ព័ត៌មានក្នុងខេត្ត

ពោធិ៍សាត់៖ ក្រុមការងារបច្ចេកទេសកសិកម្មចម្រុះ រួមមានការិយាល័យក្សេត្រសាស្ត្រ ការិយាល័យកសិកម្មធនធានធម្មជាតិ និងបរិស្ថាន ការិយាល័យសេដ្ឋកិច្ចអភិវឌ្ឍន៍សហគមន៍ និងមន្ត្រីកសិកម្មឃុំ-សង្កាត់ បានចុះពិនិត្យ និងវាយតម្លៃផលប៉ះពាល់ដំណាំស្រូវវស្សា នៅសង្កាត់ផ្ទះព្រៃ (ភូមិគក អូរស្តៅ ត្នោតទ្រេត) និងឃុំបឹងបត់កណ្ដោល (ភូមិស្វាយ បត់កណ្ដោល សំរោង អូរ និងបត់ត្រាច)។ តាមការពិនិត្យជាក់ស្ដែង មកទល់ពេលនេះ ផ្ទៃដីស្រូវក្នុងឃុំ-សង្កាត់ទាំងពីរ ទទួលបានទឹកភ្លៀងឡើងវិញ ដែលធ្វើឱ្យដំណាំស្រូវចាប់ផ្ដើមលូតលាស់ជាថ្មី។ ទោះជាយ៉ាងណា មានផ្ទៃដីស្រូវមួយផ្នែកបានរងការខូចខាត ហើយអាជ្ញាធរ និងប្រជាកសិករកំពុងជួយសង្គ្រោះ និងស្តារឡើងវិញជាបណ្តើរៗ៕

ភ្នាក់ងារសង្កេតការណ៍ ACU បានចុះពិនិត្យមណ្ឌលប្រឡងបាក់ឌុបចំនួនពីរ គឺវិទ្យាល័យពោធិ៍សាត់ (ជើង) និង (ត្បូង) ដើម្បីត្រួតពិនិត្យដំណើរការរៀបចំសម្រាប់ការប្រឡងសម័យថ្ងៃទី១០ សីហា ២០២៦ ក្រោមការអមដំណើរពីមន្ត្រីមន្ទីរអប់រំ និងថ្នាក់ដឹកនាំសាលា។

ក្រុមប្រឹក្សាក្រុងពោធិ៍សាត់ បានរៀបចំកិច្ចប្រជុំសាមញ្ញលើកទី២៧ អាណត្តិទី៤ ក្រោមអធិបតីភាពលោក សំរិទ្ធិ អេង និងលោកស្រី សេង ហួយ ដើម្បីពិភាក្សាលើការអភិវឌ្ឍមូលដ្ឋាន និងការពង្រឹងសេវាសាធារណៈ ដោយមានការចូលរួមពីមន្ត្រីរាជការ និងកងកម្លាំងប្រដាប់អាវុធពាក់ព័ន្ធជាច្រើនរូប។

ពោធិ៍សាត់៖ លោក ម៉ក់ ពេញ ប្រធានការិយាល័យប្រឡង នៃមន្ទីរអប់រំ យុវជន និងកីឡាខេត្តពោធិ៍សាត់ (តំណាងលោក លឹម វុទ្ធី ប្រធានមន្ទីរ) ព្រមទាំងតំណាងអង្គភាពប្រឆាំងអំពើពុករលួយ (ACU) រសៀលថ្ងៃទី៦ ខែសីហា ឆ្នាំ២០២៦ បានចុះត្រួតពិនិត្យសុវត្ថិភាព និងការរៀបចំនៅមណ្ឌលប្រឡងអនុវិទ្យាល័យពោធិ៍សាត់ (កើត) និងមណ្ឌលអនុវិទ្យាល័យពោធិ៍សាត់ (លិច) ដើម្បីធានាឱ្យដំណើរការប្រឡងប្រព្រឹត្តទៅដោយរលូន យុត្តិធម៌ និងមានសណ្ដាប់ធ្នាប់ល្អ៕

ពោធិ៍សាត់៖ ស្ពានអូរឬស្សី ដែលស្ថិតនៅក្នុងភូមិក្សេត្របូរី ឃុំសន្ត្រែ ស្រុកភ្នំក្រវាញ ខេត្តពោធិ៍សាត់ បានចាប់ផ្ដើមដំណើរជួសជុលឡើងវិញហើយ បន្ទាប់ពីមានការខូចខាតយ៉ាងខ្លាំងកាលពីពេលកន្លងមក។ ការជួសជុលស្ពាននេះ ធ្វើឡើងដើម្បីសម្រួលដល់ការធ្វើដំណើរ និងការដឹកជញ្ជូនផ្សេងៗ របស់ប្រជាពលរដ្ឋក្នុងមូលដ្ឋានឱ្យបានងាយស្រួល និងមានសុវត្ថិភាពជាងមុន៕

ពោធិ៍សាត់៖ ពិធីបិទបវេសនកាល និងប្រគល់រង្វាន់ជូនសិស្សជ័យលាភី សម្រាប់ឆ្នាំសិក្សា ២០២៤-២០២៥ ត្រូវបានរៀបចំឡើងយ៉ាងមហោឡារិកនៅវិទ្យាល័យពោធិ៍សាត់ ក្រោមអធិបតីភាព លោក ផាយ ឡេង អភិបាលក្រុងពោធិ៍សាត់ ដោយមានការចូលរួមពីថ្នាក់ដឹកនាំរដ្ឋបាលក្រុង លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។ ក្នុងឱកាសនោះ លោកអភិបាលក្រុង បានថ្លែងអំណរគុណ និងវាយតម្លៃខ្ពស់ចំពោះលោកគ្រូ អ្នកគ្រូ ដែលបានខិតខំបណ្ដុះបណ្ដាលសិស្សានុសិស្ស ប្រកបដោយស្មារតីទទួលខុសត្រូវខ្ពស់។ ជាមួយគ្នានេះ លោកបានអបអរសាទរ និងប្រគល់រង្វាន់លើកទឹកចិត្តជូនដល់សិស្សជ័យលាភីទាំងអស់ ព្រមទាំងបានផ្តាំផ្ញើឱ្យសិស្សានុសិស្សបន្តខិតខំរៀនសូត្រ ស្រាវជ្រាវបន្ថែម និងត្រូវចៀសវាងឱ្យឆ្ងាយពីគ្រឿងញៀន និងអំពើអបាយមុខផ្សេងៗ ដើម្បីក្លាយជាទំពាំងស្នងឫស្សី និងជាសសរទ្រូងដ៏រឹងមាំសម្រាប់ប្រទេសជាតិ៕

រដ្ឋបាលស្រុកកណ្តៀង បានសហការជាមួយប្រជាពលរដ្ឋ សិស្សានុសិស្ស និងអាជ្ញាធរពាក់ព័ន្ធ ជាប្រចាំក្នុងការដាំកូនឈើ និងសម្អាតបរិស្ថាន ដើម្បីបង្កើនគម្របបៃតង សោភ័ណភាព កាត់បន្ថយការបំពុល និងប្រយុទ្ធប្រឆាំងការប្រែប្រួលអាកាសធាតុ។ រដ្ឋបាលស្រុកក៏បានអំពាវនាវដល់គ្រប់ភាគីពាក់ព័ន្ធបន្តចូលរួមថែរក្សាដើមឈើ និងទុកដាក់សំណល់រឹងឱ្យបានត្រឹមត្រូវ ដើម្បីបរិស្ថានស្អាត និង ចីរភាពសហគមន៍។

ពោធិ៍សាត់៖ លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ ព្រមទាំងមន្ត្រីជំនាញ អមដោយអនុប្រធានមន្ទីរ និងប្រធាន-អនុប្រធានការិយាល័យពាក់ព័ន្ធ បានអញ្ជើញចូលរួមកិច្ចប្រជុំពិភាក្សាតាមប្រព័ន្ធ Zoom Meeting ស្ដីពី «ការប្រឈមលើការលូតលាស់ដំណាំស្រូវដែលរងផលប៉ះពាល់ដោយគ្រោះរាំងស្ងួត» ក្រោមអធិបតីភាព ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៥ ខែសីហា ឆ្នាំ២០២៦ ។ ក្នុងឱកាសនោះ លោកប្រធានមន្ទីរបានរាយការណ៍អំពីផែនការសកម្មភាពឆ្លើយតបចំពោះគ្រោះរាំងស្ងួត ការប្រមូលទិន្នន័យ និងវិធីសាស្ត្រវាយតម្លៃផលប៉ះពាល់ជា ៣ កម្រិត (ស្រាល មធ្យម និងធ្ងន់)។ ជាមួយគ្នានេះ មន្ទីរកសិកម្មខេត្តបានត្រៀមលក្ខណៈរួចរាល់ ក្នុងការចុះអន្តរាគមន៍ដោះស្រាយបញ្ហាជូនប្រជាកសិករឱ្យបានទាន់ពេលវេលា ដើម្បីកាត់បន្ថយផលប៉ះពាល់លើការលូតលាស់របស់ដំណាំស្រូវឱ្យមកនៅកម្រិតទាបបំផុត៕

ពោធិ៍សាត់៖ លោក បិន វណ្ណា សមាជិកក្រុមប្រឹក្សាស្រុកក្រគរ បានអញ្ជើញចុះពិនិត្យមើលដំណើរការស្ថាបនាផ្លូវកៅស៊ូនៅក្នុងឃុំអន្លង់ត្នោត ស្រុកក្រគរ ខេត្តពោធិ៍សាត់ នាថ្ងៃទី៦ ខែសីហា ឆ្នាំ២០២៦។ ក្នុងសកម្មភាពចុះពិនិត្យនេះ ផ្លូវមួយចំនួនបានបញ្ចប់ការចាក់កៅស៊ូជាន់ទី២ រួចរាល់ហើយ ខណៈផ្នែកខ្លះទៀតកំពុងបន្តបាញ់កៅស៊ូជាន់ទី១។ លើសពីនេះ រដ្ឋបាលមូលដ្ឋានក៏កំពុងរៀបចំ បំពាក់អំពូលសូឡាបំភ្លឺផ្លូវ ដើម្បីបង្កើនសោភ័ណភាព និងសុវត្ថិភាពក្នុងការធ្វើដំណើរបន្ថែមទៀត។ ចំណុចដែលគួរឱ្យកត់សម្គាល់ និងទទួលបានការសរសើរខ្លាំងនោះគឺ បរិស្ថានតាមដងផ្លូវមានភាពស្អាតបាត និងគ្មានសំរាមទាល់តែសោះ ដែលស្តែងចេញពីកិច្ចសហការល្អរវាងអាជ្ញាធរ និងការចូលរួមថែរក្សាអនាម័យពីសំណាក់ប្រជាពលរដ្ឋក្នុងមូលដ្ឋាន៕

អភិបាលស្រុកកណ្តៀង និងលោក សុខ លីមុត ប្រធានក្រុមប្រឹក្សាស្រុក បានដឹកនាំក្រុមការងារចុះប្រគល់-ទទួលទំនប់ស្ទាក់ទឹកខ្នាតមធ្យមព្រែកក្បាលរមាស និងពិនិត្យការស្តារប្រឡាយព្រមទាំងសំណង់ធារាសាស្ត្រនៅឃុំអន្លង់វិល និងភូមិព្រែកឈើត្រាវ ដើម្បីលើកកម្ពស់វិស័យកសិកម្ម និងជីវភាពប្រជាពលរដ្ឋ។

កម្លាំងនគរបាលប៉ុស្តិ៍អូសោមដឹកនាំដោយលោកនាយប៉ុស្ដិ៍ សោម រ៉ា និងប្រជាការពារ សរុប ៧នាក់ ចុះអន្តរាគមន៍តាមបណ្ដឹងរបស់ប្រពន្ធជនសង្ស័យ ជនបង្កបានទម្លាក់គ្រាប់បែកផ្ទុះបណ្ដាលឱ្យស្លាប់មនុស្សចំនួន ៦នាក់ រួមមាន៖ មន្ត្រីនគរបាល ២ នាក់ ប្រជាការពារ ៣នាក់ និងជនបង្កខ្លួនឯង និងរបួសធ្ងន់ប្រជាការពារម្នាក់ នាថ្ងៃទី៥ ខែសីហា ឆ្នាំ២០២៦ នៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ ជាប់ពាក់ព័ន្ធនឹងការប្រើប្រាស់គ្រឿងញៀន និងអំពើហិង្សាក្នុងគ្រួសារ។

ស្នងការនគរបាលខេត្តពោធិ៍សាត់ បានចុះណែនាំ និងពង្រឹងការងារនៅប៉ុស្តិ៍នគរបាលបាក់ចិញ្ចៀន និងសំរោង ដោយតម្រូវឱ្យពង្រឹងសន្តិសុខ ទប់ស្កាត់គ្រឿងញៀន ក្មេងទំនើង និង Scam Online ព្រមទាំងបានឧបត្ថម្ភថវិកា ២០ ម៉ឺនរៀល ដល់ប៉ុស្តិ៍នីមួយៗ ។