ព័ត៌មានក្នុងខេត្ត

ពោធិ៍សាត់៖ ការផ្តល់ស្បៀងអាហារ និងស្រូវពូជ ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈប្រព័ន្ធស្បៀងបម្រុងកម្ពុជា ជូនដល់ប្រជាពលរដ្ឋរងគ្រោះធម្មជាតិក្នុងមូលដ្ឋានស្រុកបាកាន ចំនួន ២.៦៨២គ្រួសារ នៅព្រឹកថ្ងៃទី៩ ខែវិច្ឆិកា ឆ្នាំ២០២៦ នៅវិទ្យាល័យអូរតាប៉ោង ស្រុកបាកាន ខេត្តពោធិ៍សាត់។ ពិធីនេះប្រារព្ធឡើងក្រោមអធិបតីភាព ឯកឧត្តម ឡាំ ហេងហួត រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានគណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា ដែលជាតំណាងដ៏ខ្ពង់ខ្ពស់របស់ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ។ អំណោយមនុស្សធម៌នេះ គឺជាការឆ្លើយតបយ៉ាងទាន់ពេលវេលារបស់រាជរដ្ឋាភិបាលក្នុងការជួយសម្រាលការលំបាក និងស្តារជីវភាពរបស់ប្រជាពលរដ្ឋដែលបានរងផលប៉ះពាល់ដោយសារគ្រោះធម្មជាតិនាពេលកន្លងមក ព្រមទាំងផ្តល់ស្រូវពូជសម្រាប់ធ្វើការបង្កបង្កើនផលឡើងវិញផងដែរ៕

ឯកឧត្តមបណ្ឌិត លី ណារុន និងក្រុមការងារ បានចុះពិនិត្យផ្លូវគម្រោង RRCIP-JICA ចំនួន ២ខ្សែ ស្វាយដូនកែវ-ច្រប់-ស្តុកឃ្លោក និងអូរតាប៉ោង-តាណៃ ក្នុងស្រុកបាកាន ខេត្តពោធិ៍សាត់ ដែលរងការជន់លិចដោយទឹកភ្លៀង ដោយបច្ចុប្បន្នស្ថានភាពទឹកកំពុងស្រកចុះបណ្តើរៗហើយ។

ពោធិ៍សាត់៖ កាលពីយប់ថ្ងៃទី១៤ ខែតុលា ឆ្នាំ២០២៦ អាជ្ញាធរដែនដី សហការយ៉ាងជិតស្និទ្ធជាមួយប្រជាពលរដ្ឋក្នុងមូលដ្ឋាន បានចុះធ្វើយុទ្ធនាការរួមគ្នាយ៉ាងសកម្ម ក្នុងការរៀបចំច្រកការ៉ុងខ្សាច់ទប់ទឹកតាមបណ្តោយដងស្ទឹង ស្ថិតក្នុងឃុំស្វាយលួង និងឃុំអន្លង់វិល ស្រុកកណ្តៀង ខេត្តពោធិ៍សាត់ ដើម្បីត្រៀមបង្ការ និងទប់ស្កាត់ផលប៉ះពាល់ផ្សេងៗ ដែលអាចកើតមានឡើងដោយសារជំនន់ទឹកភ្លៀង។ សកម្មភាពប្រកបដោយស្មារតីទទួលខុសត្រូវខ្ពស់នាពេលយប់ជ្រៅនេះ បានបង្ហាញយ៉ាងច្បាស់ពីកិច្ចសហការយ៉ាងរឹងមាំរវាងអាជ្ញាធរ និងសហគមន៍ ព្រមទាំងឆ្លុះបញ្ចាំងពីការយកចិត្តទុកដាក់ខ្ពស់បំផុតលើសុវត្ថិភាព ជីវភាព និងទ្រព្យសម្បត្តិរបស់បងប្អូនប្រជាពលរដ្ឋក្នុងមូលដ្ឋាន។ តាមរយៈកិច្ចខិតខំប្រឹងប្រែងរួមគ្នានេះ នឹងជួយកាត់បន្ថយហានិភ័យនៃការលិចលង់ និងការពារផលប្រយោជន៍របស់ប្រជាសហគមន៍បានយ៉ាងទាន់ពេលវេលា៕

លោក ផាយ ឡេង អភិបាល នៃគណៈអភិបាលក្រុងពោធិ៍សាត់ បានដឹកនាំការចុះពិនិត្យស្ថានភាពជំនន់ទឹកភ្លៀងនៅតាមបណ្តាសង្កាត់ចំនួន២ រួមមាន សង្កាត់ព្រៃញី និងសង្កាត់រលាប ដើម្បីពិនិត្យមើលស្ថានភាពជាក់ស្តែងដែលបង្កឡើងដោយទឹកភ្លៀង នាថ្ងៃទី១៤ ខែតុលា ឆ្នាំ២០២៦។

ទឹកស្ទឹងពោធិ៍សាត់បានកើនឡើងយ៉ាងលឿនគួរឱ្យកត់សម្គាល់ គិតត្រឹមម៉ោង ១២:៣០នាទី ថ្ងៃត្រង់ ថ្ងៃទី១៤ ខែតុលា ឆ្នាំ២០២៦នេះ។ ស្ថានភាពនេះតម្រូវឱ្យប្រជាពលរដ្ឋ និងអាជ្ញាធរពាក់ព័ន្ធបង្កើនការប្រុងប្រយ័ត្នខ្ពស់ចំពោះគ្រោះទឹកជំនន់។

ឯកឧត្តម ឡាំ ហេងហួត និងឯកឧត្តម ខូយ រីដា បានចុះពិនិត្យផលប៉ះពាល់ជំនន់ទឹកភ្លៀងនៅស្រុកក្រគរ ខេត្តពោធិ៍សាត់ និងរៀបចំផែនការផ្តល់ស្បៀងសង្គ្រោះបន្ទាន់។​ ទឹកជំនន់នេះបានវាយលុកឃុំចំនួន១១ (៤៧ភូមិ) ប៉ះពាល់ពលរដ្ឋ ១,៣២៤គ្រួសារ និងលិចផ្លូវ៥៧ខ្សែ ខណៈឃុំឈើតុំរងគ្រោះធ្ងន់ធ្ងរជាងគេ (៦ភូមិ មានពលរដ្ឋ ៩៥៦គ្រួសារ)។

ឥទ្ធិពលប្រព័ន្ធសម្ពាធទាបពី ព្យុះទី២៨ (Nolo) និងព្យុះទី២៩ (Koguma) បានបង្កឱ្យមានភ្លៀងធ្លាក់ជាប់ៗគ្នា ៤ថ្ងៃ រហូតបង្កើតជាជំនន់ទឹកភ្លៀងប៉ះពាល់ដល់ស្រុកក្រគរ និងស្រុកបាកាន។

នាវេលាម៉ោង ១០:០០យប់ ថ្ងៃទី១៣ ខែតុលា ឆ្នាំ២០២៦ ក្រោមការដឹកនាំបញ្ជា និងចុះប្រតិបត្តិការដោយផ្ទាល់ពី ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ កងកម្លាំងសមត្ថកិច្ច អាជ្ញាធរមូលដ្ឋាន និងក្រុមគ្រូពេទ្យ បានសហការគ្នាយ៉ាងស្រស្រាក់ស្រាំ ធ្វើអន្តរាគមន៍ជម្លៀសប្រជាពលរដ្ឋជាអ្នកជំងឺចំនួន ១៥២នាក់ ជាបន្ទាន់ បន្ទាប់ពីទីតាំងមន្ទីរពេទ្យបង្អែកស្រុកក្រគរ បានរងការជន់លិចដោយសារជំនន់ទឹកភ្លៀង។

កងរាជអាវុធហត្ថ និងកងកម្លាំងនគរបាល បានចុះអន្តរាគមន៍ភ្លាមៗ ដើម្បីជួយជម្លៀសប្រជាពលរដ្ឋ ចាស់ជរា កុមារ និងជញ្ជូនសម្ភារៈទៅកាន់ទីទួលសុវត្ថិភាព ក្រោយរងផលប៉ះពាល់ដោយជំនន់ទឹកភ្លៀង នៅក្នុងស្រុកក្រគរ ខេត្តពោធិ៍សាត់។ ដោយសារភ្លៀងនៅផ្នែកខាងលើនៅតែបន្តធ្លាក់ អាជ្ញាធរ និងកងកម្លាំងសូមអំពាវនាវឱ្យបងប្អូនប្រជាពលរដ្ឋបង្កើនការប្រុងប្រយ័ត្នខ្ពស់ពីការកើនឡើងនៃកម្រិតទឹក, ប្រយ័ត្នសុវត្ថិភាពកុមារតូចៗ និងសត្វអសិរពិស, រៀបចំទុកដាក់ឯកសារ និងសម្ភារសំខាន់ៗនៅទីទួលខ្ពស់។ បច្ចុប្បន្ន កងកម្លាំងចម្រុះកំពុងប្រចាំការ ២៤ម៉ោង លើ ២៤ម៉ោង ដើម្បីរង់ចាំជួយសង្គ្រោះប្រជាពលរដ្ឋបានទាន់ពេលវេលា។

ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ បានដឹកនាំក្រុមការងារបច្ចេកទេស និងអាជ្ញាធរមូលដ្ឋាន ចុះពិនិត្យស្ថានភាពជំនន់ទឹកភ្លៀងរហ័ស (Flash Flood) ដែលកំពុងហូរជន់លិចផ្លូវក្រួសក្រហមមួយខ្សែ ប្រវែងជាង ២០០ម៉ែត្រ នៅចំណុចខ្សាច់ហាប ស្ថិតក្នុងភូមិទានព្រៃ ឃុំឈើតុំ ស្រុកក្រគរ ខេត្តពោធិ៍សាត់ ដើម្បីវាយតម្លៃផលប៉ះពាល់ជាក់ស្តែង និងឆ្លើយតបចំពោះបញ្ហាប្រឈមរបស់ប្រជាពលរដ្ឋឱ្យបានទាន់ពេលវេលា នាថ្ងៃទី២៦ ខែកញ្ញា ឆ្នាំ២០២៦។

រដ្ឋបាលស្រុកក្រគរ បានចេញសេចក្តីជូនដំណឹងជាផ្លូវការដល់សាធារណជន ឱ្យបានជ្រាបពីស្ថានភាពជំនន់ទឹកភ្លៀងរហ័ស (Flash Flood) ដែលបានកើតឡើង បន្ទាប់ពីមានភ្លៀងធ្លាក់ជាប់ៗគ្នា រយៈពេល ៤ ទៅ ៥ថ្ងៃ នៅតំបន់ភាគខាងលើនៃជួរភ្នំ។

រដ្ឋបាលស្រុកក្រគរ ជូនដំណឹងអំពីស្ថានភាព ជំនន់ទឹកភ្លៀង និងទឹកជំនន់រហ័ស ដែលកើតឡើងបន្ទាប់ពីមានភ្លៀងធ្លាក់រយៈពេល ៥ថ្ងៃ នៅតំបន់ប៉ែកខាងលើភ្នំ។ ជំនន់បានប៉ះពាល់ដល់លំនៅឋានប្រជាពលរដ្ឋ ផ្លូវ និងស្ពានមួយចំនួន នៅក្នុងឃុំចំនួន៥។