ព័ត៌មានក្នុងខេត្ត

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានជួបសំណេះសំណាលជាមួយមន្ត្រីបក្សមូលដ្ឋានចំនួន ១,០២៣នាក់ ក្នុងសង្កាត់រលាប ក្រុងពោធិ៍សាត់ ដើម្បីពង្រឹងសាមគ្គីភាព ត្រៀមបោះឆ្នោតឃុំ-សង្កាត់ឆ្នាំ២០២៧ និងផ្តាំផ្ញើឱ្យមន្ត្រីបន្តបម្រើពលរដ្ឋឱ្យទាន់ពេលវេលា។ ជាមួយគ្នានេះ ឯកឧត្តមបានបង្ហើបពីការសម្ពោធ «ពហុកីឡដ្ឋានសម្តេចតេជោក្រគរ វាលសម្តេចយស» នៅថ្ងៃទី៣១ ខែធ្នូ ឆ្នាំ២០២៦ គម្រោងសាងសង់ច្រាំងស្ទឹងពោធិ៍សាត់ប្រវែង ៤គីឡូម៉ែត្រ ព្រមទាំងទិសដៅអភិវឌ្ឍន៍ទេសចរណ៍ និងកសិ-ថាមពលនៅស្រុកវាលវែង និងការពង្រីករោងចក្រ-ឧស្សាហកម្មបង្កើតការងារនៅស្រុកក្រគរ និងស្រុកបាកាន។

លោក ធាម សុផាត អភិបាលស្រុកភ្នំក្រវាញ បានអញ្ជើញចូលរួមកិច្ចប្រជុំពិនិត្យ និងវាយតម្លៃវឌ្ឍភាពការអនុវត្តគម្រោងដាំបង្គោលសូឡា នៅសាលាឃុំលាច ស្រុកភ្នំក្រវាញ​​​ ខេត្តពោធិ៍សាត់។ កិច្ចប្រជុំនេះផ្តោតលើការតាមដានលទ្ធផលការងារ និងកំណត់ទិសដៅអនុវត្តបន្ត ដើម្បីធានាឱ្យគម្រោងសម្រេចបានតាមផែនការ មានគុណភាព និងរួមចំណែកលើកកម្ពស់សុវត្ថិភាពជូនប្រជាពលរដ្ឋក្នុងមូលដ្ឋាន។

ឯកឧត្តមបណ្ឌិត ទី ថានី ប្រធានក្រុមការងារយុវជន គ្រូបង្រៀន និងមន្ត្រីរាជការ បានដឹកនាំកិច្ចប្រជុំត្រៀមការប្រកួតកីឡាពានរង្វាន់ «៧ មករា» ស្រុកបាកាន លើកទី៤ ឆ្នាំ២០២៧។ ព្រឹត្តិការណ៍នេះរៀបចំឡើងក្រោមការឧបត្ថម្ភគាំទ្រពី ឯកឧត្តម កែវ រតនៈ និង ឯកឧត្តមបណ្ឌិត ទី នរិន្ទ ដើម្បីលើកកម្ពស់វិស័យកីឡាមូលដ្ឋាន ពង្រឹងសាមគ្គីភាព និងលើកទឹកចិត្តយុវជនឱ្យស្រឡាញ់សុខភាពនិងចាកឆ្ងាយពីគ្រឿងញៀន។

អភិបាលរងខេត្តដឹកនាំកិច្ចប្រជុំស្តីពី ការរៀបចំផែនការសកម្មភាព និងថវិកាឆ្នាំ២០២៧ សម្រាប់ការងារកំណែទម្រង់វិមជ្ឈការ និងវិសហមជ្ឈការ ដើម្បីពិភាក្សាលើការបែងចែកថវិកា ការពង្រឹងប្រសិទ្ធភាពការងារអភិបាលកិច្ចមូលដ្ឋាន និងការផ្តល់សេវាសាធារណៈឱ្យកាន់តែល្អប្រសើរ។

លោកជំទាវ ទិត្យ ម៉ាលីន អគ្គនាយករងពន្ធនាគារ បានចុះពិនិត្យការងារ និងរបបអាហារជនជាប់ឃុំនៅពន្ធនាគារខេត្តពោធិ៍សាត់ នាថ្ងៃទី១១ វិច្ឆិកា ២០២៦។ លោកជំទាវបានវាយតម្លៃអង្គភាពថាល្អប្រសើរ និងណែនាំឱ្យបន្តយកចិត្តទុកដាក់លើអនាម័យនិងគុណភាពម្ហូបអាហារ។

ឯកឧត្តម បួន ហេង អគ្គនាយករងក្រសួងមហាផ្ទៃ និងលោក ហៀម ឃួន អភិបាលរងខេត្តពោធិ៍សាត់ បានបើកសិក្ខាសាលាស្តីពីបច្ចេកទេសផ្តល់សេវារដ្ឋបាលថ្នាក់ក្រោមជាតិ នៅសាលប្រជុំទេពឧញ៉ាឃ្លាំងមឿង ដើម្បីពង្រឹងប្រសិទ្ធភាពការិយាល័យច្រកចេញចូលតែមួយជូនប្រជាពលរដ្ឋ។

រដ្ឋបាលខេត្តពោធិ៍សាត់នានៅព្រឹក ថ្ងៃទី១១ ខែវិច្ឆិកា ឆ្នាំ២០២៦ បានប្រារព្ធពិធីអបអរសាទរខួបអនុស្សាវរីយ៍លើកទី៧៣ ទិវាបុណ្យឯករាជ្យជាតិ ៩វិច្ឆិកា និងទិវាកំណើតនៃកងយោធពលខេមរភូមិន្ទ២០២៦ ដែលជាព្រឹត្តិការណ៍ដ៏សំខាន់ដើម្បីរំលឹកដល់ការទទួលបានឯករាជ្យពេញលេញពីអាណានិគមនិយមបារាំងឆ្នាំ១៩៥៣ ក្រោមព្រះរាជភោជនីយកិច្ចដ៏ឧត្តុងឧត្តមរបស់ព្រះករុណាព្រះបាទសម្ដេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យជាតិ។

លោក អ៊ន សុផល្លា អភិបាលស្រុកក្រគរ ខេត្តពោធិ៍សាត់ រួមជាមួយក្រុមការងារ បានចុះពិនិត្យគម្រោងហេដ្ឋារចនាសម្ព័ន្ធចំនួន ៣ កាលពីព្រឹកថ្ងៃទី១០ ខែវិច្ឆិកា ឆ្នាំ២០២៦ រួមមាន៖ ផ្លូវក្រួសក្រហមនៅឃុំឈើតុំរួចរាល់ ១០០% ផ្លូវកៅស៊ូនៅឃុំស្វាយសសម្រេចបាន ៧០% និងស្ពានចំនួន ៣ កន្លែងនៅឃុំស្វាយសសម្រេចបាន ៦៥% ដើម្បីធានាគុណភាព និងការប្រើប្រាស់បានយូរអង្វែង។

រាជរដ្ឋាភិបាលកម្ពុជា បាននាំយកស្បៀងអាហារចែកជូនប្រជាពលរដ្ឋរងគ្រោះដោយទឹកជំនន់ចំនួន ១.០០៥គ្រួសារ មកពីឃុំឈើតុំ និងឃុំស្វាយស នាព្រឹកថ្ងៃទី១០ ខែវិច្ឆិកា ឆ្នាំ២០២៦ នៅវត្តទួលត្បែង ស្រុកក្រគរ ដើម្បីជួយសម្រាលទុក្ខលំបាក និងតម្រូវការចាំបាច់របស់ប្រជាពលរដ្ឋបានទាន់ពេលវេលា។

លោក ផាយ ឡេង អភិបាលក្រុងពោធិ៍សាត់ បានដឹកនាំអាជ្ញាធរ និងប្រជាពលរដ្ឋ ចុះសម្អាតបរិស្ថាន និងរៀបចំសណ្តាប់ធ្នាប់សាធារណៈតាមដងផ្លូវឆ្ពោះទៅវត្តលលកសថ្មី ក្នុងសង្កាត់លលកស សកម្មភាពនេះធ្វើឡើងដើម្បីលើកកម្ពស់សោភ័ណភាពក្រុង និងជំរុញឱ្យប្រជាពលរដ្ឋចូលរួមថែរក្សាអនាម័យជាប្រចាំ។

លោក ផាយ ឡេង អភិបាលក្រុងពោធិ៍សាត់ បានអញ្ជើញជាអធិបតីក្នុងពិធីសម្ពោធអគារសិក្សា ១ខ្នង (៣បន្ទប់) និងបង្គន់អនាម័យ ១ខ្នង (៥បន្ទប់) នៅវិទ្យាល័យទាចំរ៉ាត់។ សមិទ្ធផលទាំងនេះជាជំនួយពីសប្បុរសជនជប៉ុន (ក្រុមហ៊ុន នីស៊ីកាវ៉ា កីសូគុ និងអង្គការ EDF) ដើម្បីលើកកម្ពស់គុណភាពអប់រំ អនាម័យសិស្ស និងពង្រឹងមិត្តភាពកម្ពុជា-ជប៉ុន។

សម្តេចធិបតី ហ៊ុន ម៉ាណែត តាមរយៈប្រព័ន្ធស្បៀងបម្រុងកម្ពុជា បានចែកស្បៀងអាហារជូនពលរដ្ឋរងគ្រោះដោយទឹកជំនន់ចំនួន ១.៣១៨គ្រួសារ នៅវត្តសំសាន្ត ស្រុកតាលោសែនជ័យ ខេត្តពោធិ៍សាត់ ដើម្បីជួយសម្រាលការលំបាកក្នុងជីវភាពរស់នៅប្រចាំថ្ងៃ។