ព័ត៌មានក្នុងខេត្ត

ពោធិ៍សាត់៖ មន្ត្រីជំនាញនៃមន្ទីរផែនការខេត្តពោធិ៍សាត់ បានចុះសម្ភាសន៍ និងប្រមូលទិន្នន័យសន្ទស្សន៍ថ្លៃទំនិញ និងសេវាកម្មនៅលើទីផ្សារ (CPI) ដោយផ្ទាល់ជាមួយអាជីវករ ស្ថិតនៅផ្សារពោធិ៍សាត់ ក្រុងពោធិ៍សាត់ ខេត្តពោធិ៍សាត់ នាថ្ងៃទី៧ ខែសីហា ឆ្នាំ២០២៦។ សកម្មភាពនេះ ធ្វើឡើងក្នុងគោលបំណងតាមដាន ចែករំលែក និងក្តាប់ឱ្យបាននូវការប្រែប្រួលតម្លៃទំនិញប្រើប្រាស់ប្រចាំថ្ងៃនៅលើទីផ្សារជាក់ស្តែង ដើម្បីជាមូលដ្ឋានទិន្នន័យយ៉ាងសំខាន់ក្នុងការវិភាគស្ថានភាពសេដ្ឋកិច្ច និងអត្រាអតិផរណា សម្រាប់បម្រើឱ្យការរៀបចំគោលនយោបាយ និងផែនការអភិវឌ្ឍន៍សេដ្ឋកិច្ច-សង្គមឱ្យមានប្រសិទ្ធភាព៕

ខេត្តពោធិ៍សាត់៖ យុទ្ធនាការពិនិត្យ និងផ្ទៀងផ្ទាត់លទ្ធផលនៃការស្រង់ទិន្នន័យទីតាំងដីចុះបញ្ជីឯកជនរបស់រដ្ឋ ដែលរងការទន្ទ្រានកាន់កាប់ពីប្រជាពលរដ្ឋ ត្រូវបានរៀបចំឡើងនៅក្នុងសាលប្រជុំរដ្ឋបាលស្រុកក្រគរ នាព្រឹកថ្ងៃទី៧ ខែសីហា ឆ្នាំ២០២៦។ កិច្ចប្រជុំនេះដឹកនាំដោយ លោក គឺ គឹមណូ អភិបាលរងស្រុក ដំណាងឱ្យលោកអភិបាលស្រុកក្រគរ ដោយមានកិច្ចសហការជាមួយមន្ទីរកសិកម្ម និងនាយរងខណ្ឌរដ្ឋបាលព្រៃឈើខេត្តពោធិ៍សាត់។ ជំនួបពិភាក្សានេះ មានការចូលរួមយ៉ាងសកម្មពីសំណាក់មន្ត្រីការិយាល័យជំនាញនៃរដ្ឋបាលស្រុក អាជ្ញាធរភូមិ-ឃុំពាក់ព័ន្ធ និងតំណាងក្រុមហ៊ុន។ ការចុះផ្ទៀងផ្ទាត់ និងប្រមូលទិន្នន័យជាក់ស្តែងនេះ កំពុងផ្តោតលើទីតាំងដីធ្លីស្ថិតក្នុងដែនសមត្ថកិច្ចនៃឃុំចំនួនបី រួមមាន ឃុំអន្សាចំបក់ ឃុំស្វាយស និងឃុំឈើតុំ ដើម្បីធានាបាននូវភាពទាក់ទិនច្បាស់លាស់ តម្លាភាព និងជាមូលដ្ឋានក្នុងការដោះស្រាយតាមនីតិវិធីច្បាប់៕

លោក ធាង សេង អភិបាលរងតំណាងលោកអភិបាលស្រុកក្រគរ បានដឹកនាំក្រុមការងារ ចុះជួបសំណេះសំណាលជាមួយបងប្អូនអាជីវករ និងពិនិត្យមើលការងារបរិស្ថាន អនាម័យ សណ្តាប់ធ្នាប់ក្នុង និងបរិវេណជុំវិញផ្សារសាមគ្គីក្រគរ។

លោក ផាយ ឡេង អភិបាល នៃគណៈអភិបាលក្រុងពោធិ៍សាត់ បានដឹកនាំមន្ត្រីពាក់ព័ន្ធ ចុះពិនិត្យស្ថានភាពផ្លូវគ្រួសក្រហមចូលច្បារ ការដាំដុះដំណាំកសិកម្មរបស់ប្រជាពលរដ្ឋ និងអគារបុរាណដែលសល់ពីសម័យបារាំង ស្ថិតនៅភូមិដប់បាត សង្កាត់លលកស ក្រុងពោធិ៍សាត់។

ពោធិ៍សាត់៖ ពិធីបិទបវេសនកាល និងប្រគល់រង្វាន់ជូនសិស្សជ័យលាភី សម្រាប់ឆ្នាំសិក្សា ២០២៤-២០២៥ ត្រូវបានរៀបចំឡើងយ៉ាងមហោឡារិកនៅវិទ្យាល័យពោធិ៍សាត់ ក្រោមអធិបតីភាព លោក ផាយ ឡេង អភិបាលក្រុងពោធិ៍សាត់ ដោយមានការចូលរួមពីថ្នាក់ដឹកនាំរដ្ឋបាលក្រុង លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។ ក្នុងឱកាសនោះ លោកអភិបាលក្រុង បានថ្លែងអំណរគុណ និងវាយតម្លៃខ្ពស់ចំពោះលោកគ្រូ អ្នកគ្រូ ដែលបានខិតខំបណ្ដុះបណ្ដាលសិស្សានុសិស្ស ប្រកបដោយស្មារតីទទួលខុសត្រូវខ្ពស់។ ជាមួយគ្នានេះ លោកបានអបអរសាទរ និងប្រគល់រង្វាន់លើកទឹកចិត្តជូនដល់សិស្សជ័យលាភីទាំងអស់ ព្រមទាំងបានផ្តាំផ្ញើឱ្យសិស្សានុសិស្សបន្តខិតខំរៀនសូត្រ ស្រាវជ្រាវបន្ថែម និងត្រូវចៀសវាងឱ្យឆ្ងាយពីគ្រឿងញៀន និងអំពើអបាយមុខផ្សេងៗ ដើម្បីក្លាយជាទំពាំងស្នងឫស្សី និងជាសសរទ្រូងដ៏រឹងមាំសម្រាប់ប្រទេសជាតិ៕

រដ្ឋបាលស្រុកកណ្តៀង បានសហការជាមួយប្រជាពលរដ្ឋ សិស្សានុសិស្ស និងអាជ្ញាធរពាក់ព័ន្ធ ជាប្រចាំក្នុងការដាំកូនឈើ និងសម្អាតបរិស្ថាន ដើម្បីបង្កើនគម្របបៃតង សោភ័ណភាព កាត់បន្ថយការបំពុល និងប្រយុទ្ធប្រឆាំងការប្រែប្រួលអាកាសធាតុ។ រដ្ឋបាលស្រុកក៏បានអំពាវនាវដល់គ្រប់ភាគីពាក់ព័ន្ធបន្តចូលរួមថែរក្សាដើមឈើ និងទុកដាក់សំណល់រឹងឱ្យបានត្រឹមត្រូវ ដើម្បីបរិស្ថានស្អាត និង ចីរភាពសហគមន៍។

ពោធិ៍សាត់៖ លោក បិន វណ្ណា សមាជិកក្រុមប្រឹក្សាស្រុកក្រគរ បានអញ្ជើញចុះពិនិត្យមើលដំណើរការស្ថាបនាផ្លូវកៅស៊ូនៅក្នុងឃុំអន្លង់ត្នោត ស្រុកក្រគរ ខេត្តពោធិ៍សាត់ នាថ្ងៃទី៦ ខែសីហា ឆ្នាំ២០២៦។ ក្នុងសកម្មភាពចុះពិនិត្យនេះ ផ្លូវមួយចំនួនបានបញ្ចប់ការចាក់កៅស៊ូជាន់ទី២ រួចរាល់ហើយ ខណៈផ្នែកខ្លះទៀតកំពុងបន្តបាញ់កៅស៊ូជាន់ទី១។ លើសពីនេះ រដ្ឋបាលមូលដ្ឋានក៏កំពុងរៀបចំ បំពាក់អំពូលសូឡាបំភ្លឺផ្លូវ ដើម្បីបង្កើនសោភ័ណភាព និងសុវត្ថិភាពក្នុងការធ្វើដំណើរបន្ថែមទៀត។ ចំណុចដែលគួរឱ្យកត់សម្គាល់ និងទទួលបានការសរសើរខ្លាំងនោះគឺ បរិស្ថានតាមដងផ្លូវមានភាពស្អាតបាត និងគ្មានសំរាមទាល់តែសោះ ដែលស្តែងចេញពីកិច្ចសហការល្អរវាងអាជ្ញាធរ និងការចូលរួមថែរក្សាអនាម័យពីសំណាក់ប្រជាពលរដ្ឋក្នុងមូលដ្ឋាន៕

អភិបាលស្រុកកណ្តៀង និងលោក សុខ លីមុត ប្រធានក្រុមប្រឹក្សាស្រុក បានដឹកនាំក្រុមការងារចុះប្រគល់-ទទួលទំនប់ស្ទាក់ទឹកខ្នាតមធ្យមព្រែកក្បាលរមាស និងពិនិត្យការស្តារប្រឡាយព្រមទាំងសំណង់ធារាសាស្ត្រនៅឃុំអន្លង់វិល និងភូមិព្រែកឈើត្រាវ ដើម្បីលើកកម្ពស់វិស័យកសិកម្ម និងជីវភាពប្រជាពលរដ្ឋ។

អភិបាលស្រុកវាលវែង បានដឹកនាំមន្ត្រីរាជការចូលរួមប្រជុំ និងចុះសិក្សាទីតាំងសាងសង់ មជ្ឈមណ្ឌលបច្ចេកវិទ្យាសហគមន៍ ក្រោមវត្តមានឯកឧត្តម ប៊ិន សក្ដា អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងលោក អ៊ុយ សុធាវី អភិបាលរងខេត្តពោធិ៍សាត់។

ស្នងការដ្ឋាននគរបាលខេត្តពោធិ៍សាត់ បាននាំយកថវិកាសមាគមមិត្តនគរបាលជាតិកម្ពុជាសរុប ១២លានរៀល ទៅប្រគល់ជូនគ្រួសារសពមន្ត្រីនគរបាលនិវត្តជនចំនួន ២គ្រួសារ (ក្នុងមួយគ្រួសារទទួលបាន ៦លានរៀល) ដើម្បីចូលរួមរំលែកទុក្ខ និងជួយសម្រាលបន្ទុកគ្រួសារ។

ក្រុមប្រឹក្សាស្រុកភ្នំក្រវាញបានបើក កិច្ចប្រជុំសាមញ្ញលើកទី២៧ អាណត្តិទី៤ ក្រោមអធិបតីភាព លោក សោម វិសាល ប្រធានក្រុមប្រឹក្សាស្រុក។ កិច្ចប្រជុំនេះផ្ដោតលើការពិនិត្យ និងអនុម័តរបៀបវារៈប្រចាំខែ ការតាមដានវឌ្ឍនភាពនៃការអភិវឌ្ឍស្រុក និងការផ្តល់សេវាសាធារណៈ ព្រមទាំងការដោះស្រាយបញ្ហាប្រឈមនានា ដើម្បីធានាការគ្រប់គ្រងរដ្ឋបាលមូលដ្ឋានឱ្យមានប្រសិទ្ធភាព តម្លាភាព និងដំណើរការដោយរលូន។

ពោធិ៍សាត់៖ លោក អ៊ន សុផល្លា អភិបាល នៃគណៈអភិបាលស្រុកក្រគរ បានអញ្ជើញជាអធិបតីភាពដឹកនាំកិច្ចប្រជុំអាណត្តិ ប្រចាំខែកក្កដា និងការផ្សព្វផ្សាយព្រះរាជក្រឹត្យស្តីពីលក្ខន្តិកៈនៃអង្គគ្រូបង្រៀន នាព្រឹកថ្ងៃទី៣ ខែសីហា ឆ្នាំ២០២៦។ កិច្ចប្រជុំនេះបានប្រព្រឹត្តទៅនៅសាលប្រជុំការិយាល័យអប់រំ យុវជន និងកីឡាស្រុកក្រគរ ដោយមានការអញ្ជើញចូលរួមពីថ្នាក់ដឹកនាំ និងមន្ត្រីពាក់ព័ន្ធជាច្រើនរូប ក្នុងគោលបំណងបូកសរុបលទ្ធផលការងារប្រចាំខែ ក៏ដូចជាបង្កើនការយល់ដឹងអំពីក្របខ័ណ្ឌច្បាប់ និងលក្ខន្តិកៈដល់អង្គគ្រូបង្រៀនក្នុងស្រុកទាំងមូល៕