ពោធិ៍សាត់៖ លោកស្រី ជ័យ ចន្នី អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ រួមជាមួយក្រុមការងារគម្រោង CASDP (ដឹកនាំដោយ លោក អ៊ុក សុធា ប្រធានការិយាល័យផែនការ-គណនេយ្យ) បានអញ្ជើញចូលរួមក្នុងពិធីបើកកញ្ចប់ដេញថ្លៃផ្គត់ផ្គង់ និងដំឡើងប្រព័ន្ធស្រោចស្រព ជូនដល់សហគមន៍កសិកម្មទំនើបម្ទេសដំណាក់ទ្រយឹង ស្ថិតក្នុងភូមិប៊ុនរ៉ានី សែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នៅព្រឹកថ្ងៃទី១៣ ខែសីហា ឆ្នាំ២០២៦។ សម្ភារ និងសេវាកម្មក្នុងកញ្ចប់ដេញថ្លៃរួមមាន៖ ទុយោមេ សម្រាប់ឆ្លើយតបលើផ្ទៃដី ២៥ ហិកតា, ប្រព័ន្ធស្រោចស្រព ចំនួន ២៥ ឈុត, សេវាដំឡើង និងឧបករណ៍ប្រព័ន្ធស្រោចស្រព (ទុយោដំណក់ទឹក និងវ៉ានបិទ-បើកទឹក) ចំនួន ២០ ឈុត។ ក្នុងដំណើរការដេញថ្លៃនេះ មានក្រុមហ៊ុនចំនួន ៤ បានដាក់សំណើប្រកួតប្រជែង ដោយមានការចូលរួមយ៉ាងសកម្មពីសំណាក់តំណាងក្រុមហ៊ុន និងសមាជិកគណៈកម្មការលទ្ធកម្មសហគមន៍សរុបចំនួន ១២ នាក់ (ស្រី ៤ នាក់) ប្រកបដោយភាពតម្លាភាព និងទទួលបានលទ្ធផលជាវិជ្ជមាន៕

ពោធិ៍សាត់៖ លោក ហ៊ន់ សុវណ្ណ អនុប្រធានមន្ទីរកសិកម្ម រុក្ខាប្រមាញ់ និងនេសាទ និងលោក មាស សេត ប្រធានការិយាល័យក្សេត្រសាស្ត្រ បានអញ្ជើញចុះជួបជុំ និងផ្សព្វផ្សាយដល់កសិករក្នុងសហគមន៍កសិកម្មផ្ទះរុងរុងរឿង ស្ថិតក្នុងឃុំផ្ទះរុង ស្រុកតាលោសែនជ័យ ខេត្តពោធិ៍សាត់ នៅថ្ងៃទី១៣ ខែសីហា ឆ្នាំ២០២៦ ។ ក្នុងជំនួបនោះ ក្រុមការងារបានធ្វើការផ្សព្វផ្សាយយ៉ាងលម្អិតអំពី «នីតិវិធីនៃការរៀបចំសំណើថវិកាសម្រាប់សហគមន៍ ពេលចាប់ផ្តើមសរសេរគម្រោង» ដែលជាកញ្ចប់ថវិកាជំនួយឥតសំណងរបស់អង្គការ FAO អនុវត្តដោយអគ្គនាយកដ្ឋានក្សេត្រសាស្ត្រ (ក្រសួងកសិកម្ម) សហការជាមួយអគ្គនាយកដ្ឋានមូលដ្ឋាន (ក្រសួងបរិស្ថាន)។ ទន្ទឹមនឹងនេះ ក្រុមការងារក៏បានពិភាក្សា និងពិគ្រោះយោបល់លើការងារសំខាន់ៗមួយចំនួនទៀត រួមមាន៖ ការជ្រើសរើសទីតាំងសាលារៀនចំការបង្ហាញ និងការចុះឈ្មោះសមាជិកសហគមន៍ដែលស្ម័គ្រចិត្តចូលរួមវគ្គសិក្សាស្ដីពីផលិតកម្មបន្លែ។ សូមបញ្ជាក់ផងដែរថា សកម្មភាពខាងលើនេះមានប្រជាកសិករចូលរួមសរុបចំនួន ៣០ នាក់ (ស្រី ២១ នាក់) ដោយបរិយាកាសកក់ក្តៅ និងទទួលបានលទ្ធផលយ៉ាងល្អប្រសើរ៕

ឃុំព្រងិល៖ នៅថ្ងៃទី១៣ ខែសីហា ឆ្នាំ២០២៦ សង្កាត់រដ្ឋបាលព្រៃឈើព្រងិល បានសហការជាមួយក្រុមប្រឹក្សាឃុំព្រងិល លោកមេភូមិអូរស្រាវ និងគណៈកម្មការសហគមន៍ព្រៃឈើអូរស្រាវ ចុះអនុវត្តការងារកាយប្រឡាយ ដើម្បីរៀបចំធ្វើព្រំប្រទល់ដីព្រៃសហគមន៍អូរស្រាវឱ្យបានច្បាស់លាស់។ ជាលទ្ធផល ក្រុមការងារដែលមានសមាសភាពចូលរួមសរុប ៩ នាក់ (ស្រី ៣ នាក់) បានសម្រេចការកាយប្រឡាយព្រំប្រទល់បានប្រវែងសរុប ៣៥០ ម៉ែត្រ ដោយមានទំហំបច្ចេកទេស បណ្តោយ ៣៥០ម៉ែត្រ ទទឹងលើ ៣ម៉ែត្រ បាតក្រោម ២ម៉ែត្រ និងជម្រៅ ១ម៉ែត្រ។ គួរបញ្ជាក់ផងដែរថា សកម្មភាពកាយប្រឡាយព្រំប្រទល់ព្រៃសហគមន៍នាពេលនេះ ទទួលបានការឧបត្ថម្ភគាំទ្រផ្នែកថវិកាពី អង្គការអភិវឌ្ឍន៍នារីខ្មែរ (អានកូ) ចំនួន ៣០០ ម៉ែត្រ និងជាប្រាក់បដិភាគផ្ទាល់ពីសំណាក់ សមាជិកសហគមន៍ព្រៃឈើភូមិអូរស្រាវ ចំនួន ៥០ ម៉ែត្រ ផងដែរ៕

ពោធិ៍សាត់៖ លោកស្រី ដឹប ម៉ារីណា មន្ត្រីនៃការិយាល័យក្សេត្រសាស្ត្រ នៃមន្ទីរកសិកម្ម រុក្ខាប្រម៉ាញ់ និងនេសាទ បានសហការជាមួយកម្មវិធី ASPIRE-AT បើកវគ្គបណ្តុះបណ្តាលស្តីពី «ការអនុវត្តកសិកម្មល្អ (Good Agricultural Practices - GAP)» ជូនដល់បងប្អូនកសិករនៅក្នុងសហគមន៍កសិកម្មបាក់ចិញ្ចៀនមានជ័យ កាលពីថ្ងៃទី១២ ខែសីហា ឆ្នាំ២០២៦។ វគ្គបណ្តុះបណ្តាលនេះ មានកសិករចូលរួមសរុបចំនួន ២៨ នាក់ (ក្នុងនោះមានស្រ្តីចំនួន ២០ នាក់) ដោយបានផ្តោតសំខាន់លើការបង្រៀនបច្ចេកទេសដាំដុះតាមបទដ្ឋានសុវត្ថិភាព ការថែទាំដំណាំ និងការកាត់បន្ថយការប្រើប្រាស់សារធាតុគីមី ដើម្បីបង្កើនគុណភាពផលដំណាំ កែលម្អជីវភាពគ្រួសារ និងធានាសុវត្ថិភាពដល់អ្នកបរិភោគ៕

ពោធិ៍សាត់៖ លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ បានដឹកនាំក្រុមការងារបច្ចេកទេស ចុះពិនិត្យទីតាំងផ្ទាល់សម្រាប់រៀបចំប្រារព្ធពិធីបុណ្យ «រុក្ខទិវា» ដែលប្រព្រឹត្តទៅនាថ្ងៃទី១២ ខែសីហា ឆ្នាំ២០២៦ ខាងមុខនេះ។ ក្នុងបេសកកម្មនេះ លោកប្រធានមន្ទីរ និងក្រុមការងារ ក៏បានពិនិត្យមើលស្ថានភាពផ្លូវចូលទៅកាន់ទីតាំងប្រារព្ធពិធី ដែលបានរងការខូចខាតមួយចំនួនដោយសារទឹកភ្លៀង ស្ថិតក្នុងភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់ ដើម្បីចាត់វិធានការសម្រួល និងរៀបចំអនាម័យ-បរិស្ថានឱ្យមានភាពរលូន និងស្រស់ស្អាត មុនថ្ងៃប្រារព្ធពិធីផ្លូវការមកដល់៕

ពោធិ៍សាត់៖ ឯកឧត្តម សុទ្ធ គឹមកុលមុន្នី អគ្គលេខាធិការរង គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំប្រតិភូចុះពិនិត្យ និងវាយតម្លៃផ្ទាល់លើដំណាំស្រូវ ដែលកំពុងរងផលប៉ះពាល់ដោយសារគ្រោះរាំងស្ងួត ស្ថិតក្នុងឃុំអូរតាប៉ោង និងឃុំមេទឹក ស្រុកបាកាន ខេត្តពោធិ៍សាត់ នាថ្ងៃទី១០ ខែសីហា ឆ្នាំ២០២៦។ បេសកកម្មនេះមានការចូលរួមពី តំណាងនាយកដ្ឋានអភិវឌ្ឍន៍ដំណាំស្រូវ មន្ទីរកសិកម្ម រុក្ខាប្រមាញ់ និងនេសាទខេត្ត អាជ្ញាធរស្រុក-ឃុំ មន្ត្រីកសិកម្ម និងប្រជាកសិករក្នុងមូលដ្ឋាន ដើម្បីពិនិត្យលទ្ធភាពសង្គ្រោះ និងស្តារឡើងវិញ។ ផ្អែកតាមការចុះពិនិត្យជាក់ស្តែង ដំណាំស្រូវមួយចំនួនកំពុងស្ថិតក្នុងវគ្គបង្កបង្កើនផល មានការលូតលាស់យឺត និងត្រូវការទឹកជាចាំបាច់ ដែលអាចប្រឈមនឹងការថយចុះទិន្នផល ប្រសិនបើគ្មានប្រភពទឹកជួយសង្គ្រោះទាន់ពេលវេលា។ ចំពោះមុខស្ថានភាពនេះ អាជ្ញាធរដែនដី និងមន្ត្រីជំនាញកំពុងខិតខំស្វះស្វែងបូម និងនាំទឹកចេញពីស្ទឹង អូរ និងប្រឡាយមេ ដើម្បីចែករំលែកស្រោចស្រពសង្គ្រោះស្រែប្រជាកសិករជាបន្តបន្ទាប់៕