ព័ត៌មានក្នុងខេត្ត

ខេត្តពោធិ៍សាត់៖ ដែនដីនៃស្រុកតាលោសែនជ័យ នៅតែបន្តបង្ហាញពីសក្តានុពលកសិកម្ម និងសម្រស់ធម្មជាតិដ៏ទាក់ទាញ ដែលក្នុងនោះ ទិដ្ឋភាពរួមនៃ ភូមិដំណាក់កន្សែង ឃុំផ្ទះរុង ស្រុកតាលោសែនជ័យ ខេត្តពោធិ៍សាត់ កំពុងបង្ហាញពីភាពស្រស់បំព្រងនៃវាលស្រែចម្ការពណ៌បៃតងខ្ចី។ ភូមិដ្ឋានមួយនេះ មិនត្រឹមតែមានការអភិវឌ្ឍហេដ្ឋារចនាសម្ព័ន្ធផ្លូវថ្នល់ខ្វាត់ខ្វែង និងការរស់នៅប្រកបដោយភាពសុខសាន្តរបស់ប្រជាពលរដ្ឋប៉ុណ្ណោះទេ ប៉ុន្តែបងប្អូនប្រជាកសិករនៅក្នុងមូលដ្ឋាននេះ ក៏កំពុងមមាញឹកយ៉ាងសកម្មក្នុងការថែទាំ និងបង្កបង្កើនផលដំណាំកសិកម្មផ្សេងៗ ជាពិសេសការធ្វើស្រែចំការលក្ខណៈគ្រួសារ ដែលជាប្រភពចំណូលដ៏រឹងមាំ និងឆ្លុះបញ្ចាំងពីវឌ្ឍនភាពសេដ្ឋកិច្ចនៅតាមជនបទយ៉ាងពិតប្រាកដ៕

ខេត្តពោធិ៍សាត់បានរៀបចំកិច្ចប្រជុំតាមដាន និងត្រួតពិនិត្យវឌ្ឍនភាពនៃការអនុវត្តគម្រោងដែលប្រើប្រាស់ថវិកាសេវាសង្គម អនាម័យបរិស្ថាន និងគម្រោងមូលនិធិក្រុង ស្រុក ឃុំ សង្កាត់ ប្រចាំឆមាសទី១ ឆ្នាំ២០២៦ ក្រោមអធិបតីភាពលោក ពៅ ពិសិដ្ឋ អភិបាលរងខេត្ត។នៅព្រឹកថ្ងៃទី១៣ ខែកក្កដា ឆ្នាំ២០២៦ អង្គប្រជុំបានពិនិត្យលទ្ធផលនៃការរៀបចំកម្មវិធីវិនិយោគបីឆ្នាំរំកិល (២០២៧–២០២៩) និងវឌ្ឍនភាពនៃការអនុវត្តគម្រោងមូលនិធិឆ្នាំ២០២៦ ព្រមទាំងឯកភាពលើទម្រង់របាយការណ៍សម្រាប់ការអនុវត្តសកម្មភាព និងការប្រើប្រាស់ថវិកាសេវាសង្គម និងអនាម័យបរិស្ថាន។

ពហុកីឡដ្ឋានសម្តេចតេជោក្រគរ ពិតជាសមិទ្ធផលដ៏អស្ចារ្យ និងជាមោទនភាពថ្មីមួយសម្រាប់បងប្អូនប្រជាពលរដ្ឋក្នុងស្រុកក្រគរ ក៏ដូចជាខេត្តពោធិ៍សាត់ទាំងមូល! ជាមួយនឹងទំហំផ្ទៃដីដ៏ធំល្វឹងល្វើយរហូតដល់ទៅជាង ២៥ហិកតា ស្ថិតក្នុងភូមិថ្មី ឃុំស្នាអន្សា ទីតាំងនេះមិនត្រឹមតែជាកន្លែងសម្រាប់បម្រើឱ្យវិស័យកីឡាប៉ុណ្ណោះទេ ប៉ុន្តែថែមទាំងជា៖ មជ្ឈមណ្ឌលសុខភាព និងកម្សាន្ត៖ ជាទីតាំងដ៏ស្រឡះល្អសម្រាប់បងប្អូនប្រជាពលរដ្ឋមកហាត់ប្រាណ រត់ រដើរ កម្សាន្ត និងស្រូបយកខ្យល់អាកាសបរិសុទ្ធនៅពេលព្រឹក និងពេលល្ងាច។ បេះដូងបៃតងថ្មី៖ ផ្សារភ្ជាប់ទៅនឹងសកម្មភាពដាំកូនឈើរបស់មន្ត្រីរដ្ឋបាលស្រុកនាពេលថ្មីៗនេះ តំបន់ជុំវិញពហុកីឡដ្ឋាននេះនឹងក្លាយជាតំបន់បៃតងដ៏ទាក់ទាញ និងមានសោភ័ណភាពស្រស់បំព្រង។ កន្លែងរៀបចំទិវាសំខាន់ៗ៖ ផ្ទៃដីដ៏ធំនេះផ្តល់លទ្ធភាពខ្ពស់ក្នុងការរៀបចំកម្មវិធីប្រកួតកីឡាខ្នាតធំ ពិព័រណ៍ ឬព្រឹត្តិការណ៍វប្បធម៌នានាប្រចាំខេត្ត។ ទិដ្ឋភាពដ៏ធំទូលាយ និងការអភិវឌ្ឍហេដ្ឋារចនាសម្ព័ន្ធបែបនេះ ពិតជាបានលើកមុខមាត់ស្រុកក្រគរឱ្យកាន់តែលេចធ្លោខ្លាំងឡើង៕

ខេត្តពោធិ៍សាត់៖ ឯកឧត្តមបណ្ឌិត ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ បានដឹកនាំគណៈកម្មការអន្តរក្រសួង (ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ) រួមជាមួយក្រុមការងារបច្ចេកទេស ចុះពិនិត្យ និងវាយតម្លៃដំណាក់កាលទី១ លើការងារថែទាំផ្លូវជនបទចំនួន ៧ខ្សែ សរុបប្រវែង ៨៤,០០០ម៉ែត្រ ក្នុងខេត្តពោធិ៍សាត់ នាព្រឹកថ្ងៃទី៩ ខែកក្កដា ឆ្នាំ២០២៦។ គម្រោងថែទាំផ្លូវទាំង ៧ខ្សែនេះ អនុវត្តដោយមន្ទីរអភិវឌ្ឍន៍ជនបទខេត្តពោធិ៍សាត់ (គម្រោងលេខ DRR-RM-2026-No.021) ដោយប្រើប្រាស់ថវិកាជំពូក៦១ រួមមាន៖ ផ្លូវក្រាលកៅស៊ូពីរជាន់ (DBST) ចំនួន ៤ខ្សែ សរុបប្រវែង ៣៦,២០០ម៉ែត្រ ស្ថិតក្នុងស្រុកក្រគរ ស្រុកកណ្តៀង និងស្រុកបាកាន, ផ្លូវក្រាលល្បាយក្រួស ចំនួន ៣ខ្សែ សរុបប្រវែង ៤៧,៨០០ម៉ែត្រ ស្ថិតក្នុងក្រុងពោធិ៍សាត់ ស្រុកភ្នំក្រវាញ និងស្រុកក្រគរ។ ក្រោយការពិនិត្យ និងវាយតម្លៃផ្ទាល់លើលក្ខណៈបច្ចេកទេស គណៈកម្មការអន្តរក្រសួងបានសម្តែងការពេញចិត្ត និងសម្រេចឯកភាពទទួលយកការងារថែទាំប្រចាំ ១០០% សម្រាប់ដំណាក់កាលទី១ ជាស្ថាពរ ដើម្បីធានាគុណភាពផ្លូវ និងសម្រួលដល់ការធ្វើដំណើររបស់ប្រជាពលរដ្ឋ៕

មន្ទីរសាធារណការ និងដឹកជញ្ជូនខេត្តពោធិ៍សាត់ បន្តខិតខំកែលម្អហេដ្ឋារចនាសម្ព័ន្ធផ្លូវថ្នល់ក្នុងខេត្ត ក-ការងារសាធារណការ ១-ការងារ Reseal DBST ប្រវែង ផ្លូវជាតិលេខ៥ ប្រវែង ១៩៥០ម ចន្លោះគ.ម១៨៦+៦៥០ ដល់គ.ម១៨៨+៦០០ ក្រុងពោធិ៍សាត់ ស្រោចកៅស៊ូ DBST ។ ២-ការងារកាត់ជួសជុល ផ្លូវជាតិលេខ៥៥ ប្រវែង ៣៤០០ម ចន្លោះគ.ម៥០+០០០ ដល់គ.ម៥៣+៤០០ ចាក់ និងកិនកៀថ្មមុិច ។ ៣-ការងាររៀប Gabion box ផ្លូវខេត្តលេខ១៥២H ។ ៤-ការងារថែទាំប្រចាំ ផ្លូវជាតិលេខ៥៥ ស្រោចកៅស៊ូ DBST ចន្លោះគ.ម៧៧+០០០ ដល់គ.ម៧៨+០០០។ ៥-សម្របសម្រួលការងារថែទាំប្រចាំ ស្ថានីយចម្រោះទឹកកខ្វក់ បូមស្តារអាងក្លរ និងច្រូតកក់ក្នុងអាងរុក្ខជាតិ។ ៦-សម្របសម្រួលការងារថែទាំប្រចាំ ស្ថានីយចម្រោះទឹកកខ្វក់ តេស្តទឹកកខ្វក់ជាប្រចាំថ្ងៃ។ ខ-ការងារដឹកជញ្ជូន ១-សកម្មភាពត្រួតពិនិត្យលក្ខណៈបច្ចេកទេសយានយន្ត។

[ពោធិ៍សាត់]៖ លោក សឿន កឿន ចៅសង្កាត់ស្វាយអាត់ ក្រុងពោធិ៍សាត់ បានអញ្ជើញចុះពិនិត្យផ្ទាល់នូវសកម្មភាពការដ្ឋានចាក់ផ្លូវបេតុងអាមេខ្សែទី៤ ដែលកំពុងដំណើរការសាងសង់យ៉ាងសកម្ម នាថ្ងៃទី៨ ខែកក្កដា ឆ្នាំ២០២៦ នេះ។ គម្រោងស្ថាបនាផ្លូវបេតុងថ្មីមួយខ្សែនេះ មានសារៈសំខាន់ខ្លាំងក្នុងការតភ្ជាប់ទំនាក់ទំនង និងសេដ្ឋកិច្ចមូលដ្ឋាន៖ តភ្ជាប់ចាប់ពីចំណុចអូរស្ដៅ (សង្កាត់ស្វាយអាត់) រហូតដល់ចំណុចវត្តវាល (ស្ថិតក្នុងសង្កាត់លលកស)។ ក្នុងឱកាសចុះពិនិត្យនោះ លោកចៅសង្កាត់បានយកចិត្តទុកដាក់ខ្ពស់ទៅលើការតាមដានបច្ចេកទេស និងស្តង់ដារសំណង់របស់ក្រុមការងារ ដើម្បីធានាឱ្យបាននូវផ្លូវថ្នល់ដែលមានគុណភាព រឹងមាំ អាចប្រើប្រាស់បានយូរអង្វែង ក្នុងការសម្រួលដល់ការធ្វើដំណើរ និងលើកកម្ពស់ជីវភាពរស់នៅរបស់បងប្អូនប្រជាពលរដ្ឋនៅក្នុងមូលដ្ឋានទាំងពីរឱ្យកាន់តែប្រសើរឡើង៕

[ភូមិកែវសុវណ្ណលើ]៖ ការងារអភិវឌ្ឍន៍ហេដ្ឋារចនាសម្ព័ន្ធរបស់សង្កាត់បន្ទាយដី សម្រេចបានសមិទ្ធផលថ្មីស្រឡាងមួយខ្សែទៀតហើយ ដោយផ្លូវបេតុងក្នុងភូមិកែវសុវណ្ណលើ ត្រូវបានចាក់រួចរាល់ ១០០% ហើយ ដែលមានប្រវែង ១៣៥ ម៉ែត្រ ទទឹង ៥ ម៉ែត្រ នាថ្ងៃទី ៨ ខែកក្កដា ឆ្នាំ ២០២៦ នេះ។ ផ្លូវថ្មីមួយខ្សែនេះ គឺជាកាដូ និងជាចំណងដៃដ៏មានន័យសម្រាប់បងប្អូនប្រជាពលរដ្ឋក្នុងការធ្វើដំណើរទៅស្រុកកំណើត ក៏ដូចជាទៅធ្វើបុណ្យទានក្នុងពិធីបុណ្យភ្ជុំបិណ្ឌខាងមុខនេះ។ ក្រោយទទួលបានសមិទ្ធផលភ្លាមៗនេះ បងប្អូនប្រជាពលរដ្ឋនៅក្នុងភូមិមានការត្រេកអរ និងសប្បាយរីករាយក្រៃលែង ព្រមទាំងបានចូលរួមអបអរសាទរ ចំពោះការរីកចម្រើនយ៉ាងរហ័សរបស់មូលដ្ឋានខ្លួនផងដែរ៕

ពោធិ៍សាត់៖ ការងារអភិវឌ្ឍន៍ហេដ្ឋារចនាសម្ព័ន្ធរបស់សង្កាត់បន្ទាយដី សម្រេចបានសមិទ្ធផលថ្មីមួយបន្ថែមទៀតហើយ ដោយក្នុងនោះ ផ្លូវបេតុងខ្សែទី ២ ស្ថិតក្នុងភូមិកែវសុវណ្ណក្រោម ត្រូវបានចាក់រួចរាល់ ១០០% ហើយ នាថ្ងៃទី ៨ ខែកក្កដា ឆ្នាំ ២០២៦ នេះ។ ផ្លូវបេតុងថ្មីមួយខ្សែនេះ មានប្រវែង ៤៥ ម៉ែត្រ និងទទឹង ៥ ម៉ែត្រ ដែលនឹងជួយសម្រួលដល់ការធ្វើដំណើរ ក៏ដូចជាលើកកម្ពស់សោភ័ណភាពក្នុងមូលដ្ឋានឱ្យកាន់តែប្រសើរឡើង។ ក្រោយទទួលបានសមិទ្ធផលថ្មីស្រឡាងនេះ បងប្អូនប្រជាពលរដ្ឋនៅក្នុងភូមិ មានការត្រេកអរ និងសប្បាយរីករាយជាខ្លាំង ព្រមទាំងបានចូលរួមអបអរសាទរចំពោះការរីកចម្រើនឥតឈប់ឈររបស់មូលដ្ឋានខ្លួនផងដែរ៕

ខ្សែផ្លូវដែលបានចុះត្រួតពិនិត្យនេះ មានប្រវែង ២ ៦ tenant៦០ម៉ែត្រ (២,៦៦គីឡូម៉ែត្រ) លាតសន្ធឹងតភ្ជាប់ពីភូមិឈើទាល ទៅភូមិបឹងវាល ស្ថិតក្នុងឃុំត្នោតជុំ ស្រុកក្រគរ ខេត្តពោធិ៍សាត់ ដែលត្រូវបានអនុវត្តការសាងសង់ដោយនាយកដ្ឋានវិស្វកម្ម នៃក្រសួងការពារជាតិ។ សមាសភាពចូលរួមក្នុងសកម្មភាពនេះ រួមមាន៖ ឯកឧត្ដម ជា ស្រ៊ុន រដ្ឋលេខាធិការ និងជាអនុប្រធាន គ.ត.វ នៃក្រសួងអភិវឌ្ឍន៍ជនបទ លោកជំទាវអនុរដ្ឋលេខាធិការ តំណាងក្រសួងសេដ្ឋកិច្ច និងហិរញ្ញវត្ថុ មន្ទីរអភិវឌ្ឍន៍ជនបទខេត្តពោធិ៍សាត់ ព្រមទាំងអាជ្ញាធរមូលដ្ឋាន។

ពោធិ៍សាត់៖ យកចិត្តទុកដាក់លើគុណភាពហេដ្ឋារចនាសម្ព័ន្ធក្នុងមូលដ្ឋាន នាថ្ងៃទី ៧ ខែកក្កដា ឆ្នាំ២០២៦ នេះ លោក សឿន កឿន ចៅសង្កាត់ស្វាយអាត់ ក្រុងពោធិ៍សាត់ បានអញ្ជើញចុះពិនិត្យសកម្មភាពក្រុមការងារបច្ចេកទេស ដែលកំពុងបន្តរៀបចំចាក់បេតុងយ៉ាងសកម្មនៅលើខ្សែផ្លូវទី៤។ គម្រោងស្ថាបនាផ្លូវបេតុងអាមេខ្សែទី៤នេះ គឺតភ្ជាប់ពីចំណុចអូរស្ដៅ ក្នុងសង្កាត់ស្វាយអាត់ រហូតដល់ចំណុចវត្តវាល ស្ថិតក្នុងសង្កាត់លលកស។ ក្នុងឱកាសចុះពិនិត្យនោះដែរ លោកចៅសង្កាត់បានតាមដានយ៉ាងយកចិត្តទុកដាក់លើបច្ចេកទេស និងស្តង់ដារសំណង់ ដើម្បីធានាឱ្យបាននូវផ្លូវថ្នល់មួយដែលមានគុណភាព រឹងមាំ ប្រើប្រាស់បានយូរអង្វែង ក្នុងការសម្រួលដល់ការធ្វើដំណើរ និងលើកកម្ពស់ជីវភាពរស់នៅរបស់បងប្អូនប្រជាពលរដ្ឋនៅក្នុងមូលដ្ឋានទាំងពីរឱ្យកាន់តែប្រសើរឡើង៕

ពោធិ៍សាត់៖ លោក ធាម សុផាត អភិបាលស្រុកភ្នំក្រវាញ រួមជាមួយក្រុមការងារជំនាញថ្នាក់ខេត្ត ថ្នាក់ស្រុក និងអាជ្ញាធរឃុំ បានអញ្ជើញចុះត្រួតពិនិត្យ និងប្រគល់-ទទួលជាផ្លូវការ នូវផ្លូវក្រួសក្រហមចំនួន ១ខ្សែ នាព្រឹកថ្ងៃទី៦ ខែកក្កដា ឆ្នាំ២០២៦ នេះ។ ផ្លូវថ្មីនេះមានប្រវែង ៥,០០០ម៉ែត្រ និងទទឹង ៥ម៉ែត្រ ស្ថិតនៅក្នុងភូមិសាយ ឃុំព្រងិល ស្រុកភ្នំក្រវាញ ខេត្តពោធិ៍សាត់ ដើម្បីសម្រួលដល់ការធ្វើដំណើរ និងដឹកជញ្ជូនរបស់ប្រជាពលរដ្ឋក្នុងមូលដ្ឋាន៕

ឯកឧត្តម បណ្ឌិត ប្រាំង ជលសា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គិសនីកម្ពុជា និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកក្រគរ និងស្រុកកណ្តៀង បានអញ្ជើញជាអធិបតីក្នុងពិធីសំណេះសំណាល សម្ពោធដាក់ឱ្យប្រើប្រាស់សមិទ្ធផលហេដ្ឋារចនាសម្ព័ន្ធ និងចែកស្បៀងជូនប្រជាពលរដ្ឋក្នុងភូមិសាស្ត្រខេត្តពោធិ៍សាត់។