ឯកឧត្តមសន្តិបណ្ឌិត ម៉ៅ ច័ន្ទតារា នាំយកបច្ច័យ និងទេយ្យទាន ចូលរួមរំលែកទុក្ខជាមួយគ្រួសារសពនគរបាល និងប្រជាការពារឃុំអូរសោម ដែលបានពលីក្នុងបេសកកម្ម
ពោធិ៍សាត់៖ ឯកឧត្តមសន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញនាំយកបច្ច័យ និងទេយ្យទាន ដើម្បីចូលរួមរំលែកទុក្ខយ៉ាងក្រៀមក្រំជាទីបំផុត ជាមួយក្រុមគ្រួសារសពលោកនាយប៉ុស្តិ៍ មន្ត្រីនគរបាលរដ្ឋបាលឃុំអូរសោម និងប្រជាការពារឃុំចំនួន ៥នាក់ ដែលបានពលីជីវិតក្នុងកិច្ចប្រតិបត្តិការបង្ក្រាប និងទប់ស្កាត់អំពើហិង្សាក្នុងគ្រួសារពាក់ព័ន្ធករណីប្រើប្រាស់គ្រឿងញៀន នៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ នៅថ្ងៃទី៧ ខែសីហា ឆ្នាំ២០២៦។ ពិធីនេះក៏មានការអញ្ជើញចូលរួមពី ឯកឧត្តម ញឹក បានខេង អភិបាលរងនៃគណៈអភិបាលខេត្តពោធិ៍សាត់ (តំណាង ឯកឧត្តម ខូយ រីដា អភិបាលខេត្ត) ឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ ព្រមទាំងប្រតិភូអមដំណើរជាច្រើនរូបទៀត៕
