ព័ត៌មានក្នុងខេត្ត

ពោធិ៍សាត់៖ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីជួបសំណេះសំណាលជាមួយបងប្អូនប្រជាពលរដ្ឋ ស្ថិតនៅក្នុងសង្កាត់លលកស ក្រុងពោធិ៍សាត់ ខេត្តពោធិ៍សាត់ នាព្រឹកថ្ងៃទី៣ ខែវិច្ឆិកា ឆ្នាំ២០២៦។ នៅក្នុងពិធីសំណេះសំណាលនាឱកាសនោះ ឯកឧត្តមរដ្ឋមន្ត្រី បានពាំនាំនូវប្រសាសន៍សួរសុខទុក្ខ និងក្តីនឹកលឹកយ៉ាងជ្រាលជ្រៅពីសំណាក់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនចំពោះបងប្អូនប្រជាពលរដ្ឋទាំងអស់ក្នុងមូលដ្ឋាន។ ជាមួយគ្នានេះ ឯកឧត្តមបានគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាល លើការអភិវឌ្ឍន៍ហេដ្ឋារចនាសម្ព័ន្ធ មូលដ្ឋាន ជីវភាពរស់នៅ និងការដោះស្រាយបញ្ហាប្រឈមផ្សេងៗជូនប្រជាពលរដ្ឋឱ្យបានទាន់ពេលវេលា។ ពិធីនេះបានប្រព្រឹត្តទៅក្នុងបរិយាកាសស្និទ្ធស្នាល និងកក់ក្តៅជាពន់ពេក ដោយបងប្អូនប្រជាពលរដ្ឋបានបង្ហាញនូវក្តីសប្បាយរីករាយ និងថ្លែងអំណរគុណយ៉ាងជ្រាលជ្រៅចំពោះក្រុមការងាររាជរដ្ឋាភិបាល ដែលបានចុះផ្ទាល់ដល់មូលដ្ឋាន ដើម្បីស្តាប់នូវតម្រូវការ និងរួមសុខទុក្ខជាមួយប្រជាពលរដ្ឋយ៉ាងជិតស្និទ្ធ៕

សាលាខេត្តដុងថាប់(ថ្មី) សង្កាត់មីថ, គណៈប្រតិភូសមាគមអតីតយុទ្ធជន និងនិវត្តជនកម្ពុជាខេត្តពោធិ៍សាត់ ដឹកនាំដោយ លោក ហៀម ឃួន អភិបាលរងនៃគណៈអភិបាលខេត្ត និងជាអនុប្រធានសមាគមអតីតយុទ្ធជន និងនិវត្តជនកម្ពុជា ខេត្តពោធិ៍សាត់ តំណាងឯកឧត្តម ខូយ រីដា អភិបាលនៃគណៈអភិបាលខេត្ត និងជាអនុប្រធានសមាគមអតីតយុទ្ធជន និងនិវត្តជនកម្ពុជាខេត្ត បានអញ្ជើញបំពេញទស្សនកិច្ចសិក្សា និងចូលរួមជំនួបពិភាក្សាការងារជាមួយសមាគមអតីតយុទ្ធជនខេត្តដុងថាប់ នៃសាធារណរដ្ឋសង្គមនិយមវៀតណាម។

ពោធិ៍សាត់៖ នាព្រឹកថ្ងៃទី៣ ខែវិច្ឆិកា ឆ្នាំ២០២៦ នៅបញ្ជាការដ្ឋានកងរាជអាវុធហត្ថខេត្ត លោកវរសេនីយ៍ឯក សុខ ម៉េងឡុង មេបញ្ជាការស្ដីទីកងរាជអាវុធហត្ថខេត្តពោធិ៍សាត់ បានដឹកនាំកិច្ចប្រជុំផ្សព្វផ្សាយផែនការ ការពារសន្តិសុខ និងរក្សាសណ្ដាប់ធ្នាប់ ជូនសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាល ចែកពូជស្រូវ និងស្បៀងជូនប្រជាពលរដ្ឋ ដែលរងផលប៉ះពាល់ដោយជំនន់ទឹកភ្លៀង ស្ថិតក្នុងសង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។ កិច្ចប្រជុំនេះ ក៏មានសមាសភាពចូលរួមយ៉ាងកុះករផងដែរ រួមមាន៖ លោកមេបញ្ជាការរង ប្រធាន អនុប្រធានមន្ទីរ នាយ នាយរងការិយាល័យ មេបញ្ជាការមូលដ្ឋានកងរាជអាវុធហត្ថក្រុង-ស្រុក និងមេបញ្ជាការកងអនុសេនាធំចល័ត ដើម្បីកំណត់ផែនការសកម្មភាព និងការចាត់តាំងកម្លាំងអន្តរាគមន៍ការពារឱ្យបានហ្មត់ចត់ធានាបាននូវសុវត្ថិភាព សន្តិសុខ និងសណ្តាប់ធ្នាប់សង្គមក្នុងដំណើរអញ្ជើញចុះសំណេះសំណាល និងចែកអំណោយដល់ប្រជាពលរដ្ឋរងគ្រោះប្រកបដោយជោគជ័យ និងសុវត្ថិភាពពេញលេញ៕

លោកវរសេនីយ៍ឯក សុខ ម៉េងឡុង មេបញ្ជាការស្ដីទីកងរាជអាវុធហត្ថខេត្តពោធិ៍សាត់ បានអញ្ជើញបើកកិច្ចប្រជុំ និងចាត់ចែងចែកអំណោយជាអាវរងា ដែលជាអំណោយដ៏ថ្លៃថ្លា និងការយកចិត្តទុកដាក់ខ្ពស់ពីសំណាក់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនដល់នាយទាហាន និងនាយទាហានរង នៃកងរាជអាវុធហត្ថខេត្តពោធិ៍សាត់។

យោងតាមសកម្មភាពជាក់ស្តែង ក្រុមការងារបាននាំយកសៀវភៅសិក្សាជាច្រើនក្បាល ចែកជូនដល់ក្មួយៗសិស្សានុសិស្សតាមបណ្តាភូមិក្នុងឃុំស្វាយលួង សម្រាប់ត្រៀមខ្លួនចូលឆ្នាំសិក្សាថ្មី (២០២៦-២០២៧)។ ការផ្តល់ជូននេះមិនត្រឹមតែជួយសម្រាលបន្ទុកផ្នែកសម្ភារសិក្សារបស់អាណាព្យាបាលប៉ុណ្ណោះទេ ប៉ុន្តែថែមទាំងជាការបំផុសស្មារតី និងផ្តល់កម្លាំងចិត្តដល់សិស្សានុសិស្សទាំងអស់ឱ្យខិតខំប្រឹងប្រែងរៀនសូត្រ។

ពោធិ៍សាត់៖ ឯកឧត្តម ខូយ រីដា អភិបាលខេត្តពោធិ៍សាត់ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងារពិធីប្រណាំងទូក «ង» ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៦ ក្នុងខេត្តពោធិ៍សាត់ ដោយមានការអញ្ជើញចូលរួមពីសំណាក់មន្ត្រីរាជការ កងកម្លាំងប្រដាប់អាវុធ និងអាជ្ញាធរដែនដីពាក់ព័ន្ធជាច្រើនរូបផងដែរ នាព្រឹកថ្ងៃទី២ ខែវិច្ឆិកា ឆ្នាំ២០២៦ នៅសាលប្រជុំកោះសំពៅមាស ជាន់ទី១។ កិច្ចប្រជុំនេះរៀបចំឡើងក្នុងគោលបំណងពិនិត្យមើលលើកិច្ចការងារត្រៀមលក្ខណៈបច្ចេកទេស ផែនការសន្តិសុខ សណ្តាប់ធ្នាប់ និងការរៀបចំសោភ័ណភាពផ្សេងៗ សំដៅធានាឱ្យព្រឹត្តិការណ៍ប្រណាំងទូកថ្នាក់ខេត្តប្រព្រឹត្តទៅដោយរលូន និងប្រកបដោយបរិយាកាសសប្បាយរីករាយ។ សូមបញ្ជាក់ថា ពិធីប្រណាំងទូក «ង» ថ្នាក់ខេត្ត លើកទី៦ នឹងប្រព្រឹត្តទៅរយៈពេល ២ថ្ងៃពេញ គឺចាប់ពីថ្ងៃទី៧ ដល់ថ្ងៃទី៨ ខែវិច្ឆិកា ឆ្នាំ២០២៦ ខាងមុខនេះ នៅតាមដងស្ទឹងពោធិ៍សាត់ដ៏មានសក្តានុពល ខណៈដែលប្រជាពលរដ្ឋ និងកីឡាករទូកមកពីបណ្តាស្រុក/ក្រុងនានាកំពុងទន្ទឹងរង់ចាំទស្សនា៕

ឯកឧត្តមបណ្ឌិត ប្រាំង ជលសា បានជួបសំណេះសំណាលជាមួយមន្ត្រីបក្សមូលដ្ឋានស្រុកកណ្តៀង និងស្រុកក្រគរ ខេត្តពោធិ៍សាត់ ដោយបានលើកឡើងពីសមិទ្ធផលទំនប់វារីអគ្គិសនីស្ទឹងពោធិ៍សាត់១ ដែលត្រៀមដំណើរការចុងឆ្នាំនេះដើម្បីជួយដល់វិស័យថាមពល និងកសិកម្ម។ ជាមួយគ្នានោះ ឯកឧត្តមបានអំពាវនាវឱ្យប្រជាពលរដ្ឋ សន្សំសំចៃទឹក ទប់ទល់នឹងបាតុភូត El Niño និងផ្អាកធ្វើស្រែប្រាំងនៅតំបន់គ្មានទឹក ព្រមទាំងបានបញ្ជាក់ពីជំហរការពារអធិបតេយ្យភាពជាតិ និងការត្រៀមខ្លួនឆ្ពោះទៅបោះឆ្នោតឃុំ សង្កាត់ ឆ្នាំ២០២៧។

លោកអភិបាលស្រុកក្រគរ ខេត្តពោធិ៍សាត់ រួមជាមួយលោកប្រធានក្រុមការងារចុះជួយឃុំឈើតុំ បានអញ្ជើញចែកអំណោយជា សៀវភៅសរសេរ ជូនដល់ប្អូនៗសិស្សានុសិស្សនៅ សាលាបឋមសិក្សាក្បាលទាហ៊ាន ដើម្បីជួយលើកទឹកចិត្ត និងសម្រាលបន្ទុកក្នុងការសិក្សារបស់ពួកគាត់។

នៅ វត្តកែវសុវណ្ណ បានរៀបចំពិធីក្រុងពលីរំកិលទូកង «ទំព័រសុវណ្ណសែនជ័យបារមីលោកតាគ្រី» ក្រោមការឧបត្ថមគាំទ្ររបស់មន្ទីរព័ត៌មានខេត្តពោធិ៍សាត់ ដើម្បីសុំសេចក្តីសុខ និងត្រៀមខ្លួនចូលរួមប្រកួតប្រជែងក្នុង ព្រឹត្តិការណ៍ប្រណាំងទូកងខ្នាតអន្តរជាតិខេត្តពោធិ៍សាត់នាពេលខាងមុខ។

លោកអភិបាលស្រុកក្រគរ ខេត្តពោធិ៍សាត់ និងលោកប្រធានក្រុមការងារចុះជួយឃុំឈើតុំ បានចុះពិនិត្យ និងសម្របសម្រួលទីតាំងបូមខ្សាច់មួយកន្លែង នៅ ចំណុចទាមផ្អុង ភូមិក្បាលទាហ៊ាន ឃុំឈើតុំ ស្រុកក្រគរ តាមសំណូមពរដោះស្រាយរបស់ប្រជាពលរដ្ឋ ដើម្បីរកដំណោះស្រាយសមស្រប និងធានាផលប្រយោជន៍រួមក្នុងមូលដ្ឋាន។

លោក ធាង ឡេង អភិបាលស្រុកវាលវែង ខេត្តពោធិ៍សាត់ អញ្ជើញចូលរួមក្នុងពិធីបើកបវេសនកាល ឆ្នាំសិក្សា ២០២៦-២០២៧ នៅវិទ្យាល័យ ហ៊ុន សែន ប្រម៉ោយ និងប្រគល់លិខិតសរសើរជូនសិស្សានុសិស្សនិទ្ទេសល្អ។

ឯកឧត្តមកិត្តិសង្គហបណ្ឌិត គន់ គីម ឯកឧត្តមសន្តិបណ្ឌិត យូ ស៊ុនឡុង និង ឯកឧត្តម ខូយ រីដា បានអញ្ជើញដឹកនាំកិច្ចប្រជុំនៅខេត្តពោធិ៍សាត់ ដើម្បីដាក់ចេញវិធានការដោះស្រាយស្បៀងជូនប្រជាពលរដ្ឋរងគ្រោះដោយជំនន់ទឹកភ្លៀង និងគ្រោះរាំងស្ងួត ធានាការគាំពារជីវភាពទាន់ពេលវេលា។