ពោធិ៍សាត់៖ សមាជិក និងសមាជិកាក្រុមប្រឹក្សាខេត្តពោធិ៍សាត់ ចំនួន ២រូប បានអញ្ជើញចូលរួមកិច្ចប្រជុំសាមញ្ញលើកទី២៧ ឆ្នាំទី៣ អាណត្តិទី៤ របស់ក្រុមប្រឹក្សាស្រុកកណ្ដៀង នាព្រឹកថ្ងៃទី៧ ខែសីហា ឆ្នាំ២០២៦។ កិច្ចប្រជុំនេះ រៀបចំឡើងក្នុងគោលបំណងតាមដាន និងពិនិត្យមើលសកម្មភាពការងារ ព្រមទាំងជំរុញការអនុវត្តកិច្ចការអភិវឌ្ឍន៍ និងការផ្តល់សេវាសាធារណៈជូនប្រជាពលរដ្ឋក្នុងស្រុកកណ្ដៀង ឱ្យកាន់តែមានប្រសិទ្ធភាព និងឆ្លើយតបបានទាន់ពេលវេលា៕

ពោធិ៍សាត់៖ ឯកឧត្តមសន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញនាំយកបច្ច័យ និងទេយ្យទាន ដើម្បីចូលរួមរំលែកទុក្ខយ៉ាងក្រៀមក្រំជាទីបំផុត ជាមួយក្រុមគ្រួសារសពលោកនាយប៉ុស្តិ៍ មន្ត្រីនគរបាលរដ្ឋបាលឃុំអូរសោម និងប្រជាការពារឃុំចំនួន ៥នាក់ ដែលបានពលីជីវិតក្នុងកិច្ចប្រតិបត្តិការបង្ក្រាប និងទប់ស្កាត់អំពើហិង្សាក្នុងគ្រួសារពាក់ព័ន្ធករណីប្រើប្រាស់គ្រឿងញៀន នៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ នៅថ្ងៃទី៧ ខែសីហា ឆ្នាំ២០២៦។ ពិធីនេះក៏មានការអញ្ជើញចូលរួមពី ឯកឧត្តម ញឹក បានខេង អភិបាលរងនៃគណៈអភិបាលខេត្តពោធិ៍សាត់ (តំណាង ឯកឧត្តម ខូយ រីដា អភិបាលខេត្ត) ឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ ព្រមទាំងប្រតិភូអមដំណើរជាច្រើនរូបទៀត៕

មន្ត្រីជំនាញការិយាល័យផលិតកម្ម និងបសុព្យាបាល ការិយាល័យនីតិកម្មកសិកម្ម ព្រមទាំងមន្ត្រីច្រកចេញចូលតែមួយនៃរដ្ឋបាលខេត្ត បានអញ្ជើញចូលរួមកិច្ចប្រជុំពិនិត្យវឌ្ឍនភាពការងារកំណែទម្រង់វិមជ្ឈការ និងវិសហមជ្ឈការ របស់ក្រសួងកសិកម្ម រុក្ខាប្រមាញ់ និងនេសាទ ប្រចាំឆមាសទី១ នៅថ្ងៃទី៧ ខែសីហា ឆ្នាំ២០២៦។ កិច្ចប្រជុំនេះបានប្រព្រឹត្តទៅតាមប្រព័ន្ធអនឡាញ (Zoom) នៅសាលប្រជុំថ្មកែវ នៃអគាររដ្ឋបាលខេត្តពោធិ៍សាត់ ក្រោមការដឹកនាំរបស់ លោក ហៀម ឃួន អភិបាលរង នៃគណៈអភិបាលខេត្តពោធិ៍សាត់៕

ឯកឧត្តម ខូយ រីដា អភិបាលខេត្តពោធិ៍សាត់ សូមថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តម ជិត ប៉ុណ្ណារ៉ា និងលោកជំទាវ យូ ស្រីលាភ ដែលបានឧបត្ថម្ភថវិកាចំនួន ២៥.០០០.០០០រៀល (ក្នុង១សពចំនួន ៥.០០០.០០០រៀល) ជូនដល់គ្រួសារសពនាយប៉ុស្តិ៍ មន្ត្រីនគរបាល និងប្រជាការពារ ចំនួន ៥សព ដែលបានបាត់បង់ជីវិតពេលបំពេញភារកិច្ច។

វគ្គ «តស់! ចាប់យកឌីជីថល» ត្រូវបានរៀបចំនៅសណ្ឋាគារ ច័ន្ទមុណ្ណី មុណ្ណីច័ន្ទ ខេត្តពោធិ៍សាត់ ក្រោមអធិបតីភាពលោក គួង វុត្ថា និងលោក ងួន ប៉ោសេង ដោយមានការចូលរួមពីអាជ្ញាធរ ម្ចាស់សហគ្រាស អាជីវករ និងសហគមន៍មូលដ្ឋាន។

លោក ពៅ ពិសិដ្ឋ អភិបាលរងខេត្តពោធិ៍សាត់ បានដឹកនាំកិច្ចប្រជុំត្រួតពិនិត្យវឌ្ឍនភាពការងារកំណែទម្រង់វិមជ្ឈការ និងវិសហមជ្ឈការ ឆ្នាំ២០២៦ ដោយមានការចូលរួមពីថ្នាក់ដឹកនាំ មន្ទីរ អង្គភាពពាក់ព័ន្ធ និងរដ្ឋបាលក្រុង-ស្រុកទាំង៧។