ព័ត៌មានក្នុងខេត្ត

ពោធិ៍សាត់៖ នៅចុងសប្ដាហ៍នេះ ក្រុមការងាររាជរដ្ឋាភិបាល និងគណបក្សចុះជួយឃុំស្យា បានបន្តចុះបំពេញសកម្មភាពការងារយ៉ាងសកម្មក្នុងការជួយអភិវឌ្ឍន៍មូលដ្ឋាន និងលើកកម្ពស់ជីវភាពរស់នៅរបស់ប្រជាពលរដ្ឋ។ លទ្ធផលនៃសកម្មភាពសំខាន់ៗដែលសម្រេចបាន រួមមាន៖ ដំណើរការជួសជុល កែសម្រួលទីតាំង និងប្តូរម៉ាបស្លាកស្ពាន «ក្បាលពាម-ត្រពាំងថ្ម» ដែលរងការស្រុតបាក់ឡើងវិញ, ការងារអត្តសញ្ញាណកម្ម៖ បានចុះសម្របសម្រួល និងបង្កលក្ខណៈងាយស្រួលក្នុងការធ្វើអត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋនៅភូមិក្បាលពាម, ចុះសួរសុខទុក្ខ និងចែកស្បៀងអាហារជូនគ្រួសារទីទាល់ក្រចំនួន ០៨គ្រួសារ, ឧបត្ថម្ភសម្ភារៈប្រើប្រាស់ (ឃីតកូនខ្ចី) ជូនគ្រួសារដែលទើបសម្រាលកូនរួចចំនួន ០១គ្រួសារ និង អញ្ជើញចូលរួមរំលែកទុក្ខ និងឧបត្ថម្ភថវិកា ស្បៀងអាហារ ដល់គ្រួសារសពប្រជាពលរដ្ឋនៅភូមិធ្លក។ សកម្មភាពចម្រុះទាំងអស់នេះ បានស្តែងឱ្យឃើញពីការយកចិត្តទុកដាក់ និងការរួមសុខរួមទុក្ខរបស់ក្រុមការងារជាមួយប្រជាពលរដ្ឋនៅថ្នាក់មូលដ្ឋានជាប្រចាំ៕

ពោធិ៍សាត់៖ លោក ឆាយ គឹមម៉ុង អភិបាលស្រុកបាកាន បានដឹកនាំមន្ត្រីរាជការ រដ្ឋបាលស្រុក និងរដ្ឋបាលឃុំទាំង ៩ ចុះធ្វើសកម្មភាពសម្អាតបរិស្ថាន អនាម័យ និងដាំដើមឈើលម្អតាមមូលដ្ឋានយ៉ាងសកម្ម នាថ្ងៃទី៦ ខែកក្កដា ឆ្នាំ២០២៦។ យុទ្ធនាការបៃតងនេះ ធ្វើឡើងក្នុងគោលបំណងលើកកម្ពស់សោភណភាពស្រុកបាកានឱ្យកាន់តែស្រស់បំព្រង ព្រមទាំងរួមចំណែកបង្កើតគម្របបៃតង និងដាស់តឿនស្មារតីបងប្អូនប្រជាពលរដ្ឋឱ្យចូលរួមស្រឡាញ់ និងថែរក្សាអនាម័យបរិស្ថានជុំវិញខ្លួនឱ្យបានស្អាតជានិច្ច។ រួមគ្នាដើម្បីបរិស្ថានស្អាត ស្រុកបាកានបៃតង និងមានខ្យល់អាកាសបរិសុទ្ធ!

ពោធិ៍សាត់៖ ឯកឧត្តម លៀង ពេជ្រ ប្រធានក្រុមការងារចុះជួយមូលដ្ឋានសង្កាត់ស្វាយអាត់ បានដឹកនាំក្រុមប្រឹក្សាក្រុង រដ្ឋបាលសង្កាត់ ប៉ុស្តិ៍នគរបាល និងអាជ្ញាធរភូមិត្រាង ចុះជួបសួរសុខទុក្ខ និងប្រមូលព័ត៌មានអត្តសញ្ញាណកម្ម (អត្តសញ្ញាណប័ណ្ណ សៀវភៅគ្រួសារ សំបុត្រកំណើត) ពីប្រជាពលរដ្ឋចំនួន ១៩គ្រួសារ នារសៀលថ្ងៃទី៥ ខែកក្កដា ឆ្នាំ២០២៦។ ក្នុងឱកាសនោះ ឯកឧត្តមបានពង្រឹងការយកចិត្តទុកដាក់លើចាស់ជរា អ្នកជំងឺ និងគ្រួសារក្រីក្រ ដោយបានឧបត្ថម្ភក្នុង ១គ្រួសារ ទទួលបានអង្ករ ១០គីឡូក្រាម និងថវិកា ២ម៉ឺនរៀល (ដោយឡែកចាស់ជរាមានជំងឺ ២នាក់ ទទួលបានថវិកាបន្ថែម ៤ម៉ឺនរៀលម្នាក់)។ ទន្ទឹមនឹងការងារសង្គមកិច្ច ឯកឧត្តមប្រធានក្រុមការងារ ក៏បានចុះពិនិត្យផ្ទាល់លើបញ្ហាប្រឈមរបស់ពលរដ្ឋរួមមាន៖ ពិនិត្យផ្លូវលំបាកចំនួន ២ខ្សែ ដែលជាតម្រូវការចាំបាច់ចំពោះមុខ។ ប្រព័ន្ធរំដោះទឹក៖ ពិនិត្យប្រឡាយទឹកប្រវែងប្រមាណ ៤០០ម៉ែត្រ ដែលកំពុងរងការស្ទះទឹក បង្កឡើងដោយសារការចាក់ដីលុបពីសំណាក់ផ្សារភូពុយ ដើម្បីរកដំណោះស្រាយជូនប្រជាពលរដ្ឋឱ្យបានទាន់ពេលវេលា៕

ភ្នំពេញ៖ លោក ងួន ប៉ោសេង អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញចូលរួមក្នុងសិក្ខាសាលាផ្សព្វផ្សាយសៀវភៅណែនាំស្តីពី «ការកសាងផែនការសកម្មភាពថ្នាក់ក្រោមជាតិសម្រាប់ការគាំពារ និងអភិវឌ្ឍកុមារតូច» នៅសណ្ឋាគារ ហ៉ីម៉ាវ៉ារី រាជធានីភ្នំពេញ នាព្រឹកថ្ងៃទី៦ ខែកក្កដា ឆ្នាំ២០២៦។ សិក្ខាសាលានេះប្រព្រឹត្តទៅក្រោមអធិបតីភាព លោកជំទាវបណ្ឌិត គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា និងលោកបណ្ឌិត អានៀរបាន ឆាតឺរជី (Anirban Chatterjee) នាយករងអង្គការយូនីសេហ្វ (UNICEF) ប្រចាំកម្ពុជា ដោយមានការចូលរួមពីថ្នាក់ដឹកនាំមន្ទីរអប់រំ យុវជន និងកីឡា ខេត្តពោធិ៍សាត់ ព្រមទាំងមន្ត្រីពាក់ព័ន្ធជាច្រើនរូប។ កម្មវិធីនេះរៀបចំឡើងក្នុងគោលបំណងពង្រឹងសមត្ថភាពដល់រដ្ឋបាលថ្នាក់ក្រោមជាតិ ក្នុងការរៀបចំផែនការសកម្មភាពឱ្យកាន់តែមានប្រសិទ្ធភាព សំដៅលើកកម្ពស់ការគាំពារ ការអប់រំ និងការអភិវឌ្ឍគ្រប់ជ្រុងជ្រោយដល់កុមារតូចៗនៅតាមមូលដ្ឋាន៕

ពោធិ៍សាត់៖ លោក ប៉ិច ស៊ីផាន់ ចៅសង្កាត់ផ្ទះព្រៃ បានដឹកនាំកម្លាំងចម្រុះរួមមាន សមាជិកក្រុមប្រឹក្សាសង្កាត់ ប៉ុស្តិ៍នគរបាលរដ្ឋបាលសង្កាត់ មេភូមិទាំង១៣ ប្រជាការពារភូមិ និងក្រុមទ្រទ្រង់សុខភាពភូមិ ចុះធ្វើសកម្មភាពថែទាំបរិស្ថាន និងសោភណភាពយ៉ាងសកម្ម នាថ្ងៃអាទិត្យ ទី៥ ខែកក្កដា ឆ្នាំ២០២៦ ។ ក្នុងយុទ្ធនាការនេះ ក្រុមការងារបានរួមគ្នាចុះតុបតែង ស្រោចទឹក និងជ្រោយដីជុំវិញគល់ដើមក្ងោកដែលបានដាំរួច ដើម្បីជួយឱ្យរុក្ខជាតិលម្អទាំងនោះលូតលាស់បានល្អ នៅតាមបណ្តោយដងផ្លូវវាងក្រុង ក្នុងគោលបំណងលើកកម្ពស់សោភណភាព និងបង្កើតគម្របបៃតងទាក់ទាញប្រចាំក្រុងពោធិ៍សាត់៕

ពោធិ៍សាត់៖ នាសប្ដាហ៍ទី១ នៃខែកក្កដា ឆ្នាំ២០២៦ ក្រុមការងារគណបក្សប្រជាជនកម្ពុជា ចុះជួយស្រុកក្រគរ និងស្រុកកណ្តៀង ខេត្តពោធិ៍សាត់ បានបន្តចុះបំពេញសកម្មភាពការងារបក្ស និងសួរសុខទុក្ខប្រជាពលរដ្ឋនៅតាមមូលដ្ឋានយ៉ាងសកម្ម។ ក្នុងនោះ ក្រុមការងារគណបក្សប្រជាជនកម្ពុជា ចុះជួយឃុំកញ្ជរ ស្រុកកណ្តៀង បានចុះជួបសម្តែងការគួរសម សួរសុខទុក្ខ និងនាំយកអំណោយ ក៏ដូចជាសារនយោបាយរបស់គណបក្សទៅចែករំលែកផ្ទាល់ជូនដល់សមាជិក សមាជិកាបក្ស និងបងប្អូនប្រជាពលរដ្ឋនៅតាមខ្នងផ្ទះ។ សកម្មភាពចុះជួយមូលដ្ឋានជាប្រចាំនេះ គឺដើម្បីស្វែងយល់ពីសុខទុក្ខ តម្រូវការជាក់ស្តែង និងជួយដោះស្រាយរាល់បញ្ហាប្រឈមនានា សំដៅពង្រឹងជំនឿចិត្ត និងភាពកក់ក្តៅជូនប្រជាពលរដ្ឋនៅថ្នាក់មូលដ្ឋាន៕

ពោធិ៍សាត់៖ ដោយអនុវត្តតាមមតិចង្អុលការរបស់ លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ លោកវរសេនីយ៍ឯក មោក ភារម្យ អធិការនគរបាលស្រុកក្រគរ បានណែនាំឱ្យកម្លាំងជំនាញផែនអត្តសញ្ញាណកម្ម ចុះផ្តល់អត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋនៅតាមបណ្តាឃុំទាំង១១ ក្នុងស្រុកក្រគរ។ ទន្ទឹមនឹងនោះ កម្លាំងប៉ុស្តិ៍នគរបាលរដ្ឋបាលទាំង ១១ឃុំ ក៏បានខិតខំចុះចែកអត្តសញ្ញាណប័ណ្ណ និងសៀវភៅគ្រួសារ ជូនប្រជាពលរដ្ឋដល់លំនៅឋានផ្ទាល់តែម្តង ដើម្បីបង្កលក្ខណៈងាយស្រួល និងកាត់បន្ថយការចំណាយពេលវេលារបស់បងប្អូនប្រជាពលរដ្ឋនៅក្នុងមូលដ្ឋាន៕

ពោធិ៍សាត់៖ លោក ធាង ឡេង អភិបាលនៃគណៈអភិបាលស្រុកវាលវែង បានអញ្ជើញជាអធិបតីភាពក្នុងការបើកកាត់វិញ្ញាសាប្រឡងសញ្ញាបត្រមធ្យមសិក្សាបឋមភូមិ (ឌីប្លូម) ជូនដល់បេក្ខជន នៅមណ្ឌលប្រឡងវិទ្យាល័យ ហ៊ុន សែន ប្រម៉ោយ ស្រុកវាលវែង ខេត្តពោធិ៍សាត់ នាព្រឹកថ្ងៃទី០៦ ខែកក្កដា ឆ្នាំ២០២៦ ។ ពិធីនេះក៏មានការអញ្ជើញចូលរួមពីលោកអភិបាលរងស្រុក លោកនាយករងរដ្ឋបាលសាលាស្រុក លោក-លោកស្រីប្រធានការិយាល័យជុំវិញស្រុក រួមទាំងលោកគ្រូ-អ្នកគ្រូផងដែរ ដើម្បីធានាឱ្យដំណើរការប្រឡងប្រព្រឹត្តទៅដោយរលូន ត្រឹមត្រូវ យុត្តិធម៌ និងមានសណ្តាប់ធ្នាប់ល្អ៕

ពោធិ៍សាត់៖ លោក ចាន់ វិចិត្រ អភិបាលនៃគណៈអភិបាលស្រុកតាលោសែនជ័យ បានអញ្ជើញជាអធិបតីក្នុងការបើកកាត់វិញ្ញាសាប្រឡងសញ្ញាបត្រមធ្យមសិក្សាបឋមភូមិ (ឌីប្លូម) ជូនដល់បេក្ខជន នៅមណ្ឌលប្រឡងអនុវិទ្យាល័យតាលោ ស្ថិតក្នុងឃុំតាលោ ស្រុកតាលោសែនជ័យ ខេត្តពោធិ៍សាត់ នាព្រឹកថ្ងៃទី៦ ខែកក្កដា ឆ្នាំ២០២៦។ ការអញ្ជើញចុះពិនិត្យ និងបើកវិញ្ញាសាផ្ទាល់ពីសំណាក់លោកអភិបាលស្រុក គឺដើម្បីធានាឱ្យដំណើរការប្រឡងប្រព្រឹត្តទៅដោយរលូន ស្របតាមគោលការណ៍ច្បាប់ យុត្តិធម៌ តម្លាភាព និងដើម្បីផ្ដល់កម្លាំងចិត្តដល់បេក្ខជនទាំងអស់ឱ្យខិតខំប្រឹងប្រែងប្រឡងឱ្យបានជោគជ័យ៕

ពោធិ៍សាត់៖ ក្នុងគោលបំណងលើកកម្ពស់សោភណភាព បរិស្ថាន និងបង្កើតភាពទាក់ទាញដល់វិស័យទេសចរណ៍ធម្មជាតិ នាថ្ងៃទី៥ ខែកក្កដា ឆ្នាំ២០២៦ ឯកឧត្តម ខូយ រីដា អភិបាលខេត្តពោធិ៍សាត់ បានដឹកនាំក្រុមការងារចុះត្រួតពិនិត្យ និងបង្ហាត់បង្រៀនបច្ចេកទេសដាំ ថែទាំ និងតែងដើមឈើលម្អតាមដងផ្លូវនានាក្នុងខេត្តដោយផ្ទាល់។ សកម្មភាពយុទ្ធនាការបៃតងនេះ បានធ្វើឡើងភ្លាមៗ បន្ទាប់ពីឯកឧត្តមអភិបាលខេត្ត បានបញ្ចប់កម្មវិធីបំពាក់កន្សែងជូនយុវជនកាកបាទក្រហមកម្ពុជា ចំនួន ៥០នាក់ នៅវិទ្យាល័យ ហ៊ុន សែន បាក់ចិញ្ចៀន ស្រុកភ្នំក្រវាញ។ យុទ្ធនាការនេះ មានការចូលរួមយ៉ាងផុសផុលពីសំណាក់មន្ត្រីរដ្ឋបាលក្រុងពោធិ៍សាត់, រដ្ឋបាលស្រុកបាកាន, រដ្ឋបាលសង្កាត់ផ្ទះព្រៃ រួមទាំងក្រុមយុវជនសេដ្ឋកិច្ចក្រៅប្រព័ន្ធនៃមជ្ឈមណ្ឌលកម្សាន្តស្លាមាស, ស្កាយបារ និងកោះកាហ្វេ ក្នុងស្មារតីរួមគ្នាស្ដារ និងលើកកម្ពស់គម្របបៃតងទូទាំងខេត្ត៕

យោងតាមអនុក្រឹត្យ របស់រាជរដ្ឋាភិបាលកម្ពុជា លេខ៥៦៤ អនក្រ.តត ចុះថ្ងៃទី៣០ ខែមិថុនា ឆ្នាំ២០២៦ បានសម្រេចតែងតាំងលោក អ៊ន សុផល្លា ឋានន្តរសក្តិវរមន្ត្រី ថ្នាក់លេខ២ ឱ្យកាន់មុខតំណែង ជាអភិបាលនៃគណៈអភិបាលស្រុកក្រគរ ខេត្តពោធិ៍សាត់។ និងប្រកាសរបស់ក្រសួងមហាផ្ទៃ លេខ៦៦៧៤.ប្រក ចុះថ្ងៃទី០៨ ខែមិថុនា ឆ្នាំ២០២៦ បានសម្រេចផ្ទេរភារកិច្ច លោក ក្រូច សុខុន ឋានន្តរសក្តិនាយក្រមការ ថ្នាក់លេខ២ ពីអភិបាលរងនៃគណៈអភិបាលក្រុងពោធិ៍សាត់ ឱ្យកាន់មុខតំណែងជាអភិបាលរងនៃគណៈអភិបាលស្រុកក្រគរ។

ឯកឧត្តម ខូយ រីដា អភិបាលនៃគណៈអភិបាលខេត្ត និងប្រធានគណៈកម្មាធិការ សាខាកាកបាទក្រហមកម្ពុជាខេត្តពោធិ៍សាត់ បានអញ្ជើញដាំដើមឈើធ្នុងចំនួន២០០ដើម សំដៅរួមចំណែកលើកកម្ពស់សោភ័ណភាពបរិស្ថាន នាព្រឹកថ្ងៃអាទិត្យ ទី៥ ខែកក្កដា ឆ្នាំ២០២៦នៅវិទ្យាល័យហ៊ុនសែនបាក់ចិញ្ជៀន ស្រុកភ្នំក្រវាញ ដោយបានការចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ និងសិស្សានុសិស្សអនុនិងវិទ្យាល័យប្រមាណជាង១ពាន់នាក់។