លោក ផាយ ឡេង អភិបាលក្រុងពោធិ៍សាត់ បានអញ្ជើញជាអធិបតីក្នុងពិធីសម្ពោធអគារសិក្សា ១ខ្នង (៣បន្ទប់) និងបង្គន់អនាម័យ ១ខ្នង (៥បន្ទប់) នៅវិទ្យាល័យទាចំរ៉ាត់។ សមិទ្ធផលទាំងនេះជាជំនួយពីសប្បុរសជនជប៉ុន (ក្រុមហ៊ុន នីស៊ីកាវ៉ា កីសូគុ និងអង្គការ EDF) ដើម្បីលើកកម្ពស់គុណភាពអប់រំ អនាម័យសិស្ស និងពង្រឹងមិត្តភាពកម្ពុជា-ជប៉ុន។
លោក អ៊ន សុផល្លា អភិបាលស្រុកក្រគរ ខេត្តពោធិ៍សាត់ រួមជាមួយក្រុមការងារ បានចុះពិនិត្យគម្រោងហេដ្ឋារចនាសម្ព័ន្ធចំនួន ៣ កាលពីព្រឹកថ្ងៃទី១០ ខែវិច្ឆិកា ឆ្នាំ២០២៦ រួមមាន៖ ផ្លូវក្រួសក្រហមនៅឃុំឈើតុំរួចរាល់ ១០០% ផ្លូវកៅស៊ូនៅឃុំស្វាយសសម្រេចបាន ៧០% និងស្ពានចំនួន ៣ កន្លែងនៅឃុំស្វាយសសម្រេចបាន ៦៥% ដើម្បីធានាគុណភាព និងការប្រើប្រាស់បានយូរអង្វែង។
រាជរដ្ឋាភិបាលកម្ពុជា បាននាំយកស្បៀងអាហារចែកជូនប្រជាពលរដ្ឋរងគ្រោះដោយទឹកជំនន់ចំនួន ១.០០៥គ្រួសារ មកពីឃុំឈើតុំ និងឃុំស្វាយស នាព្រឹកថ្ងៃទី១០ ខែវិច្ឆិកា ឆ្នាំ២០២៦ នៅវត្តទួលត្បែង ស្រុកក្រគរ ដើម្បីជួយសម្រាលទុក្ខលំបាក និងតម្រូវការចាំបាច់របស់ប្រជាពលរដ្ឋបានទាន់ពេលវេលា។
លោក ផាយ ឡេង អភិបាលក្រុងពោធិ៍សាត់ បានដឹកនាំអាជ្ញាធរ និងប្រជាពលរដ្ឋ ចុះសម្អាតបរិស្ថាន និងរៀបចំសណ្តាប់ធ្នាប់សាធារណៈតាមដងផ្លូវឆ្ពោះទៅវត្តលលកសថ្មី ក្នុងសង្កាត់លលកស សកម្មភាពនេះធ្វើឡើងដើម្បីលើកកម្ពស់សោភ័ណភាពក្រុង និងជំរុញឱ្យប្រជាពលរដ្ឋចូលរួមថែរក្សាអនាម័យជាប្រចាំ។
សម្តេចធិបតី ហ៊ុន ម៉ាណែត តាមរយៈប្រព័ន្ធស្បៀងបម្រុងកម្ពុជា បានចែកស្បៀងអាហារជូនពលរដ្ឋរងគ្រោះដោយទឹកជំនន់ចំនួន ១.៣១៨គ្រួសារ នៅវត្តសំសាន្ត ស្រុកតាលោសែនជ័យ ខេត្តពោធិ៍សាត់ ដើម្បីជួយសម្រាលការលំបាកក្នុងជីវភាពរស់នៅប្រចាំថ្ងៃ។
