គម្រោងសាងសង់ផ្លូវបេតុងអាមេនៅភូមិអន្លង់ហាប សម្រេចបាន ១០០% ប្រកបដោយគុណភាព និងបទដ្ឋានបច្ចេកទេស
ពោធិ៍សាត់៖ គណៈកម្មការគ្រប់គ្រងគម្រោងឃុំកោះជុំ បានចុះពិនិត្យ និងវាយតម្លៃលទ្ធផលការដ្ឋានសាងសង់ «ផ្លូវបេតុងអាមេ» ១០០% ដែលស្ថិតនៅក្នុងភូមិអន្លង់ហាប ឃុំកោះជុំ ស្រុកកណ្តៀង ខេត្តពោធិ៍សាត់ នៅព្រឹកថ្ងៃទី៣ ខែសីហា ឆ្នាំ២០២៦ ។ តាមរយៈការចុះពិនិត្យជាក់ស្តែង គណៈកម្មការបានវាយតម្លៃ និងប្រកាសថា ក្រុមហ៊ុន ស្រី សុជាត ដែលជាទទួលការសាងសង់ បានអនុវត្តការងារយ៉ាងត្រឹមត្រូវ ស្របតាមបទដ្ឋាន គុណភាព និងលក្ខណៈបច្ចេកទេស ១០០% ដែលបានកំណត់ក្នុងកិច្ចសន្យា។ សូមបញ្ជាក់ថាគម្រោងនេះជា ប្រភេទគម្រោង ផ្លូវបេតុងអាមេ ប្រវែង ០,២៥០ គ.ម (២៥០ ម៉ែត្រ), ទទឹង ៥ ម៉ែត្រ, កម្រាស់ ១៥០ ម.ម (១៥ ហ៊ុន) ដែលជាមូលនិធិឃុំ ២០៨,៧៥០,០០០រៀល, ថវិកាភាគទាន/ធនធានចូលរួម ៣០០,០០០ រៀល, ថវិកាសរុប៖ ២០៩,០៥០,០០០ រៀល។ សមិទ្ធផលផ្លូវបេតុងថ្មីនេះ នឹងជួយសម្រួលដល់ការធ្វើដំណើរ ដឹកជញ្ជូនកសិផល និងលើកកម្ពស់ជីវភាពរស់នៅរបស់ប្រជាពលរដ្ឋក្នុងភូមិអន្លង់ហាប ឃុំកោះជុំ ស្រុកកណ្តៀង ខេត្តពោធិ៍សាត់ ឱ្យកាន់តែប្រសើរឡើងថែមទៀត៕
