាក់ស្ដែង មកទល់ពេលនេះ ផ្ទៃដីស្រូវក្នុងឃុំ-សង្កាត់ទាំងពីរ ទទួលបានទឹកភ្លៀងឡើងវិញ ដែលធ្វើឱ្យដំណាំស្រូវចាប់ផ្ដើមលូតលាស់ជាថ្មី។ ទោះជាយ៉ាងណា មានផ្ទៃដីស្រូវមួយផ្នែកបានរងការខូចខាត ហើយអាជ្ញាធរ និងប្រជាកសិករកំពុងជួយសង្គ្រោះ និងស្តារឡើងវិញជាបណ្តើរៗ៕

ពោធិ៍សាត់៖ លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ ព្រមទាំងមន្ត្រីជំនាញ អមដោយអនុប្រធានមន្ទីរ និងប្រធាន-អនុប្រធានការិយាល័យពាក់ព័ន្ធ បានអញ្ជើញចូលរួមកិច្ចប្រជុំពិភាក្សាតាមប្រព័ន្ធ Zoom Meeting ស្ដីពី «ការប្រឈមលើការលូតលាស់ដំណាំស្រូវដែលរងផលប៉ះពាល់ដោយគ្រោះរាំងស្ងួត» ក្រោមអធិបតីភាព ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៥ ខែសីហា ឆ្នាំ២០២៦ ។ ក្នុងឱកាសនោះ លោកប្រធានមន្ទីរបានរាយការណ៍អំពីផែនការសកម្មភាពឆ្លើយតបចំពោះគ្រោះរាំងស្ងួត ការប្រមូលទិន្នន័យ និងវិធីសាស្ត្រវាយតម្លៃផលប៉ះពាល់ជា ៣ កម្រិត (ស្រាល មធ្យម និងធ្ងន់)។ ជាមួយគ្នានេះ មន្ទីរកសិកម្មខេត្តបានត្រៀមលក្ខណៈរួចរាល់ ក្នុងការចុះអន្តរាគមន៍ដោះស្រាយបញ្ហាជូនប្រជាកសិករឱ្យបានទាន់ពេលវេលា ដើម្បីកាត់បន្ថយផលប៉ះពាល់លើការលូតលាស់របស់ដំណាំស្រូវឱ្យមកនៅកម្រិតទាបបំផុត៕