ព័ត៌មានក្នុងខេត្ត

ពោធិ៍សាត់៖ លោក អ៊ន សុផល្លា អភិបាលស្រុកក្រគរ បានអញ្ជើញដឹកនាំកិច្ចប្រជុំជាមួយមន្ត្រីរាជការនៃការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកក្រគរ នៅឯសាលាស្រុកក្រគរ កាលពីព្រឹកថ្ងៃទី៧ ខែកញ្ញា ឆ្នាំ២០២៦។ កិច្ចប្រជុំនេះ រៀបចំឡើងក្នុងគោលបំណងពង្រឹងសាមគ្គីភាព ឯកភាពផ្ទៃក្នុង និងពិនិត្យលើវឌ្ឍនភាពនៃការអនុវត្តការងារកន្លងមក ព្រមទាំងកំណត់ទិសដៅការងារបន្តសម្រាប់ឆ្នាំ២០២៦។ ក្នុងឱកាសនោះ លោកអភិបាលស្រុក បានណែនាំដល់មន្ត្រីជំនាញទាំងអស់ ឱ្យបង្កើនការយកចិត្តទុកដាក់ខ្ពស់លើការផ្តល់សេវាជូនប្រជាពលរដ្ឋ ពាក់ព័ន្ធនឹងវិស័យដីធ្លី ការសាងសង់ និងការចេញប័ណ្ណកម្មសិទ្ធិផ្សេងៗ ដោយត្រូវកាន់ខ្ជាប់នូវក្រមសីលធម៌វិជ្ជាជីវៈ ភាពស្មោះត្រង់ រហ័សរហួន និងតម្លាភាព។ បន្ថែមពីលើនេះ លោក អ៊ន សុផល្លា ក៏បានជំរុញឱ្យមានការយកចិត្តទុកដាក់ដោះស្រាយរាល់សំណូមពរ និងបណ្តឹងតវ៉ារបស់ប្រជាពលរដ្ឋឱ្យបានទាន់ពេលវេលា និងស្របតាមផ្លូវច្បាប់ ក៏ដូចជាការបន្តពង្រឹងការគ្រប់គ្រងសំណង់ និងការរៀបចំដែនដីក្នុងមូលដ្ឋានស្រុកក្រគរឱ្យកាន់តែមានរបៀបរៀបរយល្អប្រសើរថែមទៀត៕

លោក គិត ផល អនុប្រធានក្តាប់រួមមន្ទីរធនធានទឹក និងឧតុនិយមខេត្តពោធិ៍សាត់ បានដឹកនាំក្រុមការងារចុះពិនិត្យការប្រមើលផលស្រូវរដូវវស្សា ព្រមទាំងតាមដានសកម្មភាពអន្តរាគមន៍ជួយសង្គ្រោះស្រូវវស្សាដែលកំពុងប្រឈមនឹងការខ្វះខាតទឹក ស្ថិតក្នុងភូមិសាស្ត្រស្រុកភ្នំក្រវាញ និងស្រុកតាលោសែនជ័យ នាថ្ងៃទី០៧ ខែកញ្ញា ឆ្នាំ២០២៦ ។

យោងតាមកិច្ចចង្អុលការដឹកនាំពីរដ្ឋបាលខេត្តពោធិ៍សាត់ លោក អ៊ន សុផល្លា អភិបាលនៃគណៈអភិបាលស្រុកក្រគរ បានដឹកនាំក្រុមការងារជំនាញរដ្ឋបាលស្រុក សហការជាមួយអាជ្ញាធរឃុំ និងភូមិ ចុះសម្របសម្រួលដោះស្រាយទំនាស់ដីធ្លីរ៉ាំរ៉ៃជាច្រើនឆ្នាំរបស់ប្រជាពលរដ្ឋឈ្មោះ សុខ សៅវឿន ភេទស្រី នាថ្ងៃទី0៧ ខែកញ្ញា ឆ្នាំ២០២៦ ។

ពោធិ៍សាត់៖ លោក ធាម សុផាត អភិបាល នៃគណៈអភិបាលស្រុកភ្នំក្រវាញ បានអញ្ជើញចុះសួរសុខទុក្ខ និងពិនិត្យមើលការជួសជុលផ្ទះសម្បែងរបស់ក្រុមគ្រួសារវីរកងទ័ព ដែលរស់នៅក្នុងភូមិក្រូចឆ្មារ ឃុំលាច ស្រុកភ្នំក្រវាញ ខេត្តពោធិ៍សាត់ នារសៀល ថ្ងៃទី៧ ខែកញ្ញា ឆ្នាំ២០២៦។ នៅក្នុងឱកាសនោះ លោកអភិបាលស្រុក ក៏បាននាំយកអំណោយមនុស្សធម៌របស់អនុសាខាកាកបាទក្រហមកម្ពុជាស្រុកភ្នំក្រវាញ ទៅប្រគល់ជូនគ្រួសារវីរកងទ័ព ដើម្បីជួយសម្រាលជីវភាពរស់នៅ។ អំណោយដែលបានឧបត្ថម្ភរួមមាន៖ អង្ករ, មី, ទឹកត្រី, ទឹកស៊ីអ៊ីវ, ត្រីខ និងថវិកាផ្ទាល់ខ្លួនមួយចំនួន ព្រមទាំងបានសម្តែងនូវការដឹងគុណយ៉ាងជ្រាលជ្រៅចំពោះកាយវិការលះបង់របស់វីរកងទ័ពក្នុងការការពារជាតិមាតុភូមិ៕

ពោធិ៍សាត់៖ លោក ធាម សុផាត អភិបាល នៃគណៈអភិបាលស្រុកភ្នំក្រវាញ បានអញ្ជើញដឹកនាំមន្ត្រីរាជការនៃរដ្ឋបាលស្រុក ចុះសួរសុខទុក្ខលោកមេឃុំសន្ទ្រែ ដោយផ្ទាល់ដល់លំនៅឋាន ស្ថិតក្នុងភូមិគល់ទទឹង ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ ដែលកំពុងសម្រាកព្យាបាលជំងឺ នារសៀល ថ្ងៃទី៧ ខែកញ្ញា ឆ្នាំ២០២៦ ។ ក្នុងឱកាសប្រកបដោយមនោសញ្ចេតនាស្និទ្ធស្នាលនោះ លោកអភិបាលស្រុក ក៏បានសម្តែងនូវការព្រួយបារម្ភ និងបានសាកសួរដោយយកចិត្តទុកដាក់អំពីអាការរោគ ព្រមទាំងជូនពរឱ្យលោកមេឃុំ ឆាប់បានជាសះស្បើយពីជំងឺ ដើម្បីត្រឡប់មកបំពេញភារកិច្ច និងបម្រើបងប្អូនប្រជាពលរដ្ឋក្នុងឃុំសន្ទ្រែវិញនាពេលឆាប់ៗខាងមុខនេះ៕

ពោធិ៍សាត់៖ លោក ធាម សុផាត អភិបាល នៃគណៈអភិបាលស្រុកភ្នំក្រវាញ បានអញ្ជើញចុះពិនិត្យទីតាំងជាក់ស្តែង ដែលត្រូវរៀបចំសាងសង់អគារសិក្សាថ្មីចំនួន ១ខ្នង មាន ៥បន្ទប់ ស្ថិតនៅអនុវិទ្យាល័យគល់ទទឹង នារសៀល ថ្ងៃទី៧ ខែកញ្ញា ឆ្នាំ២០២៦ ។ ការចុះពិនិត្យទីតាំងផ្ទាល់នាពេលនេះ គឺដើម្បីរៀបចំរៀងចំផែនការ និងធានាឱ្យដំណើរការសាងសង់អគារសិក្សាថ្មីនេះ ប្រព្រឹត្តទៅដោយរលូន ប្រកបដោយគុណភាព និងសុវត្ថិភាព សំដៅឆ្លើយតបទៅនឹងតម្រូវការសិក្សារបស់សិស្សានុសិស្ស ក៏ដូចជាការចូលរួមលើកកម្ពស់ហេដ្ឋារចនាសម្ព័ន្ធវិស័យអប់រំនៅក្នុងស្រុកភ្នំក្រវាញ ខេត្តពោធិ៍សាត់ឱ្យកាន់តែប្រសើរឡើង៕

ពោធិ៍សាត់៖ លោក ធាង ឡេង អភិបាល នៃគណៈអភិបាលស្រុកវាលវែង បានដឹកនាំក្រុមការងារស្រុក ដែលរួមមានលោកអភិបាលរងស្រុក ប្រធានការិយាល័យជំនាញ អាជ្ញាធរឃុំ-ភូមិ ក្រុមយុវជន និងបងប្អូនប្រជាពលរដ្ឋក្នុងមូលដ្ឋាន ចុះពិនិត្យ ថែទាំ និងដាំបន្ថែមនូវ «ផ្កាភួងម៉ាល័យ» (ផ្កាត្រែមាស) នៅតាមបណ្តោយដងផ្លូវជាតិលេខ១០ ត្រង់ចំណុចភូមិសាស្ត្រភូមិឈើទាលជ្រុំ ឃុំប្រម៉ោយ ស្រុកវាលវែង ខេត្តពោធិ៍សាត់ នៅព្រឹកថ្ងៃទី៧ ខែកញ្ញា ឆ្នាំ២០២៦។ នៅក្នុងឱកាសនោះផងដែរ លោកអភិបាលស្រុក ក៏បានបន្តដឹកនាំក្រុមការងារ ចុះពិនិត្យស្ថានភាពទូទៅ ព្រមទាំងត្រួតពិនិត្យ និងថែទាំកូនផ្កា និងកូនឈើដែលបានដាំរួចរាល់នាពេលកន្លងមក នៅចំណុចស្ពាន «តេជោសន្តិភាព» ដែលជាស្ពានមានកម្ពស់ខ្ពស់ជាងគេនៅក្នុងប្រទេសកម្ពុជា ស្ថិតក្នុងឃុំអូរសោម ស្រុកវាលវែង ដើម្បីធានាឱ្យកូនឈើទាំងនោះលូតលាស់បានល្អ និងចូលរួមលើកកម្ពស់សោភ័ណភាពតំបន់នោះឱ្យកាន់តែមានបៃតងស្រស់ស្អាត៕

លោកអភិបាលនៃគណៈអភិបាលស្រុកក្រគរ បានអញ្ជើញចុះសួរសុខទុក្ខ និងសំណេះសំណាលដោយផ្ទាល់ជាមួយមន្ត្រីរាជការ បុគ្គលិកបម្រើការងារ និងបងប្អូនប្រជាពលរដ្ឋដែលអញ្ជើញមកទទួលសេវាសាធារណៈផ្សេងៗ នៅការិយាល័យច្រកចេញចូលតែមួយនៃរដ្ឋបាលស្រុកក្រគរ នាថ្ងៃទី០៧ ខែកញ្ញា ឆ្នាំ២០២៦។

ពោធិ៍សាត់៖ ក្រុមការងារលោកសាកលវិទ្យាធិការ នៃសាកលវិទ្យាល័យភូមិន្ទភ្នំពេញ បានចុះបេសកកម្មអនុវត្តគម្រោងស្រាវជ្រាវបែបវិទ្យាសាស្ត្រមួយ ស្តីពី «បុគ្គលិកលក្ខណៈក្រុមប្រឹក្សាឃុំ-សង្កាត់ ដែលប្រជាជនគាំទ្រ និងជ្រើសរើសក្នុងការបោះឆ្នោត សម្រាប់ការអភិវឌ្ឍសេដ្ឋកិច្ច-សង្គម ក្នុងប្រទេសកម្ពុជា» ដោយបានជ្រើសរើសយកឃុំព្រងិល ស្រុកភ្នំក្រវាញ ខេត្តពោធិ៍សាត់ ជាទីតាំងគោលដៅក្នុងការចុះប្រមូលទិន្នន័យ។ ការចុះអនុវត្តគម្រោងនេះ មានគោលបំណងសំខាន់ក្នុងការប្រមូលទិន្នន័យជាក់ស្តែង ដើម្បីធ្វើការវិភាគយ៉ាងល្អិតល្អន់លើគុណសម្បត្តិ ឥរិយាបថ និងបុគ្គលិកលក្ខណៈផ្ទាល់ខ្លួនរបស់អាជ្ញាធរឃុំ-សង្កាត់ ដែលទទួលបានសេចក្តីទុកចិត្ត និងការគាំទ្រពីសំណាក់ប្រជាពលរដ្ឋតាមរយៈការបោះឆ្នោត។ លទ្ធផលនៃការស្រាវជ្រាវនេះ នឹងក្លាយជាទិន្នន័យបែបវិទ្យាសាស្ត្រដ៏មានតម្លៃ ក្នុងការស្វែងយល់ពីកត្តាជោគជ័យនៃការដឹកនាំនៅថ្នាក់មូលដ្ឋាន។ ក្រុមស្រាវជ្រាវរំពឹងថានឹងទទួលបានធាតុចូលសំខាន់ៗ អំពីតម្រូវការ ការរំពឹងទុករបស់ប្រជាពលរដ្ឋចំពោះថ្នាក់ដឹកនាំមូលដ្ឋានរបស់ពួកគាត់ ជាផ្នែកមួយយ៉ាងសំខាន់ក្នុងការចូលរួមចំណែកជំរុញការអភិវឌ្ឍសេដ្ឋកិច្ច និងសង្គមជាតិឱ្យកាន់តែរីកចម្រើន និងមានប្រសិទ្ធភាពនាពេលអនាគត៕

អភិបាលស្រុកកណ្តៀង បានដឹកនាំមន្ត្រីរដ្ឋបាលស្រុក ក្រុមប្រឹក្សាឃុំ និងស្មៀនឃុំ ចូលរួមសន្និបាតបូកសរុបសមិទ្ធផលការងារអាណត្តិទី៥ របស់ក្រុមប្រឹក្សាឃុំ-សង្កាត់ តាមប្រព័ន្ធ Zoom ក្រោមអធិបតីភាពដ៏ខ្ពង់ខ្ពស់ ឯកឧត្ដម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅសាលប្រជុំកែវវិជ័យ ដើម្បីឆ្លុះបញ្ចាំងពីសមិទ្ធផល និងការពង្រឹងគុណភាពសេវាជូនប្រជាពលរដ្ឋ និងកុមារងាយរងគ្រោះ។

លោក សុខ តារារស្មី អភិបាលរងស្រុកក្រគរ បានអញ្ជើញចូលរួមក្នុងសន្និបាតបូកសរុបសមិទ្ធផលការងារអាណត្តិទី៥ របស់ក្រុមប្រឹក្សាឃុំ-សង្កាត់ តាមប្រព័ន្ធ Zoom ជាមួយសមាជិកក្រុមប្រឹក្សាឃុំ ស្មៀនឃុំ នាយប៉ុស្តិ៍ និងប្រធានការិយាល័យពាក់ព័ន្ធ ដើម្បីវាយតម្លៃការងារ និងពង្រឹងកិច្ចអភិវឌ្ឍន៍មូលដ្ឋាន។

ពោធិ៍សាត់៖ នៅសាលប្រជុំសាលាស្រុកភ្នំក្រវាញ បានប្រារព្ធពិធីកិច្ចប្រជុំសំណេះសំណាល និងពិភាក្សាការងារ ក្រោមអធិបតីភាពរបស់ លោក ធាម សុផាត អភិបាលស្រុកភ្នំក្រវាញ នាព្រឹកថ្ងៃទី៧ ខែកញ្ញា ឆ្នាំ២០២៦ ។ កិច្ចប្រជុំនេះរៀបចំឡើងក្នុងគោលបំណង ពិនិត្យមើលវឌ្ឍនភាពការងារថែរក្សាសន្តិសុខ សណ្តាប់ធ្នាប់សាធារណៈ ការផ្តល់សេវាសាធារណៈជូនប្រជាពលរដ្ឋ និងការជំរុញការអភិវឌ្ឍមូលដ្ឋាន ក៏ដូចជារបៀបរបបការងាររបស់មន្ត្រីរាជការក្រោមឱវាទ។ លោកអភិបាលស្រុក បានផ្តាំផ្ញើ និងណែនាំដល់អង្គប្រជុំទាំងមូល ឱ្យបន្តពង្រឹងសាមគ្គីភាពផ្ទៃក្នុង ប្រកាន់ខ្ជាប់នូវក្រមសីលធម៌វិជ្ជាជីវៈ យកចិត្តទុកដាក់ដោះស្រាយទុក្ខលំបាក និងសំណូមពររបស់ប្រជាពលរដ្ឋឱ្យបានទាន់ពេលវេលា និងប្រកបដោយប្រសិទ្ធភាពខ្ពស់ ដើម្បីបុព្វហេតុអភិវឌ្ឍន៍ស្រុកភ្នំក្រវាញឱ្យកាន់តែរីកចម្រើនថែមទៀត៕