ព័ត៌មានក្នុងខេត្ត

ឱកាសការងារ ចំនួន៣ទីតាំង ស្មើ៣២កន្លែង មាននៅក្នុងភូមិសាស្រ្តខេត្តពោធិ៍សាត់

លោកអភិបាលស្រុកក្រគរ អមដំណើរដោយមន្ត្រីរដ្ឋបាលស្រុក បានសហការយ៉ាងជិតស្និទ្ធជាមួយអាជ្ញាធរឃុំ និងមេភូមិ ចុះពិនិត្យទីតាំងអាជីវកម្មទិញ លក់អេតចាយមួយកន្លែង ដែលស្ថិតនៅជាប់ប្រឡាយ ទល់មុខវត្តសម្តេចយស ក្នុងឃុំស្នាអន្សា ស្រុកក្រគរ ខេត្តពោធិ៍សាត់ នាថ្ងៃទី០៧ ខែកញ្ញា ឆ្នាំ២០២៦។

សេចក្តីជូនដំណឹង បន្តហាត់រៀនសិល្បៈដោយឥតគិតថ្លៃ! មន្ទីរវប្បធម៌ និងវិចិត្រសិល្បៈខេត្តពោធិ៍សាត់ សូមជូនដំណឹងដល់ សិស្សានុសិស្ស និងសិក្ខាកាមសិល្បៈ ដែលបានបញ្ចប់ការហាត់រៀនសិល្បៈក្នុង វគ្គបណ្តុះបណ្តាលសិល្បៈ វគ្គ១ ឆ្នាំ២០២៦ ឱ្យបានជ្រាបថា មន្ទីរនឹងរៀបចំបើក វគ្គបណ្តុះបណ្តាលសិល្បៈ វគ្គ២ ឆ្នាំ២០២៦ ដើម្បីឱ្យសិស្សានុសិស្សអាចបន្តអភិវឌ្ឍសមត្ថភាព និងជំនាញសិល្បៈរបស់ខ្លួន។

កម្មករ កម្មការិនី នៃរោងចក្រកាត់ដេរ «លានហ្វាហេងយូ» ស្ថិតក្នុងឃុំស្នាមព្រះ ស្រុកបាកាន ខេត្តពោធិ៍សាត់ បានប្រមូលផ្តុំគ្នាតវ៉ា និងបិទផ្លូវជាតិលេខ៥ បង្កឱ្យមានការកកស្ទះចរាចរណ៍យ៉ាងខ្លាំង នាថ្ងៃទី៨ ខែកញ្ញា ឆ្នាំ២០២៦។

ពោធិ៍សាត់៖ លោក អ៊ន សុផល្លា អភិបាលស្រុកក្រគរ បានអញ្ជើញដឹកនាំកិច្ចប្រជុំជាមួយមន្ត្រីរាជការនៃការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកក្រគរ នៅឯសាលាស្រុកក្រគរ កាលពីព្រឹកថ្ងៃទី៧ ខែកញ្ញា ឆ្នាំ២០២៦។ កិច្ចប្រជុំនេះ រៀបចំឡើងក្នុងគោលបំណងពង្រឹងសាមគ្គីភាព ឯកភាពផ្ទៃក្នុង និងពិនិត្យលើវឌ្ឍនភាពនៃការអនុវត្តការងារកន្លងមក ព្រមទាំងកំណត់ទិសដៅការងារបន្តសម្រាប់ឆ្នាំ២០២៦។ ក្នុងឱកាសនោះ លោកអភិបាលស្រុក បានណែនាំដល់មន្ត្រីជំនាញទាំងអស់ ឱ្យបង្កើនការយកចិត្តទុកដាក់ខ្ពស់លើការផ្តល់សេវាជូនប្រជាពលរដ្ឋ ពាក់ព័ន្ធនឹងវិស័យដីធ្លី ការសាងសង់ និងការចេញប័ណ្ណកម្មសិទ្ធិផ្សេងៗ ដោយត្រូវកាន់ខ្ជាប់នូវក្រមសីលធម៌វិជ្ជាជីវៈ ភាពស្មោះត្រង់ រហ័សរហួន និងតម្លាភាព។ បន្ថែមពីលើនេះ លោក អ៊ន សុផល្លា ក៏បានជំរុញឱ្យមានការយកចិត្តទុកដាក់ដោះស្រាយរាល់សំណូមពរ និងបណ្តឹងតវ៉ារបស់ប្រជាពលរដ្ឋឱ្យបានទាន់ពេលវេលា និងស្របតាមផ្លូវច្បាប់ ក៏ដូចជាការបន្តពង្រឹងការគ្រប់គ្រងសំណង់ និងការរៀបចំដែនដីក្នុងមូលដ្ឋានស្រុកក្រគរឱ្យកាន់តែមានរបៀបរៀបរយល្អប្រសើរថែមទៀត៕

លោក គិត ផល អនុប្រធានក្តាប់រួមមន្ទីរធនធានទឹក និងឧតុនិយមខេត្តពោធិ៍សាត់ បានដឹកនាំក្រុមការងារចុះពិនិត្យការប្រមើលផលស្រូវរដូវវស្សា ព្រមទាំងតាមដានសកម្មភាពអន្តរាគមន៍ជួយសង្គ្រោះស្រូវវស្សាដែលកំពុងប្រឈមនឹងការខ្វះខាតទឹក ស្ថិតក្នុងភូមិសាស្ត្រស្រុកភ្នំក្រវាញ និងស្រុកតាលោសែនជ័យ នាថ្ងៃទី០៧ ខែកញ្ញា ឆ្នាំ២០២៦ ។

យោងតាមកិច្ចចង្អុលការដឹកនាំពីរដ្ឋបាលខេត្តពោធិ៍សាត់ លោក អ៊ន សុផល្លា អភិបាលនៃគណៈអភិបាលស្រុកក្រគរ បានដឹកនាំក្រុមការងារជំនាញរដ្ឋបាលស្រុក សហការជាមួយអាជ្ញាធរឃុំ និងភូមិ ចុះសម្របសម្រួលដោះស្រាយទំនាស់ដីធ្លីរ៉ាំរ៉ៃជាច្រើនឆ្នាំរបស់ប្រជាពលរដ្ឋឈ្មោះ សុខ សៅវឿន ភេទស្រី នាថ្ងៃទី0៧ ខែកញ្ញា ឆ្នាំ២០២៦ ។

ភ្នំពេញ៖ នាថ្ងៃចន្ទ ១០រោច ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៧ ខែកញ្ញា ឆ្នាំ២០២៦ ឯកឧត្តម ម៉ក់ រ៉ា ប្រធានក្រុមប្រឹក្សាខេត្តពោធិ៍សាត់ និងឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ បានអញ្ជើញចូលរួមក្នុងពិធីបុណ្យគម្រប់ ៧ថ្ងៃ ដើម្បីឧទ្ទិសកុសលជូនវិញ្ញាណក្ខន្ធ ឯកឧត្តម តី ម៉ាលី អនុរដ្ឋលេខាធិការ ក្រសួងព័ត៌មាន និងត្រូវជាឪពុកបង្កើតរបស់ លោកជំទាវ ម៉ាលី សុជាតា ដែលពិធីនេះបានរៀបចំឡើងនៅវត្តសន្សំកុសល ស្ថិតក្នុងសង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ។ សូមបញ្ជាក់ថា ឯកឧត្តម តី ម៉ាលី បានទទួលមរណភាព កាលពីថ្ងៃពុធ ៥រោច ខែស្រាពណ៌ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២ ខែកញ្ញា ឆ្នាំ២០២៦ វេលាម៉ោង ៤:៣៨ នាទីព្រឹក ក្នុងជន្មាយុ ៦៨ឆ្នាំ ដោយរោគាពាធ។ នៅក្នុងឱកាសប្រកបដោយសេចក្តីសោកសង្វេគនេះ ថ្នាក់ដឹកនាំខេត្តពោធិ៍សាត់ ព្រមទាំងប្រជាពលរដ្ឋ សូមចូលរួមរំលែកនូវមរណទុក្ខដ៏មហាក្រៀមក្រំ និងសម្តែងនូវការស្តាយស្រណោះជាទីបំផុតជាមួយក្រុមគ្រួសារនៃសព ព្រមទាំងបានឧទ្ទិសបួងសួងសូមឱ្យដួងវិញ្ញាណក្ខន្ធរបស់ ឯកឧត្តម តី ម៉ាលី បានទៅកាន់សុគតិភព កុំបីឃ្លៀងឃ្លាតឡើយ៕

ពោធិ៍សាត់៖ លោក ហៀម ឃួន ប្រធានក្រុមការងារចុះជួយសង្កាត់រលាប បានអញ្ជើញចុះសួរសុខទុក្ខ និងនាំយកអំណោយជាអង្កររបស់ ឯកឧត្តម អភិបាលនៃគណៈអភិបាលខេត្តពោធិ៍សាត់ ទៅចែកជូនលោកតា លោកយាយចាស់ៗ ចំនួន ១៨ គ្រួសារ ស្ថិតនៅក្នុងភូមិឆ្លងកាត់ សង្កាត់រលាប ក្រុងពោធិ៍សាត់ ខេត្តពោធិ៍សាត់ នាថ្ងៃទី៧ ខែកញ្ញា ឆ្នាំ២០២៦ ។ នៅក្នុងពិធីចែកអំណោយនោះ គ្រួសារលោកតា លោកយាយនីមួយៗទទួលបាន អង្ករចំនួន ១០ គីឡូក្រាម និងសារ៉ុងមួយ ដើម្បីជួយសម្រាលទុក្ខធុរៈ និងផ្គត់ផ្គង់ជីវភាពប្រចាំថ្ងៃ។ កាយវិការដ៏ប្រពៃនេះ បានស្តែងឱ្យឃើញពីការយកចិត្តទុកដាក់ខ្ពស់ពីសំណាក់ថ្នាក់ដឹកនាំ និងអាជ្ញាធរមូលដ្ឋាន ចំពោះសុខទុក្ខរបស់ប្រជាពលរដ្ឋ ជាពិសេសចាស់ជរាគ្មានទីពឹងនៅក្នុងសហគមន៍៕

ពោធិ៍សាត់៖ លោក ធាម សុផាត អភិបាល នៃគណៈអភិបាលស្រុកភ្នំក្រវាញ បានអញ្ជើញចុះសួរសុខទុក្ខ និងពិនិត្យមើលការជួសជុលផ្ទះសម្បែងរបស់ក្រុមគ្រួសារវីរកងទ័ព ដែលរស់នៅក្នុងភូមិក្រូចឆ្មារ ឃុំលាច ស្រុកភ្នំក្រវាញ ខេត្តពោធិ៍សាត់ នារសៀល ថ្ងៃទី៧ ខែកញ្ញា ឆ្នាំ២០២៦។ នៅក្នុងឱកាសនោះ លោកអភិបាលស្រុក ក៏បាននាំយកអំណោយមនុស្សធម៌របស់អនុសាខាកាកបាទក្រហមកម្ពុជាស្រុកភ្នំក្រវាញ ទៅប្រគល់ជូនគ្រួសារវីរកងទ័ព ដើម្បីជួយសម្រាលជីវភាពរស់នៅ។ អំណោយដែលបានឧបត្ថម្ភរួមមាន៖ អង្ករ, មី, ទឹកត្រី, ទឹកស៊ីអ៊ីវ, ត្រីខ និងថវិកាផ្ទាល់ខ្លួនមួយចំនួន ព្រមទាំងបានសម្តែងនូវការដឹងគុណយ៉ាងជ្រាលជ្រៅចំពោះកាយវិការលះបង់របស់វីរកងទ័ពក្នុងការការពារជាតិមាតុភូមិ៕

ពោធិ៍សាត់៖ លោក ធាម សុផាត អភិបាល នៃគណៈអភិបាលស្រុកភ្នំក្រវាញ បានអញ្ជើញដឹកនាំមន្ត្រីរាជការនៃរដ្ឋបាលស្រុក ចុះសួរសុខទុក្ខលោកមេឃុំសន្ទ្រែ ដោយផ្ទាល់ដល់លំនៅឋាន ស្ថិតក្នុងភូមិគល់ទទឹង ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ ដែលកំពុងសម្រាកព្យាបាលជំងឺ នារសៀល ថ្ងៃទី៧ ខែកញ្ញា ឆ្នាំ២០២៦ ។ ក្នុងឱកាសប្រកបដោយមនោសញ្ចេតនាស្និទ្ធស្នាលនោះ លោកអភិបាលស្រុក ក៏បានសម្តែងនូវការព្រួយបារម្ភ និងបានសាកសួរដោយយកចិត្តទុកដាក់អំពីអាការរោគ ព្រមទាំងជូនពរឱ្យលោកមេឃុំ ឆាប់បានជាសះស្បើយពីជំងឺ ដើម្បីត្រឡប់មកបំពេញភារកិច្ច និងបម្រើបងប្អូនប្រជាពលរដ្ឋក្នុងឃុំសន្ទ្រែវិញនាពេលឆាប់ៗខាងមុខនេះ៕

ពោធិ៍សាត់៖ លោក ធាម សុផាត អភិបាល នៃគណៈអភិបាលស្រុកភ្នំក្រវាញ បានអញ្ជើញចុះពិនិត្យទីតាំងជាក់ស្តែង ដែលត្រូវរៀបចំសាងសង់អគារសិក្សាថ្មីចំនួន ១ខ្នង មាន ៥បន្ទប់ ស្ថិតនៅអនុវិទ្យាល័យគល់ទទឹង នារសៀល ថ្ងៃទី៧ ខែកញ្ញា ឆ្នាំ២០២៦ ។ ការចុះពិនិត្យទីតាំងផ្ទាល់នាពេលនេះ គឺដើម្បីរៀបចំរៀងចំផែនការ និងធានាឱ្យដំណើរការសាងសង់អគារសិក្សាថ្មីនេះ ប្រព្រឹត្តទៅដោយរលូន ប្រកបដោយគុណភាព និងសុវត្ថិភាព សំដៅឆ្លើយតបទៅនឹងតម្រូវការសិក្សារបស់សិស្សានុសិស្ស ក៏ដូចជាការចូលរួមលើកកម្ពស់ហេដ្ឋារចនាសម្ព័ន្ធវិស័យអប់រំនៅក្នុងស្រុកភ្នំក្រវាញ ខេត្តពោធិ៍សាត់ឱ្យកាន់តែប្រសើរឡើង៕