ព័ត៌មានក្នុងខេត្ត

កិច្ចប្រជុំនេះធ្វើឡើងក្នុងគោលបំណងប្រមូលព័ត៌មាន វាយតម្លៃស្ថានភាពជាក់ស្តែង និងដាក់ចេញនូវវិធានការអន្តរាគមន៍សង្គ្រោះឱ្យបានទាន់ពេលវេលា ដើម្បីដោះស្រាយបញ្ហាខ្វះខាតទឹក សំដៅកាត់បន្ថយការខូចខាតផលដំណាំស្រូវរបស់ប្រជាកសិករឱ្យនៅកម្រិតទាបបំផុត។

(ភ្នំពេញ)៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអញ្ជើញចុះពិនិត្យដោយផ្ទាល់នូវការរៀបចំ និងត្រៀមលក្ខណៈសម្បត្តិសម្រាប់ដំណើរការ "ជំរឿនមន្ត្រីរាជការក្រសួងព័ត៌មាន" ដែលនឹងប្រព្រឹត្តទៅរយៈពេល២ថ្ងៃ គឺនៅថ្ងៃទី២៣ និងទី២៤ ខែកក្កដា ឆ្នាំ២០២៦ នៅទីស្តីការក្រសួងព័ត៌មាន។ ទន្ទឹមនឹងការចុះពិនិត្យនេះ ក្រសួងព័ត៌មានក៏បានធ្វើការអំពាវនាវ និងជូនដំណឹងដល់បងប្អូនមន្ត្រីរាជការទាំងអស់ចំណុះឱ្យក្រសួងព័ត៌មាន សូមមេត្តាត្រៀមលក្ខណៈចូលរួម និងរៀបចំឯកសារពាក់ព័ន្ធឱ្យបានរួចរាល់ ដើម្បីឱ្យដំណើរការនៃការប្រមូលទិន្នន័យជំរឿននេះ ប្រព្រឹត្តទៅដោយរលូន និងមានប្រសិទ្ធភាពខ្ពស់៕

ក្រសួងមហាផ្ទៃ៖ ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ បានអញ្ជើញចូលរួមផ្តល់កិច្ចសម្ភាសន៍ផ្ទាល់នៅស្ថានីយវិទ្យុ និងទូរទស្សន៍មហាផ្ទៃ នាថ្ងៃទី២១ ខែកក្កដា ឆ្នាំ២០២៦។ ក្នុងឱកាសនោះ ឯកឧត្តមអភិបាលខេត្ត បានគូសបញ្ជាក់យ៉ាងលម្អិតអំពី សមិទ្ធផលការងារសំខាន់ៗ ដែលរដ្ឋបាលខេត្តពោធិ៍សាត់សម្រេចបាន នាពេលកន្លងមក ព្រមទាំងបានបង្ហាញអំពីទិសដៅការងារត្រូវអនុវត្តបន្តប្រចាំឆមាស ប្រចាំឆ្នាំ២០២៦ និងបណ្តាឆ្នាំខាងមុខ ដើម្បីជំរុញការអភិវឌ្ឍ និងលើកកម្ពស់ជីវភាពប្រជាពលរដ្ឋក្នុងខេត្តឱ្យកាន់តែប្រសើរឡើង៕

កិច្ចប្រជុំបូកសរុបការងារនេះ ត្រូវត្រៀមបង្ការជួយអន្តរាគមន៍និងឆ្លើយតបឲ្យបានទាន់ពេលវេលាដល់ជនងាយរងគ្រោះដោយគ្រោះធម្មជាតិតែងកើតមានជាបន្តបន្ទាប់ និងត្រូវយកចិត្តទុកដាក់ចុះអប់រំ ផ្សព្វផ្សាយដល់ប្រជាពលរដ្ឋបង្កើនការយល់ដឹងអំពីជំងឺឆ្លងនិងជំងឺមិនឆ្លង ព្រមទាំងករណីគ្រោះថ្នាក់ចរាចរណ៍ លើកកម្ពស់សមត្ថភាពមន្ត្រី និងយុវជនស្ម័គ្រចិត្តនៅតាមគ្រឹះស្ថានសិក្សា និង សហគមន៍ ដើម្បីក្លាយជាប្រតិបត្តិករមិនអាចខ្វះបានក្នុងការបំពេញការងារមនុស្សធម៌។

ពោធិ៍សាត់៖ លោកជំទាវ អាំង សុជាតា ខូយរីដា ប្រធានកិត្តិយសសាខាសមាគមនារីខេត្ត និងលោកជំទាវ ឈឹម ស៊ីណា ប្រធានគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តពោធិ៍សាត់ ព្រមទាំងថ្នាក់ដឹកនាំ និងសមាជិកា បាននាំយកទៀនចំណាំព្រះវស្សា និងទេយ្យទានជាច្រើនមុខ ទៅវេរប្រគេនព្រះសង្ឃដែលគង់ចាំព្រះវស្សានៅវត្តសុវណ្ណស្លាកែត ស្ថិតក្នុងស្រុកក្រគរ ខេត្តពោធិ៍សាត់ នាថ្ងៃទី២០ ខែកក្កដា ឆ្នាំ២០២៦។ ក្នុងឱកាសដ៏មានសទ្ធាជ្រះថ្លានេះ លោកជំទាវ អាំង សុជាតា ខូយរីដា បានមានប្រសាសន៍បញ្ជាក់ថា ការប្រគេនទៀនវស្សា និងទេយ្យទាននេះ ធ្វើឡើងដើម្បីគោរពតាមទំនៀមទម្លាប់ប្រពៃណីព្រះពុទ្ធសាសនា ព្រមទាំងដើម្បីឧទ្ទិសកុសលផលបុណ្យដ៏ថ្លៃថ្លា ជូនដល់ដួងវិញ្ញាណក្ខន្ធវីរកងទ័ព ដែលបានពលីជីវិតក្នុងការការពារបូរណភាពទឹកដីកម្ពុជាផងដែរ៕

នៅក្នុងឱកាសនោះ លោកជំទាវ អាំង សុជាតា ខូយរីដា បានមានប្រសាសន៍ថា ការនាំយកទេយ្យទានមកប្រគេនព្រះសង្ឃនាពេលនេះ គឺដើម្បីចូលរួមទ្រទ្រង់ព្រះពុទ្ធសាសនា និងសម្រាលការលំបាករបស់ព្រះសង្ឃក្នុងរដូវវស្សា ជាពិសេសគឺដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធវីរកងទ័ព ដែលបានពលីជីវិតដើម្បីការពារបូរណភាពទឹកដី ព្រមទាំងបន់ស្រន់សុំសេចក្តីសុខ និងកម្លាំងកាយចិត្តមាំមួនជូនដល់កងទ័ពដែលកំពុងឈរជើងនៅតាមព្រំដែនផងដែរ។

ពោធិ៍សាត់៖ លោកជំទាវ មាន សំអាន ប្រធានគណៈកម្មការទី៨ នៃព្រឹទ្ធសភា បានដឹកនាំគណៈប្រតិភូចុះជួបពិភាក្សាការងារជាមួយរដ្ឋបាលខេត្តពោធិ៍សាត់ ដែលដឹកនាំដោយ ឯកឧត្តម ខូយ រីដា អភិបាលខេត្ត ព្រមទាំងថ្នាក់ដឹកនាំមន្ទីរ-អង្គភាពពាក់ព័ន្ធ នាព្រឹកថ្ងៃចន្ទ ទី២០ ខែកក្កដា ឆ្នាំ២០២៦ នេះ។ កិច្ចប្រជុំដែលធ្វើឡើងនៅសាលប្រជុំទេពឧកញ៉ា ឃ្លាំង មឿង នៃសាលាខេត្តពោធិ៍សាត់នេះ មានគោលបំណងសំខាន់ដើម្បីស្វែងយល់ពីវឌ្ឍនភាព បញ្ហាប្រឈម វិធានការដោះស្រាយ និងចក្ខុវិស័យទៅថ្ងៃអនាគតលើវិស័យសំខាន់ៗ ដែលស្ថិតក្រោមសមត្ថកិច្ចរបស់គណៈកម្មការទី៨ រួមមាន៖ វិស័យសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៅក្នុងភូមិសាស្ត្រខេត្តពោធិ៍សាត់៕

ខេត្តពោធិ៍សាត់៖ លោក លាង ទិតដ្ឋាន ប្រធានមន្ទីរព័ត៌មានខេត្តពោធិ៍សាត់ បានដឹកនាំកិច្ចប្រជុំស្តីពីការរៀបចំផែនការ និងបែងចែកភារកិច្ចមន្ត្រីចុះតាមមូលដ្ឋាន ដើម្បីស្រង់ស្ថិតិប្រជាពលរដ្ឋដែលត្រូវធ្វើ និងបន្តសុពលភាពអត្តសញ្ញាណប័ណ្ណសញ្ជាតិខ្មែរ នៅភូមិជំរុំសៀម សង្កាត់លលកស ក្រុងពោធិ៍សាត់ នាព្រឹកថ្ងៃទី២០ ខែកក្កដា ឆ្នាំ២០២៦។ ក្នុងឱកាសនោះ លោកប្រធានមន្ទីរបានណែនាំដល់មន្ត្រីទាំងអស់ ត្រូវអនុវត្តការងារប្រកបដោយការទទួលខុសត្រូវខ្ពស់ និងត្រូវសហការល្អជាមួយអាជ្ញាធរមូលដ្ឋាន។ បន្ថែមលើនេះ ត្រូវខិតខំផ្សព្វផ្សាយឱ្យប្រជាពលរដ្ឋបានយល់ដឹងពីសារៈសំខាន់នៃការធ្វើអត្តសញ្ញាណប័ណ្ណ ដើម្បីធានាបាននូវភាពត្រឹមត្រូវនៃទិន្នន័យ ងាយស្រួលដល់ពលរដ្ឋយកទៅប្រើប្រាស់ក្នុងសង្គម ក៏ដូចជាប្រើប្រាស់សម្រាប់ការបោះឆ្នោតនាពេលខាងមុខប្រកបដោយប្រសិទ្ធភាពខ្ពស់៕

ពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញចុះពិនិត្យស្ថានភាពទំនប់បង្ហៀរទឹកឈើតោក ស្ថិតក្នុងឃុំសន្ទ្រែ ស្រុកភ្នំក្រវាញ ដើម្បីវាយតម្លៃពីស្ថានភាពទឹក និងត្រៀមលក្ខណៈអន្តរាគមន៍គ្រោះធម្មជាតិផ្សេងៗ។ ការចុះពិនិត្យនេះ ក៏ធ្វើឡើងក្នុងគោលបំណងធានាដល់ការផ្គត់ផ្គង់ទឹកស្អាតសម្រាប់ការរស់នៅ និងការបង្កបង្កើនផលកសិកម្មរបស់ប្រជាពលរដ្ឋនៅក្នុងតំបន់នោះឱ្យបានគ្រប់គ្រាន់ផងដែរ៕

ពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញចុះពិនិត្យ និងវាយតម្លៃការងារនៅអនុវិទ្យាល័យសម្តេចឪ សម្តេចម៉ែ ក្នុងស្រុកភ្នំក្រវាញ នាព្រឹកថ្ងៃទី១៩ ខែកក្កដា ឆ្នាំ២០២៦។ ការចុះផ្ទាល់នេះ គឺដើម្បីជម្រុញការកែលម្អសោភ័ណភាព និងបរិស្ថានសិក្សា ព្រមទាំងលើកទឹកចិត្តដល់បុគ្គលិកអប់រំ សំដៅលើកកម្ពស់គុណភាពនៃការបង្រៀន និងការរៀនរបស់សិស្សានុសិស្សឱ្យកាន់តែប្រសើរឡើង៕

ខេត្តពោធិ៍សាត់៖ យុទ្ធនាការដាំកូនឈើក្រោមប្រធានបទ រួមគ្នាដាំដើមឈើ ដើម្បីបរិស្ថានបៃតង និងសោភ័ណភាពសហគមន៍ ត្រូវបានរៀបចំឡើងយ៉ាងផុសផុល ក្រោមអធិបតីភាព ឯកឧត្តម អេង គន្ធា អគ្គនាយករងអគ្គិសនីកម្ពុជា និងជាប្រធានក្រុមការងារចុះជួយឃុំអន្សាចំបក់ នាព្រឹកថ្ងៃទី១៨ ខែកក្កដា ឆ្នាំ២០២៦។ នៅក្នុងកម្មវិធីនេះ ឯកឧត្តមបានដឹកនាំកម្លាំងចម្រុះ រួមមាន ថ្នាក់ដឹកនាំស្រុកក្រគរ កងកម្លាំងប្រដាប់អាវុធ មន្ត្រីអប់រំ អាជ្ញាធរឃុំ លោកគ្រូ អ្នកគ្រូ និងក្រុមយុវជន បានរួមគ្នាសហការដាំដើមក្ងោកចំនួន ១០០ ដើម នៅតាមបណ្តោយដងផ្លូវចូលទៅកាន់អនុវិទ្យាល័យកោះរំដួល ស្ថិតក្នុងឃុំអន្សាចំបក់ ស្រុកក្រគរ ខេត្តពោធិ៍សាត់។ សកម្មភាពដ៏មានអត្ថន័យនេះ បានបង្ហាញឱ្យឃើញពីការយកចិត្តទុកដាក់ខ្ពស់របស់ថ្នាក់ដឹកនាំ និងសហគមន៍ ក្នុងការរួមចំណែកលើកកម្ពស់សោភ័ណភាព បង្កើតគម្របបៃតង និងផ្តល់ម្លប់ត្រជាក់ត្រជុំសម្រាប់សិស្សានុសិស្ស ក៏ដូចជាប្រជាពលរដ្ឋដែលធ្វើដំណើរឆ្លងកាត់ក្នុងមូលដ្ឋានទាំងមូលផងដែរ៕

ពោធិ៍សាត់៖ សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ស្រុកវាលវែង បានសម្តែងនូវការគោរពថ្លែងអំណរគុណយ៉ាងជ្រាលជ្រៅបំផុត ចំពោះគណៈប្រតិភូសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តពោធិ៍សាត់ ដែលដឹកនាំដោយ លោកជំទាវ អាំង សុជាតា ខូយ រីដា ប្រធានកិត្តិយសសាខាសមាគមនារីខេត្ត។ ការថ្លែងអំណរគុណនេះ ធ្វើឡើងបន្ទាប់ពីលោកជំទាវប្រធានកិត្តិយស និងគណៈប្រតិភូ តែងតែយកចិត្តទុកដាក់ចុះសួរសុខទុក្ខ សំណេះសំណាលផ្ទាល់ ព្រមទាំងបាននាំយកនូវគ្រឿងឧបភោគបរិភោគ និងសម្ភារៈប្រើប្រាស់ចាំបាច់ជាច្រើន ទៅឧបត្ថម្ភជូនដល់វរកងទ័ពដែលកំពុងឈរជើងការពារទឹកដីនៅជួរមុខ និងប្រជាពលរដ្ឋភៀសសឹក នៅតាមបណ្ដាខេត្តជាប់ព្រំដែន ជាពិសេសនៅក្នុងភូមិសាស្ត្រស្រុកវាលវែង។ សកម្មភាពមនុស្សធម៌ដ៏ថ្លៃថ្លានេះ មិនត្រឹមតែបានរួមចំណែកសម្រាលការលំបាក និងលើកទឹកចិត្តដល់កងទ័ពជួរមុខ និងប្រជាពលរដ្ឋប៉ុណ្ណោះទេ ប៉ុន្តែថែមទាំងបានស្តែងឱ្យឃើញពីសាមគ្គីភាព និងការយកចិត្តទុកដាក់ខ្ពស់របស់ថ្នាក់ដឹកនាំសមាគមនារីខេត្តចំពោះសុខទុក្ខរបស់កងកម្លាំង និងប្រជាជននៅតំបន់ព្រំដែនផងដែរ៕